སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
ཨ་ཁུ་སྟོན་པས་སྤྱང་གྲུང་སློབ་པ།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2014-7-13 9:45:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
     སྔར་རང་ཅག་ཁ་བ་རི་པའི་མི་རྣམས་ཀྱིས་རྡོག་ཁྲེས་སྒལ་པར་འཁུར་སྐབས། འཁུར་ཐག་དཔྲལ་སྟེང་དུ་གཏོང་གི་ཡོད་ཅིང་། ཨ་ཁུ་སྟོན་པས་རྡོག་ཁྲེས་འཁུར་སྲོལ་དེ་གཅིག་ནས་ལུས་ཁམས་ལ་གནོད་པ་ཆེ་བ་དང་། གཉིས་ནས་དངོས་པོ་ཆག་སྐྱོན་ཤོར་སླ་བ་ཞིག་སྟེ། ཐག་པ་དཔྲལ་སྟེང་ནས་ཤོར་ཏེ་ཆག་རྒྱུའི་ཉེན་ཁ་ཆེན་པོ་ཡོད་པ་མཐོང་བས། འཁུར་སྲོལ་དེ་བསྒྱུར་བཅོས་བྱེད་དགོས་བསམ་ཀྱང་སྐབས་མ་འཁེལ་བར་ལུས།
     ནམ་ཞིག་ཨ་ཁུ་སྟོན་པས་འབོག་ཆུང་ཞིག་འཁྱེར་ནས་ལྷ་སའི་སྐྱིད་ཆུའི་འགྲམ་དུ་འགྲོ་སྐབས། ལྷ་སའི་བུ་མོ་བཅུ་གྲངས་ཤིག་སྐྱིད་ཆུ་ནས་ཆུ་བླངས་ཏེ་ལོག་ཡོང་བ་དང་ཐུག ཨ་ཁུ་སྟོན་པ་ནི་རིག་པ་ཤིན་ཏུ་རྣོ་བའི་མི་ཞིག་ཡིན་པ་ཀུན་གྱིས་མི་ཤེས་མེད་པས། བུ་མོ་དེ་དག་གིས་ཨ་ཁུ་སྟོན་པའི་ལམ་བཀག་ནས། ཨ་ཁུ། ཨ་ཁུ། མི་ཚོས་ཁྱེད་རང་ཧ་ཅང་སྤྱང་པོ་ཡོད་པ་རེད་ཟེར་བས། དེ་རིང་ང་ཚོར་སྤྱང་པོ་ཞིག་སློབ་དང་ཞེས་བཤད། སྐབས་དེར་ཨ་ཁུ་སྟོན་པས་ཧ་ཅང་འཚབ་སྣང་ཆེ་བའི་བཟོ་བསྟན་ནས། ཨ་ཙི་ཙི། སྤྱང་པོ་སློབ་ཁོམ་ག་ལ་ཡོད།  ཁྱེད་ཚོ་ལྟོས་དང་ནམ་མཁར་མེ་ཤོར་འདུག་ཅེས་བཤད།
     ཨ་ཁུ་སྟོན་པའི་འཚབ་འཚུབ་ཀྱི་ཚུལ་དེས། བུ་མོ་དེ་ཚོར་ཡང་བྲེལ་འཚབ་སྐྱེས་ཏེ། སྣང་མེད་ངང་ནམ་མཁར་མིག་ལྟ་བར་ཐལ་བས། དཔྲལ་སྟེང་གི་ཐག་པ་ཤོར་ནས་རྫའི་ཆུ་བན་རྣམས་ཧྲུག་ཆག་ཏུ་གྱུར་བ་དང་། དུས་དེ་ནས་བཟུང་བོད་ཀྱི་ཡུལ་གྲུ་ཕལ་ཆེར་རྡོག་ཁྲེས་འཁུར་སྐབས། ཐག་པ་དཔུང་པར་བཀོན་པའི་སྲོལ་དེ་དེ་ནས་དར་བར་གྲགས།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
正在加载评论列表...