གསར་འགོད་པས་དྲི་བ།
ཁྱོད་ཀྱིས་སྒྲུང་གཏམ་གསར་རྩོམ་གྱི་བླ་ན་མེད་པའི་དམིགས་ཚད་དེ་ཅི་ལྟ་བུ་ཞིག་ལ་བརྩི་གིན་ཡོད།
ཚེ་རིང་དོན་གྲུབ་ཀྱི་དྲི་ལན།
    བདག་གིས་ནི་རྣམ་པ་ཀུན་ཏུ་སྒྲུང་གཏམ་གསར་རྩོམ་གྱི་ལག་ཐབས་དེ་ཆེས་མཐོའི་རྨང་གཞི་ཞིག་ལ་སྦྱོང་བ་བྱེད་ཀྱིན་ཡོད་ལ། ཁྱད་དུ་འཕགས་པའི་སྒྲུང་གཏམ་ཟེར་བ་ནི་ཅེ་ཁེའི་བརྩམས་སྒྲུང་བ་ཆེན་མོ་མུས་ལན་ཁོན་ཏི་ལིས་གསུང་བ་ལྟར་མིའི་རིགས་འཚོ་བཞུགས་ཀྱི་སྙིང་བོ་ཅི་ཞིག་ཡིན་པ་དང༌། བསམ་དོན་ངོ་མ་ཅི་ཞིག་ཡིན་པའི་དྲི་གཞི་ལ་ལན་བདོན་བཞིན་ གསང་བའི་གནས་སུ་བག་ལ་ཉལ་བའི་མིའི་རིགས་ཀྱི་བྱ་དོན་ངོ་མ་ཞིག་ལྷང་ལ་འབུད་ཐུབ་པ་བྱ་རྒྱུ་སྟེ། ཐ་ན་གློག་བརྙན་དུ་བསྒྱུར་ཐབས་མེད་པའི་རྩོམ་འབྲིའི་ནུས་པ་ཁེར་རྐྱང་བ་ཞིག་ལ་གོ་ཆོག 
གསར་འགོད་པ།
ཁྱེད་རང་གིས་སྒྲུང་གཏམ་གསར་རྩོམ་བྱེད་དུས་སུ་ཆེས་གལ་ཆེ་བའི་དཀའ་གནད་དེ་གང་འདྲ་ཞིག་ལ་ངོས་འཛིན་གྱིན་ཡོད།
དྲི་ལན།
    ཅུང་གཞོན་དུས་སུ་བརྗོད་བྱེད་དེ་ཡིག་རྩལ་དང་སྒྱུ་རྩལ་གྱི་མཉམ་བཟོ་འདོན་སྟངས་སོགས་ལ་གོམས་པས་སྒྲུང་གཏམ་འདྲི་རྒྱུ་དེ་ཅུང་སླ་བོར་འདུག་སྙམ་ནའང༌། ད་ལྟ་བསམ་བློ་དེ་རྦད་དེ་འགྱུར་བཞིན་སྒྲུང་གཏམ་གསར་རྩོམ་སྐོར་ལ་ཆེས་འཛོམས་དཀའ་བའི་དཀའ་ངལ་དེ་རང་ཉིད་གནས་པའི་འཚོ་བ་གོར་ཐིག་མ་དེ་རེད་ལ། ཐ་ན་ང་ཚོ་བོད་པ་ཞིག་ལ་མཚོན་ན་རང་ཉིད་བོད་ཡིན་པའི་ཡུལ་སྲོལ་དང་མཛེས་དཔྱོད་འཛུགས་སྟངས་དེ་མོག་མོག་ཅིག་ཏུ་གྱུར་ཡོད་པ་དེ་རེད།
དྲི་བ།
《རླུང་དམར་འུར་འུར》སྐོར་ལ་སྐད་ཆ་རེ་བཤད་ན། 
དྲི་ལན།
    རྟོག་བཟོའི་སྒྱུ་རྩལ་གྱི་ཉམས་བཏོན་ས་མང་ནའང་གཙོ་ཆེར་རྩད་འདྲིའི་མྱོང་བ་སོང་བ་ཞིག་ཡིན་པས། སྒྲུང་གཏམ་སྔོན་མ་གཉིས་ལས་ལོ་རྒྱུས་ཀྱི་དོན་སྙིང་ཅུང་ཡོད་བསམ་ཡོད། 
དྲི་བ།
《རླུང་དམར་འུར་འུར》གྱི་དགེ་བ་དེ་གང་ཞིག་ནས་མཚོན་གྱིན་ཡོད།
དྲི་ལན།
    དགེ་བ་མཐའ་དག་ཀློག་པ་པོར་གསལ་གྱི་བདག་ལ་བརྗོད་དུ་མེད་ནའང་སྒྲུང་གཏམ་འདིའི་ཁྲོད་དུ་རང་ཉིད་ལ་ངེས་ཤེས་འདྲོང་བའི་ཡིད་ཆེས་ཤིག་ཡོད་པ་ནི་སྦྱངས་པར་གོམས་པའི་ སྨྱུག་རྩལ་བཟང་བོ་ཞིག་ཆགས་ཡོད་པ་དེ་ཡིན་ལ། འབྲི་བའི་དུས་ཚོད་ཅུང་མང་པོ་བཀོལ་བའི་སྒྲུང་རིང་ཞིག་ཡིན་ཞེས་བསྙད་པས་ཀྱང་འཐུས།
                                   གསར་འགོད་པ།
                                   ཁྱེད་ལ་བཀའ་དྲིན་ཆེ་ཞུ།