སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
བསང་གི་བྱུང་བ་དང་ཕན་ཡོན།
རྩོམ་པ་པོ། ནམ་མཁའ་ནོར་བུའི་གསུང་རྩོམ་ཕྱོགས་བསྒྲིགས་ལས་བཏུས། རྩོམ་སྒྲིག་པ། Lhamo དུས་ཚོད། 2018-5-10 9:28:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
བསང་གི་བྱུང་བ།
     སྤྱིར་བསང་ཞེས་པ་ནི་གཙང་གི་དོན་ཡིན་པས། བསང་ཕུལ་ཞེས་པ་ནི་གཙང་ཕུལ་བ་སྟེ། རང་ཉིད་དད་འདུན་ཆེ་བའི་ཡུལ་བྱེ་བྲག་པ་ཅིག་ལ་བཟའ་བཏུང་གི་དྭངས་མ་དང་། ཤུག་པ། བ་ལི། ཙན་དན་གྱི་དྲི་བཏང་སྟེ་མི་གཙང་བའི་མནོལ་གྲིབ་ཐམས་ཅད་བསང་བར་བྱེད་པའི་ཆོ་ག་ཞིག་ལ་ཟེར་ཞིང་། འདིའི་ཐོག་མའི་ཁུངས་ཐད་ལ་འཇིག་རྟེན་དང་འབྲེལ་བའི་བཤད་ཚུལ་ཞིག་དང་། ཆོས་ལུགས་དང་འབྲེལ་བའི་བཤད་རྒྱུན་ཚུལ་གཉིས་མཆིས་ཏེ།སྔ་མ་འཇིག་རྟེན་དང་འབྲེལ་བའི་བཤད་ཚུལ་ནི། བོད་གཙོས། རྒྱ་ནག་དང་། ཁ་ཆེ་མི་རིགས་གང་ལ་མཚོན་ནའང་རི་འགོ་མཐོན་པོའི་སྟེང་ནས་དུ་བ་གཏོང་བའི་སྲོལ་ཀ་དེ་གདོད་མ་གློག་ཆས་ཡོ་བྱད་མེད་པའི་དུས་སྐབས་སུ། ཚོགས་པའམ་ཐུན་མོང་རང་བཞིན་གྱིས་ཕན་ཚུན་རི་མཐོན་པོའི་མགོ་ནས་དུ་བ་བཏང་སྟེ། གསང་བརྡ་སྤྲོད་བྱེད་ཀྱི་བརྡ་ཐབས་ཁྱད་པར་བ་ཞིག་ལགས་པས་དེ་ཐོག་མར་དམག་འཁྲུག་ཏུ་སྤྱོད་ལ། ཕྱིས་སུ་བོད་རང་ལ་མཚོན་ན་རིམ་བཞིན་ཆོས་ལུགས་ཀྱི་ཆོ་ག་ཞིག་ཏུ་གྱུར་ཡོད།
     ཕྱི་མ་ཆོས་ལུགས་དང་འབྲེལ་བའི་བཤད་ཚུལ་ནི། ཇི་སྐད་དུ་མདོ་སྡེ་གསེར་འོད་དམ་པ་ལས། བཙུན་པ་བཅོམ་ལྡན་འདས། གསེར་འོད་དམ་པ་མདོ་སྡེའི་དབང་བོ་རྒྱལ་བོ་དེ་ལ་མཆོད་པའི་སླད་དུ་བདུག་སྤོས་སྣ་ཚོགས་ལས་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ།དེ་དག་སྐད་ཅིག་ཐེངས་ཅིག་ཡུད་ཙམ་དེ་ལ་རྒྱལ་བོ་བདག་ཅག་བཞིའི་རང་རང་གི་ཁང་བའི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ།  