| རྩོམ་པ་པོ། | བསམ་ཤོད། | རྩོམ་སྒྲིག་པ། | Bdechen mtso | དུས་ཚོད། | 2012-1-7 12:14:00 | རྩོམ་ཁུངས། | མཚོ་སྔོན་པོ་དྲ་བ། | ཀློག་གྲངས། |
ལྷ་སའི་བར་སྐོར།
བར་སྐོར་བྱང་ཆུབ་ལམ་དུ་གཡས་སྐོར་ཕྱིན་པས་ན། བོད་རིགས་གཙོར་བྱས་ཐོག རྒྱ་བལ་དང་ཁ་ཆེ་སོགས་ཀྱི་ཚོང་ཁང་འདྲ་མིན་སྣ་ཚོགས་ཡོད་ལ་ས་ཕྱོགས་ཁག་ནས་གནས་སྐོར་ལ་ཡོང་མཁན་དང་། བར་སྐོར་ལ་འགྲོ་མཁན། ཚོང་ཟོག་ཉོ་འཚོང་བྱེད་མཁན་སོགས་ཤིན་ཏུ་མང་བས་འཁྲུག་ཆ་དོད་པོ་ཡོད། བར་སྐོར་བྱང་ངོས་ཀྱི་དབུས་སུ་སྲིད་ཞིའི་འདོད་རྒུ་མ་ལུས་པ་འབད་མེད་དུ་འདུ་བའི་རྣམ་གྲངས་ས་བདག་བརྒྱད་དང་། ཛམ་བྷ་ལ། ནོར་རྒྱུན་མ་སོགས་གཏེར་འབུམ་དག་བཞུགས་པའི་མཆོད་རྟེན་ཀཀྞི་སྒོ་བཞི་དང་། ལྷོ་ཤར་དུ་འབྲུག་པ་ལོ་ཕྱག་ཞེས(ལོ་གསར་སྐབས་ཏཱ་ལའི་བླ་མ་དང་བཀའ་ཤག་སྲིད་གཞུང་ལ་མཇལ་ཕྱག་ཞུ་མི་ཞིག་གཏོང་སྲོལ་ཡོད་པ་དེ་ལ་ལོ་ཕྱག་ཟེར)འབྲུག་གཞུང་བོད་སྡོད་གཞུང་ཚབ་ཀྱི་གཟིམ་ཤག་དེང་སང་ཁྲོམ་གཟིགས་སྒང་སྒོ་རྭ་ཤར་ཟེར་བ་དེ་ཡིན། མདུན་དུ་མི་དབང་ཕོ་ལྷ་བསོད་ནམས་སྟོབས་རྒྱལ་གྱིས་བཞེངས་པའི་མ་ཎི་འཁོར་ཆེན། ཉེ་འགྲམ་དུ་ཁྲིམས་ཁང་མི་དཔོན་ལས་ཁུངས་དང་བཙོན་མ་འཇུག་སའི་སྣང་རྩེ་ཤག་ཡོད། སྣང་རྩེ་ཤག་ནི་ཞོལ་པ་ལས་ཁུངས་ཀྱི་གཤམ་འོག་ལས་ཁུངས་ཡིན་ཞིང་། ལས་ཁུངས་དེར་འགོ་འཛིན་མི་དཔོན་གཉིས་དང་། དྲུང་ཡིག་གཅིག གཉེར་པ་གཉིས། ཁང་གཉེར་གཅིག པུ་ལི་སི་དམག་སྒར་གྱི་རྒྱ་དཔོན་གཅིག་བསྐོར་བྱ་བ་མི་གྲངས་ཉི་ཤུ་སྐོར། བཙོན་སྲུང་བ་མི་གཅིག་བཅས་ཡོད། ལས་ཁུངས་དེའི་ལས་འགན་གཙོ་བོ་ནི་ལྷ་ས་ཁུལ་གྱི་ཁྲིམས་དོན་དང་། བདེ་འཇགས། གཙང་སྦྲ། དེ་མིན་ཁྲལ་དོན་དང་། ཁང་པ་གསར་སྐྲུན་སོགས་བྱེད་དགོས་ཚེ་ལྷ་ས་གཉེར་ཚང་ལས་ཁུངས་ལ་དགོངས་སྐོར་ཞུ་རྒྱུ་དང་། དཔོན་ཁུངས་གང་གི་མི་བོགས་གཏན་འཁེལ་ལྟར་སྤྲོད་པ་སོགས་