སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
མཁན་ཆེན་ཞི་བ་འཚོའི་རྣམ་ཐར།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2018-9-17 15:15:00 རྩོམ་ཁུངས། དགེ་ལུགས་དྲ་བ། ཀློག་གྲངས།
     རླབས་ཆེན་སྤྱོད་པའི་གཏེར་གྱུར་རྣམ་སྣང་མཛད། རླབས་ཆེན་སྤྱོད་པའི་གཏེར་གྱུར་རྣམ་སྣང་མཛད། ཅེས་བསྔགས་པ། མཁན་པོ་ཡང་དག་རྣམ་སྣང་མཛད། མཚན་གཞན་བོ་དྷི་སཏྭ་ཞེས་ཀྱང་བྱ། ལེགས་སྦྱར་གྱི་སྐད་ལ་ཤནྟ་རཀྵི་ཏ། བོད་སྐད་དུ་ཞི་བ་འཚོ་ཞེས་བརྗོད་པ་མཁན་ཆེན་ཞི་བ་འཚོ་ནི། སྔོན་བསྐལ་པ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སྔོན་རོལ་ནས་བྱང་ཆུབ་མཆོག་ཏུ་ཐུགས་བསྐྱེད་དེ་ས་ལམ་མཐར་ཕྱིན་ནས་ཞིང་འདིར་ཐུབ་པའི་བསྟན་པ་སྤེལ་བའི་སླད་དུ་སྙིང་རྗེ་དང་སྨོན་ལམ་གྱི་དབང་གིས་བསམ་བཞིན་དུ་བྱོན་པ་ཞིག་སྟེ། དེ་ཡང་ཤར་ཕྱོགས་ཟ་ཧོར་རྒྱལ་པོའི་སྲས་སུ་སྐུ་འཁྲུངས། གཞོན་ནུ་ནས་ཁྱིམ་གྱི་གནས་ནི་སྡུག་བསྔལ་དུ་མའི་འབྱུང་གནས་བཙོན་ར་ལྟ་བུ་དང༌། ཉོན་མོངས་པ་དང་ཉེས་པར་སྤྱོད་པ་ཐམས་ཅད་ཀྱི་འབྱུང་ཁུངས་སུ་རིག་ནས་སྲིད་པའི་ཕུན་ཚོགས་ལ་ཆགས་པ་མེད་པར་རྒྱལ་སྲིད་མཆིལ་མའི་ཐལ་བ་བཞིན་དུ་དོར་ཏེ་མཁན་པོ་ཡེ་ཤེས་སྙིང་པོའི་དྲུང་དུ་རབ་ཏུ་བྱུང་ཞིང་བསྙེན་པར་རྫོགས་པའི་སྡོམ་པ་བཞེས། དེ་ཡང་རྩ་བའི་སྡེ་པ་བཞི་ལས་གཞི་ཐམས་ཅད་ཡོད་པར་སྨྲ་བའི་སྡེ་པ་ཡིན་པས།མཁན་པོ་དེ་ཉིད་ལ་བརྟེན་ནས་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་འདུལ་བ་ལུང་སྡེ་བཞི་ནས་གསུངས་པའི་དགག་སྒྲུབ་གནང་གསུམ་གྱི་བཅས་པ་ཆེ་ཕྲ་མཐའ་དག་ཐུགས་སུ་ཆུད་པ་མཛད་ནས་བཅས་པ་དང་རང་བཞིན་གྱི་ཁ་ན་མ་ཐོ་བའི་ཉེས་ལྟུང་ཕྲ་མོས་ཀྱང་མ་གོས་པའི་ཚུལ་ཁྲིམས་རྣམ་པར་དག་པ་ལ་གནས་ནས་སྡེ་སྣོད་གསུམ་ལ་སྦྱངས་ཏེ་མཁས་པའི་ཕུལ་དུ་ཕྱིན་པར་མཛད།
     དེ་ནས་བྱང་ཆུབ་ལམ་གྱི་རིམ་པའི་མན་ངག་རྣམས་གསན་བཞེད་ནས་སློབ་དཔོན་དུལ་བའི་སྡེ་ལ་བསྙེན་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་མངོན་པར་རྟོགས་པའི་རྒྱན་གསན་ཏེ།དེའི་མན་ངག་ཤེར་ཕྱིན་གྱི་མདོ་དང་བཅས་པའི་ཚིག་དོན་མཐའ་དག་ཐུགས་སུ་ཆུད་པར་མཛད། ཐེག་པ་ཆེན་པོའི་ལམ་གྱི་རིམ་པ་ལ་རྒྱ་ཆེ་བའི་ལམ་གྱི་རིམ་པ་དང་ཟབ་མོའི་ལམ་གྱི་རིམ་པ་གཉིས་ཡོད་པ་གཉིས་ཀ་མེད་མི་རུང་དུ་གཟིགས་ནས་བདག་ཉིད་ཆེན་པོ་འཕགས་པ་ཀླུ་སྒྲུབ་ཀྱིས་རྒྱལ་བའི་དགོངས་པ་བཀྲལ་བའི་མན་ངག་མཐར་ཐུག་པ་དབུ་མའི་གཞུང་རྣམས་ལ་ལེགས་པར་སྦྱངས་ཏེ་ཐུགས་སུ་ཆུད་པར་མཛད། གཞུང་དེ་དག་གི་དོན་ལ་དྲི་མ་མེད་པའི་རིགས་པ་ལེགས་པར་དཔྱད་ནས་ངེས་ཤེས་གཏིང་ཕྱིན་པར་རྙེད་པ་ན་ཐུགས་རྒྱུད་ལ་སྦྱར་ཏེ་ཉམས་སུ་བཞེས་པས་ཐེག་པ་ཆེན་པོའི་ལམ་གྱི་རིམ་པའི་ལུས་ཡོངས་སུ་རྫོགས་པ་ལ་ཉམས་མྱོང་གི་རྟོགས་པ་ཁྱད་པར་ཅན་འཁྲུངས་པ་ན་སྐལ་པ་དང་ལྡན་པ་གཞན་དག་ལ་ཆོས་ཀྱི་བདུད་རྩི་རྒྱ་ཆེར་སྩལ་ཏེ། ཐེག་པ་ཆེན་པོའི་ལམ་གྱི་རིམ་པ་ཟབ་པ་དང་རྒྱ་ཆེ་བ་གཉིས་ཀ་སྟོན་པའི་བསྟན་བཅོས་དབུ་མ་རྒྱན་འགྲེལ་པ་དང་བཅས་པ་མཛད་དེ་གདུལ་བྱ་མཐའ་ཡས་པ་ལ་རྒྱ་ཆེར་སྤེལ་ཏེ་འཕགས་ཡུལ་དུ་ཤེར་ཕྱིན་གྱི་མན་ངག་ཉིན་མོ་ལྟར་གསལ་བར་མཛད། བདག་ཉིད་ཆེན་པོ་འདི་ནི་དགུང་ལོ་བརྒྱ་ཕྲག་མང་པོ་བཞུགས་པས། སྐུ་ཚེའི་སྟོད་སྨད་བར་གསུམ་གྱི་སློབ་མ་རིམ་པ་མང་དུ་ཡོད་ཅིང་སྲས་ཀྱི་ཐུ་བོ་འགྲན་ཟླ་དང་བྲལ་བའི་སློབ་དཔོན་སེང་གེ་བཟང་པོ་དང༌། མཁན་མཆོག་ཀཱ་མ་ལ་ཤཱི་ལ་གཉིས་སོ། །མཁན་ཆེན་ཞི་བ་འཚོ་འདི་ནི་རྒྱལ་སྲས་གཞན་གྱིས་དཔག་པར་དཀའ་བའི་སྙིང་སྟོབས་དང་བྱང་ཆུབ་ཀྱི་སེམས་ཤིན་ཏུ་སྟོབས་ཆེ་བས་སྙིགས་མའི་དུས་འདིར་འགྲོ་བའི་དོན་མཛད་པ་ལ་རྒྱལ་སྲས་ཀྱི་སྤྱོད་པ་ཆེས་ཕུལ་དུ་བྱུང་བ་ཞིག་སྟེ། དོན་གྱི་དབང་འདི་ལ་གཟིགས་ནས་རྗེ་བདག་ཉིད་ཆེན་པོས། རླབས་ཆེན་སྤྱོད་པའི་གཏེར་གྱུར་ཅེས་བསྔགས་པ་ཡིན་ནོ། །
     མཁན་ཆེན་ཞི་བ་འཚོ་འདིས་རྒྱ་བོད་ཐམས་ཅད་དུ་བསྟན་པ་ལ་བྱ་བ་རྒྱ་ཆེན་པོ་མཛད་པ་ཡིན་ཞིང༌། ལྷག་པར་བྱང་ཕྱོགས་བོད་ཡུལ་འདི་སྟོན་པ་ཐུགས་རྗེ་ཅན་དེས་ཀྱང་འདུལ་མ་ནུས་པར་མུན་པའི་གླིང་དུ་ལུས་ཤིང༌། སློབ་དཔོན་འདིའི་གོང་དུ་བྱོན་པའི་ཤིང་རྟ་ཆེན་པོ་གཉིས་སོགས་བདག་ཉིད་ཆེན་པོ་དེ་དག་ཐམས་ཅད་ཀྱིས་འདུལ་བར་མ་ནུས་པར་མཐའ་འཁོབ་མུན་གླིང་དུ་ལུས་པ་སློབ་དཔོན་འདིས་ཐུགས་ཀྱིས་མ་བཟོད་ནས་ཞིང་འདིར་བྱོན་ཞིང་དེ་ལྟ་ནའང་རྟེན་འབྲེལ་སྒོ་མང་པོ་ཞིག་ནས་འགྲིག་དགོས་པའི་དབང་གི་སློབ་དཔོན་འདི་བྱོན་ནས་ལོ་དགུ་བརྒྱ་ལྷག་ཙམ་གྱི་བར་དུ་བོད་དུ་རྒྱལ་བའི་བསྟན་པ་འཛུགས་པའི་རྟེན་འབྲེལ་མ་འགྲིག་པར་ནམ་ཞིག་ན་བོད་ཁམས་མུན་པའི་གླིང་དུ་རྒྱལ་བའི་བསྟན་པའི་སྒྲོན་མེ་འཛུགས་པར་ནུས་སྙམ་དུ་དེ་འབའ་ཞིག་ཐུགས་ལ་བརྣགས་ནས་སྐུ་ཚེ་བྱིན་གྱིས་བརླབས་ཏེ་བཞུགས་པ་ལས། དུས་ནམ་ཞིག་ན་བོད་ཁམས་ཀྱི་རྗེ་བོ་ཆོས་རྒྱལ་སྲོང་བཙན་སྒམ་པོས་བོད་དུ་རྒྱལ་བསྟན་གྱི་སྲོལ་བཙུགས། ཇོ་བོ་ཤཱཀྱ་མུ་ནི་དང་ཇོ་བོ་མི་བསྐྱོད་རྡོ་རྗེ་གཉིས་རྒྱ་བལ་ནས་སྤྱན་དྲངས་ལྷ་སར་གཙུག་ལག་ཁང་བརྩིགས།
