སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
གློག་བརྙན《ཆུ་ལྷམ་ཆུང་ཆུང》ལ་འཁྲབ་ཁྲིད་པ་རྩེ་གྲ་སོགས་འོས་མིང་དྲུག་ཐོབ།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2018-8-16 10:06:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།

     སྤྱི་ཟླ8པའི་ཚེས14ཉིན། ཀྲུང་གོའི་ན་གཞོན་གློག་བརྙན་གླེང་སྟེགས་སྐབས་བཅུ་གསུམ་པས་བྱ་དགའི་འོས་མིང་དུ་ཚུད་པའི་མིང་ཐོ་ཁྱབ་བསྒྲགས་བྱས་ཤིང་། འཁྲབ་ཁྲིད་པ་པདྨ་ཚེ་བརྟན་གྱིས་ལྟ་སྐུལ་དང་། ལྷ་དཔལ་རྒྱལ་གྱིས་འཁྲབ་ཁྲིད་བྱས་པའི་གློག་བརྙན《ཆུ་ལྷམ་ཆུང་ཆུང》ཞེས་པར་ཕུལ་བྱུང་འཁྲབ་ཁྲིད་པ་དང་ཕུལ་བྱུང་འཁྲབ་གཞུང་། ཕུལ་བྱུང་བརྙན་ལེན། ཕུལ་བྱུང་སྒྲིག་སྦྱོར། ཕུལ་བྱུང་སྒྲ་ལེན། ཕུལ་བྱུང་བརྙན་སྐྲུན་པ་བཅས་ཀྱི་བྱ་དགའ་ཆེན་མོ་དྲུག་གི་བསྐོ་མིང་ཐོབ།

     གློག་བརྙན་འདི་ནི་བྱིས་པ་དང་འབྲེལ་བའི་གློག་བརྙན་བརྩམས་ཆོས་ཤིག་སྟེ། རྩོམ་པ་པོ་ཆུ་ནག་ཚེ་རིང་དོན་འགྲུབ་ཀྱི་སྒྲུང་ཐུང《དབང་གྲགས་ཀྱི་ཆུ་ལྷམ》ཞེས་པ་ལས་བཅོས་སྒྲིག་བྱས་པ་ཡིན་ལ། དེ་ལས། བོད་ཡུལ་གྱི་རོང་ཕྱོགས་ས་ཁུལ་ན་འཚོ་བ་རོལ་བཞིན་པའི་བྱིས་པ་དབང་གྲགས་ཀྱིས་ནམ་རྒྱུན་མཛེས་ཤིང་ཡིད་དུ་འོང་བའི་ཆུ་ལྷམ་ཆ་གཅིག་ཐོབ་པར་རེ་ཞིང་། དེ་ལྟར་ཡུན་རིང་བསྒུགས་པའི་མཐའ་མར་ཁོའི་རེ་བ་དོན་ཐོག་ཏུ་སྨིན་སྟེ་ཆུ་ལྷམ་ཆ་གཅིག་ཐོབ་སོང་ནའང་། ཆར་བ་དུས་ཐོག་ཏུ་མ་བབས་པས། ཆར་ཞིག་འབབ་པའི་རེ་བ་ལས་བྱུང་བའི་དགོད་བྲོ་ལ་ངུ་ཡང་སྐྱེན་པའི་གཏམ་རྒྱུད་ཅིག་ཡིན།
     གློག་བརྙན་འདིའི་འཁྲབ་ཁྲིད་པ་ལྷ་དཔལ་རྒྱལ་གྱིས་བཤད་རྒྱུར། འཁྲབ་སྟོན་པ་ཆུང་ཆུང་འབྲུག་ལྷ་རྡོ་རྗེ་དང་ཕག་མོ་གཡང་སྒྲོན། དེ་མིན་ཕ་མ་འཁྲབ་པའི་འཁྲབ་སྟོན་པ་སྦྱིན་པ་དང་བྱམས་མ་སྐྱིད་སོགས་འཁྲབ་སྟོན་པ་མང་པོའི་ངོ་མཚར་ཡིད་དུ་འོང་བའི་འཁྲབ་སྟོན་སྒྱུ་རྩལ་གྱིས་གློག་བརྙན་ཁྲོད་ཀྱི་མི་སྣའི་སྣང་བརྙན་དང་ནང་སེམས་ཀྱི་འཇིག་རྟེན་རྣམ་པ་དེ་གསལ་རྗེན་དུ་མངོན་ཡོད་ལ། ཅུང་མི་འགོར་བར་འབྲེལ་ཡོད་ལས་སྣེ་པ་དག་དང་ལྷན་དུ་འཇར་མན་དུ་ཕྱིན་ནས། ཕོ་ལན་གློག་བརྙན་དུས་སྟོན་དུ་ཞུགས་རྒྱུ་ཡིན། གློག་བརྙན་བརྩམས་ཆོས་འདི་ཧ་ལམ2018ལོའི་ལོ་དཀྱིལ་ཙམ་དུ་རྒྱ་ཆེ་བའི་གཟིགས་མོ་བ་ལྷན་རྒྱས་ཀྱི་སྦྱན་ལམ་དུ་བསྟར་རྩིས་ཡོད། གློག་བརྙན་འདིའི་ཕབ་སྐྲུན་ཕྱོགས་དང་པོ་ནི་ཧེ་ཉུན་ཡོན་ཧྲི་རིག་གནས་སྨྱན་སྦྱོར་མ་རྐང་ཚད་ཡོད་ཀུང་ཟི་ཡིན་ལ། གཉིས་པ་ནི་ན་གཞོན་གློག་བརྙན་བཟོ་སྐྲུན་ཁང་། གསུམ་པ་ནི་མཚོ་སྔོན་ཁ་བ་ཅན་གློག་བརྙན་ཀུང་ཟི་བཅས་ཡིན།

