སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི《སྐྱེ་བོ་གསོ་ཐིགས》།
རྩོམ་པ་པོ། སློབ་དཔོན་འཕགས་པ་ཀླུ་སྒྲུབ། རྩོམ་སྒྲིག་པ། Bdechen mtso དུས་ཚོད། 2014-12-10 14:26:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།

རྒྱ་གར་སྐད་དུ། བྱ་ན་པུ་ཛ་ན་ཏུ་བྷི་དྷུ་བོ་ཤཱ་ནཱ་མ།
བོད་སྐད་དུ། ལུགས་ཀྱི་བསྟན་བཅོས་སྐྱེ་བོ་གསོ་བའི་ཐིགས་པ་ཞེས་བྱ་བ།
འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །
དཔལ་གྱི་འབྱུང་གནས་འཇམ་དཔལ་ཀུན་གྱི་དཔལ། །
མཐའ་དག་བྱམས་པས་ཁྱབ་པར་འཇམ་པའི་ངང་། །
འཇམ་དང་དཔལ་གྱི་གྲགས་པའི་ཐུགས་རྗེའི་མགོན། །
འཇམ་དཔལ་ཀུན་གྱི་མགོན་ལ་ཕྱག་འཚལ་ཏེ། །
བློ་དམན་སྐྱེ་བོ་མུན་ནག་ལྟ་བུ་ལ། །
སྙན་ངག་སྒྲོན་མེ་ལྟ་བུས་གསལ་བྱའི་ཕྱིར། །
བདག་ལྟ་དམན་ལ་སྙན་ངག་སྒྲོན་མེད་ཀྱང་། །
བླུན་པོ་གསོ་ཕྱིར་ཆུ་ཐིགས་ཙམ་ཞིག་བརྗོད། །
གཞན་གྱི་སྐྱོན་རྣམས་བརྗོད་མི་བྱ། །
གཞན་གྱི་སྐྱོན་རྣམས་ཅི་བརྗོད་པ། །
དེ་བཞིན་བདག་ལའང་ཡོད་པ་སྟེ། །
དཔེར་ན་ཝ་དང་བུད་མེད་བཞིན། །
བདག་ཉིད་ལ་ནི་བསྟོད་མི་བྱ། །
བདག་ཉིད་ལ་ནི་གང་བསྟོད་པ། །
དེ་ནི་བློ་ཆུང་ཤེས་རབ་ཞན། །
དཔེར་ན་ཀ་ལནྡ་ཀ་འདྲ། །
གྲོགས་ངན་བསྟེན་པར་མི་བྱ་སྟེ། །
གྲོགས་པོ་ངན་པ་སུས་བསྟེན་པ། །
ན་གུ་ཏ་ནི་བསྟེན་པ་ཡིས། །
ཤིག་རྣམས་ཕུང་བར་གྱུར་ལ་ལྟོས། །
ངན་པ་རྣམས་ལ་གྲོས་མི་གདབ། །
ངན་པ་རྣམས་ལ་གྲོས་བཏབ་ན། །
ལེགས་པར་སྨྲས་ཀྱང་ཉེས་པར་འགྲོ། །
སྤྲེའུས་ཀ་ལནྡ་ཀ་ཡི། །
ཚང་བཤིག་པ་ཡི་ཚུལ་ལ་ལྟོས། །
སྤྱོད་པ་རྣམས་ལ་བག་ཡོད་བྱ། །
བག་མེད་རྒྱུན་དུ་སྤང་བར་བྱ། །
གླང་ཆེན་མྱོས་པ་ལྟ་བུ་ནི། །
ནམ་ཡང་བྱ་བ་མ་ཡིན་ནོ། །
ཚིག་རྣམས་བརྗོད་འདོད་རྟག་ཏུ་ནི། །
ཇི་ལྟར་བརྟགས་ཤིང་དེ་ལྟར་སྨྲ། །
གང་ཞིག་མ་བརྟགས་པར་སྨྲ་བ། །
དཔེར་ན་སྨྱོན་པའི་བསྟན་བཅོས་བཞིན། །
དགོས་པ་མེད་པའི་ཚིག་རྩུབ་ནི། །
ནམ་ཡང་བྲཇོད་པར་མི་བྱ་སྟེ། །
བདག་ལ་མི་ཕན་གཞན་གནོད་པ། །
དཔེར་ན་ནེ་ཙོའི་རྫུན་ཚིག་བཞིན། །
རྫུན་གྱི་ཚིག་རྣམས་བརྗོད་མི་བྱ། །
རྫུན་གྱི་ཚིག་རྣམས་བརྗོད་བྱས་ན། །
མྱུར་བར་གཞན་གྱིས་ཤེས་འགྱུར་ཏེ། །
དཔེར་ན་བྱི་ལའི་རྫུན་ཚིག་བཞིན། །