ཀྱི་ལས་ཀ་དང་། མི་བསད་རྟ་འགྱེལ་གྱི་གྱོད་དོན་བྱུང་ཚེ་ཕྲལ་དུ་བཀའ་ཤག་སྲིད་གཞུང་ལ་དགོངས་སྐོར་གྱིས་ཁྲིམས་ལྟར་ཐག་གཅོད་བྱ་རྒྱུ་དང་། གྱོད་དོན་ཆུང་རྩག་བྱུང་ཚེ་ནག་ཉེས་ཆེ་ཆུང་གིས་ཐད་ཀར་རྟ་ལྕག་དང་ལྕང་སྨྱུག་ཁ་གྲངས་གཏན་འཁེལ་བྱས་ཏེ་ཁྲིམས་ཐག་རང་སར་གཅོད་པའི་དབང་ཆ་ཡོད། དེའི་ལམ་གྱི་ཉེ་འགྲམ་དུ་རྨེ་རུ་རྙིང་པ་ཞེས་པ་དེ་ལྷ་ས་གཙུག་ལག་ཁང་གི་ཤར་སྒོའི་སེ་ར་ལྟག་སྒོའི་འགྲམ་དུ་གནས་ཡོད་ཅིང་། དེ་ཡང་ཐོག་མར་བོད་ཀྱི་བཙན་པོའི་རྒྱལ་རབས་ཞེ་གཅིག་པ་ཁྲི་གཙུག་ལྡེ་བཙན་རལ་པ་ཅན་གྱིས་དུས་རབས་དགུ་པའི་ནང་གཙུག་ལག་ཁང་གི་ཤར་དུ་ཀ་རུ་དང་། རྨེ་རུ། ལྷོ་རུ་དགའ་བ་དང་དགའ་བའི་འོད། བྱང་དུ་བྲན་ཁང་དང་བྲན་ཁང་ཐ་མ་ལ་སོགས་བཞེངས་པའི་ཡ་གྱལ་ཞིག་ཡིན་པར་གྲགས། སྐབས་དེའི་ལྷ་ཁང་ནི་གཞི་རྒྱ་ཆུང་ལ་སྒོ་ཤར་ལྟའི་འོག་ཁང་དེ་ཡིན་སྐད། རྗེས་སུ་རྒྱ་བསྐྱེད་དེ་རྒྱལ་སྒོ་བྱང་ལྟ་དང་། ཤར་དུ་མ་ཁང་ཐོག་གསུམ་འདུ་ཁང་དང་བཅས་པ་དང་། རྟེན་གཙོ་སངས་རྒྱས་མར་མེ་མཛད་གཙོ་འཁོར་དང་རྣམ་སྲས་ལྗང་སེང་གི་སྐུ་ཛམ་བྷ་ལ། ལྷ་ཁང་རྙིང་པའི་སྟེང་གི་མགོན་ཁང་ནང་རྟེན་གཙོ་འཇིགས་བྱེད་ཀྲོང་བསྐྱེད་དང་། མགོན་པོ་བྲལ་གཟུགས་ཀྱི་སྐུ་བརྙན། འདུ་ཁང་ནང་གནས་ཆུང་རྡོ་རྗེ་གྲགས་ལྡན་གྱི་སྐུ་གསོབ་སོགས་པ་བཞུགས་ཡོད། དགོན་དེར་དད་ལྡན་མང་ཚོགས་ཀྱིས་མཆོད་མཇལ་ཞུ་བ་དང་སྦྲགས་བསང་གསོལ་ལྗགས་སྐྱེམས་ཕུལ་བ། ལྷག་པར་ཚོང་པ་ཚོས་འདིར་ཞོགས་ལྟར་བསང་གསོལ་ལྗགས་སྐྱེམས་ཕུལ་ན་ཚོང་དོན་ལེགས་པར་བརྗོད་སྲོལ་འདུག རྗེས་སུ་རྨེ་རུ་དགོན་པ་དེ་ལྷ་སའི་བྱང་ངོས་སུ་སྤོས་སྟབས་རྨེ་རུ་ཞེས་འབོད། དེ་ནས་བར་སྐོར་ཤར་བྱང་དུ་སྤྱི་ལོ1681ལོར་ལ་དྭགས་རྒྱལ་པོ་སེང་གེ་རྣམ་རྒྱལ་ཟེར་བ་དེས་མངའ་རིས་སྐོར་གསུམ་བཙན་བཟུང་བྱས་རྐྱེན་དགའ་ལྡན་ཚེ་དབང་དཔལ་བཟང་གིས་བོད་དམག་ཁྲིད་ནས་དཔའ་མཛངས་བརྟུལ་ཕོད་ཀྱིས་ཕར་རྒོལ་གཡུལ་ལས་རྣམ་པར་རྒྱལ་བའི་དཔའ་རྟགས་སུ་བཙུགས་པའི་དགའ་ལྡན་དར་ཆེན་དང་བར་སྐོར་ཤར་ལྷོའི་མཚམས་ཀྱི་དུང་མཚོ་ཟུར་དུ་རྗེ་ཙོང་ཁ་པ་བློ་བཟང་གྲགས་པས་སྤྱི་ལོ1409ལོར་ལྷ་ལྡན་སྨོན་ལམ་ཆེན་མོ་སྲོལ་གཏོད་སྐབས་བཙུགས་པའི་ཤར་སྐྱ་རིང་དར་ཆེན། ཁག་གཅིག་གིས་དར་ཆེན་གྱི་ནང་རྟེན་དུ་རྗེའི་ཞལ་རྒྱུག་ཡོད་པར་གྲགས་པས་མཁས་དབང་རྣམས་ཀྱིས་དཔྱད་པར་ཞུ། གཙུག་ལག་ཁང་གི་ལྷོ་སྒོའི་འགྲམ་དུ་ཆོ་འཕྲུལ་སྨོན་ལམ་ཆེན་མོ་སོགས་ལ་བཀའ་ཆོས་གནང་ས་གསུང་ཆོས་རྭ་བ། དེའི་མདུན་དུ་རྒྱལ་མཆོག་བདུན་པ་བསྐལ་བཟང་རྒྱ་མཚོ་མཆོག་གསེར་ཁྲིར་མངའ་གསོལ་མཛད་སྐབས་བཙུགས་པའི་བསྐལ་བཟང་དར་ཆེན་དང་། སྔར་གཙུག་ལག་ཁང་གི་མདུན་ཙམ་ན་ཇུས་འདིང་གནས(ཁ་སྐད་དུ་ཇི་སྡེ་གླིང)ཞེས་པའི་ཁང་ཁྱིམ་དང་། ཇུས་ཡག་དར་ཆེན་ཞེས་པ་གཅིག་ཡོད། དེ་ཡང་དུས་རབས་བཅུ་བདུན་པའི་ནང་སོག་པོ་གོ་ཥི་བསྟན་འཛིན་ཆོས་རྒྱལ་གྱི་དམག་བོད་དུ་བསྐོངས་དེ་སྡེ་སྲིད་གཙང་པའི་སྲིད་དབང་གཏོར་ནས་རྒྱལ་མཆོག་ལྔ་པ་ཆེན་པོའི་སྲིད་དབང་དགའ་ལྡན་ཕོ་བྲང་འཛུགས་རྒྱུའི་སྐོར་དགའ་ལྡན་ཕོ་བྲང་པའི་ཕྱག་མཛོད་བསོད་ནམས་རབ་བརྟན་དང་། སྐྱིད་ཤོད་སྡེ་པ་སོགས་ནས་ཇུས་བཏོན་པར་ཕྱིས་ཕན་འབྲས་ཐོབ་སྟབས་ཁང་མིང་དུའང་ཇུས་འདིང་གནས་དང་། བྱང་སྒོའི(ལྟག་སྒོ་ལྷོ་ཡང་ཡོད)འགྲམ་དུ་དར་ཆེན་ཞིག་བཙུགས་པ་དེར་ཇུས་ཡག་དར་ཆེན་ཟེར། ལྷ་ས་གཙུག་ལག་ཁང་གི་བྱང་ངོས་སུ་དར་པོ་གླིང་ཞེས་པ་དེ་ཡོད། དུས་རབས་བཅོ་ལྔ་པའི་ནང་ཏཱ་ལའི་བླ་མ་སྐུ་ཕྲེང་དང་པོ་དགེ་འདུན་གྲུབ་པས་ཕྱག་བཏབ་པར་གྲགས། དེ་གར་དགེ་བསྙེན་ཕྱིང་དཀར་བ་དང་། དགྲ་ལྷ་སོགས་ཁོག་ཞུགས་བྱེད་པ་དང་། དར་པོ་གླིང་གི་ལྷ་མོ་ཞེས་ལྷ་གསོལ་མཁན་དམངས་ཁྲོད་སྐྱིད་སྡུག་ཡོད། བདག་གཉེར་རྩེ་རྣམ་རྒྱལ་གྲྭ་ཚང་གིས་བྱེད་པ་རེད།
