སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སྡེར་ནང་ས་བྲིས་ཀྱི་ལོ་རྒྱུས་མདོར་བསྡུས་ངོ་སྦྱོར།
རྩོམ་པ་པོ། སྐལ་བཟང་ཡེ་ཤེས། རྩོམ་སྒྲིག་པ། Lhamo དུས་ཚོད། 2015-3-4 10:08:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།

སྡེར་ནང་ས་བྲིས་ཀྱི་ལོ་རྒྱུས་མདོར་བསྡུས་ངོ་སྦྱོར།

སྡེར་ནང་ས་བྲིས་ཀྱི་བྲིས་ཁུངས་དང་དེ་ལྟར་མིང་དུ་ཐོག་དོན།
     སྡེར་ནང་ས་བྲིས་ནི་མགོ་ལོག་ཁུལ་དར་ལག་རྫོང་སྡེར་ནང་ཡུལ་ཚོ་ནས་བྱུང་ཞིང་། རིམ་བཞིན་མགོ་ལོག་ཡོངས་དང་བོད་ཀྱི་ས་ཁུལ་གཞན་དག་ཏུ་དར་བའི་ཡིག་གཟུགས་ཀྱི་ཁྲིད་རྒྱུན་ཞིག་ཡིན་ན། ཐོག་མར་ང་ཚོས་སྡེར་ནང་ཞེས་པའི་ཐ་སྙད་འདི་ལ་ངོས་འཛིན་ཞིག་བྱ་སྟེ། 《རྨ་ཡུལ་སྡེར་ནང་དགོན་གྱི་གདན་རབས་དང་སྡེར་ནང་ས་བྲིས་ཀྱི་ལོ་རྒྱུས་རུས་མཛོད》ལས“ད་ལྟའི་རྨ་ཡུལ་སྡེར་ནང་དགོན་ནི་སྔོན་སྡེར་རྒྱབ༼ད་ལྟའི་པདྨ་རྫོང་ཁོངས་དབང་རོལ་གྱི་ས་ཆ་ཡིན༽ཏུ་ཡོད་ལ། དེ་ནི་སྤྱི་ལོ༡༧༨༥ལོར་སྡེར་རྒྱབ་བླ་མ་ཡོན་ཏན་རྒྱ་མཚོ་མཆོག་གིས་གསར་དུ་ཕྱག་བཏབ་བྱས་པ་ཡིན་ལ། རྗེས་སུ་ཡུལ་སྡེའི་ས་ཆའི་གནས་སྤོར་གྱི་སྟབས་དང་བསྟུན་ནས་རྨ་ཡུལ་སྡེར་ནང་དུ་གནས་སྤོས་ཏེ་དར་ཞིང་རྒྱས་པའི་སྐབས་སོ།”ཞེས་པ་ལྟར་ན་སྡེར་ནང་ཟེར་བ་ནི་ཐོག་མར་ས་མིང་དགོན་ལ་ཤན་ཞུགས་ཤིང་། རིམ་བཞིན་དགོན་མིང་སྡེ་ལ་ཐོག་པར་སྣང་ངོ་། ད་ལྟ་རྨ་ཡུལ་སྡེར་ནང་ཡུལ་ཚོ་ཞེས་སྲིད་འཛིན་ཡུལ་ཚོ་གཅིག་ལ་འབྲོག་བསྐོས་ཁང་གཉིས་དང་ཁྱིམ་ཚང་བཞི་བརྒྱར་ཉེ་བ་ཡོད་ཅིང་། སྡེར་ནང་དགོན་པ་ལ་ཡང་རྒྱུན་བཞུགས་བླ་གྲྭ༣༠༠ལྷག་ཡོད་པ་དང་། ལོ་རེ་བཞིན་དབྱར་གནས་དང་། སྤྱི་སྲུང་། གསང་རྙིང་། སྒྲུབ་ཆེན། སྨྱུང་གནས། ཐོས་གྲོལ་སྒྲུབ་མཆོད། དགུ་གཏོར་སོགས་ཆོས་ཀྱི་བྱེད་སྒོ་མང་དུ་ཡོད་ལ། དེ་མིན་གཞུང་མཚན་ཉིད་དང་། སྡེར་ནང་ས་བྲིས་སོགས་ཀྱི་ཁྲིད་འཆད་ཉན་ཡང་ཡོད། སྡེར་ནང་ས་བྲིས་ཟེར་བ་ནི། ངག་རྒྱུན་དུ་རྒྱལ་པོ་ཁྲི་སྲུང་ལྡེ་བཙན་གྱི་སྐབས་སུ་ལོ་ཙྰ་བ་ཆེན་པོ་བཻ་རོ་ཙ་ནས། ཁམས་ཕྱོགས་སུ་གདུལ་བྱ་རྫོགས་ཏེ་ཕྱིར་དབུས་གཙང་སུ་བྱོན་སྐབས། རང་གི་སྨྱུ་གུ་ནམ་མཁའ་ལ་མཆོད་དེ་མགོན་པོ་ཚོགས་བདག་ལ་གཉེར་བཅོལ་བྱས་ཤིང་། མ་འོངས་བར་སྐལ་ལྡན་སུ་ཡི་ལག་ཏུ་རྙེད་ཚེ་དེས་རང་གི་བྲིས་རྒྱུན་སྤེལ་བའི་སྨོན་ལམ་བཏབ་པ། ཕྱིས་སུ་ས་ངན་བླ་མ་བསྟན་འཛིན་གྱི་ལག་ཏུ་རྙེད་ནས་བྲིས་རྒྱུན་འདི་དར་སྤེལ་བྱས་པ་ཡིན་ཟེར་བ་དང་། དེ་བཞིན་དུ་སྡེར་ནང་གཏེར་ཆེན་པདྨ་མཁྱེན་བརྩེའི་འོད་ཟེར་གྱི《ས་བྲིས་ལོ་རྒྱུས》སུ་ཡང“ས་བྲིས་འདི་ནི་བོད་ཀྱི་མིག་འབྱེད་དམ། ལོ་ཙཱ་བ་ཐམས་ཅད་ཀྱི་ནང་ནས་འགྲན་ཟླ་དང་བྲལ་བའི་སངས་རྒྱས་དངོས་བྱོན་སྒྲ་སྒྱུར་བཻ་རོ་ཙ་ན་རྒྱལ་མོ་ཚ་བ་རོང་ནས་གདུལ་བྱ་རྫོགས་ཕྲལ་དབུས་སུ་ཕེབས་སྐབས། སྨྱུ་གུ་གསུམ་ནམ་མཁའ་ལ་དོར་ཏེ་སྨོན་ལམ་བཏབ་ཅིང་ཚོགས་བདག་ལ་ཉེ་བར་བཅོལ་ནས། ནམ་ཞིག་འདི་དང་འཕྲད་པའི་ལས་ལྡན་མ་བྱུང་བར་དུ་གཉེར་དམ་གྱིས་གསུངས་ནས་རྒྱས་བཏབས་པ། ཕྱིས་སུ་ལས་དང་སྐལ་བ་སྨོན་ལམ་གསུམ་འཛོམས་པའི་ས་ངན་བསྟན་འཛིན་གྱིས་རྙེད་ནས་དེས་རྐྱེན་གྱིས་ཡི་གེ་འདི་ཡིག་རྐྱེན་གཞན་ལ་མ་ལྟོས་པར་ཁོ་རང་བྱིན་རླབས་དང་སྨོན་ལམ་གྱི་མཐུ་ཟབ་མོ་བརྡོལ་ནས་རྣམ་རིག་ཡིག་གཟུགས་སུ་འཕོས་པའི་ནུས་མཐུ་ཅན་དུ་སད་པ་ཡིན་སྐད”ཅེས་དང༌། 《མགོ་ལོག་སྨན་རྩིས་རིག་གནས་ལོ་རྒྱུས》སུ་ཡང“ལོ་ཆེན་བཻ་རོ་རྒྱལ་མོ་རོང་ནས་ཡར་ཕེབས་སྐབས་བྲིས་སྨྱུག་ནམ་མཁར་འཕངས་ཏེ། མགོན་པོ་ཚོགས་བདག་ལ་གཉེར་དམ་བཅོལ།མ་འོངས་པར་སྨྱུ་གུ་འདི་སུ་དང་འཕྲད་ན། དེའི་བདག་གི་བྲིས་རྒྱུན་རྩོལ་མེད་དུ་ཤེས་པར་ཤོག་ཅེས་ཐུགས་སྨོན་མཛད་པ། སླར་ས་ངན་བླ་མ་བསྟན་འཛིན་ཞེས་པའི་ཕྱག་ཏུ་ལྟས་མཚན་བཟང་པོ་དང་བཅས་འབྱོར་ནས། འཕྲིན་ལས་ཁྱད་པར་ཅན་གྱི་དབུ་མེད་གཟབ་མའི་བྲིས་ཚུགས་བྱུང་བའི་མིང་ཡང་ས་བྲིས་སུ་ཐོགས”ཞེས་གསུངས། དེ་ནས་སྡེར་ནང་འཇང་བླ་དང་ཀ་ཐོག་ལྕམ་བླ་སོགས་ཀྱིས་སྦྱང་སྟེ་དར་ཁྱབ་ཏུ་སོང་ནས་ད་ལྟའི་བྲིས་རབས་བརྒྱད་པ་ལ་ཐོན་པར་བཞེད་དོ། དེར་བརྟེན་སྡེར་ནང་ས་བྲིས་ཞེས་ཐོག་དོན་ཡང་གོང་གསལ་ལྟར་བྲིས་འདི་ཐོག་མར་ཡུལ་མགོ་ལོག་གི་སྡེར་ནང་ཚོ་བར་དར་བས་སྡེར་ནང་དང་། བྲིས་རབས་ཐོག་མའམ་བྲིས་ཁུངས་གཙོ་བོ་ནི་ས་ངན་བསྟན་འཛིན་ཡིན་པས་ས་བྲིས་སུ་བཏགས་པ་ཡིན།
