སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སེང་རྡོར་གྱི་བརྩམས་སྒྲུང་དང་ལྷུག་རྩོམ་གྱི་དེབ《ང་དང་ངའི་སྙིང་སྡུག་འཇིགས་མེད་ནོར་བུ》ཞེས་པ་པར་བསྐྲུན།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2018-5-9 11:31:00 རྩོམ་ཁུངས། མཆོད་མེ་བོད་ཀྱི་རྩོམ་རིག་དྲ་བ། ཀློག་གྲངས།


ཇུས་འགོད་སྤུས་གཙང་བྱས་པའི་དེབ《ང་དང་ངའི་སྙིང་སྡུག་འཇིགས་མེད་ནོར་བུའི》ཕྱི་དབྱིབས།

     ཉེ་ལམ། མཚོ་སྔོན་མི་རིགས་དཔེ་སྐྲུན་ཁང་གི་ཐུགས་ཁུར་དང་རྒྱབ་སྐྱོར་འོག་སྐུ་ཞབས་སེང་རྡོར་གྱི་སྒྲུང་ལྷུག་དེབ《ང་དང་ངའི་སྙིང་སྡུག་འཇིགས་མེད་ནོར་བུ》ཞེས་པ་རྒྱལ་ཁབ་ཀྱི་ཚད་ལྡན་དཔེ་རྟགས་ཐོབ་པ་བརྒྱུད་དངོས་སུ་པར་དུ་བསྐྲུན།

     ཁྱད་པར་དུ་འཁྲབ་ཁྲིད་པའམ་རྩོམ་པ་པོ་པད་མ་ཚེ་བརྟན་དང་ན་གཞོན་རྩོམ་པ་པོ་ལྷ་བྱམས་རྒྱལ་གྱིས་དེབ་འདི་མགོ་འཇུག་ཆ་ཚང་བ་བཀླགས་ནས་གཟུ་བོའི་ཚིག་དང་ངོ་སྤྲོད་ཀྱི་གསུང་ཕུལ།

ཞར་བཀོད། ལྷུག་མའི་འགྱུར་ཁུག་གིས་དྲུད་ཡོང་བའི་ངོ་གདོང་གི་ཚོགས།
__སེང་རྡོར་གྱི་བརྩམས་དེབ《ང་དང་ངའི་སྙིང་སྡུག་འཇིགས་མེད་ནོར་བུའི》ཞེས་པར་ཕུལ་བ།
སྐྱབས་ཆེན་བདེ་གྲོལ།

