སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
བོད་ཀྱི་ལོ་རྒྱུས་རྒྱུན་ཤེས་གཞོན་ནུའི་མགུལ་རྒྱན་མེ་ཏོག་ཕྲེང་བ།
རྩོམ་པ་པོ། བྱམས་རྡོར་དང་གངས་དབང་། རྩོམ་སྒྲིག་པ། Lhamo དུས་ཚོད། 2013-12-8 10:19:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
༡  ལོ་རྒྱུས་སྦྱོང་བ་ལ་དགོས་པ་ག་འདྲ་ཡོད།
    ལོ་རྒྱུས་ལ་སློབ་སྦྱོང་བྱེད་པ་ནི་ལོ་རྒྱུས་ཀྱི་ཉམས་མྱོང་ལེན་ཆེད་ཡིན།ལོ་རྒྱུས་ལ་ཞིབ་འཇུག་བྱེད་པ་ནི་ལོ་རྒྱུས་ཀྱི་བསླབ་བྱ་ལེན་ཆེད་ཡིན།འོན་ཀྱང་ལོ་ལ་སྐྱབས་བཅོལ་བ་ནི་ལོ་རྒྱུས་མཇུག་རྫོགས་པའི་སྔ་ལྟས་ཡིན།དེས་ན་ང་ཚོས་ཁ་སང་ལ་ཞིབ་འཇུག་བྱས་ནས་མེས་པོ་ཚོར་རྒྱུས་ལོན་བྱེད་པ་ནི་དེ་རིང་གི་ང་ཚོའི་སྐྱིད་སྡུག་དང་འབྲེལ་བ་ཡོད་པ་མ་ཟད།སང་ཉིན་གྱི་བུ་ཚ་དག་གི་འཚོ་གནས་དང་འབྲེལ་བ་ཡོད་དོ།
༢  ལོ་རྒྱུས་ཞེས་པར་ངེས་ཚིག་ཇི་ལྟར་འགྲེལ། འདས་ཟིན་པའི་ལོ་ཟླ་ཡི་ནང་གི་བྱུང་བ་རྣམས་མུ་ཏིག་བསྟར་ལ་རྒྱུས་པ་ལྟར་བཀོད་པས་ན་ལོ་རྒྱུས་ཞེས་ཟེར་རོ།
༣  བོད་ཀྱི་ལོ་རྒྱུས་ཀྱི་དུས་རིམ་ལ་དབྱེ་ན་ཧ་ལམ་གང་འདྲ་ཡིན།
    དེ་ཡང་དུས་རིམ་བརྒྱད་ལ་དབྱེར་ཆོག་སྟེ། ཀ ཡ་ཐོག་སྐབས་ཀྱི་ལོ་རྒྱུས། ཁ སྤུར་རྒྱལ་གདུང་རབས་ཀྱི་སྐབས།ག བོད་བཙན་པོའི་དུས་སྐབས། ང  བོད་སིལ་བུའི་དུས་སྐབས། ཅ ས་སྐྱ་བའི་དུས་སྐབས།ཆ ཕག་མོ་གྲུ་པ་དང་རིན་སྤུངས་པའི་དུས་སྐབས།ཇ དགའ་ལྡན་ཕོ་བྲང་གི་དས་སྐབས།ཉ དེང་རབས་ཀྱི་སྐབས་བཅས་སོ།
༤  བོད་མིའི་འགྲོ་བ་བྱུང་ཚུལ་ཅི་འདྲ་ཡིན། རང་ཅག་རྣམས་ཀྱི་བཤད་རྒྱུན་ལ་ཕ་སྤྲེལ་རྒན་བྱང་ཆུབ་སེམས་དཔའ་དང་།མ་བྲག་སྲིན་མོ་གཉིས་འདུས་པ་ལས་སྤྲེལ་ཕྲུག་མང་དུ་འཕེལ་ཏེ་དེ་དག་གི་རྒྱུད་པ་ལས་བོད་མི་རྣམས་བྱུང་བར་གྲགས་སོ།
༥  བོད་ཁམས་ཆགས་ཚུལ་ཅི་འདྲ་ཡིན། སྟོད་མངའ་རིས་ཀྱི་ཆ་ནི་རྫིང་དང་འདྲ།བར་དབུས་གཙང་རུ་བཞི་ཡུར་བ་འདྲ།སྨད་མདོ་ཁམས་སྒངས་དྲུག་ཞིང་ལྟ་བུ་ཞེས་སྔོན་གྱི་ཡིག་ཚང་དུ་མར་བར་ལྟར་ན་བོད་ཁམས་ནི་སྟོད་གཡའ་རི་དང་གངས་ཀྱི་ཡུལ།བར་བྲག་དང་སྤང་ལྗོངས།སྨད་རྩི་ཤིང་དང་ནགས་ཚལ་སྟུག་པོས་ཁྱབ་པར་བཤད་དོ།
༦  བོད་ཅེས་པའི་མིང་བྱུང་ཚུལ་ཅི་འདྲ་ཡིན། ཀ འདོད་རྒྱལ་གྱི་མིང་ཡིན་ཟེར་མཁན་ཡོད། ཁ བོན་ཞེས་པ་ལས་ཟུར་ཆགས་པ་བཞེད་མཁན་ཡོད། ག འབོད་པ་ཞེས་པའི་ཐ་སྙད་ལས་བྱུང་ཟེར། ང འོད་གསལ་ལྷ་ལས་ཆད་པའི་འོད་དེ་བོད་ལ་གྱུར་པ་རེད་ཅེས་གསུང་ཚུལ་མི་འདྲ་བ་ཤིན་ཏུ་མང་ངོ་།
༧  བོད་ཁམས་འདིར་འགྲོ་བ་མིའི་རིགས་མ་བྱུང་བའི་སྔོན་དུ་གང་འདྲ་ཞིག་ཡིན།
    རི་ལུང་ཐམས་ཅད་ཆུས་གང་ནས་ཡོད་པར་བཤད་ལ།དེ་རྗེས་ཆུ་འཁྱིལ་སའི་ཡོལ་གོ་རྣམས་ཀྱི་ཁ་ཤོར་ཏེ་ཆུ་རྣམས་རྒྱ་མཚོར་བཞུར་བའི་ཤུལ་དུ་རིམ་གྱིས་རྩི་ཤིང་ནགས་ཚལ་རྒྱས།དེ་ནས་རིམ་གྱིས་སྲོག་ཆགས་དག་འཕེལ་བའོ།།
༨  རྩེད་ཐང་ཞེས་པའི་མིང་དེ་ཇི་ལྟར་ཐོགས།
    སྤྲེལ་ཕྲུག་རྣམས་མགོན་པོ་རི་ནས་ཐང་དུ་བབས་ཏེ་རྩེད་ས་ཡིན་པས་ན་རྩེད་ཐང་ཞེས་ཐོགས་སོ།།
༩  བོད་མིའི་གདུང་དྲུག་དེ་གང་ཡིན་ནམ།
    སེ་རྨུ་ལྡོང་སྟོང་སྟེ་རུས་ཚན་ཆེན་པོ་བཞིར་ཆགས་པ་དང་།དེའི་སྟེང་དུ་དབྲ་དང་འགྲུ་གཉིས་བསྣན་པའོ།།
༡༠  བོད་ལ་རུས་མེད་ཟེར་བའི་བཤད་ལུགས་དེ་བདེན་ནམ་རྒྱུ་མཚན་ཅི།
    མི་བདེན་ཏེ་བོད་ལ་ཆོས་ལུགས་ཀྱི་མིང་འདོགས་ལུགས་དར་ཁྱབ་བྱུང་ཡོད་ཀྱང་རུས་ནི་ད་ལྟའི་བར་དུ་གནས་སོ།།
༡༡  གནམ་གྱི་ཁྲི་བདུན་དེ་གང་གང་རེད།
    ༡ གཉའ་ཁྲི་བཙན་པོ། ༢ མུ་ཁྲི་བཙན་པོ།༣ དིང་ཁྲི་བཙན་པོ། ༤སོ་ཁྲི་བཙན་པོ། ༥མེར་ཁྲི་བཙན་པོ། ༦གདགས་ཁྲི་བཙན་པོ། ༧སྲིབ་ཁྲི་བཙན་པོ།།
༡༢  བོད་རྒྱལ་ཐོག་མའི་མིང་ལ་གང་ཟེར།། གཉའ་ཁྲི་བཙན་པོ་ཟེར།།