     མཐའ་འདུལ་ཡང་འདུལ་གྱི་ལྷ་ཁང་དང་མཆོད་རྟེན་རྣམས་བརྩིགས། ཆོས་ཀྱི་བརྡ་སློབ་པ་སོགས་བསྟན་པ་རིན་པོ་ཆེའི་སྲོལ་བཙུགས་ཀྱང་སྙིགས་མའི་སྐྱེ་བོ་རྣམས་བསོད་ནམས་དམན་པ་དང༌། བདུད་སྡིག་ཏོ་ཅན་འཁོར་ནག་ཕྱོགས་ཀྱི་འབྱུང་པོ་གདུག་པ་ཅན་རྣམས་དང་བཅས་པས་མི་རྣམས་ཀྱི་ཡིད་བསྒྱུར་ཏེ་ཆོས་རྒྱལ་སྲོང་བཙན་སྒམ་པོ་འདས་ནས་སྡིག་བློན་མང་པོས་རྒྱལ་བའི་བསྟན་པ་ཉམས་པར་བྱས་ཏེ། ཇོ་བོ་ཤཱཀྱ་མུ་ནེ་མུན་ཁང་དུ་སྦ་བ་དང༌། ཆོས་བྱེད་རྣམས་ལ་ཆད་པས་གཅོད་པ་སོགས་རྣམ་པ་ཀུན་ནས་འཚེ་བར་བྱས་ཤིང་སླར་ཡང་ནག་ཕྱོགས་ཀྱི་སྟོབས་ཆེར་རྒྱས་ཏེ་ཇོ་བོ་རིན་པོ་ཆེ་བྱེ་ཐེམས་སུ་སྦ་བ་དང༌། དེས་ཀྱང་མི་ཆོག་པར་དེ་ནས་བཏོན་ཏེ་མང་ཡུལ་སྐྱིད་གྲོང་དུ་སྤྱུགས་པ་དང༌། རྒྱལ་བསྟན་གྱི་མཚན་ཙམ་ཡང་འདོན་དབང་མེད་པར་སྡིག་བློན་མང་པོས་ཁྲིམས་དམ་པར་བྱས་ཏེ་རྒྱལ་བསྟན་ཡི་གེ་འབྲུ་རེ་ཡང་ཀློག་ས་མེད་པར་མུན་གླིང་ཁོ་ནར་གྱུར་པ་ན། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཁྱེན་བརྩེ་ནུས་གསུམ་གཅིག་ཏུ་བསྡུས་པ་རིགས་གསུམ་མགོན་པོས་བོད་ཡུལ་དུ་རྒྱལ་བསྟན་འཛུགས་པར་ཐུགས་བསྐྱེད་དེ་སྤྱན་རས་གཟིགས་སྲོང་བཙན་སྒམ་པོས་བོད་ཡུལ་དུ་རྒྱལ་བསྟན་གྱི་སྲོལ་བཙུགས་པ་བདུད་སྡེ་དཔུང་དང་བཅས་པས་ཉམས་པར་བྱས་པ་དེ་ཉིད་གསོ་ཕྱིར་རྗེ་བཙུན་འཇམ་པའི་དབྱངས་མིའི་རྗེ་བོར་སྤྲུལ་པ་ཆོས་རྒྱལ་ཁྲི་སྲོང་ལྡེ་བཙན་རྒྱ་ཟ་ཀོང་ཇོ་ལས་སྐུ་འཁྲུངས་ནས་རིང་པོ་མ་ལོན་པ་ན་ཡབ་གཤེགས། འཁྲུངས་མ་ཐག་ནས་ཆོས་ཀྱི་བག་ཆགས་བརྟས་པ་དེ་བདུད་སྡེས་མ་བཟོད་པར་བདུད་བློན་རྣམས་ཀྱིས་འདི་རྒྱ་བཟའི་བུ་མིན་གྱི་ཞང་གི་ཚ་བོ་ཡིན་ཞེས་དབྲོག་པར་བརྩམས་པ་ན། རྒྱལ་བུཆུང་ངུ་དེའི་ཞལ་ནས། ཁྲི་སྲོང་ལྡེ་བཙན་རྒྱ་ཚ་ལགས། །སྣ་རྣམ་ཞང་གིས་ཅི་བགྱི་འཚལ། །ཞེས་གསུངས་ནས་རང་ལ་རང་གིས་ཁྲི་སྲོང་ལྡེ་བཙན་ཞེས་མཚན་བཏགས། རྒྱ་བཟའི་སྲས་ཡིན་པར་ཡོངས་སུ་གྲགས་པར་བྱས། དེ་ནས་རྒྱལ་བུ་ཆུང་ངུ་དེས་སྔར་ཡབ་མེས་བཀའ་དྲིན་ཅན་དེ་དག་གིས་བོད་འདིར་སངས་རྒྱས་ཀྱི་བསྟན་པ་གཙུགས་པ་ད་ལྟ་མིང་ཙམ་ཡང་མེད་པ་འདི་ཐབས་གང་ཞིག་བྱས་ན་གསོ་བར་ནུས་སྙམ་དུ་དེ་འབའ་ཞིག་སེམས་པར་མཛད་དོ། །