     སེང་རྡོར་གྱི་རྩོམ་ལ་རྒྱུས་མངའ་ཆེ་བའི་ཀློག་མཁན་ཞིག་ལ་མཚོན་ན། ཁོང་གི་སྨྱུག་རྩེ་ན་གཞན་དང་མི་འདྲ་བའི་རྗོད་པ་ངོ་མཚར་ཅན་ཞིག་ཡོད་པ་བརྗེད་མི་སྲིད་ལ། དོན་དུ་དེ་ནི་ཅི་ལྟ་བུ་ཞིག་རེད་ཅེ་ན། ཁོ་བོ་རང་གི་མྱོང་བ་ལྟར་ན་དེ་ཉིད་ཚིག་གཅིག་ཏུ་བསྡུ་ཞིང་བསྡོམ་མི་ནུས་པར་ཁོང་གིས་བྲིས་པ་དག་རེ་རེ་བཞིན་བསྐྱར་དུ་བཀླགས་པས་ཤེས་ནུས་པ་ཞིག་རེད།
     མང་པོ་ཞིག་གིས་སེང་རྡོར་གྱི་རྩོམ་བཀླགས་པའི་ཚོར་བ་བཤད་སྐབས“ཚིག་སྦྱོར་ཕུན་སུམ་ཚོགས་པར་འདུག”ཅེས་སྐད་ཆ་སྟབས་བདེ་ཞིག་གིས་མགོ་ཨེ་ཚོས་བལྟ་ནའང་དོན་དུ་སེང་རྡོར་ལུགས་ཀྱི“ཚིག་སྦྱོར་ཕུན་སུམ་ཚོགས་པ”ནི་ཡི་གེའི་རྩེད་མོ་ཁོ་ནས་གྲུབ་པ་ཞིག་མིན་ཏེ། ཁོང་གི་འབྲོག་སྐད་ཤས་ཆེ་ཞིང་དོན་གྱི་ཁོག་འབུབས་གསལ་ལ། རྗོད་པར་མངའ་བརྙེས་པ་དང་། བརྩེ་སེམས་མངོན་པར་གསལ་ཅིང་སྣང་བརྙན་ཞིབ་མོར་དོད་པའི་རྩོམ་རྣམས་ནི་རྒན་པོ་ཁ་བདེ་རེ་འགས་ཚོགས་གཏམ་བཤད་པ་བཞིན་ཚིག་སྙན་མོ་མང་པོ་ཞིག་བཤད་ནའང་ཡིད་ལ་གཟུང་བར་བྱ་བ་དང་ཚོར་བ་སྒུལ་བར་བྱེད་པའི་ནུས་པ་གང་ཡང་མེད་པ་དེ་འདྲ་མ་ཡིན་པས་སོ།།
     གུས་པོས་ཐེངས་འདིར་ཁྱེད་ཅག་ལ་ངོ་སྤྲོད་བྱ་རྒྱུའི་དེབ་གསར《ང་དང་ངའི་སྙིང་སྡུག་འཇིགས་མེད་ནོར་བུའི》ཞེས་པ་ནི་སེང་རྡོར་གྱི་བརྩམས་དེབ་རྣམས་ལས་ཤིན་ཏུ་དམིགས་བསལ་བ་ཞིག་ཡིན་ཏེ། འདིར་བསྡུས་པའི་རྩོམ་ཐུང་རྣམས་ནི་གཏམ་རྒྱུད་དང་ཚོར་བའི་བར་གྱི་འཆར་སྒོ་སྣ་ཚོགས་ཡངས་པོར་བཀྲལ་བ་ཡིན་ལ། དེ་ལས་མང་པོ་ཞིག་གངས་ཀྱི་རི་བོ་ལྷུན་སྡུག་ཏུ་ཆགས་པའི་གནས་འདིའི་མི་དག་གི་བྱིས་དུས་ཀྱི་དྲན་པ་དང་འབྲེལ་ཡོད་པས་ངེད་ཅག་སུས་བཀླགས་ཀྱང་ང་ཚོ་རང་གི་གཟུགས་བརྙན་མཐོང་ཡོང་བ་དང་། ཡང་ན་ངེད་ཅག་གི་དྲན་པའི་གཏིང་དུ་ཟུག་ཀྱང་བརྗེད་ངེས་ཀྱི་རྐུན་པོས་འཁྱེར་ལ་ཉེ་བའི་མི་དེ་དག་ལ་འབྲེལ་འདུག་པས་དེ་ལས་ངེད་ཚོས་སྙིང་ཉེ་བའམ་དགའ་ཞིང་དུང་བའི་ཚོར་བ་ངོ་མཚར་ཅན་ཞིག་རྙེད་ཐུབ།
     རྩོམ་རིག་བརྩམས་ཆོས་ཀྱི་ནུས་པ་གཅིག་ནི་རྣམ་པར་རྟོག་པའི་དོན་ཇི་སྙེད་ཅིག་ཚིག་གི་སྦྱོར་བར་དྲངས་ནས་མི་རྣམས་ཀྱི་སེམས་པ་མངོན་སུམ་གྱི་འཆིང་བ་ལས་བཀྲོལ་ཏེ་རང་དབང་གི་ཞིང་ཁམས་ཤིག་ཏུ་འཁྲིད་པ་དེ་ཡིན་ལ། དེ་ལས་ཀྱང་ལྷག་པའི་ནུས་པ་གཞན་ཞིག་ནི་སྐྱེ་བོ་མང་པོའི་ཐུན་མོང་གི་དྲན་པ་སླར་སོས་པར་བྱས་ནས“འདས་དོན་དང་རྨི་ལམ་གྱིས་དབུལ་བ་རྣམས”ལ་བསམ་པའི་ཁྲུས་གསོལ་གང་མང་བགྱིད་པ་དེ་ཡིན། གུས་པོས་བསམ་ན་དེབ་འདིར་བསྡུས་པའི་སེང་རྡོར་གྱི་རྩོམ་དག་གི་བྱེད་ནུས་ནི་རིགས་ཕྱི་མར་གཏོགས་པར་སྙམ།