     གཞན་ཡང་སྔོན་ཚེར་ས་བྲིས་འདི་འབྲི་སྐབས་ས་མགོ་ཆེ་བར་འབྲི་དགོས་པས་ས་བྲིས་ཟེར་སྲོལ་ཡང་ཡོད་ལ། རྗེས་སུ་ཡི་གེའི་ཆ་ཚད་དང་སྤྱི་ཁོག་སོགས་ལ་དམིགས་ནས་ས་མགོ་ཆུང་བར་བྱས་མོད་ཀྱང་མིང་དེ་ལྟར་ལུས་པའི་བཤད་སྲོལ་ཞིག་ཡོད་པ་དགེ་རྒན་སེང་དར་ལ་བྲིས་རྒན་པད་གྲགས་ཀྱིས་གསུང་བར་རྒན་དམ་པ་ཁོང་གིས་གསུངས་སོ།
སྡེར་ནང་ས་བྲིས་ཀྱི་བྲིས་རབས་དང་བོ་ངོ་སྦྱོར།
     ཡུལ་མགོ་ལོག་ཏུ་སྡེར་ནང་ས་བྲིས་ནི་དམངས་ཡོངས་རང་བཞིན་གྱིས་སྦྱང་བའི་ཤེས་བྱ་ཞིག་ཡིན་ཟེར་ཆོག་སྟེ། སྔོན་གྱི་དུས་སུ་ཡུལ་མགོ་ལོག་ཏུ་སྡེར་ནང་གཙོར་བྱས་པའི་ས་ཕྱོགས་སོ་སོར་ཡི་གེ་ཤེས་མཁན་ཞིག་ཡིན་ཕྱིན་ཕལ་ཆེར་བྲིས་མི་སྦྱང་མཁན་ཉུང་ཉུང་ཡིན་པ་དང་། བྲིས་ལ་ལྟ་མི་ཤེས་མཁན་དེ་བས་ཉུང་ཤས་ཡིན། དེར་བརྟེན་མགོ་ལོག་ནས་བྲིས་པ་ཆེན་པོར་ཆགས་དགོས་ན་ཡིག་གཟུགས་ཀྱི་བྱང་ཚད་ངེས་ཅན་ཞིག་ཏུ་ཐོན་མེད་ཚེ། ཀུན་གྱིས་ཁེས་ལེན་ཅུང་དཀའ་མོ་ཡིན། དེ་ལྟ་མོད་ཀྱང་ཡུལ་འདིར་ཕུལ་དུ་བྱུང་བའི་བྲིས་པ་གང་མང་མང་ཞིག་བྱུང་ཡོད་པས་འདིར་འགའ་ཞིག་ཞུ་བར་བྱའོ།།
     ས་བྲིས་ཐོག་མ་ས་ངན་བླ་མ་བསྟན་འཛིན། 《རྨ་ཡུལ་སྡེར་ནང་དགོན་གྱི་གདན་རབས་དང་སྡེར་ནང་ས་བྲིས་ཀྱི་ལོ་རྒྱུས་རུས་མཛོད》དུ་ཁོང་གི་མཚན་ལ་འཇང་བླ་བསྟན་འཛིན་ཡང་ཟེར་ཞེས་བཀོད་ཡོད། རབ་བྱུང་བཅུ་གཉིས་པའི་སྨད་ཙམ་ལ་བྱོན་ཡོད་པར་སྣང་། སྔོན་བཻ་རོའི་སྨོན་ལམ་དུས་སུ་སྨིན་ཏེ་ཁོང་གིས་སྨྱུ་གུ་དང་ས་ཤོག་སོགས་གཏེར་ནས་བཞེས་ཤིང་། བཻ་རོའི་བྲིས་རྒྱུན་དེ་ཉིད་རང་ཤུགས་ཀྱིས་མཁྱེན་ཞིང་། བྲིས་དེ་ཡང་ཁོང་གིས་གསར་སྤེལ་བགྱིས་ཏེ་བོད་མི་རིགས་ལ་ཆེས་ཐུན་མོང་མ་ཡིན་པའི་ཡིག་གཟུགས་སྒྱུ་རྩལ་འདི་བཞག་པར་མ་ཟད། ཁོང་གིས་བྲིས་སློབ་ཡང་ཀཿཐོག་ལྕམ་བླ་རིན་པོ་ཆེ་སོགས་བསྐྱངས་པར་བཤད།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...