སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
བོད་ཟླ5པའི་ཚེས15ཉིན་ཀརྨ་པ་རང་བྱུང་རྡོ་རྗེས་སྲོལ་གཏོད་གནང་བའི་འཛམ་གླིང་སྤྱི་བསངས་དུས་དྲན་ཡིན།
རྩོམ་པ་པོ། ཐུབ་བསྟན་ཕུན་ཚོགས། རྩོམ་སྒྲིག་པ། Lhamo དུས་ཚོད། 2016-7-19 14:41:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།

བོད་ཟླ་ལྔ་པའི་ཚེས་བཅོ་ལྔ་ཉིན་ནི་ཀརྨ་པ་རང་བྱུང་རྡོ་རྗེས་སྲོལ་གཏོད་གནང་བའི་འཛམ་གླིང་སྤྱི་བསངས་དུས་དྲན་རེད།

     རབ་བྱུང་དྲུག་པའི་ས་འབྲུག་སྤྱི་ལོ༡༣༢༨ལོར་ཀརྨ་པ་རང་བྱུང་རྡོ་རྗེས་བོད་ཀྱི་བྱང་ཕྱོགས་སོག་ཆུ་ཁར་ལྕགས་ཟམ་འཛུགས་སྐབས། འཛམ་བུ་གླིང་གི་གཞི་བདག་རྣམས་ལ་འཕྲིན་བཅོལ་གྱི་ཆེད་དུ་བརྩམས་པའི་བསངས་དཔེ་ཞིག་གི་མིང་ཡིན། དེའི་རྗེས་སུ་བོད་ཀྱི་ཡུལ་གྲུ་སོ་སོར་ཟླ་བ་ལྔ་བའི་ནང་ཡུལ་ལྷ་བསོ་ཞིང་ལྷ་བསངས་བཏང་བའི་དུས་ཆེན་ཞིག་དར་བ་དང་། ལྷ་བསངས་གཏོང་སྐབས་འཛམ་གླིང་སྤྱི་བསངས་ཀྱི་དཔེ་ཆ་འདི་འདོན་སྲོལ་ཆགས་པར་འཛམ་གླིང་སྤྱི་བསང་ཞེས་རི་ལྷ་བསོ་བའི་དུས་ཆེན་དེའི་མིང་ཆགས་པ་རེད། རི་ལྷ་བསོ་ཞིང་ལྷ་བསང་གཏོང་བའི་དུས་ནི་ཡུལ་སོ་སོའི་ས་བབ་དང་བསྟུན་པའི་དུས་ཚོད་མི་འདྲ་བ་ཅུང་ཟད་ཡོད་ཀྱང་། ཟླ་བ་ལྔ་པའི་ཚེས་བཅོ་ལྔར་དམིགས་བསལ་བོད་ཁམས་ཡོངས་ལ་ལྷ་བསངས་གཏོང་བའི་སྲོལ་དེ་ཡོད་འདུག དེང་དུས་ཚིག་མཛོད་འགའ་ཞིག་དང་། བོད་ཡིག་དབྱིངས་ཐེར་དྲྭ་རྒྱ་སོགས་ཀྱི་ནང་དུ་རྒྱལ་པོ་ཁྲི་སྲོང་ལྡེའུ་བཙན་སྐབས་སུ་གུ་རུ་པདྨ་འབྱུང་གནས་ཀྱིས་མཛད་པ་རེད་ཅེས་བྲིས་འདུག་པ་དེ་ནི་ལྷ་བསང་རྒྱག་བརྔན་དང་གཅིག་ཏུ་འཁྲུལ་ནས་ངོ་སྤྲོད་བྱས་པར་སེམས། ལྷ་བསང་རྒྱགས་བརྔན་ནི་སློབ་དཔོན་པདྨས་མཛད་ཅིང་གཏེར་སྟོན་རིག་འཛིན་རྒོད་ལྡེམ་གྱིས་གཏེར་ནས་བཏོན་པ་ཞིག་ཡིན། དེ་དང་འཛམ་གླིང་སྤྱི་བསང་གཉིས་དོན་གཅིག་མིན་པར་ཤེས་པ་བྱའོ། ། འོན་ཀྱང་སློབ་དཔོན་པདྨས་མཛད་པའི་འཛམ་གླིང་སྤྱི་བསངས་ཟེར་བ་ནི་ཁུངས་ལྡན་གྱི་ལོ་རྒྱུས་ཡིག་ཆ་གང་ལའང་མཐོང་རྒྱུ་མི་སྣང་།