ཚུལ་འཆོས་སྤྱོད་པ་བྱ་བ་མིན། །
ཚུལ་འཆོས་སྤྱོད་པ་གང་བྱེད་པ། །
དེ་ཡིས་བཙུན་པར་མི་འགྱུར་ཏེ། །
བྲམ་ཟེ་ན་ཡའི་རྒྱལ་མོ་བཞིན། །
མཛའ་བཤེས་ངན་པའི་ཚིག་མི་མཉན། །
མཛའ་ཤེས་ངན་པའི་ཚིག་ཉན་པ། །
འདོད་དོན་མེད་དེ་བསླུས་པར་འགྱུར། །
དཔེར་ན་རུས་སྦལ་སྤྲེའུ་བཞིན། །
གཡོ་ཅན་ངག་འཇམ་ཚིག་མི་མཉན། །
དེ་ཡི་ཚིག་རྣམས་ཉན་བྱེད་པ། །
དཔེར་ན་དབང་པོའི་རྒྱལ་མཚན་གྱིས། །
སྤྱང་ཀི་ལ་སོགས་བསླུས་ལ་ལྟོས། །
གནོད་སེམས་ཅན་གྱི་ཚིག་མི་མཉན། །
དེ་ཡི་ཚིག་རྣམས་ཉན་བྱེད་ན། །
བདག་ལ་ཕན་པ་མི་འབྱུང་སྟེ། །
ཝ་ནི་སྲེག་པས་ཕུང་བ་བཞིན། །
སྡིག་པའི་གྲོགས་པོ་ཡིད་མཐུན་བཞིན། །
དགའ་བ་སྣ་ཚོགས་ཚིག་བརྗོད་ཀྱང་། །
སྡིག་ངན་དེ་ནི་བདུད་ཡིན་ཏེ། །
དཔེར་ན་གླང་གི་སྲིན་མོ་བཞིན། །
ཕྱུག་པོ་ཀླ་ཀློ་ལ་ཡང་ཡོད། །
དཔའ་བོ་དུད་འགྲོ་ལ་ཡང་ཡོད། །
དོན་དང་མཐུན་པའི་གཏམ་སྨྲ་བ། །
འཇིག་རྟེན་འདི་ན་ཤིན་ཏུ་དཀོན། །
དེ་ཕྱིར་ཡོན་ཏན་དག་ལ་ནི། །
སྲོག་དང་བསྡོས་ཏེ་འབད་པར་བྱ། །
གང་ཞིག་ཡོན་ཏན་མི་སློབ་པ། །
དེ་ནི་བླུན་པོ་ཕྱུགས་ལྟ་བུ། །
ཡོན་ཏན་མེད་པའི་ཁ་ཉིད་ནི། །
ས་ཡི་བུ་ག་དག་དང་མཚུངས། །
ཡོན་ཏན་རབ་ཀྱི་བརྒྱན་པ་ཡི། །
ཁ་ནི་པད་མ་ཡིད་འོང་ལྡན། །
གཞོན་པའི་དུས་སུ་རིག་པ་བསླབ། །
ཞོ་འདོད་བ་ནི་དགུན་ནས་གསོས། །
དྲོད་གཤེར་ལྡན་དུས་ས་བོན་གདབ། །
འདི་གསུམ་འབྲས་བུ་སྨིན་པའི་རྒྱུ། །
ཡོན་ཏན་དག་ལ་འབད་བྱ་ཡི། །
འགྱིང་ཚུལ་དགོས་པ་ཅི་ཞིག་ཡོད། །
འོ་མ་མེད་པར་གྱུར་པའི་བ། །
དྲིལ་བུ་བཏགས་ཀྱང་ཉོར་མི་འདོད། །
བདག་ལ་ཕུན་སུམ་ཚོགས་ཡོད་ཀྱང་། །
གཞན་ལ་བརྙས་པར་མི་བྱ་སྟེ། །
ཞུན་མར་ལྟ་བུའི་སེམས་ཀྱིས་སུ། །
ཡོན་ཏན་མཐའ་དག་ཁོང་དུ་སྦ། །
ཤེས་རབ་ལྡན་པ་ལུས་ཆུང་ཡང་། །
དར་བབས་གཞན་གྱིས་བརྙས་མི་བྱ། །
དཔེར་ན་བློ་གསལ་རི་བོང་གིས། །
སེང་གེ་སྲོག་དང་ཕྲལ་བ་བཞིན། །
ཀུན་ལ་མཐོ་དམན་མེད་པ་ཡི། །
ཉི་མ་ལྟ་བུའི་ཕན་བྱས་ན། །
ཀུན་གྱིས་ལན་རྣམས་ལྡོན་འགྱུར་ཏེ། །
བྱི་བས་གླང་ཆེན་བསླངས་པ་བཞིན། ། 
སེམས་ཅན་ཀུན་ལ་ཕན་སེམས་བསྐྱེད། །

གཙོ་ངོས།ཤོག་ངོས་གོང་མ།123ཤོག་ངོས་འོག་མ།ཤོག་ངོས་མཐའ་མ།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
正在加载评论列表...