སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
བཀའ་ཆེམས་ཀ་ཁོལ་མ།
རྩོམ་པ་པོ། ཆོས་རྒྱལ་སྲོང་བཙན་སྒམ་པོ། རྩོམ་སྒྲིག་པ། Lhamo དུས་ཚོད། 2014-2-21 10:31:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
ལེའུ་དང་པོ། ལོངས་སྤྱོད་རྫོགས་པའི་སྐུས་འདུལ་བ།
      ཨོཾ་མ་ཎི་པདྨེ་ཧཱུཾ། །དཀོན་མཆོག་གསུམ་པོ་བླ་ན་མེད་པར་མཉན་པ། ཇོ་བོ་ཐུགས་རྗེ་ཅན་ལ་མོས་ཤིང་གུས་པར་ཕྱག་འཚལ་ལོ། །རིགས་གསུམ་མགོན་པོའི་རྣམ་འཕྲུལ་གྱིས། །ཁ་བ་ཅན་གྱི་རྒྱལ་ཁམས་འདིར། །ཤ་ཟ་གདོང་དམར་འདུལ་བ་ཡི། །ཆོས་རྒྱལ་མེས་དབོན་ལ་སོགས་པ། །རྣམ་པ་གསུམ་དུ་མཚན་གསོལ་བའི། །ངོ་མཚར་རྨད་དུ་བྱུང་བ་ཡི། །རྒྱལ་པོའི་བཀའ་ཆེམས་འདི་ལྟར་ལགས། །མགོན་པོ་ཚེ་དཔག་ཏུ་མེད་པའི་སྲས། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་ཕྱུག་གི་སྐུ་ལུས་ཀྱི་བཀོད་པ་དང༌། རྫུ་འཕྲུལ་བསམ་གྱིས་མི་ཁྱབ་སྟེ། དེ་ཅིའི་ཕྱིར་ཞེ་ན། མདོ་དང་རྒྱུད་སྡེ་དུ་མ་ན་ཡང་མང་དུ་བཞུགས་ནས་ཡོད། ཡི་གེ་འདིའི་དཔེ་ཡང་སུ་ཐོ་དོད་ལ་མེད་པས་དཀའ་བ་ལགས་པས། དེ་བས་ན་འདི་བྲིས་པ་དང་ཀློག་འདོན་བྱས་པ་ལ་ཕན་ཡོན་གྱིས་བསོད་ནམས་ཆེན་པོ་བསམ་གྱིས་མི་ཁྱབ་པ་ཐོབ་ཡོང་བར་བཤད་ཅིང་ལུང་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། ཡེ་ཤེས་ཀྱི་མཁའ་འགྲོ་མས་ལུང་བསྟན་པ་ལས། གཞན་གྱིས་རྙེད་པ་མ་ཡིན་ཏེ། དེ་ཡང་རྒྱ་གར་གྱི་པཎྜི་ཏ་དཱི་བཾ་ཀཱ་ར་ཤྲཱི་ཛྙཱ་ན་ཞེས་བྱ་བ་འཕགས་པ་སྤྱན་རས་གཟིགས་ཐུགས་རྗེ་ཆེན་པོའི་ངོ་བོ་ཆེན་པོ་རྗེ་ལྷ་ཅིག་དེ་སྙེ་ཐང་འོར་ན་བཞུགས་ཙ་ན་རྒྱབ་རིའི་ངོས་ཆད་པའི་གསེབ་ན། ཨ་བ་བི་ཤོ་ཏའི་སྐད་ཀྱིས་མི་མ་ཡིན་པ་རྣམས་ལ་ཆོས་སྟོན་གྱིན་བཞུགས་པའི་དུས་སུ། ཕོ་བྲང་དམར་པོ་རི་དང་ལྕགས་ཁ་རི་གཉིས་ཀྱི་ཐད་ན་འཇའ་འོད་ཁ་དོག་མི་གཅིག་པ་ལྔ་འགྱུ་ཡིན་འགྲོ་བ་གཟིགས་ན། འདི་ཅིའི་ཡོན་ཏན་ཡིན་དྲིས་པ་དང༌། འདིའི་ཡོན་ཏན་ནི་རི་ཡ་གི་གཉིས་ཀྱི་ཤར་ན་རྗེ་གཉའ་ཁྲི་བཙན་པོའི་གདུང་རྒྱུད་ཆོས་རྒྱལ་སྲོང་བཙན་སྒམ་པོའི་ཐུགས་དམ་གྱི་ལྷ་ཁང་ཡོད། དེའི་ཡོན་ཏན་དང་ཆ་རྐྱེན་ཡིན་ཞེས་གྲགས་སོ། །སང་ནངས་པར་པཎྜི་ཏ་ན་རེ། རྒྱལ་བོ་སྲོང་བཙན་སྒམ་པོའི་ཐུགས་དམ་བལྟར་འགྲོ་གསུངས་ནས། མཆོད་པའི་ཆས་མང་པོ་ཁྱེར་ནས་བྱོན། དགེ་བཤེས་རྣལ་འབྱོར་བས་ཆིབས་པ་ཁྲིད་ནས་འཕྲུལ་སྣང་གི་སྒོ་ཁ་ན་ཕར་བྱོན་ཙ་ན། ཇོ་བོས་ཕྱག་གསུམ་མཛད་ནས་སང་ཀྲི་(སཾ་སྐྲྀ)ཏའི་སྐད་མང་པོ་འདོན་ཅིང་ན་བཟའ་བོར་སྟེ་རྒྱུགས་ནས་གཤེགས་སོ། །རྣལ་འབྱོར་བས་པཎྜི་ཏ་ལགས། ལྷ་ཤཱཀྱ་མུ་ནེ་ར་མོ་ཆེ་ན་བཞུགས་བྱས་ཀྱང་མ་གསན་པར་འཕྲུལ་སྣང་དུ་བཞུད་དོ། །དེ་ནས་ཇོ་བོ་ཕྱིར་བྱོན་ནས། རྣལ་འབྱོར་བ་ཁྱེད་ཀྱི་ངའི་མདུན་དུ་ཅི་འདུག་པ་མཐོང་ངམ་གསུངས་པས། ངས་ཅི་ཡང་མ་མཐོང་པཎྜི་ཏ་ཁྱེད་རེ་རིངས་བྱས་པས། པཎྜི་ཏའི་ཞལ་ནས་ཐུགས་རྗེ་ཆེན་པོ་ངའི་མདུན་དུ་བསུར་བྱུང་སྟེ། པཎྜི་ཏ་བོད་དུ་བྱོན་པ་ལེགས་སོ་གསུངས་ནས་མདུན་དུ་ང་ལ་བསུ་བ་མཛད། ངས་ཁོང་གི་ཕྱིར་རྒྱུགས་པས་མ་ཟིན་པར་ཇོ་བོ་རང་བྱོན་ལྔ་ལྡན་ལ་ཐིམ་སོང༌། ཁྱོད་ཀྱིས་མི་དཀར་པོ་དེ་ཨེ་མཐོང་གསུངས་པས་མ་མཐོང་ཟེར་རོ། །ཇོ་བོའི་ཞལ་ནས་མི་དཀར་པོ་ཅི་བྱུང་བ་དེ་རང་བྱོན་ལྔ་ལྡན་ལ་ཐིམ་སོང༌། ཇོ་བོ་རང་བྱོན་ལྔ་ལྡན་འདི་ཇོ་བོ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དངོས་ཡིན་ནོ་གསུང་ངོ༌། །དེར་པཎྜི་ཏ་དཔོན་སློབ་གཉིས་ཀྱིས་མཆོད་པ་རྣམ་པ་མང་པོ་ཕུལ་ནས་ལེགས་པར་གཟིགས་པས། པཎྜི་ཏའི་ཞལ་ནས་ལྷ་ཁང་འདི་སྤྲུལ་པའི་སྐུ་དང་ཁྱད་མེད་པ་ཞིག་འདུག་གསུངས། འདི་ཇི་ལྟར་བཞེངས་པའི་ལོ་རྒྱུས་ཤེས་ན་དགའ་བ་ལ་གསུང་ངོ༌། །དེ་ཙ་ན་ཁྱམས་ཁྲ་ཆེན་མོའི་སྒོ་རྩ་ན། རྒན་མོ་མུ་འགྲམ་སེའོ་བྱས་པ། སྐལ་ཐགས་བྱས་ནས་རྒྱགས་འཚོལ་ཞིང་རེས་འགའ་གཅེར་མོར་འགྲོ་བ། རེས་ངུ་རེས་རྒོད་པ་ལྷ་སའི་སྨྱོན་མ་བྱ་བ་ཞིག་ཡོད་པ་དེ་ནི། པཎྜི་ཏ་ལགས། ལྷ་ཁང་འདི་ཇི་ལྟར་བཞེངས་པའི་ལོ་རྒྱུས་ཤེས་པར་འདོད་དམ་ཟེར་བས། ཤེས་པར་འདོད་ཀྱི་ཁྱོད་ཀྱིས་ཤེས་སམ་བྱས་པས། ངས་ཏ་ཤེས་ཏེ་ང་ལ་བཤད་དབང་མེད། ཀ་བ་བུམ་པ་ཅན་གྱི་སྟེང་ནས་འདོམ་ཕྱེད་དང་གསུམ་གཞལ་བའི་ནང་ན། འདི་བཞེངས་མཁན་གྱིས་མཛད་པའི་ཡི་གེ་ཡོད་དོ། །དེ་ཐོན་ལ་ལྟོས་ཤིག་ཟེར་ནས་རྒན་མོ་མི་སྣང་བར་གྱུར་ཏོ། །དེ་ནས་སང་ནང་བར་པཎྜི་ཏ་དཔོན་གཡོག་གསུམ་གྱིས་ཤོག་དྲིལ་གསུམ་བཏོན་གཟིགས་པས། སྔོན་མ་ལ་བློན་པོ་རྣམས་ཀྱིས་བྱས་པའི་ལོ་རྒྱུས་ཟླ་བ་འདོད་འཇོ་བྱ་བ་བྱུང༌། བར་བ་གཉིས་པ་ལ་བཙུན་མོ་རྣམས་ཀྱིས་བྱས་པའི་དར་དཀར་གསལ་བ་བྱ་བ་བྱུང༌། ཕྱི་མ་གསུམ་པ་ནས་རྒྱལ་པོ་རང་གིས་མཛད་པའི་ལོ་རྒྱུས་བཀའ་ཆེམ་(ས)ཀྱི་ཡི་གེ་འདི་བྱུང་བ་ཡིན་ནོ། །ཇོ་བོ་པཎྜི་ཏ་དཱི་པཾ་ཀཱ་ར་ལ་ལུང་སྟོན་པའི་རྒན་མོ་གཅེར་བུ་རེས་ངུ་རེས་རྒོད་པའི་སྨྱོན་མ་དེ་ནི་རྒྱ་མོ་ཨོང་ཅོང་གི་སྐྱེ་བ་ཡིན་ཡང་ཟེར། རྗེ་བཙུན་སྒྲོལ་མ་སྔོན་མོའི་སྤྲུལ་པ་ཡང་ཡིན་གསུང༌། དེ་གཉིས་སུ་མེད་སོ་སོ་མ་ཡིན་ཐ་མི་དད་གསུང་ངོ༌། །སྨྱོན་མ་རྒན་མོ་རེས་