དེ་དག་སྐད་ཅིག་ཐེངས་ཅིག་ཡུད་ཙམ་དེ་ལ་རྒྱལ་པོ་བདག་ཅག་བཞིའི་རང་རང་གི་ཁང་བའི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་སུ་གནས་པར་འགྱུར་ཞེས་གསུངས། ཐུའུ་བཀྭན་བློ་བཟང་ཆོས་ཀྱི་ཉི་མས་ཀྱང་། མ་ག་དྷ་བཟང་མོས་མཐའ་འཁོབ་ཀྱི་ཡུལ་བུ་རམ་ཤིང་འཕེལ་དུ་རང་གི་ཁང་ཐོག་ནས་བསང་གི་དུད་སྤྲིན་ཐུལ་བ། སངས་རྒྱས་མཉན་ཡོད་དུ་བཞུགས་པའི་སྤྱན་སྔར་མཆོད་སྤྲིན་གྱི་ཕུང་བོར་འཁྲིགས་པའི་ལོ་རྒྱུས་མདོ་ལས་གསུངས་པ་དེ་ཉིད་བསང་གི་ཁུངས་སུ་འགྲོ་བར་སེམས་མོ།།ཞེས་དང་། ཁྱད་པར་དུ་དགྲ་བཅོམ་པ་ས་ག་ལྷའི་མེ་ཏོག་ཕྲེང་རྒྱུད་དུ། སངས་རྒྱས་སྐུ་གཟུགས་གྲོང་སོགས་སུ། །སྤྱན་དྲངས་པར་ནི་གསུངས་པ་ཡིན། ། དེར་ནི་ཆག་ཆག་བྱུགས་པ་དང་། ། སྲང་གི་བཞི་མདོར་ས་གཞི་ལ། ། སྣ་ཚོགས་མེ་ཏོག་བཀོད་པ་ཡིས། ། རབ་ཏུ་མཛེས་པར་བྱས་པ་ཡིན། ། ཙན་དན་ཨ་ཀར་ག་བུར་གྱི། ། བདུག་སྤོས་ཀུན་ནས་འབུལ་བར་བྱ། །ཞེས་གསུངས་པ་འདི་དག་བསང་གི་ཁུངས་དྲག་ཤོས་ཡིན་པར་བསྟན་དར་ལྷ་སའི་བར་སྐོར་དུ་བྱམས་སྐུ་གདན་འདྲེན་སྐབས་ལྟ་བུ་ལ་སྲང་བར་དུ་བསངས་ཤིང་དུ་བ་འཐུལ་བར་བྱས་པའི་སྲོལ་མཆིས་པ་དེ། རྒྱ་གར་པའི་ཆོས་ལུགས་ཀྱི་རྗེས་སུ་འབྲངས་པ་ཡིན་པར་གོར་མ་ཆག་གོ་ཞེས་གསུངས་འདུག་གོ་ཞེས་ཆ་རིས་པས་བཞེད་དོ། །
      གོང་གི་རྒྱུ་མཚན་དེ་དག་ལ་གཞིགས་ན་བསང་དང་བོད་མིའི་བར་ཤ་ཁྲག་ལྟ་བུའི་འབྲེལ་བ་མཆིས་པས།མདོ་དབུས་ཁམས་གསུམ་གྱི་ཡུལ་ལུང་སོ་སོ་ལའང་རང་རང་གི་ཡབ་མེས་ནས་མཆོད་བཀུར་བྱེད་པའི་ཡུལ་ལྷ་གཞི་བདག་སོགས་ཡུལ་བྱེ་བྲག་པ་དེ་དག་མཆོད་བསྟོད་བྱེད་པའི་བསང་ཡིག་ཅི་རིགས་ཡོད་དོ།།
བསང་གི་ཕན་ཡོན།
