སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སྡེ་རོང་ཝ་ཁ་གྲོང་རྡལ་ཀྲུང་གོའི་དམངས་ཁྲོད་རིག་རྩལ་གྱི་ཕ་སར་གྲགས།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2019-1-22 11:16:00 རྩོམ་ཁུངས། ཁམས་པའི་དྲ་བ། ཀློག་གྲངས།

     ཉེ་ཆར། རིག་གནས་དང་ཡུལ་སྐོར་པུའུ་ཡིས2018ལོ་ནས2020ལོ་འཁོར་བར་གྱི་ཀྲུང་གོའི་དམངས་ཁྲོད་རིག་གནས་སྒྱུ་རྩལ་གྱི་ཕ་ས་ཞེས་པའི་མིང་ཐོ་གསལ་བསྒྲགས་བྱས་ཏེ། རྒྱལ་ཡོངས་ཀྱི་ཤང་དང་གྲོང་རྡལ། རྫོང་རིམ་པའི་གྲོང་ཁྱེར་དང་སྡེ་ཁུལ་བཅས་ཁྱོན་བསྡོམས175མིང་ཐོ་ནང་ཚུད་པ་དང་། སི་ཁྲོན་ཞིང་ཆེན་དཀར་མཛེས་ཁུལ་གྱི་སྡེ་རོང་རྫོང་ཝ་ཁ་གྲོང་རྡལ་ཡང་དེའི་མིང་ཐོ་ནང་དུ་ཚུད་པ་རེད།
     ཀྲུང་གོའི་དམངས་ཁྲོད་རིག་གནས་སྒྱུ་རྩལ་གྱི་ཕ་ས་ཞེས་པ་ནི1987ལོར་སྔར་རིག་གནས་པུའུ་ཡིས་དམངས་ཁྲོད་རིག་གནས་སྒྱུ་རྩལ་བྱ་གཞག་དར་རྒྱས་གོང་འཕེལ་ཡོང་བར་སྐུལ་འདེད་གཏང་ཆེད་དང་། གཞི་རིམ་མང་ཚོགས་ཀྱི་རིག་གནས་འཚོ་བ་ཕུན་སུམ་ཇེ་ཚོགས་སུ་འགྲོ་བའི་ཕྱིར་དུ་གསར་འཛུགས་བྱས་པའི་རིག་གནས་ཟོང་རྟགས་ཀྱི་ལས་གཞི་ཞིག་ཡིན་ལ། མིང་བཏགས་དུས་འཁོར་ལོ3ཡིན། 1987ལོ་ནས2003ལོའི་བར་སྔར་རིག་གནས་པུའུ་ཡིས་རྒྱལ་ཡོངས་སུ་ཀྲུང་གོའི་དམངས་ཁྲོད་རིག་གནས་སྒྱུ་རྩལ་གྱི་ཕ་ས་དང་ཀྲུང་གོའི་ཁྱད་ཆོས་ལྡན་པའི་སྒྱུ་རྩལ་གྱི་ཕ་ས་ཞེས་པའི་ཁྱོན་བསྡོམས486ལ་སྒོ་བྱང་བཀལ་བའི་བྱེད་སྟངས་བརྒྱུད་དེ་མིང་བཏགས་བཀོད་པ་རེད།
     ཤོག་འཆམ་ནི་ཉི་མའི་ལུང་པ་རུ་གྲགས་པའི་སྔོན་བྱོན་མེས་པོ་རྣམས་ཀྱིས་རྗེས་རབས་པར་བཞག་པའི་རིག་གནས་སྒྱུ་རྩལ་གྱི་གཅེས་ནོར་ཡིན་ཞིང་། ས་གནས་དེ་གའི་དམངས་ཁྲོད་དུ་ཁྱབ་པའི་བཤད་སྲོལ་ལ་གཞིགས་ན། རྒྱ་བཟའ་ཀོང་ཇོ་བོད་ལ་གདན་དྲངས་པའི་སྐབས་སུ་འབྲི་ཆུའི་འགྲམ་དུ་ཤོག་འཆམ་འཁྲབ་སྟོན་བྱས་ཏེ་བསུ་མའི་མཛད་སྒོ་སྤེལ་ནས་རྟེན་འབྲེལ་གྱི་ཆོ་ག་རབ་དང་རིམ་པ་སྤེལ། མཛད་སྒོ་དེར་དྲན་རྟེན་བྱེད་ཕྱིར་དམངས་ཁྲོད་ཀྱི་ཞབས་བྲོ་འདི་མི་རབས་ནས་མི་རབས་བར་དུ་རྒྱུན་འཛིན་བྱུང་ནས་ད་བར་དུ་མ་ཉམས་སོར་གནས་བྱུང་ཡོད་པ་རེད། ཤོག་འཆམ་གྱི་གཞི་གདངས་དང་བྲོ་སྟབས་ནི་སྡེ་རོང་སྐོར་བྲོ་ལས་མཆེད་ཅིང་སྡེ་རོང་ཡུལ་སྐད་གཙོ་བོར་བྱས་ནས་འཁྲབ་པ་རེད།
     སྡེ་རོང་ཤོག་འཆམ་ལ་གནའ་སྲོལ་དོད་ཅིང་བཤངས་ཆེ་ལ་ངར་ཤུགས་ལྡན། ཞབས་བྲོའི་ཁྱད་ཆོས་གཙོ་བོ་ནི་རྡོག་བྲོ་ལས་མངོན་ཞིང་། རྡོག་ཤུགས་ཆེ་ལ་རྡོག་སྒྲ་གསལ་བ་དང་། འཆམ་མཁན་གྱི་སྐེད་བཀུག་དང་བསྟུན་ནས་རྡོག་བྲོ་འགྱུར་བས་མཉེན་ཉམས་དོད། རྡོག་བྲོ་བརྡུང་བ་དང་བརྐྱང་བསྐུམ་ཟུང་དུ་འབྲེལ་བ་ལས་ཤོག་འཆམ་གྱི་ཐུན་མོང་མ་ཡིན་པའི་བྲོ་བ་ཞིག་ཚོར་ཐུབ།
     ངོ་མཚར་སྟོང་དང་ལྡན་པའི་མི་རིགས་ཀྱི་ཡུལ་སྲོལ་གོམས་གཤིས་དང་ལོ་རྒྱུས་ཀྱི་རིག་གནས་མཚོན་པའི་དམངས་ཁྲོད་སྒྱུ་རྩལ་ཏེ་སྡེ་རོང་ཤོག་འཆམ་ལ་ས་གནས་ཀྱི་ཁྱད་ཆོས་ཕུན་སུམ་ཚོགས་ཤིང་བཅོས་མིན་གྱི་འཚོ་བའི་བྲོ་བ་ཆེ་བ་དང་། ལོ་རྒྱུས་རིག་གནས་དང་དམངས་སྲོལ་རིག་པ། ཞབས་བྲོའི་རིག་པ་སོགས་ཞིབ་འཇུག་བྱེད་པའི་དཔྱད་གཞི་གལ་ཆེན་དུ་གྱུར་པ་རེད། ད་ལྟ་དེང་རབས་དཔལ་འབྱོར་སྤྱི་ཚོགས་ཀྱི་འཕེལ་རྒྱས་དང་བསྟུན་ནས་ཤོག་འཆམ་ཤེས་མཁན་གྱི་སྒྱུ་རྩལ་པ་ཇེ་ཉུང་ནས་ཇེ་ཉུང་དུ་སོང་ཞིང་བརྒྱུད་འཛིན་པ་ཆད་པའི་ཉེན་ཁའི་གནས་སུ་ལྷུང་ཡོད་པས་མྱུར་སྐྱོབ་སྲུང་སྐྱོང་བྱ་རྒྱུ་ནི་ཁ་ཚ་དགོས་གཏུག་ཏུ་གྱུར་ཡོད་དོ།།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...