མཚོ་སྔོན་ཞིང་ཆེན་གྱིས“གཙང་གསུམ་འབྱུང་ཡུལ”ས་ཁུལ་གྱི་སློབ་གསོའི་འགྲོ་གྲོན་ཁ་གསབ་སྲིད་ཇུས་ལག་བསྟར་བྱས་པ་ནས་བཟུང་། འབྲིང་རིམ་ལས་རིགས་སློབ་གྲྭའི་སློབ་མ17143ལྷག་གི་སློབ་ཡོན་དང་། སྡོད་གླ། དཔེ་རིན་སོགས་མི་ལེན་པའི་འཚོ་བའི་འགྲོ་གྲོན་རོགས་སྐྱོར་སྲིད་ཇུས་ལག་བསྟར་བྱས་པ་རེད།
　　2011ལོའི་ལོ་སྨད་དུ་སློབ་འགོ་ཚུགས་པ་ནས་བཟུང་མཚོ་སྔོན་ནོར་སྲིད་ཐིན་གྱིས་སྒོར་ཁྲི9643ལྷག་བཏང་ནས་མཚོ་སྔོན་དུ་སློབ་གྲྭ་འགྲིམ་བཞིན་པའི་སློབ་མར་ལོ་རེར་སྒོར4200ཡི་རོགས་སྐྱོར་གནང་། དེའི་ཁྲོད་སྤྱི་སྤྱོད་འགྲོ་གྲོན་རོགས་དངུལ་སྒོར2700དང་འཚོ་བའི་རོགས་དངུལ་སྒོར1500ཡོད་པ་རེད། ཡུལ་གཞན་དུ་སློབ་གྲྭ་འགྲིམ་བཞིན་པའི་སློབ་མར་ལོ་རེར་སྒོར6500གནང་། དེའི་ཁྲོད་སྤྱི་སྤྱོད་འགྲོ་གྲོན་རོགས་དངུལ་སྒོར3300དང་འཚོ་བའི་རོགས་དངུལ་སྒོར3200ཡོད་པ་རེད།
　　མཚོ་སྔོན་ཞིང་ཆེན་སློབ་གསོ་ཐིན་གྱི་འབྲེལ་ཡོད་འགོ་ཁྲིད་ཀྱིས་བཤད་རྒྱུར། བོད་རིགས་འདུས་སྡོད་ཁུལ་གྱི་འབྲིང་རིམ་ལས་རིགས་སློབ་གསོར་འགྲོ་གྲོན་ཁ་གསབ་ཀྱི་སྲིད་ཇུས་ལག་བསྟར་བྱེད་པ་ནི་མཚོ་སྔོན་ཞིང་ཆེན་ཏང་ཨུ་དང་། ཞིང་ཆེན་སྲིད་གཞུང་གིས་མཚོ་སྔོན་བོད་ཁུལ་གྱི་དཔལ་འབྱོར་འཛུགས་སྐྲུན་དང་། དམངས་འཚོ་བཅོས་བསྒྱུར། དབུལ་སེལ་བཅས་ཀྱི་བྱེད་ཐབས་ཤིག་ཡིན་ཞིང་། དེང་ཕྱི་གཉིས་ཀར་དགེ་བའི་དམངས་ཕན་ལས་གཞི་ཞིག་ཀྱང་ཡིན་པ་རེད་ཅེས་བརྗོད། སྲིད་ཇུས་འདིས་བོད་རིགས་ས་ཁུལ་གྱི་རོང་འབྲོག་མང་ཚོགས་ཀྱི་དཔལ་འབྱོར་གྱི་ཁུར་བོ་ཇེ་ཡང་དུ་བཏང་བར་མ་ཟད། རོང་འབྲོག་མང་ཚོགས་ཀྱི་སློབ་བུ་རྣམས་འབྲིང་རིམ་ལས་རིགས་སློབ་གྲྭ་འགྲིམ་པར་སྐུལ་འདེད་ཆེན་པོ་བྱས་པ་རེད།