ཆོས་རྗེ་རང་བྱུང་རྡོ་རྗེས་སོག་ཆུ་ལ་ལྕགས་ཟམ་འཛུགས་སྐབས་མཛད་པའི་འཛམ་གླིང་སྤྱི་བསངས་བཞུགས་སོ། །

     ཀྱེེ། སྔོན་གྱི་བསྐལ་པ་དང་པོ་ལ། ། བསང་གི་རྒྱུ་ནི་ཇི་ལྟར་སྲིད། ། སྐྱེ་མེད་སྤྲོས་བྲལ་སྟོང་པ་ལ། ། འགགས་མེད་འཁོར་ལོ་བསྒྱུར་རྒྱལ་ཤར། ། སྐྱེ་འགགས་གཉིས་མེད་རོལ་པ་ལ། ། མཁའ་ལ་རླུང་བརྟེན་འབྱུང་བ་རིམ་བཞིན་ཆག །ཕྱི་སྣོད་འཇིག་རྟེན་གཞལ་ཡས་རང་གྲུབ་ལ། ། ནང་བཅུད་སེམས་ཅན་བྱང་ཆུབ་སྙིང་པོར་གྱུར། ། སྤྲུལ་པའི་ལྷ་རྣམས་འགྲོ་བའི་དོན་ལ་བྱོན། ། རི་རབ་རི་བདུན་རང་བཞིན་ལྷུན་གྱིས་གྲུབ། ། རོལ་པའི་མཚོ་བདུན་སྨོན་ལམ་སྟོབས་ཀྱིས་ཆགས། ། མེ་ཤེལ་ཆུ་ཤེལ་སྣང་སྲིད་དཀར་དམར་ཤར། ། སྤོས་རི་ངད་ལྡན་འཛམ་བུ་གླིང་གི་རི། ། རི་བོ་དེ་ཡི་ཤར་ཕྱོགས་ན། ། ཤིང་ནི་བ་ལུ་དཀར་པོ་སྐྱེས། ། རི་བོ་དེ་ཡི་ལྷོ་ཕྱོགས་ན། ། ཤིང་ནི་གསེར་སྟག་སེར་པོ་སྐྱེས། ། རི་བོ་དེ་ཡི་ནུབ་ཕྱོགས་ན། ། ཤིང་ནི་ཙན་དན་དམར་པོ་སྐྱེས། ། རི་བོ་དེ་ཡི་བྱང་ཕྱོགས་ན། ། ཤིང་ནི་ལོ་བཟང་ཤུགས་པ་སྐྱེས། ། རི་བོ་དེ་ཡི་ནུབ་བྱང་ན། ། ཤིང་ནི་དེ་ཝ་ཌྰ་རུ་སྐྱེས། ། རི་བོ་དེ་ཡི་བྱང་ཤར་ན། ། ཤིང་ནི་མཁན་དཀར་གསེར་མགོ་སྐྱེས། ། རི་བོ་དེ་ཡི་དབུས་ཕྱོགས་ན། ། ཤིང་ནི་དཔག་བསམ་ལྗོན་ཤིང་སྐྱེས། ། ཤིང་སྣ་དགུ་ཡི་དུད་པ་དང་། ། ཕྱེ་མར་ཟས་ཕུད་སྐོམ་དང་ནི། ། གཡག་ལུག་ར་གསུམ་གཟུགས་འགྲོས་དང་། ། དཀར་དམར་མདངས་ལྡན་ཤ་ཕུད་དང་། ། རྩི་སྨན་དར་ཟབ་སྣ་ཚོགས་དང་། ། རོལ་མོ་སྒྲ་སྙན་གདུང་བའི་དབྱངས། ། འདོད་ཡོན་མཆོད་པ་སྣ་ཚོགས་ཀྱིས། ། ཀྱེ། ཀུན་ཏུ་བཟང་པོ་ལ་སོགས་པའི། ། རྙིང་མ་རྒྱུད་པ་ཐམས་ཅད་བསངས། ། རྡོ་རྗེ་འཆང་ཆེན་ལ་སོགས་པའི། ། གསར་མ་རྒྱུད་པ་ཐམས་ཅད་བསངས། ། སྣང་བ་མཐའ་ཡས་ལ་སོགས་པའི། ། གཏེར་མ་རྒྱུད་པ་ཐམས་ཅད་བསངས། ། པདྨ་འབྱུང་གནས་ལ་སོགས་པའི། ། རིག་འཛིན་རྒྱུད་པ་ཐམས་ཅད་བསངས། ། ཕ་རོལ་ཕྱིན་དྲུག་ལ་སོགས་པའི། ། དུས་གསུམ་རྒྱལ་བའི་ཡུམ་རྣམས་བསངས། ། དཀོན་མཆོག་འབྱུང་གནས་ལ་སོགས་པའི། ། ཕྱོགས་བཅུའི་སངས་རྒྱས་ཐམས་ཅད་བསངས། ། མར་མེ་མཛད་ལ་སོགས་པ་ཡི། ། འདས་པའི་སངས་རྒྱས་ཐམས་ཅད་བསངས། ། ཤྰཀྱ་ཐུབ་པ་ལ་སོགས་པའི། ། ད་ལྟའི་སངས་རྒྱས་ཐམས་ཅད་བསངས། ། བྱམས་པ་མགོན་པོ་ལ་སོགས་པའི། ། ཕྱིས་ནས་འབྱོན་པ་ཐམས་ཅད་བསངས། ། རྣམ་པ་སྣང་མཛད་ལ་སོགས་པའི། ། བདེ་གཤེགས་རྒྱལ་བ་རིག་ལྔ་བསངས། ། ནམ་མཁའི་དབྱིངས་ཕྱུག་ལ་སོགས་པའི། ། རིགས་ཀྱི་ཡུམ་ཆེན་ལྔ་པོ་བསངས། ། འཕགས་པ་འཇམ་དཔལ་ལ་སོགས་པའི། ། རིགས་གསུམ་མགོན་པོ་རྣམ་གསུམ་བསངས། ། ནམ་མཁའི་སྙིང་པོ་ལ་སོགས་པའི། ། བྱང་ཆུབ་སེམས་དཔའ་ཐམས་ཅད་བསངས། ། གནས་བརྟན་རབ་འབྱོར་ལ་སོགས་པའི། ། ཉན་ཐོས་ཆེན་པོ་བཅོ་བརྒྱད་བསངས། ། གདུང་བ་སེལ་ལ་སོགས་པ་ཡི། ། རང་རྒྱལ་ཆེན་པོ་བཅུ་གཉིས་བསངས། ། བྷ་ར་དྷཱ་ཛ་ལ་སོགས་པའི། ། གནས་བརྟན་ཆེན་པོ་བཅུ་དྲུག་བསངས། ། སློབ་དཔོན་ཐོག་མེད་ལ་སོགས་པའི། ། འཛམ་བུ་གླིང་གི་རྒྱན་དྲུག་བསངས། ། ཨིནྡྲ་བྷོ་དྷི་ལ་སོགས་པའི། ། རྣལ་འབྱོར་གྲུབ་ཆེན་བརྒྱད་པོ་བསངས། ། ཀླུ་སྒྲུབ་སྙིང་པོ་ལ་སོགས་པའི། ། རྒྱ་གར་གྲུབ་ཆེན་བརྒྱད་ཅུ་བསངས། ། གསང་བ་འདུས་པ་ལ་སོགས་པའི། ། ཕ་རྒྱུད་ལྷ་ཚོགས་ཐམས་ཅད་བསངས། ། མ་ཧཱ་མ་ཡ་ལ་སོགས་པའི། ། མ་རྒྱུད་ལྷ་ཚོགས་ཐམས་ཅད་བསངས། ། བདེ་མཆོག་དགྱེས་རྡོར་ལ་སོགས་པའི། ། བླ་མེད་རྒྱུད་སྡེ་ཐམས་ཅད་བསངས། ། རྡོ་རྗེ་སེམས་དཔའ་ལ་སོགས་པའི། ། ཞི་བའི་ལྷ་ཚོགས་ཐམས་ཅད་བསངས། ། ཆེ་མཆོག་ཁྲག་འཐུང་ལ་སོགས་པའི། ། ཁྲོ་བོའི་ལྷ་ཚོགས་ཐམས་ཅད་བསངས། ། གཤིན་རྗེ་གཤེད་ལ་སོགས་པ་ཡི། ། སྐུ་ཡི་ལྷ་ཚོགས་ཐམས་ཅད་བསངས། ། པདྨ་དབང་ཆེན་ལ་སོགས་པའི། ། གསུང་གི་ལྷ་ཚོགས་ཐམས་ཅད་བསངས། ། བཛྲ་ཧེ་རུ་ཀ་ལ་སོགས། ། ཐུགས་ཀྱི་ལྷ་ཚོགས་ཐམས་ཅད་བསངས། ། རྡོ་རྗེ་གཞོན་ནུ་ལ་སོགས་པའི། ། འཕྲིན་ལས་ལྷ་ཚོགས་ཐམས་ཅད་བསངས། ། བླ་མེད་ཧེ་རུ་ཀ་ལ་སོགས། ། མ་མོ་རྦད་གཏོང་ལྷ་ཚོགས་བསངས། ། རྩ་བའི་བླ་མ་ལ་སོགས་པའི། ། རིག་འཛིན་བླ་མའི་ལྷ་ཚོགས་བསངས། ། དྲེགས་པ་ཀུན་འདུལ་ལ་སོགས་པའི། ། འཇིག་རྟེན་མཆོད་བསྟོད་ལྷ་ཚོགས་བསངས། ། སྟོབས་ལྡན་ནག་པོ་ལ་སོགས་པའི། ། དམོད་པ་དྲག་སྔགས་ལྷ་ཚོགས་བསངས། ། རིག་འཛིན་མཁའ་འགྲོ་ལ་སོགས་པའི། ། བཀའ་སྲུང་ལྷ་ཚོགས་ཐམས་ཅད་བསངས། ། མགོན་པོ་ནག་པོ་ལ་སོགས་པའི། ། ཆོས་སྐྱོང་ཕོ་རྒྱུད་ཐམས་ཅད་བསངས། །  དཔལ་ལྡན་ལྷ་མོ་ལ་སོགས་པའི། ། ཆོས་སྐྱོང་མོ་རྒྱུད་ཐམས་ཅད་བསངས། ། ཚངས་པ་དུང་ཐོད་ལ་སོགས་པའི། ། སྟེང་གི་ལྷ་ཚོགས་ཐམས་ཅད་བསངས། ། གཉན་རྒན་དེ་ཝ་ལ་སོགས་པའི། ། བར་སྣང་གནས་པའི་གཉན་རྣམས་བསངས། ། ས་བདག་དབང་ཆེན་ལ་སོགས་པའི། ། ས་ལ་གནས་པའི་ས་བདག་བསངས། ། ཡུལ་འཁོར་སྲུང་ལ་སོགས་པ་ཡི། ། རྒྱལ་པོ་ཆེན་པོ་སྡེ་བཞི་བསངས། ། ལྷ་དབང་རྒྱ་བྱིན་ལ་སོགས་པའི། ། ཕྱོགས་སྐྱོང་གཉན་པོ་བཅུ་པོ་བསངས། ། མ་ཧཱ་དེ་ཝ་ལ་སོགས་པའི། ། ལྷ་ཆེན་བརྒྱད་པོ་འཁོར་བཅས་བསངས། ། དགའ་བོ་འཇོག་པོ་ལ་སོགས་པའི། ། ཀླུ་ཆེན་བརྒྱད་པོ་འཁོར་བཅས་བསངས། ། ཉི་མ་ཟླ་བ་ལ་སོགས་པའི། ། གཟའ་ཆེན་བརྒྱད་པོ་འཁོར་བཅས་བསངས། ། ཛམ་བྷ་ལ་ལ་སོགས་པ་ཡི། ། ནོར་སྲུང་བརྒྱད་པོ་འཁོར་བཅས་བསངས། ། སྐར་མ་སྨིན་དྲུག་ལ་སོགས་པའི། ། རྒྱུ་སྐར་ཉི་ཤུ་རྩ་བརྒྱད་བསངས། ། རྒྱལ་བློན་བཅུ་གཉིས་ལ་སོགས་པའི། ། ལོ་ཡི་ས་བདག་ཐམས་ཅད་བསངས། ། མགྲོན་བུ་ལྷ་ལྔ་ལ་སོགས་པའི། ། ཟླ་བའི་ས་བདག་ཐམས་ཅད་བསངས། ། བྱི་ལིང་འཕར་མ་ལ་སོགས་པའི། ། ཞག་གི་ས་བདག་ཐམས་ཅད་བསངས། ། ཉུ་ལེ་བཅུ་གཉིས་ལ་སོགས་པའི། ། དུས་ཚོད་ས་བདག་ཐམས་ཅད་བསངས། ། རི་བོ་མཆོག་རབ་ལ་སོགས་པའི།      །རི་བདུན་རོལ་པའི་མཚོ་བདུན་བསངས། ། ལྷོ་རྒྱལ་འཛམ་བུ་གླིང་ལ་སོགས། ། གླིང་ཆེན་བཞི་ལ་གནས་པ་བསངས། ། རྔ་ཡབ་གླིང་ལ་སོགས་པ་ཡི། ། གླིང་ཕྲན་བརྒྱད་ལ་གནས་པ་བསངས། ། རི་བོ་པོ་ཏ་ལ་སོགས་པའི། ། རི་བོ་རྣམས་ལ་གནས་པ་བསངས། ། ཆུ་བོ་གངྒ་ལ་སོགས་པའི། ། ཆུ་བོ་རྣམས་ལ་གནས་པ་བསངས། ། རྡོ་རྗེ་གདན་ལ་སོགས་པ་ཡི། ། རྒྱ་གར་གཙུག་ལག་སྲུང་མ་བསངས། ། ན་ལེནྡྲ་ལ་སོགས་པ་ཡི། ། རྒྱ་གར་ཆོས་གྲྭའི་སྲུང་མ་བསངས། ། ཨོ་རྒྱན་ཡུལ་ལ་སོགས་པ་ཡི། ། བསྒྲུབ་གནས་རྣམས་ལ་གནས་པ་བསངས། ། བསིལ་པ་ཚལ་ལ་སོགས་པ་ཡི། ། དུར་ཁྲོད་རྣམས་ལ་གནས་པ་བསངས། ། འཕགས་པ་ཤིང་ཀུན་ལ་སོགས་པའི། ། བལ་པོའི་གཞི་བདག་ཐམས་ཅད་བསངས། ། རི་བོ་གྷནྡྷོ་ལ་སོགས་པའི། ། བོད་ཀྱི་མགུལ་ལྷ་བཅུ་གསུམ་བསངས། ། ཁ་རག་ཁྱུང་བཙུན་ལ་སོགས་པའི། ། བོད་ཁམས་སྐྱོང་བ་བཅུ་གཉིས་བསངས། ། ཨེ་ཛི་རི་དང་ཤིན་གྷ་དྷ། ། བྱང་ཕྱོགས་ས་བདག་ཐམས་ཅད་བསངས། ། གནམ་མཚོ་ཕྱུག་མོ་ལ་སོགས་པའི། ། བྱང་གི་མཚོ་སྨན་ཐམས་ཅད་བསངས། ། མ་ཕམ་གཡུ་མཚོ་ལ་སོགས་པའི། ། ཞང་ཞུང་ཡུལ་གྱི་མཚོ་སྨན་བསངས། ། ལྷ་ས་བསམ་ཡས་ལ་སོགས་པའི། ། བོད་ཀྱི་གཙུག་ལག་སྲུང་མ་བསངས། ། ལྷོ་བྲག་མཁར་ཆུ་ལ་སོགས་པའི། ། བོད་ཡུལ་དབེན་གནས་སྲུང་མ་བསངས། ། དགེ་བསྙེན་མཁའ་རི་ལ་སོགས་པའི། ། བོད་ཡུལ་གཏེར་སྲུང་ཐམས་ཅད་བསངས། ། དཔལ་ལྡན་ས་སྐྱ་ལ་སོགས་པའི། ། ཆོས་གྲྭའི་སྲུང་མ་ཐམས་ཅད་བསངས། ། དྭགས་ལྷ་སྒམ་པོ་ལ་སོགས་པའི། ། སྒོམ་གྲྭའི་སྲུང་མ་ཐམས་ཅད་བསངས། །  གངས་དཀར་ཏི་སེ་ལ་སོགས་པའི། ། མངའ་རིས་ཡུལ་གྱི་ས་བདག་བསངས། ། གང་བ་བཟང་པོ་ལ་སོགས་པའི། ། གཙང་གི་ས་བདག་ཐམས་ཅད་བསངས། ། ཡར་ལྷ་ཤམ་པོ་ལ་སོགས་པའི། ། ཡར་ལུང་ས་བདག་ཐམས་ཅད་བསངས། ། ཐང་ལྷ་ཡར་བཞུད་ལ་སོགས་པའི།      །དབུས་ཀྱི་ས་བདག་ཐམས་ཅད་བསངས། ། འོ་དེ་གུང་རྒྱལ་ལ་སོགས་པའི། ། ཉང་པོའི་ས་བདག་ཐམས་ཅད་བསངས། ། སྒམ་པོ་ས་རི་ལ་སོགས་པའི། ། དྭགས་པོའི་ས་བདག་ཐམས་ཅད་བསངས། ། ཀོང་བཙུན་དེ་མོ་ལ་སོགས་པའི། ། ཀོང་པོའི་ས་བདག་ཐམས་ཅད་བསངས། ། ཁ་ཤ་སྙུག་རི་ལ་སོགས་པའི། ། མོན་ཡུལ་ས་བདག་ཐམས་ཅད་བསངས། ། གཡག་ལ་སེ་བོ་ལ་སོགས་པའི། ། སོག་གི་གཞི་བདག་ཐམས་ཅད་བསངས། ། ཁ་བ་དཀར་པོ་ལ་སོགས་པའི། ། ཚ་བ་རོང་གི་ས་བདག་བསངས། ། རོང་ལྷ་རྒྱལ་མཚན་ལ་སོགས་པའི། ། རོང་གི་ས་བདག་ཐམས་ཅད་བསངས། ། དམག་དཔོན་དགྲ་འདུལ་ལ་སོགས་པའི། ། ཚ་བ་སྒང་གི་ས་བདག་བསངས། ། ཁྱུང་ཐོ་དུང་རི་ལ་སོགས་པའི། ། སྤོ་བོའི་ས་བདག་ཐམས་ཅད་བསངས། ། གཟི་ཡི་མ་ཡོ་ལ་སོགས་པའི། ། ལྕི་ཡི་ས་བདག་ཐམས་ཅད་བསངས། ། འབྲི་རྒྱལ་ཤེ་རི་ལ་སོགས་པའི། ། མདོ་ཁམས་སྒང་གི་གཞི་བདག་བསངས། ། རྩི་ཡི་ས་རྒོད་ལ་སོགས་པའི། ། ཟླ་བའི་ས་བདག་ཐམས་ཅད་བསངས། ། རྡོ་ཐི་གངས་དཀར་ལ་སོགས་པའི། ། གནས་དྲུག་ས་བདག་ཐམས་ཅད་བསངས། ། ཡོལ་རྒྱལ་མ་ཡོལ་ལ་སོགས་པའི། ། ཡོལ་གྱི་གཞི་བདག་ཐམས་ཅད་བསངས། ། ངོམ་རྒྱལ་མཚོ་བཀྲ་ལ་སོགས་པའི། ། ངོམ་གྱི་ས་བདག་ཐམས་ཅད་བསངས། ། ཆབ་ལ་རྫོང་ཕྲོལ་ལ་སོགས་པའི། ། འབེ་ཡི་ས་བདག་ཐམས་ཅས་བསངས། ། སྒྱོགས་ཆེན་གདོང་ར་ལ་སོགས་པའི། ། འདན་གྱི་ས་བདག་ཐམས་ཅས་བསངས། ། མི་མགོན་དཀར་པོ་ལ་སོགས་པའི། ། སྨར་ཁམས་སྒང་གི་ས་བདག་བསངས། ། གེར་མཛོ་གཉན་པོ་ལ་སོགས་པའི། ། ཤར་ཟླའི་ས་བདག་ཐམས་ཅད་བསངས། ། རྨ་ཆེན་སྤོམ་ར་ལ་སོགས་པའི། ། རྨ་ཡི་ས་བདག་ཐམས་ཅས་བསངས། ། དགེ་བསྙེན་གདོང་ར་ལ་སོགས་པའི། ། འབྲི་གུང་ས་བདག་ཐམས་ཅད་བསངས། ། གཙང་གཉན་སྨྲི་ཏི་ལ་སོགས་པའི། ། གཙང་གི་ས་བདག་ཐམས་ཅད་བསངས། ། རྡོ་རྗེ་དཔལ་བརྩེགས་ལ་སོགས་པའི། ། སྤོམ་འབོར་སྒང་གི་ས་བདག་བསངས། ། ལྷ་ཆེན་སྐུ་ལྷ་ལ་སོགས་པའི། ། རྒྱལ་མོ་རོང་གི་ས་བདག་བསངས། ། བཞག་ར་ལྷ་རྩེ་ལ་སོགས་པའི། །  