༡༣  ཅིའི་ཕྱིར་གཉའ་ཁྲི་བཙན་པོ་ཟེར། བོད་འབངས་རྣམས་ཀྱིས་རྗེ་ཉིད་གཉའ་བར་བཏེགས་ནས་ཁུར་བས་སོ།།
༡༤ གཉའ་ཁྲི་བཙན་པོ་ལ་མིང་གཞན་གང་གསོལ་བ་དང་ཁོང་གི་མ་ཡུམ་མིང་ལ་གང་ཟེར།ཁོང་གི་སྐུ་ལུས་ལ་ཐུན་མིན་གྱི་ཁྱད་ཆོས་གང་དག་ཡོད།
      མིང་གཞན་ལ་འོ་དེ་པུ་རྒྱལ་དང་།ཨུ་བེ་ར་ཟེར་ལ།མ་ཡུམ་ལ་བྱ་མོ་བཙུན་ཟེར།ཁོང་གི་དམིགས་བསལ་གྱི་ཁྱད་ཆོས་ནི་ལྕེས་གདོང་གི་དཀྱིལ་འཁོར་ཁེབས་པ།ཕྱག་སོར་དྲ་བས་འབྲེལ་བ།ནུས་མཐུ་ཆེ་བ་ཞིག་གོ།
༡༥  བོད་རྒྱལ་ལོ་ཞེས་པ་དེ་གང་འདྲ་བརྩིས་པ་དང་།ད་ལྟར་བོད་རྒྱལ་ལོ་ག་ཚོད་སོང་རེད།
      སྤྱི་ལོའི་སྔོན་གྱི་ལོ༡༢༦ལ་གཉའ་ཁྲི་བཙན་པོ་བོད་ཀྱི་ལོ་རྒྱུས་ཐོག་གི་རྒྱལ་ཐོག་མ་བྱས་ཤིང་།དེ་ནས་བོད་རྒྱལ་ལོ་བརྩིས་པ་རེད་ལ།༢༠༠༨ལོའི་བར་བོད་རྒྱལ་ལོ་༢༡༣༥སོང་བའོ།།
༡༦  རྗེ་གཉའ་ཁྲི་བཙན་པོའི་འབྱུང་ཁུངས་ཇི་ལྟར་ཡིན་མིན་སྐོར་ལ་བཤད་ཚུལ་མི་འདྲ་བ་ཨེ་ཡོད།
      རྒྱ་གར་ནས་བྱུང་བ་རེད་ཟེར་བ་དང་།འོད་གསལ་ལྷ་ལས་བྱུང་བ་རེད་ཟེར་བ་སོགས་བཤད་ཚུལ་མི་འདྲ་བ་མང་པོ་ཡོད་ཀྱང་ད་ལྟའི་བོད་རང་སྐྱོང་ལྗོངས་སྤོ་བོ་དང་ཉིང་ཁྲི་རྫོང་གི་བར་གྱི་སྤོ་བོའི་ཡུལ་ནས་བྱུང་བའི་བོད་རང་གི་མི་ཡིན་ནོ།།
༡༧  གཉའ་ཁྲིའི་སྐབས་སུ་བོད་ལ་ཆོས་ཨེ་ཡོད།ཆོས་ལུགས་ཀྱི་མིང་ལ་གང་ཟེར། ཡོད་དེ་བོན་ཆོས་ཟེར།།
༡༨  རྗེ་ཡིས་རྒྱལ་ཆས་སྤྲས་པ་དང་ཕ་ཤུལ་བུ་འཛིན་གྱི་རྒྱལ་རྒྱུད་འཛིན་པའི་སྲོལ་དེ་རྒྱལ་པོ་སུ་ཡི་རིང་དུ་དར། རྗེ་གཉའ་ཁྲིའི་སྐབས་སུ་དར་རོ།།
༡༩  བོད་དུ་མཁར་ལ་སྔ་བ་ནི་གང་ཡིན། ཡུམ་བུ་བླ་མཁར་རོ།།
༢༠ བོད་དུ་ཡུལ་ལ་སྔ་བ་ནི་གང་ཡིན། ཡར་ལུང་སོག་ཀ་ཡིན་ནོ།།
༢༡  བོད་དུ་གྲོང་ལ་སྔ་བ་གང་ཡིན། ཕྱིང་བ་སྟག་རྩེ་ཡིན་ནོ།།
༢༢  བོད་དུ་ཞིང་ལ་སྔ་བ་གང་ཡིན། ཟོ་དང་ཞིང་ཡིན་ནོ།།
༢༣  ཕོ་བྲང་ཡུམ་བུ་བླ་སྒང་དེ་ཡུལ་གང་དུ་གནས་ཡོད།
      བོད་ལྗོངས་ལྷོ་ཁ་ས་ཁུལ་སྣེ་གདོང་རྫོང་ཕོ་བྲང་ཆུས་ཁོངས་ཇོ་མོ་བཀྲ་ཤིས་ཚེ་རིང་ཞེས་པའི་རི་ནུབ་ཏུ་ཟུར་གཉིས་བརྐྱངས་པའི་གཡོན་གྱི་རི་ཟུར་བྲག་རིའི་སྟེང་ཐོག་ལྟ་བུར་གནས་སོ།ཡུམ་བུ་བླ་སྒང་དང་ཡུམ་བུ་བརླ་སྒང་།ཡུམ་བུ་གླ་སྒང་སོགས་འབྲི་ལུགས་མང་པོ་སྣང་ངོ་།།
༢༤  གནམ་གྱི་ཁྲི་བདུན་གྱི་བང་སོ་གང་དུ་བཏབ།
      རྒྱལ་པོ་དེ་རྣམས་ནམ་མཁར་ཡལ་ནས་བང་སོ་མེད་པར་གྲགས།
 ༢༥  བར་གྱི་སྟེང་གཉིས་དེ་གང་ཡིན།
      གྲི་གུམ་བཙན་པོ་དང་པུ་དེ་གུང་རྒྱལ་ཡིན་ནོ།།
༢༦  གྲི་གུམ་བཙན་པོའི་དུས་སུ་བོན་དར་བ་རེད་དམ་བསྣུབས་པ་རེད། རྒྱུ་མཚན་ཅི།
      བོན་བསྣུབས་པ་རེད།རྒྱུ་མཚན་ནི་བོན་གཤེན་དག་གི་མངའ་ཐང་ཇེ་ཆེར་སོང་སྟེ་ཐད་ཀར་བཙན་པོའི་རྒྱལ་སྲིད་ལ་ཐེ་གཏོགས་དང་ཚོད་འཛིན་བྱས་པས་སོ། ༢༧གྲི་གུམ་བཙན་པོ་སུས་བཀྲོངས་པ་རེད།ཅིའི་ཕྱིར། རྒྱལ་པོ་འདི་ཡིས་བོན་གྱི་བསྟན་པ་བསྣུབས་པས།འབངས་ལོ་ངམ་གྱིས་རྒྱལ་པོའི་དཔྲལ་བ་ལ་མདའ་འཕངས་ནས་བཀྲོངས་སོ།
༢༧ གྲི་གུམ་བཙན་པོ་ལ་བུ་དུ་བྱུང་།དེ་དག་ལས་པུ་དེ་གུང་རྒྱལ་དེ་སུ་རེད།
      བྱ་ཁྲི་དང་།ཤ་ཁྲི།ཉ་ཁྲི་བཅས་བྱུང་།དེ་ལས་སྲས་བྱ་ཁྲི་དེ་པུ་དེ་གུང་རྒྱལ་ཡིན་ནོ།།
༢༨  བློན་པོ་ལོ་ངམ་བསད་མཁན་སུ་རེད།
      བློན་པོ་རུ་ལས་སྐྱེས་ཀྱིས་བསད་པ་རེད།
༢༩  བོད་ཀྱི་རྒྱལ་པོ་རྣམས་ཀྱི་བང་སོ་ཐོག་མ་དང་།ཁྲབ་ཀྱི་ཐོག་མ་དེ་རྒྱལ་པོ་སུ་ཡི་དུས་སུ་བྱུང་།
      རྒྱལ་པོ་བརྒྱད་པ་གྲི་གུམ་བཙན་པོའི་དུས་སུ་བྱུང་ངོ་།།
༣༠  ཅིའི་ཕྱིར་པུ་དེ་གུང་རྒྱལ་ཟེར།
       ཡུམ་གྱི་ལྷ་ལ་དམོན་བོར་བས་ནམ་མཁའ་ནས་ཁྱེད་ཀྱི་བུ་དེ་ཀུན་ལས་རྒྱལ་བར་འགྱུར་རོ་ཞེས་པའི་སྒྲ་བྱུང་བས་བྱ་ཁྲིའི་མཚན་ལ་པུ་དེ་གུང་རྒྱལ་ཟེར་རོ།།
༣༡  ཕྱིང་བ་སྟག་རྩེ་དེ་རྒྱལ་པོ་སུ་ཞིག་་གི་དུས་སུ་བརྩིགས།
       པུ་དེ་གུང་རྒྱལ་གྱི་སྐབས་སུ་བརྩིགས་སོ།
༣༢  བོད་ཀྱི་མཛངས་མི་བདུན་ལས་དང་པོའི་མིང་ལ་ཅི་ཟེར།
      མཛངས་མི་དང་པོའི་མིང་ལ་རུ་ལས་སྐྱེས་ཞེས་ཞུའོ།།
༣༣  རུ་ལས་སྐྱེས་ཀྱིས་མཛངས་པའི་ལས་སུ་ཅི་བྱས།
      མཛངས་པའི་ལས་སུ་ཤིང་སྲེག་སོལ་བ་བྱུང་།དེ་ཡིས་རྡོ་བཞུགས་གསེར་དངུལ་ཟངས་ལྕགས་བྱུང་།ཤིང་ལ་མིག་ཕུག་གཤོལ་དང་གཉའ་ཤིང་བྱས།ས་ཞིང་བརྐོས་ནས་ཕུ་ཆུ་ཡུར་དུ་དྲངས།རྨོན་པ་དོར་བསྡེབས་སྤང་ཐང་ཞིང་དུ་རྨོས།བརྒལ་བའི་མི་ཐར་ཆུ་ལ་ཟམ་པ་བཙུགས།
༣༤ རུ་ལས་སྐྱེས་དེ་རྒྱལ་པོ་སུ་ཡི་བློན་པོ་ཡིན།
      གྲི་གུམ་བཙན་པོ་དང་པུ་དེ་གུང་རྒྱལ་གཉིས་ཀྱི་བློན་པོ་ཡིན།
༣༤  བར་གྱི་སྟེང་གཉིས་ཀྱི་བང་སོ་གང་དུ་བཏབ།  གཡའ་དང་རྫ་ལ་བཏབ།
༣༥  ས་ཡི་ལེགས་དྲུག་དེ་གང་གང་ཡིན།
       ཨེ་ཤོ་ལེགས་དང་།དེ་ཤོ་ལེགས།ཐི་ཤོ་ལེགས།གུ་རུ་ལེགས།འབྲོང་ཞི་ལེགས།ཨི་ཤོ་ལེགས་བཅས་སོ།
༣༦  མཛངས་མི་གཉིས་པའི་མིང་ལ་ཅི་ཟེར།
      ལྷ་བུ་མགོ་དཀར་ཟེར།དེ་ནི་བློན་པོ་རུ་ལས་སྐྱེས་ཀྱི་བུ་ཡིན།
༣༧  མཛངས་མི་གཉིས་པས་དེ་རྒྱལ་པོ་སུ་ཡི་སྐབས་བྱུང་།
      ཨེ་ཤོ་ལེགས་ཀྱི་སྐབས་སུ་བྱུང་།
༣༨  མཛངས་མི་གཉིས་པས་མཛངས་པའི་ལས་སུ་ཅི་བྱས།
      མཛངས་པའི་ལས་སུ་ཞིང་ལ་དོར་ཁ་བརྩིས།འབྲོག་ལ་ཐུལ་རྩིས་ཕུ་ཆུ་ཡུར་དུ་དྲངས།མདའ་ལ་ཆུ་མ་རྨོ་བ་འདི་ནས་བྱུང་།
༣༩  ས་ཡི་ལྡེ་བརྒྱད་དེ་གང་གང་ཡིན།
      ས་ནམ་ཟིན་ལྡེ།ལྡེ་འཕྲུལ་ནམ་གཞུང་བཙན།སེ་སྣོལ་ནམ་ལྡེ།སེ་སྣོལ་བོ་ལྡེ།ལྡེ་སྣོལ་ནམ།ལྡེ་ནམ་པོ།ལྡེ་རྒྱལ་པོ།ལྡེ་སྤྲིན་བཙན་བཅས་སོ།
༤༠  ལྡེ་བརྒྱད་ཀྱི་བང་སོ་གང་དུ་བཏབ།  ཆུ་བོའི་གཞུང་ལ་བཏབ།
