སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
རྗེ་བཙུན་མི་ལ་རས་པ།
རྩོམ་པ་པོ། བོད་ལྗོངས་དགའ་སྐྱིད་གླིང་འཛུགས་སྐྲུན་ཚད་ཡོད་ཀུང་སི། རྩོམ་སྒྲིག་པ། Bdechen mtso དུས་ཚོད། 2014-12-28 10:46:00 རྩོམ་ཁུངས། 《གངས་ལྗོངས་མི་སྣ་གྲགས་ཅན་གྱི་ལོ་རྒྱུས་མཛད་ཐང》 ཀློག་གྲངས།

  རྗེ་བཙུན་མི་ལ་རས་པ་ནི། རབ་བྱུང་དང་པོའི་ལྕགས་འབྲུག(སྤྱི་ལོ1040)ལོར་ཡབ་མི་ལ་ཤེས་རབ་རྒྱལ་མཚན་དང་ཡུམ་མྱང་ཚ་དཀར་རྒྱན་གཉིས་ཀྱི་སྲས་སུ་མང་ཡུལ་གུང་ཐང་སྐྱ་རྔ་རྩ་རུ་འཁྲུངས། མཚན་ལ་ཐོས་པ་དགའ་ཞེས་ཞུ། ཆུང་ངུར་ཡབ་གཤེགས་ཏེ་སྡུག་མང་པོ་མྱངས། དེ་རྗེས་མཐུ་བསླབས་ནས་འཁོན་གླན་པར་མི་མང་པོ་བསད། སླད་ནས་སྡིག་པ་ལ་འགྱོད་དེ་ཆོས་བྱེད་པར་རབ་བྱུང་དང་པོའི་ས་རྟ(སྤྱི་ལོ1078)ལོ་ལྷོ་བྲག་ཏུ་ཕེབས་ཏེ་མར་པ་ལོ་ཙཱ་བ་ཆོས་ཀྱི་བློ་གྲོས་དང་མཇལ། དེར་ལོ་དྲུག་ཟླ་བརྒྱད་ཙམ་བཞུགས་ཏེ་བླ་མ་དེ་ལས་དབང་དང་མན་ངག་རྫོགས་པར་བླངས། མར་པ་ལོ་ཙཱ་བའི་བཀའ་ལྟར་སྡིག་སྒྲིབ་སྦྱོང་བའི་ཕྱིར་དཀའ་བ་ཚད་མེད་སྤྱད་དེ་སྲས་མཁར་དགུ་ཐོག་བརྩིགས། དགུང་ལོ་ཞེ་ལྔ་པ་རབ་བྱུང་དང་པོའི་ཤིང་བྱི(སྤྱི་ལོ1084)ལོར་སྟོད་ཕྱོགས་སྐྱིད་གྲོང་དང་གཉའ་ནང་ཁུལ་དུ་ཕེབས་ཤིང་སྒྲུབ་པའི་དམ་བཅའ་མཛད་དེ་ལོ་དགུའི་རིང་དཀའ་སྤྱད་དྲག་པོས་བསྒོམས་པས་མཆོག་གི་དངོས་གྲུབ་ཐོབ། དེ་ནས་ས་ཕྱོགས་གཞན་དུ་འབྱོན་བཞུད་མཛད་དེ་སྣོད་དུ་རུང་བའི་སློབ་མ་རྣམས་ལ་གསང་སྔགས་ཀྱི་གདམས་པ་ཅི་རིགས་གནང་། སྒྲུབ་བརྒྱུད་ཀྱི་བསྟན་པའི་སྲོལ་བཙུགས། རས་ཆུང་བ་དང་དྭགས་པོ་ལྷ་རྗེ་སོགས་སློབ་མ་གྲགས་ཅན་མང་པོ་བྱུང་། ཉམས་མགུར་མང་དུ་བརྩམས་པ་རྗེས་རབས་པས《རྗེ་བཙུན་མི་ལ་རས་པའི་རྣམ་ཐར་རྒྱས་པར་ཕྱེ་བ་མགུར་འབུམ》ཞེས་བྱ་བ་བསྒྲིགས། མཐར་དགུང་ལོ་གྱ་བཞི་པ་རབ་བྱུང་གཉིས་པའི་ཆུ་ཡོས(སྤྱི་ལོ1123)ལོར་མཁའ་སྤྱོད་དུ་སྐུ་གཤེགས།
 


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...