སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
ཧུང་ཡོན་རྫོང་ཁོངས་ཀྱི་གནས་རི་སྟག་རྩེ།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2019-10-18 9:52:00 རྩོམ་ཁུངས། རྔ་བའི་གསར་འགྱུར་དྲ་བ། ཀློག་གྲངས།
ཆགས་དབྱིབས་དང་རྣམ་པ། 
     སྟག་རྩེ་ནི་སྐ་ཀླུང་རིང་མོ་དལ་གྱིས་འབབ་པའི་ཆུ་མགོ་རྨ་འབྲིའི་དབྱེ་མཚམས་སྟེ་ས་བབས་ཀྱི་ངོས་ནས་བལྟས་ན་ཅུང་མཐོ་ཤོས་ཀྱི་གནས་སུ་ཡོད་པ་དང་མཐའ་འཁོར་གྱི་རི་གཤིས་དང་མི་འདྲ་བར་རི་དཔྱད་དང་ངག་རྒྱུན་ཕུན་སུམ་ཚོགས་པའི་གནས་རི་ཁྱད་པར་བ་ཞིག་ཡིན།  གནས་རིའི་བྱང་ཤར་གྱི་མཚམས་སུ་འཇིང་མོ་དང་ནུབ་བྱང་གི་མཚམས་སུ་མདུན་རི་བཀྲ་ཤིས་རྟགས་བརྒྱད་ཚང་བའི་གནས།  རི་ངོས་སུ་དབྱིབས་སྣ་ཚོགས་ཀྱི་བྲག་རྡོ་དང་ལྷ་ཤིང་ཤུག་པས་བརྒྱན་པ།  རྒྱབ་རི་ཚང་ཚིང་ནགས་ཀྱིས་མཛེས་པར་བརྒྱན་ཡོད་པའི་གནས་ཤིག་ཡིན།
ངག་རྒྱུན།
     ངག་རྒྱུན་ལ་སྟག་རྩེ་ནི་སོག་པོའི་མདའ་ཚན(དེང་གི་རྨ་ལྷོ་སོག་རྫོང་གི་གསེར་ལུང་སྡེ་བ)གྱི་ཀླུའི་ཆབ་བྲག་ནས་ཡོང་བ་ཡིན་པར་བཤད། ཀླུའི་ཆབ་བྲག་ནི་ཀླུ་མོ་དཔའ་བཙུན་མ་གཙོས་ཀླུ་མོ་སྟོང་གི་གནས་ཡིན་པ་དང་བར་སྐབས་ཤིག་ལ་ནང་མ་འགྲིགས་པར་འབྲོས་དགོས་ལ་ཐུག་པས།  ཡན་འབའ་སྐྱ་བདུན་དང་བན་དེ་སྐྱབས། རྔ་མོང་རྡོ་རྒྱག ཉིན་གྱི་སྒལ་ཚིགས་དང་སྲིབ་ཀྱི་ས་ཚིགས། ཀླུ་ཁོག་གི་ཀླུ་འཕྱོར། ཤྭ་རྭ་ཁུ་ཚུར།( ས་ཕྱོགས་དེའི་ངག་རྒྱུན་ཡོད་པའི་གནས་རི་ཡིན།)སོགས་ཀྱིས་ར་མདའ་བྱེད་དུ་སྟག་རྩེའི་དཔའ་བོ་ངར་ལངས་ངོ་ལ་བུད་ནས་གཡུལ་བཤམས་སྐབས་ས་གནས་དེའི་སྐྱེས་ཆེན་ཞིག་གི་བར་འཕངས་བར་ཡན་ཆུ་ཞེས་ཀླུའི་ཆབ་བྲག་ནས་ཤར་དུ་བཞུར་བཞིན་པའི་ཆུ་བོ་ཞིག་ཡན་འབབ་སྐྱ་བདུན་དང་སྟག་རྩེའི་དཔའ་བོ་ངར་ལངས་གཉིས་ཀྱི་བར་དུ་འཕངས་ཡོད། མུ་མཐུད་སྐ་ཆུ་བརྒྱུད་ནས་ཡོང་སྐབས་བན་དཀར(ས་མིང)ནས་བན་ལུས་པ་དང་བོའི་ཁྱི(ས་མིང་)ནས་ཁྱི་ལུས། རིམ་གྱིས་སྐ་སྟོད་ཀྱི་རྫ་གསེབ་ཏུ་ཡིབ་པ་ཡིན།  དེར་གནས་བཅས་རྗེས་ས་གནས་དེའི་གཞི་བདག་འཇིང་མོ་དང་འཕྲད་ནས་དུས་ད་ལྟའི་བར་ཡོད་པ་འདིའོ། ། སྤྱིར་འཇིང་མོ་ནི་སྟག་རྩེ་ལས་མཐོ་ལ་གཡང་གཟར་ཆེ་བ་ཞིག་ཡིན་པས་ངག་རྒྱུན་ལ་སྟག་རྩེ་མི་མཐོ་འཇིང་མོ་མཐོ། སྐྱེས་ཕོ་མགོ་མི་མཐོ་མོ་མགོ་མཐོ་ཞེས་ས་གནས་དེའི་བུད་མེད་ཀྱི་དབང་ཆ་མཐོན་པོ་ཡིན་པ་ཁ་དཔེར་ཆགས་ཡོད། སྟག་རྩེ་དེ་ལྟར་བྲོས་ནས་ཡོང་སྐབས་ལམ་བར་དུ་ད་དུང་གཏམ་རྒྱུད་མང་དུ་སྣང་སྲིད་ཀྱང་མིག་སྔར་རྩད་ཆོད་པ་ནི་སོག་རྫོང་གི་གསེར་ལུང་སྡེ་བ་དང་ཀླུ་ཆུའི་རྒྱུད། ཧུང་ཡོན་རྫོང་གི་སྐ་ཆུའི་རྒྱུད་ཀྱི་ངག་རྒྱུན་ཉུང་ཤས་ཤིག་ལས་ལག་སོན་བྱུང་མེད། གཞན་ཡང་གནས་རིའི་ངོས་སུ་བེ་རོ་ཙ་ནའི་སྒྲུབ་ཕུག་དང་དཔལ་ལྡན་ཤ་བ་རིའི་སྒྲུབ་ཕུག མགོན་པོ་ཕྱག་དྲུག་པའི་བཞུགས་གནས།  ཀླུ་མོ་འོད་དཀར་བྱེ་བའི་གནས།  རིག་བྱེད་མའི་གནས།  ལྷ་ལུང་དཔལ་རྡོར་གྱི་སྒྲུབ་ཕུག་འདན་མའི་དངུལ་ཁྲི་དང་བསང་ཁྲི།  འདན་མའི་རྟ་རྗེས་དང་རྟ་ལྕག་གིས་བྲབས་ཤུལ།  སྒྲོལ་མ་དཀར་ལྗིང་གི་རྡོ་རང་བྱོན། རྡོ་རྗེ་འཕགས་མོའི་རྡོ།(རིག་གསར་སྐབས་ཆགས་འཇིགས་བྱུང་ཡོད)རང་བྱོན་སོགས་ངོ་མཚར་གྱི་རྗེས་ཤུལ་དང་གཏམ་རྒྱུད་ཀྱིས་གང་ཡོད།
     བྲག་དགོན་པ་དཀོན་མཆོག་བསྟན་པ་རབ་རྒྱ་ཀྱིས་《མཛད་པས མདོ་སྨད་ཆོས་འབྱུང》 (ཀན་སུའུ་མི་རིགས་དཔེ་སྐྲུན་ཁང་། ཤོག་ངོས།༢༤༡)གི་ཕྲེང༡༧ནས༡༨བར།  “རྐ་ཆུ་རྐ་སྟག་རྩེ་ནས་འབབ་པའི་སྟོད་དུ་ཨ་མཆོག་སྨྲ་སེང་གླིང་གི་མཆོད་གཞིས་རྭ་ཁོག་ཚོ་བ་བརྒྱད་ཀྱི་འབྲོག་སྡེ་ཡོད”ཅེས་སྐ་ཆུའི་སྟོད་དུ་སྟག་རྩེའི་གནས་རི་ཡོད་པ་ཞིབ་འབྲི་བྱས་ཡོད།
     《རྗེ་བཙན་དམུ་དགེ་བསམ་གཏན་དཔལ་བཟང་བོའི་གསུང་འབུམ་པོད་དྲུག་པ》(སི་ཁྲོན་ཏང་དེབ་ཚོགས་པ། སི་ཁྲོན་མི་རིགས་དཔེ་སྐྲུན་ཁང་གིས་བསྐྲུན)ཡི་ཤོག་ངོས༡༤༥ཕྲེང༥པར་ཡང“སྐ་ཆུ་སྐ་བར་སྟག་རྩེ་ནས་པའི་སྟོད་དུ་ཨ་མཆོག་སྨྲ་སེང་གླིང་གི་མཆོད་གཞིས་རྭ་ཁོག་ཚོ་བ་བརྒྱད་ཡོད”ཅེས་སྐ་ཆུའི་སྐ་ས་སྐ་བསྒྱུར་ནས་སྟག་རྩེ་དང་སྐ་ཆུ་བྲིས་ཡོད། དེ་མིན་དཔེ་ཆ་དེའི་ཤོག་ངོས༤༩༦པའི་ཕྲེང༧ནས༡༢བར། “ཡང་ངེད་ཅག་གི་སར་སྐ་བར་སྟག་རྩེ་ཞེས་པའི་གནས་རི་ཞིག་ཡོད་པ་དེའི་མདུན་ནས་འོང་བའི་ཆུ་བོ་ད་སྐ་ཁོག་བརྒྱུད་མཛོད་དགེ་སོག་ཚང་དགོན་པའི་མདུན་ནས་རྨ་ཆུ་དང་འདྲེས་པའི་ཆུ་དེའི་མིང་བཅིངས་བགྲོལ་སྐབས་སྐད་སྒྱུར་ཞིག་ལ་དྲིས་པས།  སྐ་ཆུ་ཟེར་ཞིང་བརྗོད་པར།  འོ།  དཀར་ཆུ་ཟེར་བ་ཡིན་རྒྱུ་རེད་སྙམ་ནས་རྒྱ་སྐད་ལ་དེང་སང་དཀར་ཆུ(白河)ཞེས་བརྗོད་བཞིན་ཡོད། དེ་ལྟར་མིང་གང་བྱུང་དུ་བཏགས་ནས་ལོ་རྒྱུས་རྙོག་དྲ་བཟོས་པ་ཤིན་ཏུ་མང་ངོ་།།”ཞེས་པ་སོགས་སྐ་ཆུའི་མིང་འབྲི་ལུགས་ལ་མིང་གཞིར་མ་བཟུང་བར་ཐེར་འདོན་བྱེད་སྐབས་ཡང་སྐ་སྟོད་ཀྱི་སྟག་རྩེའི་མིང་ཐོན་ཡོད།
ས་གནས། 
     ཧུང་ཡོན་རྫོང་སྐྱ་རོང་ཡུལ་ཚོ་ནས་ཤར་ལྷོའི་ཕྱོགས་སུ་སྤྱི་ལེ༣༢ལྷག་སོང་མཚམས་སུ་ཡོད།  

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...