     དེང་གི་བོད་ཀྱི་རྩོམ་སྟེགས་ལ་བལྟས་ན། རྩོམ་མཁན་ཕལ་བོ་ཆེའི་རྩོམ་ནི་ཉིན་འགའི་སྔོན་གྱི་ནུབ་འཚལ་བསྐྱར་དུ་བསྲོས་ཏེ་བསྐོལ་བ་ལྟ་བུ་ཡིན་དོན་ནི། གཅིག་ནས་ཧ་ཅང་ཆེན་པོ་གཞན་གྱི་མ་ཤོད་པ་དེ་འདྲ་བཤད་རྒྱུར་རྔམ་ནས་དུས་དང་གནས་ལ་འཕྲོད་མིན་མི་བལྟ་བར“མི་བོ་ཆེ་དག་གི་ཚིག་མཛོད”ནང་གི་ཐ་སྙད་རྫིག་པོ་རྣམས་ཁྱེར་ཡོང་སྟེ་དེ་ཉིད་རང་གི་ལྟ་བའི་ཁབ་མིག་ཏུ་ཨེ་ཚུད་བལྟས་ནས་གསེར་གྱི་མཛུབ་རྒྱན་ལ་དོ་ལོའི་ཕྲ་འཇོག་པའི་སྦྱོར་བ་བརྩམས་པས་ཡིན་པ་དང་། གཉིས་ནས་སོ་སོ་སྐྱེ་བོ་རང་གི་དྲན་པ་དང་འདས་དོན་ལ་བདག་པོ་རྒྱག་མི་ཐུབ་པར་ཉི་མ་དེ་རིང་ལ་ཅི་ཞིག་རྒྱུགས་ཆེ་བར་བསམ་སྟེ། མི་མང་གི་གནས་སྐབས་ཀྱི་དགའ་ཁ་འཁྱེར་ཕྱོགས་ལ་བསྟུན་མཁས་བྱེད་པ་དེ་རེད། སེང་རྡོར་གྱི་རྩོམ་ལ་ཀུན་གྱིས་དགའ་བོ་བྱེད་པ་དང་ཁོང་གི་རྩོམ་རྣམས་གཞན་དང་མ་འདྲ་བར་གྱུར་དོན་ནི་ཁོང་གིས་གོང་གི་དོན་དེ་གཉིས་ཀར་གཡོལ་ཏེ་རང་ཚུགས་སྲ་མོར་བཟུང་བས་རེད་སྙམ་ལ། ཏག་ཏག་རང་ཚུགས་དེའི་རྒྱབ་རོལ་ན་གཞན་ལ་མེད་པའི་རྣམ་དཔྱོད་ཅིག་དང་སློབ་གསོའི་བརྒྱུད་རིམ་ཞིག་ཡོད་པར་སྙམ།
     དེབ་འདིའི་ནང་དུ《ཁྱོད་ཀྱང་ངའི་རྣམ་རྟོག་གི་རབ་ཁར་ཡང་ཡང་འབོད》ནང་གི“ཤིང་མོ”ལྟ་བུའི་མི་སྣ་དམིགས་བསལ་བ་མང་པོ་ཡོད་ལ་མི་སྣ་དེ་དག་གི་ངོ་གདོང་ནི་སྒྲུང་པ་ཡིན་ལ་ཚིག་གི་སྒྱུ་མ་མཁན་ཡང་ཡིན་པའི་རྩོམ་མཁན་སེང་རྡོར་གྱིས་ལྷུག་མའི་འགྱུར་ཁུག་ལ་བརྟེན་ནས་ཁྱེད་ཀྱི་མདུན་སར་དྲུད་ཡོང་བ་དེ་བསམ་ནས་ཕྲན་གྱིས་གླེང་གཞི་འདིའི་ཁ་བྱང་ཡང་རྙེད་པ་ཡིན། མི་སྣ་དེ་དག་ལས“ཤིང་མོ”སོགས་ནི་སྲིད་པའི་རྩོམ་མཆོག《རྗེན་ཨེར》ནང་གི་རྗེན་ཨེར་དང《ཨན་ནཱ་ཁ་ལེ་ན》ནང་གི་ཨན་ནཱ་བཞིན་སུས་དྲན་ན་སྙིང་རྗེ་འཆོར་བ་འགའ་ཡིན་ལ། ཡང“རྒྱ་ལའོ་ཧྲིན”དང“བླ་རྒན་དར་རྒྱས”སོགས་ཅི་ཡིན་འདི་ཡིན་མེད་པའི་མི་སྣ་འགའ་ཡོད་པ་ནི《མཁར་རྫོང》ནང་གིKདང《གསོད་ར་ཨང་ལྔ་བའི》ནང་གི་བྷི་ལི་བཞིན་མི་ཚེ་འདི་ཁུངས་མེད་ལུང་མེད་ཡིན་པའི་དཔེ་མཚོན་ནི་ཡིན་འདུག
     མི་སྣ་ངོ་མཚར་བ་མང་དག་ཅིག་དེབ་སྲབ་མོ་ཤོག་གྲངས་ཉིས་བརྒྱ་ཡས་མས་ཅན་ཞིག་གི་ནང་དུ་བསྡུས་དུས་འདི་ལ་སྒྲུང་དེབ་བམ་ལྷུག་རྩོམ་དེབ་སོགས་སུ་འབོད་པ་ནི་རྩོམ་ལུས་ཀྱི་གཞུང་ལུགས་ནང་ཐ་སྙད་དཀོན་པས་དེ་འདྲ་མི་བྱེད་ཀ་མེད་དུ་གྱུར་བ་རེད་སྙམ་པས། འདི་ལ་སྒྲུང་རིང་མང་པོ་ཞིག་གི་དཀར་ཆག་གམ་ལྡེ་མིག་ཏུ་བཏགས་ཀྱང་མི་རུང་བ་ག་ལ་འདུག་སྟེ། རྗེས་མར་སེང་རྡོར་ལགས་ཀྱིས《ཤིང་མོ》ཟེར་བའི་སྒྲུང་རིང་བྱུང་རིམ་ལ་ཀྱག་ཀྱོག་ཆེ་བ་དང་། སྤྲོས་བརྗོད་ཀྱི་རྩལ་གྱིས་ཕྱུག་པ་དེ་འདྲ་ཞིག་ངེད་ཅག་གི་ཀློག་སྐལ་དུ་བསྩལ་ཚེ་ངས་ཀྱང་ཡང་བསྐྱར་གླེང་གཞི་རིང་ཐག་ཆོད་པ་ཞིག་འཁྱེར་ཡོང་རྒྱུ་ཡིན།

2018ལོའི་སྤྱི་ཟླ3པའི་ཚེས13ཉིན།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...