ངུ་རེས་རྒོད་པའི་རྒྱུ་མཚན་ནི། རེས་ངུ་བ་ནི་སེམས་ཅན་དགེ་བ་ལ་མི་མོས་ཤིང་དུག་ལྔ་ལ་རང་དགར་སྤྱོད་ཅིང༌། སྡིག་པ་མང་དུ་བསགས་ནས་ངན་སོང་གསུམ་དུ་ལྟུང་བ་ལ་གཟིགས་ནས་ངུ་བ་ཡིན། རེས་རྒོད་པ་ནི་སེམས་ཅན་གྱི་དགེ་བ་བྱས་ཤིང་བྱང་ཆུབ་བསྒྲུབས་ནས། དུག་ལྔ་ཡེ་ཤེས་ལྔར་ལམ་གྱིས་ཤར་ནས་སངས་རྒྱས་སུ་འགྲོ་བ་འདུག་པ་ལ་གཟིགས་ནས་རྒོད་པ་ཡིན། རེས་འགའ་གཅེར་བུར་འོང་བ་དེ། སྐྱེས་ཀྱང་གཅེར་བུར་སྐྱེས། ཤི་ཡང་གཅེར་བུར་ཤི། ལུས་དང་རྒྱན་ཆ་དང་གོས་ཟས་རྣམས་མི་རྟག་པས་གཅེར་བུར་འོང་བ་ཡིན། འཚོ་བ་སྐལ་ཐགས་ལ་རེ་བ་ནི། གཞི་ཁང་ནང་ནོར་རྫས་འདུས་བྱས་ཐམས་ཅད་ཁྱེར་དབང་མེད་མི་རྟག་པར་བཞག་ནས་འགྲོ་བས་འཚོ་བ་ལ་འཕྲལ་ཕྱེད་བྱེད་པ་ཡིན། ལྷ་ས་བཞེངས་ལུགས་བཤད་དབང་མེད་པ་ནི་བུད་མེད་སྐྱེ་བ་དམའ་བས་བཤད་དབང་མེད་པ་ཡིན། ཇོ་བོ་པཎྜི་ཏ་ལ་ལུང་སྟོན་ནུས་པ་ནི། པཎྜི་ཏ་དང་སྔོན་གྱི་འབྲེལ་བ་ཡོད་པས་ལུང་སྟོན་ནུས་པ་ཡིན་ནོ་གསུང་ངོ༌། །དེ་བཞིན་གཤེགས་པའི་གདུལ་བྱར་མ་གྱུར་པ་དེ། གངས་རི་དང་མཚོ་དང་ནགས་དང་རི་དྭགས་དང་གཅན་(ག)ཟན་དང་འདྲེ་སྲིན་གྱི་ཡུལ་དུ་ཡོད་པས་ལན་ཟེར་བ་ཡིན་ནོ་གསུང་ངོ༌། །བོད་ཡུལ་ཁ་བ་ཅན་གྱི་རྒྱལ་ཁམས་སུ་དེ་བཞིན་གཤེགས་པའི་གདུལ་བྱར་མ་གྱུར་པ་རྣམས་ལ། བཀའ་དྲིན་ཆེ་བ་རྣམ་པ་གསུམ་གྱི་སྒོ་ནས་བཀའ་དྲིན་ཆེ་བའོ། །དེ་ཡང་སྐྱེ་བོ་ཐ་མལ་བ་རྣམས་ལ་བཀའ་དྲིན་ཆེ་བ་དང༌། བྱང་ཆུབ་སེམས་དཔའ་རྣམས་ལ་བཀའ་དྲིན་ཆེ་བ་དང༌། དེ་བཞིན་གཤེགས་པ་རྣམས་ལ་བཀའ་དྲིན་ཆེའོ། །སྐྱེ་བ་ཐ་མལ་བ་རྣམས་ལ་བཀའ་དྲིན་ཆེ་བ་ནི། ལུང་གི་ཆོས་གོ་བར་བྱ་བའི་ཕྱིར་སྒྲུང་བསྟན། རིག་པའི་ཆོས་གོ་བར་བྱ་བའི་ཕྱིར་ལྡེའུ་བསྟན། བསླབ་པ་གསུམ་ལ་འཇུག་པ་གོ་བར་བྱ་བའི་ཕྱིར་གཡུ་རུང་གི་བོན་བསྟན། མི་དགེ་བ་ལས་བཟློག་ནས་སྤྱོད་པ་དག་པས་དགེ་བ་ལ་འགོད་པར་བྱ་བའི་ཕྱིར་དགེ་བ་བཅུའི་ཁྲིམས་བྱས་པ་ལ་སོགས་ཏེ་འོག་ནས་འབྱུང་བ་ཀུན་ཡིན་ནོ། །དེ་ལ་སྒྲུང་ནི་རྒྱལ་པོ་གྲགས་པ་མཐའ་ཡས་ཡང་ཟེར། རྒྱལ་པོ་སྤྱི་བོ་སྐྱེས་ཀྱིས་གཏམ་རྒྱུད་ལ་སོགས་པ་དང༌། བྱའི་སྒྲུང་དང༌། སྤྲེའུའི་སྒྲུང་དང༌། དེ་ལ་སོགས་པའི་གཏམ་རྒྱུད་མང་དུ་གསུངས་ཏེ། ར་སའི་གློ་འབུར་གོང་མ་ན་གཟུགས་བརྙན་དུ་བཀོད་ནས་ཡོད་དོ། །ལྡེའུ་ཡང་སྟེང་ན་དབུ་ཉི་མ་བ། འོག་ན་ཆུ་ཆར་ཅི་ཡི་བྱ་བྱས་སྣ་དྲངས་པ། ཐེམ་སྙེར་སྦ་བ་ཕྱིས་ཅི་ཡིན། དམར་པོ་སྤུ་མེད་བཅུག་ཅིང་ཕྱུང༌། སེར་བོ་མགོ་ཆེ་བསྐྱེད་ཅིང་རྒྱགས་ཅི་ཡིན། བྱ་བ་ལ་སོགས་པ་ནུབ་བྱང་མཚམས་ཀྱི་པང་ན་གཟུགས་བརྙན་དུ་བཀོད་ནས་ཡོད་དོ། །བོན་ཡང་ཤ་བ་ནམ་མཁའ་ལ་འགྲོ་ཤེས་པས་སྣ་དྲངས་པ་ལ་སོགས་པ་དང༌། ནད་པ་མངོན་སུམ་དུ་གསོ་བ་ལ་སོགས་པ་ཀ་བ་ཤིང་ལོ་ཅན་གྱི་འོག་ན་གཏེར་དུ་སྦས་ནས་ཡོད་དོ། །ཁྲིམས་ཀྱི་ཡི་གེ་ནི་བསད་ན་སྟོང༌། འདོད་པ་རྐུས་ན་འཇལ་འདོད། རྫུན་དང་ཕྲ་མ་ལ་ལྕེ་འབྲེག