རབ་སྒང་ས་བདག་ཐམས་ཅད་བསངས། ། རི་བོ་རྩེ་ལྔ་ལ་སོགས་པའི། ། རྒྱ་ནག་ས་བདག་ཐམས་ཅས་བསངས། །  འཇང་རི་སྨུག་པོ་ལ་སོགས་པའི། ། འཇང་ཡུལ་ས་བདག་ཐམས་ཅས་བསངས། །  ལྕོག་ལ་མཚལ་རྩེ་ལ་སོགས་པའི། ། ཧོར་ཡུལ་ས་བདག་ཐམས་ཅད་བསངས། །  ཡུལ་ལྷ་གཉན་པོ་ལ་སོགས་པའི། ། ཡུལ་འདིའི་ས་བདག་ཐམས་ཅད་བསངས། །
     ཀྱེེ། ལྡོང་ལྷ་ཁྲོམ་ཁྲོམ་ལ་སོགས་པའི། ། གདོང་རིགས་སྲིད་པའི་དགྲ་བླ་བསངས།   །འགྲུ་མོ་ཕྲོམ་ཕྲོམ་ལ་སོགས་པའི། ། འགྲུ་རིགས་སྲིད་པའི་དགྲ་ལྷ་བསངས། ། དབྲ་མོ་དབྲ་དཀར་ལ་སོགས་པའི།   །དབྲ་རིགས་སྲིད་པའི་དགྲ་བླ་བསངས། ། སྒ་མོ་ལེགས་ཕྲོམ་ལ་སོགས་པའི། ། སྒ་རིགས་སྲིད་པའི་དགྲ་བླ་བསངས། ། དགུ་རྒྱུད་དགུ་སྤྲུལ་ལ་སོགས་པའི། ། དགུ་རིགས་སྲིད་པའི་དགྲ་བླ་བསངས། ། མཚལ་སྟག་དམར་པོ་ལ་སོགས་པའི། ། དབལ་ཟླ་གཉིས་ཀྱི་དགྲ་བླ་བསངས། ། སྨན་མི་དབུ་ལ་སོགས་པ་ཡི། ། ཡང་མྱེས་བཙུན་རྒན་ཐམས་ཅད་བསངས། ། ཡབ་ལྷ་སྡེ་དྲུག་ལ་སོགས་པའི། ། མེས་མཚུན་གཉན་པོ་ཐམས་ཅད་བསངས། ། རྒྱལ་བུ་འཐིང་གེ་ལ་སོགས་པའི། ། ཕ་མཚུན་གཉན་པོ་ཐམས་ཅད་བསངས། ། སྟག་ཆས་དཔལ་བུ་ལ་སོགས་པའི། ། གྲི་མཚུན་གཉན་པོ་ཐམས་ཅད་བསངས། ། དེ་མོ་གངས་དཀར་ལ་སོགས་པའི། ། མ་མཚུན་གཉན་པོ་ཐམས་ཅད་བསངས། ། དེ་རྣམས་བསངས་བའི་ཡོན་ཏན་གྱིས། ། བདག་ཅག་ཡོན་མཆོད་འཁོར་བཅས་ཀྱི། ། མི་ལ་ན་ཚ་མ་བཏང་ཅིག ། ཕྱུག་ལ་གོད་ཁ་མ་བཏང་ཅིག ། ཞིང་ལ་བཙའ་སད་མ་བཏང་ཅིག ། བསམ་པ་ཆོས་བཞིན་འགྲུབ་པར་མཛོད། ། ཅེས་པ་རང་བྱུང་རྡོ་རྗེས་སོག་གི་ཆུ་ལ་ལྕགས་ཟམ་བཙུགས་པའི་དུས་སུ་མཛད་པའོ། ། སརྦ་མངྒ་ལ། །


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...