     དེ་ནས་དུས་ནམ་ཞིག་ན་རྒྱལ་པོས་སྦ་གསལ་སྣང་ལ་སོགས་པ་ཁ་ཤས་རྒྱ་ཡུལ་དུ་རྒྱལ་བའི་བཀའ་འཚོལ་དུ་བཏང༌། དེ་དག་གིས་ཀྱང་རྒྱལ་པོའི་བཀའ་བཞིན་རྩོལ་བ་ཆེན་པོས་ཕྱིན་ཏེ་རྒྱ་ནག་ནས་རྒྱལ་བའི་བཀའ་མང་པོ་སྤྱན་དྲངས། རྒྱལ་པོའི་སྐུ་མདུན་དུ་སླེབས་ཀྱང་སྡིག་བློན་རྣམས་དབང་ཆེ་བས་རྒྱལ་བའི་བཀའ་མཚན་ཙམ་ཡང་འདོན་དབང་མེད་པས་རེ་ཞིག་བཀའ་རྣམས་བྲག་ལ་སྦས། དེ་ནས་རྒྱལ་བུས་གསལ་སྣང་དང་གྲོས་བྱས་ཏེ་གསལ་སྣང་གིས་རྒྱ་གར་དུ་ཕྱིན་ནས་རྒྱལ་བའི་བཀའ་དང་དེའི་དོན་སྟོན་པའི་པཎྜི་ཏ་འཚོལ་རྩིས་དང༌། བདུད་བློན་རྣམས་ཀྱི་སྣང་ངོར་མང་ཡུལ་སྐྱིད་གྲོང་གི་དཔོན་དུ་བསྐོས་ཏེ་བཏང༌། དེ་ནས་གསལ་སྣང་གིས་རྒྱ་གར་དུ་ཕྱིན་ཏེ་རྡོ་རྗེ་གདན་གྱི་མ་ཧཱ་བོ་དྷི་དང་ཤྲི་ན་ལནྡྲར་མཆོད་པ་ཕུལ་བས་མེ་ཏོག་གི་ཆར་བབས། བྱང་ཆུབ་ཀྱི་ཤིང་ལས་འོ་མའི་རྒྱུན་བབས་ཤིང་དགེའོ་ཞེས་པའི་སྒྲ་འོད་དང་བཅས་པ་བྱུང༌། དེ་ནས་གསལ་སྣང་བལ་ཡུལ་དུ་བྱོན་པས་བལ་རྗེའི་མཆོད་གནས་སུ་མཁས་ཤིང་གྲུབ་པའི་པཎ་ཆེན་ཤནྟཱ་རཀྵི་ཏ་བཞུགས་པ་མང་ཡུལ་སྐྱིད་གྲོང་དུ་སྤྱན་དྲངས། བཞུགས་གནས་སུ་གཙུག་ལག་ཁང་གཉིས་བརྩིགས།
     སློབ་དཔོན་ལ་སེམས་བསྐྱེད་ཞུས་པས། སེམས་བསྐྱེད་ཞུ་བ་ལ་ཡོན་དགོས་གསུངས༌། གསེར་དངུལ་སོགས་རིན་པོ་ཆེ་དང༌། དར་ཟབ་སྣམ་གོས་སོགས་ཡོད་བྱད་ཅི་ཡོད་ཕུལ་བས་ད་དུང་ཕུལ་ཅིག་གསུངས། ད་ལུས་ལ་བཅིངས་པའི་སྐ་རགས་གཅིག་མིན་པ་མེད་ཞུས་པས་དེ་ཡང་ཕུལ་ཅིག་གསུངས་ནས་ཕུལ། སེམས་བསྐྱེད་ཞུས་ཟིན་པ་ན་སློབ་དཔོན་གྱིས་འབུལ་བ་ཐམས་ཅད་ཚུར་གནང་ནས་ཁྱོད་དང་ང་གཉིས་སྐྱེ་བ་འདི་ལ་ངོ་ཤེས་པ་ཙམ་མ་ཡིན། སྐྱེ་བ་དུ་མའི་སྔ་རོལ་ནས་ངའི་དྲུང་དུ་སེམས་བསྐྱེད་པའི་སྲས་ཀྱི་ཐུ་བོ་ཡིན།ཁྱོད་ཀྱི་མིང་ཡེ་ཤེས་དབང་པོ་བྱ་བར་འགྱུར་རོ་གསུངས་ནས་མགོ་ལ་ཕྱག་གིས་བྱིལ་བྱིལ་མཛད། དེ་ནས་གསལ་སྣང་གིས་སློབ་དཔོན་ལ་ཕྱག་བྱས་ཏེ། བོད་ཡུལ་དུ་སངས་རྒྱས་ཀྱི་བསྟན་པ་དར་བའི་ཆེད་དུ་བོད་ཀྱི་རྒྱལ་པོའི་དགེ་བའི་བཤེས་གཉེན་དུ་འབྱོན་པ་ཅི་གནང༌། ཞེས་གསོལ་བ་བཏབ་པས་སློབ་དཔོན་གྱིས་བོད་ངའི་གདུལ་སྐལ་ཡིན།བོད་ཀྱི་རྒྱལ་པོ་དང་ཁྱོད་ལྷན་ཅིག་མ་སྐྱེས་པས་ཁྱོད་གཉིས་ཀྱི་སྐྱེ་བ་དགུའི་བར་དུ་མང་ཡུལ་དང་ཟ་ཧོར་གཉིས་སུ་བསྒུགས་ནས་བསྡད་པ་ཡིན། ད་ཁྱེད་གཉིས་ཀྱང་ནར་སོན་ནས་དུས་ལ་བབ་པར་གདའ་བས་ངས་བོད་ཀྱི་རྒྱལ་པོའི་དགེ་བའི་གཤེས་གཉེན་བྱས་ལ་ཡུལ་བྱན་ཀར་ཆུ་བོ་ལོ་ཧི་ཏའི་འགྲམ། རི་ཧས་པུ་རིའི་དྲུང་དུ་བྲག་དམར་བསམ་ཡས་མི་འགྱུར་ལྷུན་གྱིས་གྲུབ་བ་ཞེས་བྱ་བའི་གཙུག་ལག་ཁང་གཅིག་ཀྱང་བཞེངས་སུ་གསོལ། ཞེས་གསུངས་ནས་སློབ་དཔོན་སླར་བལ་ཡུལ་དུ་གཤེགས། གསལ་སྣང་བོད་དུ་འོངས་ཏེ་རྒྱལ་པོའི་སྐུ་མདུན་དུ་མཆིས་ནས་དབེན་པ་ཞིག་ཏུ་ཆོས་བྱ་བར་རིགས་པ་དང་མཁས་པ་ཆེན་པོ་ཤནྟཱ་རཀྵི་ཏ་ཞེས་བྱ་བ་ད་ལྟ་བལ་ཡུལ་ན་བཞུགས་ཡོད། བོད་དུ་འབྱོན་པར་གསོལ་བ་བཏབ་པས་ཞལ་གྱིས་བཞེས། པཎྜི་ཏ་དེའི་བཀའ་མཆིད་ཀྱང་འདི་ལྟར་གནང་ཞེས་རྒྱལ་པོ་ལ་ཞིབ་ཏུ་གསོལ་བས་རྒྱལ་པོའི་ཞལ་ནས།ངེད་གཉིས་ཀྱི་པཎྜི་ཏ་སྤྱན་དྲངས་ཏེ་རྒྱལ་བའི་བསྟན་པ་འཛུགས་པར་བདུད་བློན་འདི་དག་གིས་ཤེས་ན་ཁྱོད་སྲོག་དང་འབྲལ་བར་བྱེད་ཅིང་དོན་ཆེན་པོ་ལས་ཉམས་པར་འགྱུར་བས་ཁྱོད་རེ་ཞིག་ཡུལ་དུ་སོང་ལ་ཡིབ་ལ་སྡོད་ཅིག་ངས་ཐབས་ཀྱིས་དོན་གྲུབ་པ་ཞིག་བྱའོ་གསུངས་ནས་གསལ་སྣང་རེ་ཞིག་དབེན་པར་བྱོལ། དེ་ནས་རྒྱལ་པོའི་ཐབས་མཁས་ཀྱི་མཛད་པ་དུ་མས་བདུད་བློན་རྣམས་ཀྱི་བསམ་སྦྱོར་མཐའ་དག་བྱེ་མའི་ཆངས་བུ་ལྟར་ཞིག་སྟེ་ཆབ་སྲིད་ཆོས་ཀྱིས་སྐྱོང་བའི་དུས་ལ་བབ་པ་ན།
     རྒྱལ་པོས་བློན་པོ་རྣམས་ལ་བཀའ་སྩལ་པ། ངའི་ཡབ་མེས་རྣམས་ཀྱིས་རྒྱལ་བའི་བསྟན་པ་རིན་པོ་ཆེ་བཙུགས་པ་དེ་ཞང་མ་ཞང་སོགས་སྡིག་བློན་རྣམས་ཀྱིས་བཤིག ཇོ་བོ་ཤཱཀྱ་མུ་ནེ་མང་ཡུལ་སྐྱིད་གྲོང་དུ་སྤྱུགས་འདུག་པས། ད་ཇོ་བོ་ཤཱཀྱ་མུ་ནེ་དེ་སྤྱན་དྲངས། ངེད་རང་རྗེ་བློན་འབངས་དང་བཅས་པ་རྣམས་ཆོས་བྱེད་པ་མི་རུང་ངམ་གསུངས་པས། རྒྱལ་པོའི་བཀའ་བཞིན་རྗེ་བློན་འབངས་དང་བཅས་པ་རྣམས་ཆོས་བྱེད་པ་ལ་འཆམ་ནས་ཆོས་བྱེད་པ་ལ་རྒྱ་གར་ནས་འོངས་པའི་རྒྱུས་ཅན་དགོས་པས་སུ་ཡོད་ཅེས་གླེང་བ་ན། གསལ་སྣང་མང་ཡུལ་ནས་འོངས་པ་མཆི་བས་དེ་རྗེའི་སྤྱན་སྔར་དགུག་འཚལ་ཟེར་བ་བཞིན་གསལ་སྣང་རྒྱལ་པོའི་སྤྱན་སྔར་བཀུག་ནས་བཀའ་སྩལ་པ། རྒྱ་གར་དང་བལ་ཡུལ་ན་ཆོས་ལ་མཁས་པའི་པཎྜི་ཏ་སུ་ཡོད། དེ་ཁྱོད་ཀྱིས་སྤྱན་དྲོངས་ཤིག་ཅེས་བསྒོ་བ་ན། གསལ་སྣང་གིས་གསོལ་པ། ཟ་ཧོར་རྒྱལ་པོའི་སྲས་དགེ་སློང་ཤནྟཱ་རཀྵི་ཏ་ཞེས་བྱ་བ་ད་ལྟ་བལ་ཡུལ་ནས་མཆིས་པ་དེ་དམ་པའི་ཆོས་དང་གཙུག་ལག་ཀུན་ལ་མཁས་པ་ཞིག་བདོག་ཅེས་གསོལ་པས།རྗེའི་ཞལ་ནས་ཁྱོད་ཡུལ་དུ་མ་འགྲོ་བར་པཎྜི་ཏ་དེ་སྤྱན་དྲངས་བའི་ཕྱིར་བལ་ཡུལ་དུ་སོངས་ལ་བལ་རྗེ་ལ་ངའི་བཀའི་སྒྲོམ་བུ་འདི་ཕུལ་ལ་པཎྜི་ཏ་དེ་ངེས་པར་སྤྱན་འདྲོངས་པར་གྱིས་ཤིག ཅེས་མངགས་ནས་གསལ་སྣང་བལ་ཡུལ་དུ་བརྫངས། གསལ་སྣང་བལ་ཡུལ་དུ་འབྱོར་ནས་བལ་རྗེ་ལ་རྒྱལ་པོའི་བཀའི་སྒྲོམ་བུ་ཕུལ་ནས་བོ་དྷི་ས་ཏྭ་བོད་ཡུལ་དུ་སྤྱན་འདྲེན་པར་ཆས། རིམ་གྱིས་མང་ཡུལ་དུ་ཕེབས་པ་ན་བོད་ནས་རྒྱ་པོས་ཕེབས་བསུར་ཁང་ལང་འགྲོ་སྣ་ར་དང༌། གཉེར་སྟག་ཚང་ལྡོང་གཟིགས། སྦྲང་རྒྱ་ར་ལེགས་གཟིགས་གསུམ་བཏང་བ་འབྱོར། དེ་ནས་རིམ་གྱིས་ཕེབས་ཏེ་རྒྱལ་པོའི་ཕོ་བྲང་དུ་ཕེབས་བསུ་ཉེ་བ་ན། གསལ་སྣང་གི་སྔོན་ལ་ཕྱིན་ནས་རྒྱལ་པོ་ལ་ཕྱག་ཕུལ། པཎྜི་ཏ་བྱོན་ཡོད་པའི་ལོ་རྒྱུས་རྣམས་གསོལ་བས་རྒྱལ་པོ་དགྱེས་ཏེ་གསལ་སྣང་ཁམས་བཟང་ཞིང་པཎྜི་ཏ་བདེ་བར་བྱོན་པ་ལེགས་ཞེས་རྒྱལ་པོས་བཀུར་སྟི་བགྱིས་པ་ན་ཞང་བློན་དག་ན་རེ།རྒྱ་བལ་གྱི་མི་ངན་སྔགས་མཁན་ཡང་མང་པོ་འོང་བས་སྔོན་ལ་རྟོག་དཔྱོད་མཛད་པ་ལེགས་ཟེར། སངས་ཤི་སོགས་འགའ་ཞིག་གིས་བརྟགས་ཀྱང་ཨཱ་ཙརྱའི་སྐད་མ་གོ ཁ་ཆེ་ཨ་ནན་ཏ་ལ་ལོ་ཙཱ་བཅོལ་ནས་དྲིས་པས། སློབ་དཔོན་གྱི་ཞལ་ནས། ལྷ་དཀོན་མཆོག་མཆོད། དམ་ཚིག་དང་སྡོམ་པ་ལ་གནས། གཙོ་བོར་སེམས་ཅན་ལ་ཕན་པ་འབའ་ཞིག་བྱེད་གསུངས། བློན་པོ་དེ་དག་གིས་རྒྱལ་པོ་ལ་ཨཱ་ཙརྱ་འདི་སྤྱོད་པ་ཁྱད་པར་དུ་འཕགས་པ་འདུག་པས་ཐུགས་འཕྲིག་བྱ་མི་འཚལ་ཞེས་གསོལ་ནས་ཕོ་བྲང་དུ་སྤྱན་དྲངས། ཕོ་བྲང་གི་ཆབ་སྒོར་བྱོན་པ་ན་ཕོ་ཉས་རྒྱལ་པོ་ལ་སློབ་དཔོན་སྒོ་ན་བྱོན་ནོ་ཞུས་པས། རྒྱལ་པོས་གསེར་ཕྱེ་བྲེ་གང་ཕྱག་རྟེན་དུ་ཕུལ་ནས་ཕྱག་བྱས་ཞབས་སྤྱི་བོར་བླངས་ཏེ་བྱིན་རླབས་ཞུས་པ་ན། སློབ་དཔོན་གྱིས་ཞལ་ནས། རྒྱལ་པོ་ཆེན་པོ། ཁྱོད་ཀྱི་ཁོ་བོ་མཁྱེན་ནམ་གསུངས་པས། རྒྱལ་པོས་སློབ་དཔོན་དང་སྔོན་ཆད་ཞལ་མ་འཛོམ་ལགས་ཞུས་པས། སློབ་དཔོན་གྱི་ཞལ་ནས། སྔོན་སངས་རྒྱས་འོད་སྲུང་གི་བསྟན་པ་ལ་གཙུག་ལག་ཁང་གི་རྒྱན་བསྲུང་བའི་བྱིས་པ་གསུམ་གྱིས་བྱེ་མའི་མཆོད་རྟེན་བྱས་ཏེ་སྨོན་ལམ་བཏབ་པ། མ་འོངས་པ་ན་ངས་པཎྜི་ཏ་བྱ་བ། ཁྱོད་ཀྱིས་མཐའ་འཁོབ་ཀྱི་རྒྱལ་པོ་བྱ་བ། གསལ་སྣང་གིསབརྡ་སྦྱོར་གྱི་བང་ཕྱིན་པ་བྱས་ལ་མཐའ་འཁོབ་ཀྱི་རྒྱལ་ཁམས་སུ་དམ་པའི་ཆོས་དར་བར་བྱེད་པའི་སྨོན་ལམ་བཏབ་པ་མཉེལ་ལམ་གསུངས། རྒྱལ་པོའི་ཞལ་ནས། དེ་མད་བདག་སྒོམ་ཡུན་ཐུང་པས་ལན་ཞེས་གསོལ།
     དེ་ནས་རྒྱལ་པོས་བོད་དུ་སངས་རྒྱས་ཀྱི་བསྟན་པ་དར་བར་གསོལ་བ་བཏབ་ནས་བརྟག་པ་ཞུས་པ་ན། སློབ་དཔོན་གྱིས། ངེད་ཨཱ་ཙརྱ་བྱ་བ་རྟེན་འབྲེལ་བརྟག་པ་ལ་མཁས་པ་ཡིན། རྒྱལ་པོ་ཁྱོད་ཀྱིས་མགོ་ལ་ཐོད་བཅིངས་པ་དང་སྦྱར་ན་སྟོད་དུ་མངའ་རིས་ཞྭ་ཙམ་ཞིག ཞབས་ལ་ལྷམ་གསོལ་བས་སྨད་དུ་མངའ་རིས་ལྷམ་ཙམ་ཞིག་ལ་ཆོས་ཁྲིམས་ཆགས། སྐ་རགས་མ་བཅིངས་པ་དང་སྦྱར་ན་བར་དུ་རྒྱལ་ཁྲིམས་མྱུར་དུ་འཇིགས་ཉེན་ཡོད། འོན་ཀྱང་རིན་པོ་ཆེའི་ཕྱག་རྟེན་ཕུལ་བས་རྒྱལ་བའི་བསྟན་པ་འཛུགས་བཏུབ་གསུངས། དེ་ནས་སློབ་དཔོན་གྱིས་ཕོ་བྲང་རླུང་ཚུབས་སུ་ཟླ་བ་བཞིར་དགེ་བ་བཅུ་ཁམས་བཅོ་བརྒྱད་རྟེན་འབྲེལ་བཅུ་གཉིས་ཀྱི་ཆོས་བཤད་པས། བོད་ཀྱི་ལྷ་སྲིན་ཁྲོས་ཏེ་འཕང་ཐང་ཆུས་ཁྱེར། དམར་པོ་རི་ལ་ཐོག་རྒྱབ། མི་ནད་ཕྱུགས་ནད་བྱུང་བས་བོད་འབངས་ཡོ་ལོག་