སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སུམ་བྷའི་ནས་ཆང་བཙགས་ཚུལ་ནོར་སྒྲུབ་མན་ངག
རྩོམ་པ་པོ། རིན་ཆེན་བཀྲ་ཤིས། རྩོམ་སྒྲིག་པ། Lhamo དུས་ཚོད། 2019-11-4 10:47:00 རྩོམ་ཁུངས། ཀྲུང་གོ་བོད་ཀྱི་དྲ་བ། ཀློག་གྲངས།
      ༄༅། །ཨོཾ་སྭསྟི་སི་ངྔྷཾ། ཁྲོ་བོའི་རྒྱལ་པོ་བདུད་རྩི་འཁྱིལ་བ་ལ་ཕྱག་འཚལ་ལོ། །མྱ་ངན་འཐིབས་པ་སེལ་བའི་ཉི་མ་སྟེ། །དགའ་བདེའི་བསིལ་བ་བསྐྱེད་པའི་ཟླ་བ་ཡིན། །ཤེས་རབ་མེ་ལྕེ་འབར་བྱེད་རླུང་ཡིན་ལ། །སྨྲ་འདོད་རྣམས་ཀྱི་སྤོབས་པའི་དཔལ་ཡང་ཡིན། །ཞེས་འགྲོ་མགོན་ཆོས་རྒྱལ་འཕགས་པའི་གསུང་གིས་མདུན་བསུས་ཏེ། སུམ་བྷའི་ནས་ཆང་གི་བཙགས་ཚུལ་ཅུང་ཙམ་ཞུས་ན།
      སྤྱིར་ཆང་ནི་མི་སྐྱའི་འཚོ་བའི་ཁྲོད་མེད་མི་རུང་ཞིང་། གྲང་དུས་བསྲོས་ནས་བཏུང་ན་ལུས་ལ་དྲོད་སྐྱེད་པ་དང་། དགའ་སྤྲོའི་གླུ་དབྱངས་ལེན་དུས་སྐད་ཡོང་བ། སྐྱིད་དུས་ཞབས་བྲོ་འཁྲབ་དུས་ཉམས་ཐོན་པ། མྱ་ངན་གྱི་མུན་པ་སེལ་བའི་ཉི་མ་ལྟ་བུ། དགའ་བདེའི་བསིལ་བ་བསྐྱེད་པའི་ཟླ་བ་ལྟ་བུ། ཤེས་རབ་མེ་ལྕེ་འབར་བྱེད་ཀྱི་རླུང་ལྟ་བུ། སྨྲ་འདོད་རྣམས་ལ་སྤོབས་པའི་དཔལ་སྟེར་བ། སྡར་མ་འཕྲང་འགག་བགྲོད་པའི་སྐྱེལ་མ་ལྟ་བུ་སྟེ། མདོར་ན་ཆང་ནི་དགའ་བའི་དགའ་རོགས་དང་སྐྱོ་བའི་སྐྱོ་རོགས། དགའ་སྐྱོ་གང་འདྲ་བྱུང་ཡང་གྲོགས་ཀྱི་དམ་པ་ཡིན་པ་མ་ཟད། དེང་དུས་ཀྱི་ཚོང་ལས་དཔལ་འབྱོར་ཁྲོད་ཀྱང་གོ་གནས་གལ་ཆེན་ཟིན།
      དེ་ཡང་སྐབས་སུ་བབ་པ་སུམ་བྷའི་ནས་ཆང་ལ་ལོ་ངོ་བཞི་བརྒྱ་ལྷག་གི་ལོ་རྒྱུས་ཡོད་ཅིང་། ཐོག་ཐ་བར་གསུམ་དུ་སྲོལ་རྒྱུན་གྱི་ལག་རྩལ་ལ་བརྟེན་པ་དང་། ནས་བཟང་པོ་དང་ཆུ་གཙང་མ་ཤ་སྟག་གིས་བཙགས་དགོས་པ་ཡིན་ཏེ།