མི་བདེན་པ་ལ་ཡོ་ལོག་གཏོང་བྱ་བ་ལ་སོགས་པ་རྒྱལ་བློན་ཀུན་ལ་སྒྲ་བསྒྲགས་ནས་ཁྲིམས་ཡིག་ཕྱག་མཛོད་ན་མངའ་སྟེ། མི་དགེ་བ་ལས་བཟློག་པའི་ཁྲིམས་བཅས་པ་ཡང༌། དབུ་རུར་ལིའི་བན་དྷེ་དང་འཕྲད་པ་ལ་སོགས་པ། དགུང་ལོ་བརྒྱད་བཞེས་པའི་དུས་ན་སྔ་དྲོ་ཞིག་ཅེས་སོ། །བྱང་ཆུབ་སེམས་དཔའ་ལ་བཀའ་དྲིན་ཆེ་བ་ནི། སངས་རྒྱས་པའི་དུས་སུ་མདོ་སྡེ་བཞི་གསུངས་པ་དེ་ལྟར་རོ། །དེ་བཞིན་གཤེགས་པ་ལ་བཀའ་དྲིན་ཆེ་བ་ནི། རྒྱལ་པོ་སྲོང་བཙན་སྒམ་པོ་དབང་བསྐུར་བའི་དུས་ཡིན་ནོ། །ཚུལ་དེ་བཞིན་དུ་ནམ་མཁའི་མཐས་གར་ཁྱབ་པར་སེམས་ཅན་གྱིས་ཁྱབ། དེས་གར་ཁྱབ་པར་འཕགས་པ་ཐུགས་རྗེ་ཆེན་པོ་སྤྱན་རས་གཟིགས་དེ་ཡང༌། དང་པོ་སངས་རྒྱས་འོད་དཔག་མེད་ལ་སོགས་པ་སངས་རྒྱས་བྱེ་བ་ཕྲག་བཅུ་གཅིག་གི་དྲུང་དུ་འདི་ལྟར་སེམས་བསྐྱེད་དོ། །བདག་གི་བ་སྤུའི་བུ་ག་རེ་རེ་ནས་ཀྱང༌། སྐད་ཅིག་མ་རེ་རེ་ལ་དུས་གསུམ་གྱི་སངས་རྒྱས་རྣམས་ཀྱིས་མཛད་པའི་རྣམ་འཕྲུལ་བྱུང་ནས། སེམས་ཅན་གཅིག་ཀྱང་མ་ལུས་པར་བླ་ན་མེད་པའི་བྱང་ཆུབ་སེམས་ལ་འགོད་པར་བྱའོ། །དེ་མ་བཀོད་པར་རང་རེ་གཅིག་པུ་བདེ་བ་འདོད་པའི་བློ་བྱུང་ན། ངའི་མགོ་ཨ་རྫ་ཀའི་དོག་པ་བཞིན་དུ་ཚལ་བ་བཅུར་འགས་པར་གྱུར་ཅིག་ཅེས་སྨོན་ལམ་བཏབ་བོ། །དེ་ལ་འོད་དཔག་ཏུ་མེད་པ་ལ་སོགས་པས་འདི་སྐད་ཅེས་གསུངས་སོ། །ལེགས་སོ་ལེགས་སོ། །རིགས་ཀྱི་བུ་བདག་ཅག་ལ་སོགས་པ་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱིས་ཀྱང་ཚུལ་དེ་ལྟ་བུ་ལ་བརྟེན་ནས་སངས་རྒྱས་པ་ཡིན་པས། ཁྱོད་ཀྱིས་སེམས་ཅན་འདོན་པའི་གྲོགས་ཀྱང་ངས་བྱ་ཡི་གསུང་ངོ༌། །དེ་ནས་སྤྱན་རས་གཟིགས་ཀྱང་བྱང་ཆུབ་བསྒྲུབས་ནས། ལོངས་སྤྱོད་རྫོགས་པའི་སྐུས་འདུལ་བའི་སེམས་ཅན་རྣམས་ལ་ལོངས་སྤྱོད་རྫོགས་པའི་སྣང་བ་བསྟན་ནས་དོན་མཛད། སྤྲུལ་པའི་སྐུས་འདུལ་བ་ལ་སྤྲུལ་པའི་སྐུའི་སྣང་བ་བསྟན་ནས་དོན་མཛད། དེ་བཞིན་དུ་སྟག་དང་རི་བོང་དང༌། ཉན་ཐོས་དང༌། རང་སངས་རྒྱས་དང་དེ་བཞིན་དུ་སྣང་བ་མ་དག་པ་རྣམས་ལ་རྒྱལ་པོ་ལ་སོགས་པ་དང་སྐལ་བ་མཉམ་པའི་སྣང་བ་བསྟན་ནས། གང་ལ་ཅིས་འདུལ་བའི་འཕྲིན་ལས་མཛད་ནས། སེམས་ཅན་ཐམས་ཅད་བྱང་ཆུབ་སེམས་དཔའི་ས་ལ་བཀོད་ནས། སེམས་ཅན་ཐམས་ཅད་བྱང་ཆུབ་སེམས་དཔའི་ས་ལ་བཀོད་ནས། ད་མ་ལུས་སྙམ་ནས་བལྟས་པས་སེམས་ཅན་ནི་ཉུང་དུ་མ་སོང་བར་འདུག་གོ །ལན་གཉིས་ལན་གསུམ་གྱི་བར་དུ་བཏོན་ཡང་ཉུང་དུ་མ་སོང་བས་ཡི་མུག་སྟེ། ཀྱེ་མ་དེ་བཞིན་གཤེགས་པའི་དགོངས་པ་བསམ་གྱིས་མི་ཁྱབ། ནམ་མཁའི་ཁམས་བསམ་གྱིས་མི་ཁྱབ། སེམས་ཅན་གྱི་ཁམས་བསམ་གྱིས་མི་ཁྱབ་བྱ་བ་བདེན་པར་འདུག ངས་དེ་ཙམ་པའི་སེམས་ཅན་གྱི་དོན་བྱས་རུང་ད་དུང་ཉུང་དུ་མ་སོང་བར་འདུག སེམས་ཅན་གྱི་དོན་བྱེད་དུ་མི་བཏུབ་པར་འདུག ད་ང་རང་གཅིག་པུ་ཞི་བའི་བདེ་བ་ཐོབ་པར་བྱའོ་སྙམ་པ་དང༌། སྔར་གྱི་དམ་བཅའ་ཉམས་ནས་མགོ་བོ་ཚལ་བ་བཅུར་གས་སོ། །དེའི་ཚེ་དེའི་དུས་ན་འོད་དཔག་ཏུ་མེད་པས་མགོ་གས་པ་དེ་སྤྱི་བོར་བསྡུས་ཏེ། ཁྱོད་ཀྱིས་བདག་ཅག་སངས་རྒྱས་བྱེ་བ་ཕྲག་བཅུ་གཅིག་སླུ་བར་བྱེད་པ་ཡིན་ནམ། སེམས་ཅན་གྱི་དོན་འཁོར་བ་མ་སྟོངས་ཀྱི་བར་དུ་བྱེད་པ་ཡིན་ནོ་གསུངས་པས། མགོ་བོ་ཚལ་བ་བཅུར་གས་པ་དེ་ཞལ་བཅུར་གྱུར་ཏོ། །ཡང་སྔ་མ་བཞིན་དུ་སྐུ་ལུས་ཀྱི་བཀོད་པ་མཛད་ནས་གང་ལ་ཅིས་འདུལ་བ་དེའི་སྐུར་བསྟན་ནས་སེམས་ཅན་གྱི་དོན་མཛད་དོ། །དེ་ལ་ལོངས་སྤྱོད་རྫོགས་པའི་སྐུས་འདུལ་བ་གང་ཞེ་ན། དེ་ཡང་ནམ་མཁའི་ཁམས་གང་བ་ཞིག་ཡོད་དོ། །དེའི་ཞིང་ཁམས་ཤིག་བཤད་པར་བྱ་སྟེ། འཇིག་རྟེན་གྱི་ཁམས་མེ་ཏོག་གིས་བརྒྱན་པ་ཞེས་བྱ་བ་ཞིག་ཡོད་དེ། དེ་ལ་རྒྱར་མི་མཇེད་ཀྱི་འཇིག་རྟེན་གྱི་ཁམས་འབུམ་ཕྲག་བཅུའི་རྒྱ་དང་མཉམ་མོ། །དེའི་སྟེང་ན་རྣམ་པར་སྣང་མཛད་གངས་ཆེན་མཚོའི་སྐུ་དང་མཉམ་པ་ཞིག་བཞུགས། དེའི་བ་སྤུའི་བུ་ཁ་ཐམས་ཅད་ཞིང་ཁམས་མི་འདྲ་བཀང་ནས་སེམས་ཅན་གྱི་དོན་མཛད་དོ། །བ་སྤུ་གྱེན་ལ་ལྟ་བ་ཐམས་ཅད་འཇིག་རྟེན་གྱི་ཁམས་གཞི་མཉམ་པ་ཞེས་བྱ་སྟེ། དེར་སངས་རྒྱས་བྱོན་ནས་སེམས་ཅན་གྱི་དོན་མཛད་དོ། །བ་སྤུ་ཁ་ཕྲེད་ལ་ལྟ་བ་ཐམས་ཅད་ངོས་ཕྱལ་ཞེས་བྱ་སྟེ། དེར་ཉན་ཐོས་དང་རང་སངས་རྒྱས་ཐམས་ཅད་ཀྱིས་སེམས་ཅན་གྱི་དོན་མཛད་དོ། །བ་སྤུ་ཁ་ཐུར་ལ་ལྟ་བ་ཐམས་ཅད་གལ་ལོག་ཅེས་བྱ་བ་དང༌། སྤྱན་གྱི་བུ་ག་ནས་འཇུག་པ་ཁྱིམ་ཅན་ཅེས་བྱ་སྟེ། རང་དང་ལུས་དང་སྐལ་བ་མཉམ་པར་སེམས་ཅན་གྱི་དོན་མཛད་དོ། །ཕྱག་མཉམ་བཞག་གི་སྟེང་ན་སྤོས་ཀྱི་རྒྱ་མཚོ་ཆེན་པོ་ཡོད་པའི་ནང་ན། པདྨ་ཡོད་པའི་ཟེའུ་འབྲུ་ལ་ཞིང་ཁམས་དཔག་ཏུ་མེད་པ་ཅི་ཡོད་པ་དེའི་ཟེའུ་འབྲུ་གཅིག་གི་ནང་ན་ཞིང་ཁམས་ཉི་ཤུ་རྩ་ལྔ་ཡོད་པའི། བཅུ་གསུམ་པ་ནི་མི་མཇེད་ཀྱི་འཇིག་རྟེན་གྱི་ཁམས་འདི་ཡིན་ཏེ། རྣམ་པར་སྣང་མཛད་ཀྱི་ཐུགས་ཀ་ན་ཡོད་པ་ཡིན་ནོ། །འདིར་སྐྱེས་པའི་སེམས་ཅན་རྣམས་ནི་ཡིད་འབྱུང་བ་ཤས་ཆེ་སྟེ། འཇིག་རྟེན་གྱི་ཁམས་གཞན་དུ་བསྐལ་བར་དགེ་སྡིག་སྤྱད་པ་བས་འདིར་སྐད་ཅིག་ཙམ་ལ་སྤྱད་པ་ནུས་པ་ཆེའོ། །ཚུལ་འདི་ལྟ་བུ་ནི་གསང་བ་རྡོ་རྗེ་ཐོད་པའི་རྒྱུད་ལས་བཤད། སངས་རྒྱས་ཕལ་བོ་ཆེའི་མདོ་ལས་ཀྱང་ཅུང་ཞིག་གསལ་ལོ། །ལོངས་སྤྱོད་རྫོགས་པའི་སྐུས་འདུལ་བའི་ལེའུ་སྟེ་དང་པོའོ།། །།
ལེའུ་གཉིས་པ། སྐུ་ལུས་ཀྱི་བཀོད་པ་མཛད་པ།
      དེ་ནས་ཡང་འཇིག་རྟེན་གྱི་ཁམས་མི་མཇེད་འདིའི་དབང་དུ་བྱས་ན། འོག་ནམ་མཁའ་སྟོང་པའི་གཞི་རླུང་རྡོ་རྗེ་རྒྱ་གྲམ་གྱི་དཀྱིལ་འཁོར་གཅིག་གིས་འདེབས་པ། སྤྲུལ་སྐུ་གཅིག་གིས་གདུལ་བྱར་གྱུར་པ་འདི། རྒྱལ་བ་ཤཱཀྱ་ཐུབ་པར་སྐུ་སྤྲུལ་ནས་འགྲོ་བ་སེམས་ཅན་གྱི་དོན་མཛད་དོ། །འདི་ན་འཛམ་བུའི་གླིང་འབུམ་ཕྲག་གཉིས་སྟོང་ཡོད་པ་ལས། འཛམ་བུའི་གླིང་འདིའི་དབང་དུ་བྱས་ན་འོག་མིན་གྱི་གནས་ནས་རྣམ་པར་སྣང་མཛད་འོད་ཀྱི་རྒྱལ་པོའི་ཐུགས་ཀ་ནས་པདྨའི་ཟེའུ་འབྲུ་སྟོང་པའི་ནང་ནས་ཕྱོགས་ཐམས་ཅད་ནས་རླུང་ལངས་པས། རླུང་གི་དཀྱིལ་འཁོར་མཐིང་ནག་ཟླ་གམ་ཚན་པོ་ཆེའི་སྟོབས་ཀྱིས་ཀྱང་མི་ཤིགས་པ་ཞིག་ཆགས། དེའི་སྟེང་དུ་གསེར་གྱི་སྙིང་པོ་ཅན་གྱི་སྤྲིན་ལས་ཆར་གཉའ་ཤིང་གི་རྒྱུན་ཙམ་བབ་པས། ཆུའི་དཀྱིལ་འཁོར་དཀར་པོ་ཟླུམ་པོ་ཆགས། དེ་རླུང་གིས་བསྲུབས་པ་ལས་གསེར་གྱི་གཞི་གྲུ་བཞི་ཆགས། དེའི་སྟེང་དུ་ཁམས་སྣ་ཚོགས་ཀྱི་སྤྲིན་ཆགས་པ་ལས། ཆར་གླང་པོ་ཆེའི་ཕོ་མཚན་ཙམ་བབ་པས། ཕྱིའི་རྒྱ་མཚོ་ཆེན་པོ་ཆགས། དེ་བསྲུབས་པས་རི་རབ་གསེར་གྱི་རི་བདུན། རོལ་པའི་མཚོ་བདུན། གླིང་བཞི་ལྕགས་རི་མུ་ཁྱུད་དང་བཅས་པ་ཆགས། དེ་ལྟར་སེམས་ཅན་ཡང་རིམ་གྱིས་ཆགས། དེའི་སྟེང་འོག་མིན་གྱི་ཕོ་བྲང་དུ་རྣམ་པར་སྣང་མཛད་གངས་ཆེན་མཚོ་འོད་ཀྱིས་བརྒྱན་པ་ཞིག་ཏུ་སྤྲུལ། དེའི་ཐུགས་ཀ་ནས་འོད་ཟེར་བྱེ་བ་ཕྲག་ཉིས་བརྒྱ་བཀྱེ་སྟེ། འོད་ཟེར་རེ་རེ་འཛམ་བུ་གླིང་རེ་རེར་སོང༌། དེའི་དཀྱིལ་ན་རྡོ་རྗེ་གདན་རེ་རེ་ཡོད་པའི་ལྦུ་བར་སོང་སྟེ་དབང་ཆེན་གསེར་གྱི་ས་གཞི་ལ་ཐུག་ལྦུ་བ་ཞུ། ལྦུ་བ་འཁྱིལ་བ་ལ་བྱང་ཆུབ་ཀྱི་ཤིང་རེ་རེ་སྐྱེས། ནམ་མཁའི་མཐོངས་དགའ་ལྡན་གྱི་ལྷ་གནས་རེ་རེ་ཆགས། ལྷའི་བུ་དམ་པ་ཏོག་དཀར་པོ་རེ་རེར་སྤྲུལ། གཟིགས་པ་ལྔ་ཡིས་འཛམ་བུའི་གླིང་ལ་གཟིགས། དེ་ནས་གླང་པོ་ཆེ་ཐལ་དཀར་མཆེ་བ་དྲུག་པར་སྐུ་སྤྲུལ་ཏེ། གྲོང་ཁྱེར་སེར་སྐྱར་རྒྱལ་པོ་ཟས་གཙང་གི་བཙུན་མོ་ཡུམ་སྒྱུ་མ་ལྷ་མཛེས་ཀྱི་ལྷུམས་སུ་ཞུགས་ཏེ། སྲས་རྒྱལ་བུ་དོན