༤༡  ལོ་རྒྱུས་ཐོག་འོག་གི་བཙན་ལྔ་ལ་གྲགས་པའི་རྒྱལ་པོ་དེ་གང་གང་རེད།
      རྒྱལ་ཏོ་རེ་ལོང་བཙན།ཁྲི་བཙན་ནམ།ཁྲི་སྒྲ་དཔུང་བཙན།ཁྲི་ཐོག་རྗེ་བཙན།ལྷ་ཐོ་ཐོ་གཉན་བཙན་བཅས་ལགས།
༤༢  གཉའ་ཁྲི་བཙན་པོ་ནས་ཁྲི་ཐོག་རྗེ་བཙན་བར་བོད་རྒྱལ་གདུང་རབས་ཉི་ཤུ་རྩ་བདུན་རིང་ཆབ་སྲིད་གང་ལ་བརྟེན་ནས་བསྐྱངས།
      བོན་སྒྲུང་ལྡེའུ་གསུམ་གྱིས་བསྐྱངས་།
༤༣  རྒྱལ་པོ་གང་གི་རིང་ལ་དམ་པའི་ཆོས་ཀྱི་དབུ་བརྙེས།
       ལྷ་ཐོ་ཐོ་གཉན་བཙན་གྱི་དུས་སུ་དམ་ཆོས་དབུ་བརྙེསསོ།
༤༤  གཉན་པོ་གསང་བ་ཞེས་པ་དེ་གང་ལ་ངོས་འཛིན་དགོས།
       སྐུའི་རྟེན་རིགས་ལྔའི་ལུགས་ཚར་གཅིག གསུང་གི་རྟེན་དུ་དཔང་ཀོང་ཕྱག་རྒྱ་མ་དང་གཙུག་ཏོར་དྲི་མེད།ཐུགས་ཀྱི་རྟེན་གསེར་གྱི་མཆོད་རྟེན་བང་རིམ་ལྔ་བ་བཅས་སོ།
༤༥  གཉན་པོ་གསང་བ་ཞེས་པ་བོད་ལ་དྲངས་ཡོང་མཁན་སུ་ཡིན།
      པཎྡི་ཏ་བློ་སེམས་འཚོ་དང་ལོ་ཙྭ་བ་ལི་ཐེ་སི་གཉིས་ཀྱིས་དྲངས་ཡོང་བའོ།།
༤༦  ཐོག་མར་བོད་ལ་དར་བའི་གསོ་བ་རིག་པ་ནི་གང་གི་ལུགས་ཡིན།།
       གཡུང་དྲུང་བོན་གྱི་ལུགས་ཡིན།
༤༧  བོད་ཀྱི་གསོ་བ་རིགས་པས་ནད་བཅོས་ཐབས་གཙོ་བོ་གང་ལ་བརྟེན།
       གཏར་སྲེག་བྱུག་གསུམ་ལ་བརྟེན་པའོ།
༤༨  བཙན་ལྔའི་བང་སོ་གང་དུ་བཏབ།
       བཙན་ལྔའི་བང་སོ་འཆིང་ཡུལ་དར་ཐང་དུ་བཏབ།བང་སོའི་དབྱིབས་ནི་ས་ཕུང་སྦྲ་འདྲ་ཡོད་ཟེར།
༤༩  ལྷ་ཐོ་ཐོ་གཉན་བཙན་དགུང་ལོ་ག་ཚོད་བཞུགས།
       བོད་ཀྱི་ལོ་རྒྱུས་དོན་ཆེན་རེའུ་མིག་ལྟར་ན།སྤྱི་ལོ་༢༥༤ལོ་ནས་སྤྱི་ལོ་༣༧བར་དགུང་ལོ་བརྒྱ་དང་ཉི་ཤུ་བཞུགས་སོ།
༥༠  ལྷ་ཐོ་ཐོ་གཉན་བཙན་གྱི་བླ་སྨན་པ་དེའི་མཚན་ལ་གང་གསོལ།
       སྨན་པ་དུང་གི་ཐོར་ཅོག་ཅན་ཞེས་ཞུ་ལ།ཁོང་གིས་རྒྱལ་པོ་ལྷ་ཐོ་ཐོ་གཉན་བཙན་དང་ཁྲི་གཉན་གཟུངས་བཙན་གཉིས་ཀྱི་བླ་སྨན་པ་མཛད་ཅིང་།བོད་དུ་བླ་སྨན་འཛུགས་པའི་སྲོལ་དེ་ནས་དར་རོ།