      ཕབས་བསྙལ་ཚུལ་ནི། ཐོག་མར་གྲོའམ་ནས་སམ། ཡང་ན་སོ་བ། བྲ་བོ། བུད་ཙེ༼ནས་སོགས་བཏགས་རྗེས་ཕྱེ་བླངས་པའི་ཤུན་ལྤགས༽སོགས་བསྲེས་ཏེ་བཏགས། དེ་ནས་ཕྱེའི་སུམ་ཆའི་ཕབས་རྟ་ཞིབ་ཏུ་བརྡུང་། ཆུ་དྲོ་འཇམ་དུ་ཕྱེ་དང་ཕབས་རྟ་བསྲེས་ཏེ་སྐྱུར་སྒྲུང་། དྲོ་ས་ནས་དབབ་ཏུ་གཞུག །ཚད་ནི་སོབ་སོབ་ཏུ་འགྱུར་བ་ཡིན། དེ་ཡང་སྐྱུར་གྱི་ནང་དུ་གོང་གི་ཕྱེ་སྣ་ལྔ་བོ་བསྲེས་པ་ཆུ་དྲོ་འཇམ་གྱིས་བརྫི་དགོས། བརྫིས་རྗེས་གོ་རེ་ལྟ་བུ་ལེབ་མོ་མཐུག་པོ་དཀྱུལ་དུ་ཁུང་བུ་ཡོད་པ་བཅའ། དབྱར་དུས་ཁྱམས་ཡིན་ཡང་ཆོག །དགུན་དུས་སུ་ཚ་ཐབ་དྲོ་ས་ནས་ཞབས་སུ་གྲོའི་རྩྭ་སྐྱའི་གདན་གཙང་མ་བཏིངས་ཏེ་འཇོག །སྙི་ན་ཕུབ་མའི་སྟེང་ནས་སྟེང་འོག་ཐེངས་གཉིས་གསུམ་རེ་ལ་བརྗེས་ཏེ་ཕུབ་མ་འབྱར་དུ་གཞུག །རྩྭ་སྐྱ་རུ་བསྙལ་དུས་ཕབས་རིམ་པ་རེའི་སྟེང་དུ་རྩྭ་སྐྱ་སྲབ་མོ་རེ་བཏིངས། རིམ་པ་གསུམ་རེ་བརྩིགས་ན་ཆོག  །སྟེང་དུའང་རྩྭ་སྐྱ་མཐུག་པོ་བཀབ་སྟེ་བསྙལ། དེ་ནས་ཟླ་གཅིག་ལྷག་འགོར་ཚེ། སིལ་དྲིའམ་ཆང་དྲི་འཐུལ་ཅིང་ཕབས་ཀྱི་ཐོག་ཏུ་བལ་ལྟ་བུ་ཆགས་ཡོད་ན། གདུང་མའི་སྟེང་དུ་འཇོག་པའམ། ཡང་ན་བཅུ་ཕྲག་གཅིག་གཉིས་རེ་ཐ་གུ་ལ་བརྒྱུས་ཏེ་གདུང་མར་འདོགས། དེ་ནི་སྐེམ་རྒྱུའི་ཆེད་དམ་ཙི་གུས་མི་ཟ་བའི་ཆེད་ཡིན། དེ་ལྟར་ཟླ་གཅིག་གཉིས་རེ་ལ་བཞག་ན་ཆོག །རང་ལ་མི་མཁོ་ན་ཅི་ཙམ་བཞག་ཀྱང་རུང་།
      ཆང་འདེབས་ཚུལ(གླུམ་བསྙལ་ཚུལ)ནི། ཟངས་ང་ལ་གཡིས་ཀྱི་གཡའ་སྣུམ་ཡང་ཡང་བཏང་། ཆང་རྒྱུ་ནས་ཀྱི་ནང་གི་ས་རྡོ་རྩྭ་སྙིགས་སོགས་བསལ་བ་དང་། དེ་ནས་ཆུ་གཙང་གིས་ཐེངས་མང་བཀྲུ། ནས་བཙོ་ཐེངས་གཅིག་ལ་ནས་རྒྱ་མ་བཞི་བཅུ་བཙོ་དགོས། ནས་བཙོ་སྐབས་འཚིག་མི་རུང་ཞིང་ནས་ཀྱི་ཉིས་ཆའི་ཕབས་བཏབ་སྟེ་དཀྲུགས་པ་དང་ནས་དང་ཕབས་གཉིས་འདྲེས་པར་བྱ། ཚོས་རྗེས་དཀྲུགས་ཏེ་ཉིན་གཅིག་གི་རིང་འཁྱག་ཏུ་གཞུག །དེ་ནས་དྲོ་འཇམ་དེ་རྫ་མ་གཙང་མ་ཞིག་ཏུ་བླུགས། གར་ན་ཆུ་ཁོལ་དྲོ་འཇམ་རྒྱ་མ་བཞི་ནས་ལྔ་དང་། ཆང་རྒྱ་མ་གང་རེའི་སྙིང་ཁུ་བརྒྱབ། རྫ་མའི་ཁར་ཕྱེ་བརྫིས་ནས་སྦྱར་བའི་སྟེང་ཁ་ལེབ་བམ་ཁ་གཅོད་བཀབ་རྗེས། དངོས་པོ་ལྕི་མོ་ཞིག་གིས་ཁ་ལེབ་མནན་ཏེ་དབུགས་མི་འགྲོ་བར་བྱེད། ཡང་ན་ར་ལྤགས་སྐྱི་ཐེར་རློམ་པ་ཁུང་བུ་མེད་པ་ཞིག་གིས་རྫ་མའི་ཁ་བཏུམས། དགུན་སླག་པ་སོགས་ཀྱིས་བཏུམས་ནས་དྲོན་མོ་བྱེད། དབྱར་དེ་ལྟར་མ་བཏུམས་ཀྱང་རུང་། དེ་ནས་ཟླ་གཅིག་གམ་གཉིས་ལ་འཇོག །རྣ་བས་ཉན་ན་སག་སྒྲ་གྲག་སྐབས་ཆང་བཙགས་ཆོག །
      ཆང་བཙགས་ཚུལ་ནི། ཟངས་རྒན་ནང་དུ་གཡིས་ཀྱི་གཡའ་སྣུམ་བཏང་། དེ་རུ་ཆུ་ལྕགས་ཟེའུ་དོ་བླུགས་ཏེ་ཁོལ་ལ་ཁད་དུ་རྫ་མའི་ནང་གི་གླུམ་ཕྱེད་ཀ་བླུགས། ལག་པ་གཙང་མར་བཀྲུས་ཏེ་གླུམ་རྣམས་བཙིར་ཏེ་ཁོག་སྟོང་བྱེད་པ་དང་། ཡང་ཡང་དཀྲུགས་ནས་འདུར་དུ་གཞུག །མ་ཆུ་མཐོ་ན་འཕྱུར་བས་མང་ཉུང་རན་པར་བྱ། ཟངས་ངའི་ཁ་ལེབ་ཕྱེད་གཅིག་བག་ཕྱེ་བརྫིས་ཏེ་སྔོན་ལ་སྦྱར། གླུམ་ཁོལ་རྗེས་ཁ་ལེབ་ཕྱེད་ཀ་དེ་མགྱོགས་མྱུར་གྱིས་སྦྱར་རྗེས་སྦངས་སྐམ་གྱི་མེ་འབུད། མེ་བཙན་ན་སྦངས་མ་འཚིག་ནས་ཆང་ལ་འཚིག་དྲི་དྲོ་བས་མེ་ཚད་དང་རན་པ་ངང་རིང་གིས་འབུད། ར་ཤན་གྱི་མགོ་རྔ་གཉིས་ཁ་ལེབ་ཀྱི་ཁུང་བུ་དང་བཙགས་རྫའི་ཁུང་བུ་ལ་སྤྲད། བཙགས་རྫའི་ནང་དུ་ཆབ་རོམ་འཇོག །དབྱར་དུས་སུ་ཆུ་འཁྱག་ལྡུག །དེ་ལྟར་བྱས་ན་བཙགས་རྫའི་ནང་གི་རླངས་པ་ཆང་ལ་གྱུར་ཏེ་ཝ་མཆུ་ལས་ཆང་ཡོང་། ཆང་མགོ་མ་ལ་སྣ་ཁུ་དང་། དེའི་རྗེས་ལ་ཆང་མང་། དེའི་རྗེས་མ་ལ་གཞུག་ཆུ་ཟེར།
      སྤྱིར་ཆང་རྒྱུའི་ཆ་ནས་ནས་ཆང་དང་། འབྲས་ཆང་། གྲོ་ཆང་། རྒུན་ཆང་། གཟེ་ཆང་། རུས་ཆང་སོགས་ཀྱི་དབྱེ་བ་མང་པོ་ཡོད་ལ། དུས་ཡུན་གྱི་ཆ་ནས་ཞག་ཆང་དང་། ཟླ་ཆང་། ལོ་ཆང་སོགས་ཡོད་པ་ལས་ལོ་ཆང་དང་ཟླ་ཆང་ནི་སྟོན་མོ་སོགས་སུ་བཏུང་བར་བྱ་བ་ཡིན། ཆང་སྐྱུར་བོ་མི་འབྱུང་བའི་ཐབས་ལ། རྫ་མ་ཁ་དོག་པོར་ཆང་བླུགས་ལ་ར་ལྤགས་སྐྱི་ཐེར་རློན་པས་ཁ་དམ་པོར་བཅད་ན་ཡུན་རིང་ཆང་སྐྱུར་བོ་མི་འབྱུང་ངོ་། །འདིས་ཀྱང་འཚོ་འཚིས་སྒྲུབ་མཁན་རྣམས་ལ་ཕན་ཐོགས་པར་གྱུར་ཅིག

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...