་གྲུབ་ཏུ་སྐུ་སྤྲུལ་ནས། མཛད་པ་བཅུ་གཉིས་ཀྱི་སྒོ་ནས་སེམས་ཅན་གྱི་དོན་མཛད་དོ། །དགའ་ལྡན་གནས་ནས་འཕོ་བ་དང༌། ལྷུམས་སུ་ཞུགས་དང་བལྟམས་པ་དང༌། གཞོན་ནུ་རོལ་རྩེད་མཛད་པ་དང༌། བཙུན་མོ་འཁོར་དུ་རོལ་བ་དང༌། ངེས་འབྱུང་དཀའ་ཐུབ་མཛད་པ་དང༌། སྙིང་པོར་གཤེགས་དང་བདུད་འདུལ་དང༌། བྱང་ཆུབ་ཆོས་འཁོར་མྱ་ངན་འདས་བཅས་སོ། །དེ་ནས་བཅོམ་ལྡན་འདས་ཀྱིས་བཀའ་འཁོར་ལོ་རིམ་པ་གསུམ་དུ་བསྐོར་པ་ནི། དང་པོ་ཡུལ་ཝ་ར་ཎ་སིར་བདེན་པ་བཞིའི་ཆོས་ཀྱི་འཁོར་ལོ་བསྐོར། དེ་ནས་རྒྱལ་པོའི་ཁབ་ཏུ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར། དེ་ནས་ཡུལ་ཡངས་པ་ཅན་དང༌། པདྨོ་ཅན་དུ་ངེས་དོན་དང་དྲང་དོན་གྱི་ཆོས་ཀྱི་འཁོར་ལོ་བསྐོར་ནས། ཐ་མ་ལེ་ལོ་ཅན་རྣམས་ཆོས་ལ་བསྐུལ་བའི་དོན་དུ་གྲོང་ཁྱེར་རྩྭ་མཆོག་ཏུ། བཅོམ་ལྡན་འདས་སྐུ་མྱ་ངན་ལས་འདས་པར་དགོངས་པ་དེའི་ཚེ། ནུབ་ཕྱོགས་བདེ་བ་ཅན་གྱི་ཞིང་ཁམས་ན། བཅོམ་ལྡན་འདས་འོད་དཔག་མེད་བཞུགས་ཡོད་པས་མཁྱེན་ཅིང་གཟིགས་ཏེ། འཁོར་འདུས་པ་རྣམས་ཀྱི་མཆོག་བྱང་ཆུབ་སེམས་དཔའ་སྤྱན་རས་གཟིགས་ཀྱི་རྣམ་པར་འཕྲུལ་བ་བསམ་གྱིས་མི་ཁྱབ་སྟེ། ནམ་མཁའི་མཐའ་དང་མཉམ་མོ། །སྤྱན་རས་གཟིགས་རང་གི་ངོ་བོ་དེ་འོད་དཔག་ཏུ་མེད་པའི་དྲུང་ན་ཉེ་གནས་ཀྱི་ཚུལ་ཏུ་བཞུགས་པ་དེ་འོད་ཟེར་གྱིས་བསྐུལ་ནས། དེ་ལ་འོད་དཔག་ཏུ་མེད་པས་འདི་སྐད་ཅེས་གསུངས་སོ། །རིགས་ཀྱི་བུ་འདི་ནས་ཤར་ཕྱོགས་ལོགས་ནས་བསྐལ་བ་གངྒཱའི་ཀླུང་གི་བྱེ་མ་སྙེད་ཀྱི་ཕ་རོལ་ན། མི་མཇེད་ཅེས་བྱ་བའི་འཇིག་རྟེན་ཡོད་དེ་དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བའི་སངས་རྒྱས་ད་ལྟར་བཞུགས་ཤིང་ཆོས་སྟོན་ཏོ། །དེ་ནི་སྐུ་མྱ་ངན་ལས་འདའ་བར་བཞེད་དེ་གཟིགས་པ་དང༌། དེའི་དགོངས་པ་ད་རུང་མ་རྫོགས་པས་ཁྱོད་དེར་སོང་ལ་བཅོམ་ལྡན་འདས་མྱ་ངན་ལས་མི་འདའ་བར་གསོལ་བ་འདེབས་སུ་མི་འགྲོའམ་ཞེས་གསུངས་པ་དང༌། སྤྱན་རས་གཟིགས་ཀྱིས་གསོལ་བ་འདེབས་སུ་འགྲོ་ལགས་ཞེས་ཞུས་པ་དང༌། འོད་དཔག་མེད་ཀྱི་ཞལ་ནས་ཁྱོད་དེར་སོང་ལ་ཁ་བ་ཅན་གྱི་རྒྱལ་ཁམས་སུ་སེམས་ཅན་རྣམས་ཀྱི་དོན་ལ་བཅོམ་ལྡན་འདས་མྱ་ངན་ལས་འདའ་བར་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་སུ་སོང་ཞིག