༥༡  བོད་གཅིག་གྱུར་བཟོས་པ་དེ་རྒྱལ་པོ་གང་གི་དུས་སུ་འགོ་རྩོམ།
       བོད་རྒྱལ་སྟག་རི་གཉན་གཟིགས་ཀྱི་སྐབས་སུ་འགོ་རྩོམ།
༥༢སྟག་རི་གཉན་གཟིགས་ཀྱི་སྐབས་སུ་བོད་དུ་རྒྱལ་ཕྲན་ཅི་ཙམ་མངའ་འོག་ཏུ་འདུས།
      རྒྱལ་ཕྲན་རྣམས་ཀྱི་སུམ་ཆ་གཉིས་མངའ་འོག་ཏུ་འདུས་སོ།།  
 ༥༣  མཛངས་མི་གསུམ་པ་དེ་སུ་ཡིན།
       ཁྲི་དོ་རི་སྣང་ཞེས་པ་དེ་ལགས།
༥༤  མཛངས་མི་བདུན་གྱི་གསུམ་པ་དེ་རྒྱལ་པོ་གང་གི་དུས་སུ་བྱུང་། སྟག་རི་གཉན་གཟིགས་ཀྱི་སྐབས་སུ་བྱུང་ངོ་།
༥༥  ཁྲི་དོ་རི་སྣང་མཛངས་བློན་དུ་འཇོག་པའི་བྱས་རྗེས་གང་།
       བྲེ་ཕུལ་སྲང་བཅོས་འབྲུ་མར་ཚད་ཀྱིས་བཅལ།།དགའ་གཉིས་ཚོང་བྱས་མཐུན་གཉིས་ལ་ལུང་བསྡེབས།
༥༦  རྒྱལ་པོ་གང་གི་དུས་སུ་ཚོང་ལས་ཐོག་མ་དར་བ་ཡིན། སྟག་རི་གཉན་གཟིགས་ཀྱི་སྐབས་སུ་ཚོང་ལས་ཐོག་མ་དརབ་ཡིན།
༥༧  བྱང་ནས་ཚྭ་ཁ་རྙེད།བྱང་ཚྭ་ལྷོ་རུ་འདྲེན་པའི་སྲོལ་དེ་རྒྱལ་པོ་སུའི་རིང་ལ་བྱུང་།
       གནམ་རི་སྲོང་བཙན་གྱི་སྐབས་སུ་བྱུང་།
༥༨  བོད་རྒྱལ་ཉེར་དགུ་པ་དང་སུམ་ཅུ་པ།སོ་ཅིག་པ་བཅས་སོ་སོར་གང་དག་ཡིན།
       རིམ་བཞིན་ཁྲི་གཉན་གཟུངས་བཙན་དང་།འབྲོང་གཉན་ལྡེའུ།སྟག་རི་གཉན་གཟིགས་བཅས་སོ།།
༥༩  སྟག་རི་གཉན་གཟིགས་ཞེས་ཐོགས་དགོས་དོན་གང་ཡིན་ནམ།
      ཁོང་ནི་འབྲོང་གཉན་ལྡེའུ་དང་བཙུན་མོ་མཆིམས་བཟའ་ཀླུ་རྒྱལ་ངན་བུ་མཚོ་གཉིས་ཀྱི་སྲས་དམུས་ལོང་དཀོན་པ་བཀྲ་ཞེས་དེ་ཡིན་ལ།ཡབ་ཀྱི་ཞལ་ཆེངས་བཞིན་འ་ཞའི་ཡུལ་གྱི་སྨན་པ་སྤྱན་དྲངས་ཏེ་སྨན་བཅོས་བྱས་པས་མིག་ཕྱེ་སྐབས་སྐྱིད་ཤོད་སྟག་མོ་རི་ལ་རི་དྭགས་གཉན་འགྲོ་བ་གཟིགས་ཐུབ་པ་བྱུང་བས་མཚན་ཡང་སྟག་རི་གཉན་གཟིགས་གསོལ་ལོ།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...