     དུས་ཕྱིས་ཀྱི་མཁས་བླུན་ཕལ་མོ་ཆེས་མཆོད་པའི་གྲས་ཤིག་སྟེ། ཇི་ལྟར་དབང་པོ་ལྔའི་ཡུལ་དུ་གཟུགས་ལ་སོགས་པ་མཆོད་པ་བྱེ་བྲག་རྣམས་འབུལ་བའི་ཚེ་ཤངས་ལ་བདུག་སྤོས་དང་དྲི་བཟང་གི་རིགས་རྣམས་འབུལ་དགོས་པ་ངོས་འཛིན་བྱེད་ཀྱིན་ཡོད་འདུག  བསངལ་དོན་ཡང་ངེས་པར་དུ་ཡོད་མོད། བསང་གི་ངོ་བོ་དང་བྱེད་ལས་གཙོ་བོ་ནི་མནོལ་གྲིབ་མི་གཙང་བའི་རིགས་རྣམས་བསང་བའམ་དག་པར་བྱེད་པ་སེལ་གྱི་སྒོ་ཞིག་ཡིན་པ་སྟེ་དེའི་ཚུལ་ནི་གེ་ཁོད་མནོལ་བསང་ཤན་ལས། བསང་གི་རྒྱུ་འདི་གང་ནས་བྱུང་། ། སྲིད་གསུམ་འདུས་པའི་རྩེ་མོ་ཡང་གོང་ན། ། གནམ་ཕྱི་གུང་རྒྱལ་བདུད་རྩིའི་ཡུལ། ། སྐུ་ལ་བདུད་རྩིའི་ཐུལ་པ་གསོལ། ། ཞལ་ནས་བདུད་རྩིའི་ཆར་བ་འབེབས། ། ཕྱག་ན་བདུད་རྩིའི་བུམ་པ་བསྣམས། ། ལས་སུ་བདུད་རྩིའི་ཐང་ལ་བརྡལ། ། ཉོན་མོངས་སྡུག་བསྔལ་འཇོམས་པ་དང་། །གེ་ཁོད་ལྷ་ཞལ་བལྟ་བའི་ཕྱིར། ། དབུ་ཡི་སྨིན་མ་ཕྱད་ཕྱོད་ལ། ། ཞལ་གྱི་མཆིལ་མ་ལྗགས་གང་ལ། ། ཞལ་ནས་བདེན་པའི་སྨོན་ལམ་བཏབ། ། མི་ཡུལ་གླིང་བཞིའི་འཇིག་རྟེན་ན། ། ཉོན་མོངས་རྣམ་རྟོག་སྡུག་བསྔལ་མང་། ། རྣམ་རྟོག་འཇོམས་པའི་རྩི་དང་སྨན། ། ལྷ་རྒོད་ཐང་ཤིང་སྐྱེ་བར་ཤོག ། གནམ་ནས་ས་ལ་གཏོར་བ་ལས། ། དེ་ལ་བསང་གི་རྒྱུ་རུ་བྱུང་། ། ཨ་ཀྲོང་དཀར་པོ་གངས་ཀྱི་རྩི། ། བདུད་རྩི་ཨ་བ་བྲག་གི་རྩི། ། སྤྲ་བ་ཐོད་དཀར་སྤང་གི་རྩི། ། སྤོས་མེ་དྲི་ཞིམ་རྫ་ཡི་རྩི། ། མཁན་པ་གསེར་ལོ་གད་ཀྱི་རྩི། ། ཤུག་པ་གཡུ་ལོ་ཉིན་གྱི་རྩི། ། བ་སྤུ་དཀར་པོ་སྲིབ་ཀྱི་རྩི། ། ཙན་དང་སྨུག་པོ་ནགས་ཀྱི་རྩི། ། ཞང་ཞུང་སྲིད་པའི་བོད་པོ་ཡིས། ། བདུད་རྩི་བསང་ཤིང་ལོ་བྲེགས་ནས། ། ཉོན་མོངས་དུག་མཚོན་མེ་ལ་བསྲེགས། ། མེ་སྟག་དྲག་པོའི་ཐོག་རྒོད་འཕྲོས། ། གདུག་པོའི་དགྲ་བགེགས་ཁོ་ཐག་བཅད། ། མེ་ལྕེ་བར་སྣང་ཁམས་སུ་ཁྱབ། ། ཉོན་མོངས་རྣམ་རྟོག་མུན་པ་གསལ། ། འདགས་ལ་ས་གཞིའི་ཁོངས་སུ་ལྷག  ། ལྷ་དང་མི་ཡི་ལོངས་སྤྱོད་རྒྱུ། ། ཐལ་བ་དུད་ཕྱེ་རླུང་གིས་གཏོར། ། དགྲ་བགེགས་ཐལ་བ་བརྡུལ་དུ་རློག ། དུད་པ་སྤྲིན་ཕུང་མཁའ་ལ་འཁྲིགས། ། ལྷ་གསལ་དབལ་གྱི་ཤངས་ལ་ཐིམ། །དམེ་བ་དག་ལ་མནོལ་བ་བསང་། །ཞེས་དང་། རྒྱགས་བརྔན་ཆེན་མོ་ཤབ་ལས། བསང་གི་རྒྱུ་བྱུང་གང་ནས་བྱུང་། །བསང་གི་རྒྱུ་བྱུང་གནམ་ནས་བྱུང་། ། ཕ་གནམ་ལ་འབྲུག་ཆེན་ལྡར་མ་ལྡིར། །མ་ས་ལ་གློག་ཆེན་གྱ་མ་གྱུ། །བུ་སྟར་སྒོ་གངས་ཀྱི་ཐིགས་པ་ཡིན། ། མ་ཕམ་གཡུ་མཚོའི་ཁ་ཞག་ཡིན། ། བཟང་དྲུག་སྨན་གྱི་ནུས་པ་ཡིན། ། དྲི་ཞིམ་སྤོས་ཀྱི་ངད་པ་ཡིན། ། ཕྱེ་མར་འོ་སྐོལ་གསུར་གྱིས་མཆོད། ། གསེར་ལོ་འབར་བའི་སྟག་པ་དང་། ། གཡུ་ལོ་འབར་བའི་ཤུག་པ་དང་། ། དུང་ལོ་འབར་བའི་བ་ལུ་དང་། མཁན་པ་སྤོས་དཀར་ཨ་ཀ་རུ། ། ཤིང་བདུད་རྩི་ཅན་གྱི་དུད་པ་དང་། ། ཕྱེ་མར་ཟས་ཕུད་གསེར་སྐྱེམས་ཀྱིས། ། ལྷ་འདྲེ་ཐམས་ཅད་བསང་བའི་ཕྱིར། །ཞེས་དང་། མནོལ་བསང་ཤན་ལས། བསང་ངོ་བསང་ངོ་རྨུགས་པ་བསང་། ། བསང་ངོ་བསང་ངོ་འཐིབས་པ་བསང་། ། བསང་ངོ་བསང་ངོ་བྱིངས་པ་བསང་། །བསང་ངོ་བསང་ངོ་ཉམས་གྲིབ་བསང་། ། བསང་ངོ་བསང་ངོ་འཁོན་གྲིབ་བསང་། །བསང་ངོ་བསང་ངོ་དམེ་གྲིབ་བསང་། །ཞེས་དང་ཡང་དེའི་ཤོག་གྲངས་ཤན་ལ། དུ་བ་གནམ་དུ་སོང་བ་ཡི། ། ནམ་མཁའ་གང་བའི་ལྷ་རྣམས་བསང་། ། ལྷ་ལ་གྲིབ་གྱི་ཕོག་པ་ཀུན། ། དེ་རིང་ཉིད་ནས་སངས་གྱུར་ཅིག ། མེ་སྟག་བར་སྣང་འཕྲོ་བ་ཡིས། ། བར་སྣང་གང་བའི་གཉན་རྣམས་བསང་། ། གཉན་ལ་གྲིབ་ཀྱིས་ཕོག་པ་ཀུན། ། དེ་རིང་ཉིད་ནས་སངས་གྱུར་ཅིག ། མེ་ལྕེ་ས་ལ་འཁྱིལ་བ་ཡིས། ། ས་གཞི་གང་བའི་ཀླུ་རྣམས་བསང་། ། ཀླུ་ལ་གྲིབ་ཀྱིས་ཕོག་པ་ཀུན། ། དེ་རིང་ཉིད་ནས་སངས་གྱུར་ཅིང་། །ཞེས་དང་། ཤབ་ལས། དེ་ལྟར་ལྷ་སྲུང་འཁོར་བཅས་ཀུན། །རྨུགས་པ་འཐིབས་པ་ཁམས་བདེ་མཛོད། ། འཐིབས་པ་གསལ་ནས་ཉམས་དགའོ། ། བསང་གིས་མི་བསང་གང་ཡང་མེད། །ཅེས་གསུངས་པ་དེ་དག་གིས་གསལ་ལོ། །

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...