ནས་ཆོས་བྱས་པས་ལན་ཟེར་བ་ན། རྒྱལ་པོ་ཁྲི་སྲོང་ལྡེ་བཙན་གྱིས་མཁན་ཆེན་པོ་དྷི་ས་ཏྭའི་ཞབས་ལ་དབུ་གཏུགས་ཏེ་བཤུམ་བཞིན་དུ་བོད་བསོད་ནམས་དམན་པས་ནག་ཕྱོགས་ཀྱི་མི་མ་ཡིན་རྣམས་ཀྱིས་བར་ཆད་འདི་འདྲ་བྱས། བོད་ཀྱི་མི་རྣམས་ཀྱང་འདི་སྐད་ཟེར་བས་སློབ་དཔོན་རེ་ཤིག་བལ་ཡུལ་དུ་གཤེགས་ནས་སླར་འབྱོན་དགོས་ཞེས་ཞུས་ཏེ་སློབ་དཔོན་བལ་ཡུལ་དུ་བྱོན། དེ་ནས་རིང་ཞིག་ནས་སྦ་གསལ་སྣང་རྒྱ་ཡུལ་དུ་ཆོས་འཚོལ་དུ་བཏང༌། སང་ཤི་ལ་སོགས་པ་སུམ་ཅུ་མཁན་ཆེན་ཞི་བ་འཚོ་སྤྱན་འདྲེན་དུ་བཏང་ངོ༌། །དེའི་ཚེ་རྒྱ་ནག་ཏུ་ཧ་ཤང་ཞིག་ན་རེ། ད་ཟླ་བ་དྲུག་ཞག་དྲུག་ན་འཕགས་པ་རྟ་སྐད་ཀྱི་སྤྲུལ་པ་འདི་འདྲ་ཞིག་འོང་ཞེས་འདྲ་འབག་བྱས་ཤིང༌། སང་ཤི་རྒྱ་ནག་ཏུ་སླེབ་པ་དང་རྒྱ་རྗེས་བྱ་དགའ་བྱིན། ཧ་ཤང་ལ་བསྒོམ་ལུང་བླངས་ཏེ་སླར་བོད་དུ་འཁོར་བ་ན་རྒྱལ་པོ་ལ་སྐྱེས་ཕུལ་ལོ། །དེ་ནས་རྒྱལ་པོས་སང་ཤི་ལ་ཨཱ་ཙརྱ་ད་དུང་སྤྱན་མ་འདྲོངས་པས་ཁྱོད་སོངས་ཤིག་གསུངས། དེས་བལ་པོར་ཕྱིན་ནས་མཁན་ཆེན་ཞི་བ་འཚོ་སྤྱན་དྲངས་ཏེ་བྲག་དམར་འབྲིན་བཟང་དུ་ཕེབས་ནས་རྒྱལ་པོ་ལ། བོད་ཀྱི་ལྷ་སྲིན་མ་ཐུལ་བས་ཆོས་བྱེད་དུ་མི་སྟེར་ཞིང་བཙན་པོ་སྐུ་ཚེ་ཐུང་བ་ཡང་དེས་ལན་པས། མི་མ་ཡིན་གདུག་པ་ཅན་རྣམས་འདུལ་བ་ལ་སློབ་དཔོན་པདྨ་སམྦྷ་ཝ་ཞེས་བྱ་བ་མཐུ་རྩལ་དང་ལྡན་པ་ཞིག་ཡོད་པས་དེ་སྤྱན་དྲོངས་ཤིག་གསུངས་པ་ན། བཙན་པོས་རྨི་ལམ་དུ་བྱུང་བ་སྐད་བགྱིས་ཏེ། སྦ་མང་རྗེ་གསལ་སྣང་སོགས་མི་ལྔ་སྤྱན་འདྲེན་དུ་བཏང་བས། སློབ་དཔོན་གྱིས་མཁྱེན་ཏེ་མང་ཡུལ་གུང་ཐང་དུ་བྱོན་པ་དང་མཇལ་ནས་རིམ་གྱིས་ལྷ་སྲིན་གདུག་པ་ཅན་རྣམས་དམ་ལ་འདོགས་ཤིང་བྱོན་ཏེ། ཧས་པོ་རིར་ཕྱག་ཕེབས་ཏེ་བཙན་པོ་དང་མཇལ། མལ་གྲོ་ཕུར་བྱོན་ནས་བོད་ཀྱི་ལྷ་སྲིན་ཐམས་ཅད་དམ་ལ་བཏགས་སོ། །དེ་ནས་མཁན་ཆེན་བོ་དྷི་སཏྭ་དང༌། སློབ་དཔོན་པདྨ་སམྦྷ་ཝ་གཉིས་ཀྱིས་ས་ཆོག་མཛད་དེ་ཨོ་ཏཱནྟ་པཱུ་རིའི་གཙུག་ལག་ཁང་ལ་དཔེ་བླངས་ནས་རི་རབ་གླིང་བཅུ་གཉིས།ཉི་ཟླ་ཟུང་གཅིག མཐའ་ལྕགས་རིས་བསྐོར་བའི་བཀོད་པ་མཛད་དེ་མེ་མོ་ཡོས་བུའི་ལོ་ལ་རྨང་བཏིང༌། ས་མོ་ཡོས་ལ་ཚར་ནས་མཁན་ཆེན་བོ་དྷི་སཏྭ་དང་སློབ་དཔོན་པདྨ་སམྦྷ་ཝས་རབ་གནས་མཛད། དགའ་སྟོན་བྱས་ཏེ། ལུག་གི་ལོ་ལ་ཐམས་ཅད་ཡོད་སྨྲའི་སྡེ་པའི་དགེ་སློང་བཅུ་གཉིས་སྤྱན་དྲངས་ཏེ་བོད་ལ་རབ་བྱུང་བཏུབ་མི་བཏུབ་སད་པའི་ཕྱིར་ཡེ་ཤེས་དབང་པོ་ལ་སོགས་པ་མི་བདུན་རབ་ཏུ་བྱུང་བ་ན། རབ་ཏུ་བྱུང་མ་ཐག་ཏུ་དེ་དག་ལ་མངོན་པར་ཤེས་པ་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་དང་ལྡན་པར་གྱུར།བདུན་པོ་དེ་ལ་སད་མི་མི་བདུན་ཞེས་གྲགས་སོ། །
     དེ་ནས་ཆོས་རྒྱལ་ཁྲི་སྟོང་ལྡེ་བཙན་གྱིས་གངས་རིའི་ཁྲོད་འདིར་མཁན་ཆེན་ཞི་བ་འཚོའི་མཁན་རྒྱུད་ཐམས་ཅད་ཡོད་པར་སྨྲ་བའི་ལུགས་འདི་དར་ཞིང་རྒྱས་ལ་ཡུན་རིང་དུ་གནས་པ་ཞིག་བྱུང་ན་ཅི་མ་རུང་སྙམ་དུ་འདིའི་མཁན་རྒྱུད་འཕགས་པ་ཤཱ་རིའི་བུ། སྒྲ་གཅན་ཟིན། ཀླུ་སྒྲུབ། ལེགས་ལྡན་འབྱེད། དཔལ་སྦས། ཡེ་ཤེས་སྙིང་པོ། མཁན་པོ་བོ་དྷི་སཏྭ་རྣམས་བསམ་ཡས་ཀྱི་གྱང་རིས་ལ་འགོད་པར་མཛད་དོ། །དེ་ནས་ཆོས་རྒྱལ་ཁྲི་སྲོང་ལྡེ་བཙན་གྱིས་མཁན་ཆེན་བོ་དྷི་སཏྭ་རྙེད་བཀུར་ཚད་མེད་པས་མཆོད་ཅིང་བོད་ཁམས་འདིར་སངས་རྒྱས་ཀྱི་བསྟན་པ་རྒྱ་ཆེར་སྤེལ་བར་ཞུས་ཏེ། དེའི་འཕྲིན་ལས་ཀྱི་གྲོགས་སུ་ལོ་ཙཱ་མཁས་པ་ཡང་མང་དུ་བསླབས་རྒྱ་གར་ནས་སློབ་དཔོན་བི་མ་ལ་མི་ཏྲ་དང༌། སློབ་དཔོན་སངས་རྒྱས་གསང་བ་སོགས་མཁས་ཤིང་གྲུབ་པའི་པཎྜི་ཏ་ཆེན་པོ་མང་དུ་སྤྱན་དྲངས། རྒྱལ་བའི་བཀའ་དང་བསྟན་བཅོས་མཐའ་ཡས་པ་བསྒྱུར། གང་སྒྱུར་བའི་ཆོས་དེ་དག་ཐམས་ཅད་ལ་ལོ་ཆེན་མཁས་པ་རྣམས་ཀྱིས་ཞུས་ཏིག་ཡང་དག་པར་བྱས། དེ་དག་ཐམས་ཅད་ཀྱང་ཆོས་རྒྱལ་ཉིད་ཀྱི་སྤྱན་ལམ་དུ་ཕབ་ནས་ཆོས་ལྟར་བཅོས་པའི་བསྲེ་བསླད་ཕྲ་མོའང་མེད་པར་མཛད། བོད་ཁམས་ཐམས་ཅད་ལ་ཁྲིམས་འདི་ལྟར་བསྒྲགས་ཏེ། བོད་ཀྱི་མངའ་འོག་ན་གནས་པ་ཐམས་ཅད་ཀྱིས་དམ་པའི་ཆོས་ཚུལ་བཞིན་དུ་བྱ་བ་དང༌། རྒྱལ་བའི་བསྟན་པ་ལ་རབ་ཏུ་བྱུང་བ་རྣམས་ལ་བླ་ལྷག་ཏུ་གུས་པར་བྱ་བ་དང༌། ཆོས་བྱེད་པ་རྣམས་ཀྱིས་ཀྱང་མཁན་ཆེན་བོ་དྷི་ས་ཏྭས་བོད་ཁམས་འདིར་རྒྱལ་བསྟན་གྱི་སྲོལ་ཇི་ལྟར་གཏོད་པ་ལྟར་འདུལ་བའི་བཅས་ཁྲིམས་རྣམ་པར་དག་པས་གཞི་བཟུང་ནས་སྤྱོད་པ་རྣམ་པར་དག་པ་དང་། འཕགས་པ་ཀླུ་སྒྲུབ་ཀྱིས་རྒྱལ་བའི་དགོངས་པ་ཇི་ལྟར་བཀྲལ་བའི་ལྟ་བ་རྣམ་པར་དག་པ་དེ་ཁོ་ན་བཞིན་བྱ་དགོས་པའི་བཀའ་ཁྲིམས་བསྒྲགས་སོ། །དེ་ལྟར་མཁན་ཆེན་བོ་དྷི་ས་ཏྭས་རྒྱལ་བསྟན་ཉིན་མོ་ལྟར་གསལ་བར་མཛད་ནས་སྐུའི་བཀོད་པར་བསྡུ་བ་ལ་ཕྱོགས་པ་ན་ཆོས་རྒྱལ་ཁྲི་སྲོང་ལྡེ་བཙན་ལ་འདི་ལྟར་བཀའ་སྩལ་ཏེ། བོད་དུ་མུ་སྟེགས་ནི་མི་འབྱུང་གིས། སངས་རྒྱས་ཀྱི་བསྟན་པ་ཉིད་ཁ་གཉིས་སུ་གྱེས་ཏེ་རྩོད་པར་འགྱུར་བས། དེའི་ཚེ་ངའི་སློབ་མ་ཀ་མ་ལ་ཤཱི་ལ་སྤྱན་དྲོངས་ལ་རྩོད་པ་བྱེད་དུ་ཆུག་ཅིག རྩོད་པ་བྱས་པས་རྩོད་པ་ཆོས་ཕྱོགས་སུ་ཞི་བར་འགྱུར་རོ། །ཞེས་ལུང་བསྟན་ཏེ་ཞི་བར་གཤེགས་སོ། །

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...