འཁྲབ་ཁྲིད་པ་ངོ་སྤྲོད།  
     ལྷ་དཔལ་རྒྱལ། སྤྱི་ལོ1989ལོའི་ཟླ5པར་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་བྲག་དཀར་རྫོང་དུ་སྐྱེས་ཤིང་། དེང་རབས་བོད་ཀྱི་ན་གཞོན་འཁྲབ་ཁྲིད་པ་དང་འཁྲབ་གཞུང་རྩོམ་པ་པོ་ཞིག་ཡིན། པེ་ཅིང་གློག་བརྙན་སློབ་གླིང་ནས་སློབ་མཐར་ཕྱིན། སྔོན་ཆད་སློབ་གཉེར་བྱེད་སྒང་ལ་བརྙན་ཐུང་བརྩམས་ཆོས་མང་པོ་གསར་རྩོམ་བྱས་ཤིང་། གདེང་འཇོག་ཀྱང་མི་དམན་པ་ཐོབ། ལོ་དུ་མའི་རིང་རྒན་པདྨ་ཚེ་བརྟན་གྱི་རྗེས་འབྲངས་ནས་གློག་བརྙན་ལ་སྦྱང་བ་མཛད་ཅིང་། མིང་དུ་གྲགས་པའི་གློག་བརྙན་འཁྲབ་ཁྲིད་པ་པདྨ་ཚེ་བརྟན་གྱི་གློག་བརྙན་བརྩམས་ཆོས《ཐར་ལོ》ཡི་ལག་བསྟར་འཁྲབ་ཁྲིད་པའི་འགན་ཁུར། 《ལོ་བརྒྱད་ཀྱི་སྟེང》ཞེས་པ་དང《ཆུ་མིག་ཁྲོད་ཀྱི་རལ་གྲི》སོགས་ཕུལ་བྱུང་བརྩམས་ཆོས་མང་དག་ཅིག་ལ་ལག་བསྟར་འཁྲབ་ཁྲིད་པ་བྱས་མྱོང་བས། གསར་རྩོམ་ལག་ལེན་གྱི་ཉམས་མྱོང་ངེས་ཅན་ཞིག་རྒྱུད་ལ་འབྱོར་ཡོད། 《ཆུ་ལྷམ་ཆུང་ཆུང》ཞེས་པ་ནི་ཁོང་གི་བརྩམས་ཆོས་རིང་གྲས་ཀྱི་ཐོག་མ་དེ་ཆགས་ཡོད།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...