ཅེས་གསུངས་པ་དང༌། སྤྱན་རས་གཟིགས་བདེ་བ་ཅན་ན་མི་སྣང་བར་གྱུར་ཏོ། །དེའི་ཚེ་དེའི་དུས་ན་བཅོམ་ལྡན་འདས་རི་ག་ཡའི་མགོ་ལ་འཁོར་རྒྱ་མཚོ་སྙེད་ཀྱིས་བསྐོར་ནས། བཅོམ་ལྡན་འདས་ཀྱིས་སྤྱན་རས་གཟིགས་ཀྱི་སྐུ་ཆེ་བའི་ཡོན་ཏན་དཔག་ཏུ་མེད་པ་བརྗོད་པ། སྤྱན་རས་གཟིགས་ཞེས་བྱ་བའི་བྱང་ཆུབ་སེམས་དཔའ་རྣམས་ཀྱི་མཆོག་ཏུ་གྱུར་པ་ཞིག་ཡོད་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དང་མཉམ་པའི་སངས་རྒྱས་སྟོང་རྩ་གཉིས་སུ་སྤྲུལ་ནས། སེམས་ཅན་གྱི་དོན་མཛད་ཅེས་ཆུ་ཀླུང་སྣ་ཚོགས་ཀྱི་མདོ་ལས་གསུངས་སོ། །ཡང་སྤྱན་རས་གཟིགས་དེས་སྟོང་གསུམ་གྱི་སྟོང་ཆེན་པོ་བཀོད་པ་བར་མའི་འབྱུང་བ་ཆེན་པོ་བཞིའི་རྡུལ་ཕྲ་རབ་དང་མཉམ་པའི་མཛད་པ་བཅུ་གཉིས་སུ་སྤྲུལ་ནས་སེམས་ཅན་གྱི་དོན་མཛད་པར་བུན་ད་རི་ཀའི་མདོ་ནས་གསུངས་སོ། །ཡང་སྤྱན་རས་གཟིགས་དེས་འཛམ་བུའི་གླིང་བྱེ་བ་ཕྲག་བརྒྱར་ཡོད་པ། དེ་ན་རྡོ་རྗེ་གདན་བྱེ་བ་ཕྲག་བརྒྱ་ན་སངས་རྒྱས་ཤཱཀྱ་ཐུབ་པ་བྱེ་བ་ཕྲག་བརྒྱ། དེའི་བྱང་ཕྱོགས་ན་ཁ་བ་ཅན་བྱེ་བ་ཕྲག་བརྒྱ་ན་རྒྱལ་པོ་སྲོང་བཙན་སྒམ་པོ་བྱེ་བ་ཕྲག་བརྒྱ། བལ་མོ་ཟ་ཁྲི་བཙུན་དང་རྒྱ་མོ་ཨོང་ཅོང་བྱེ་བ་ཕྲག་བརྒྱ། དེ་ནས་ར་ས་གཙུག་ལག་ཁང་བྱེ་བ་ཕྲག་བརྒྱར་སྤྲུལ་ནས་སེམས་ཅན་གྱི་དོན་མཛད་པར་སྙིང་རྗེ་སྣ་ཚོགས་རོལ་པའི་མདོ་ལས་གསུངས་སོ། །དེའི་ཚེ་འཁོར་དེའི་ནང་ནས་སྒྲིབ་པ་རྣམ་པར་སེལ་བ་ཞེས་བྱ་བའི་བྱང་ཆུབ་སེམས་དཔའ་སྟན་ལས་ལངས་ནས་འདི་སྐད་ཅེས་ཟེར་རོ། །བཅོམ་ལྡན་འདས་སྤྱན་རས་གཟིགས་ཞེས་བྱ་བའི་བྱང་ཆུབ་སེམས་དཔའ་དེ་ངོ་མཚར་ཅན་ཞིག་འདུག་པ་དེ་ད་ལྟ་གང་ན་འདུག ང་ལྟ་བར་འགྲོ་འདོད་དོ་ཞེས་པ་དང༌། བཅོམ་ལྡན་འདས་ཤཱཀྱ་ཐུབ་པའི་ཞལ་ནས། འཛམ་བུའི་གླིང་ན་བྱང་ཆུབ་སེམས་དཔའ་སྤྱན་རས་གཟིགས་ཀྱི་བ་སྤུའི་ཁུང་བུ་རེ་རེ་ནས་ཀྱང་འོ་སྐོལ་འདྲ་བའི་སངས་རྒྱས་ཀྱི་ཞིང་ཁམས་དཔག་ཏུ་མེད་པ་བཀོད་ནས་སེམས་ཅན་གྱི་དོན་མཛད་པ་ཡིན་ཏེ། ཁྱོད་ལྟ་བུས་དེ་ལྟ་བར་མི་ནུས་པས་ལན་ཞིག་བཅོམ་ལྡན་འདས་ཀྱི་རྫུ་འཕྲུལ་གྱིས་བསྐུལ་ནས་ང་ཅན་དུ་འོང་ཞིག དེ་ཙ་ན་ངས་འོད་ཟེར་གྱི་སྒོ་ནས་བསྟན་ཞིག་ཅེས་ཟ་མ་ཏོག་བཀོད་པའི་མདོ་ལས་གསུངས་སོ། །ཚུལ་དེ་བཞིན་དུ་ནམ་མཁའི་མཐས་གར་ཁྱབ་པར་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་པར་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་བས་ཁྱབ་ནས་སེམས་ཅན་གྱི་དོན་མཛད་དོ། །དེ་ནས་བཅོམ་ལྡན་འདས་འཁོར་དང་བཅས་པ་མཛེ་ཏའི་ཚལ་ན་བཞུགས་སོ། །སྐུ་ལུས་ཀྱི་བཀོད་པ་མཛད་པའི་ལེའུ་སྟེ་གཉིས་པའོ།། །།
གཙོ་ངོས།ཤོག་ངོས་གོང་མ།གོང་གི་ཤོག་ངོསལྔ12345ཞོལ་གྱི་ཤོག་ངོསལྔཤོག་ངོས་འོག་མ།ཤོག་ངོས་མཐའ་མ།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...