༄༅།། 《ལང་ཚོའི་རྦབ་ཆུ》ལས་འཕྲོས་པའི་གཏམ་རེ་གཉིས།
| རྩོམ་པ་པོ། |
ཨ་བུ། |
རྩོམ་སྒྲིག་པ། |
Lhamo |
དུས་ཚོད། |
2008-7-31 15:25:03 |
རྩོམ་ཁུངས། |
ཀྲུང་གོ་བོད་ཀྱི་དྲ་བ། |
ཀློག་གྲངས། |
|
དོན་གྲུབ་རྒྱལ་གྱི་བརྩམས་ཆོས་དག་ལས《ལང་ཚོའི་རྦབ་ཆུའི》ཤུགས་རྐྱེན་ནི་གཞན་གང་ལས་ཀྱང་ཆེ་བར་མངོན་ཏེ།སྤྱི་ལོ1983 ལོར《སྦྲང་ཆར》དུ་སྤེལ་བ་ནས་བཟུང་སྟེ།“རང་མོས་མ་མོས”①ཟེར་བ་འདི་མི་མཁོ་བར་སྨྲ་བ་དང་།དེ་ཉིད་གོ་དཀའ་བར་འདོད་པ།② ཡང་ན《ལང་ཚོའི་རྦབ་ཆུ》འདིར་ལྷུག་སྐྱོན་ཆེ་ཞིང་ཁ་གཡང་ཙམ་དུ་ཟད་དེ་གྱེར་འདོན་སྙན་ངག་ཡིན་ཞེས་དམིགས་བསལ་གྱི་གུ་ཡངས་འདྲ་འང་སྟེར་མཁན་ཡོད།སྤྱིར་སྙན་ངག་འགྲུབ་པའི་ཐོག་མཐའ་བར་གསུམ་དུ་ཕྱིའི་ངག་ནས་ཡིན་ན་ཆོག ནང་སེམས་ནས་ཡིན་ན་ཆོག གང་ལྟར་གྱེར་འདོན་མ་བྱས་ན་ཡི་གེའི་གཟུགས་རིས་ཙམ་གྱིས་སྙན་ངག་ཏུ་མི་འགྲོ་ཕྱིར།ལྟ་ཚུལ་དེ་ཙམ་གྱིས་སྙན་རྩོམ་འདི་རོལ་མྱོང་བྱེད་པར་ཕན་ཅི་ཡང་མི་ཐོགས་སྙམ།ཡང་ལ་ཤས་ཀྱིས།སྙན་རྩོམ་འདི་བོད་ནང་དུ་གྲགས་ཆེ་ཡང་།གཞན“སྔོན་ཐོན་པས”བལྟས་ན་དེ་འདྲ་ཙམ་དུ་ཟད་དོ་ཞེས་བསྒྱུར་མཁན་རེ་གཉིས་ཀྱི་གཏམ་མཆོག་ཏུ་སེམས་པ་འདི་དག་ནི《ལང་ཚོའི་རྦབ་ཆུའི》ཤུགས་ཀྱི་དོན་སྙིང་མ་གོ་བ་ཡིན་ལ།ཁ་གསལ་བར་བཤད་ན་བོད་པའི་སྐྱིད་སྡུག་ཉམས་སུ་མ་མྱངས་པའི་སྐྱོན་རེད་སྙམ་མོ།།ཡིན་ནའང་།འདིར་གནད་དོན་ཞིག་འབྱུང་བ་ནི《ལང་ཚོའི་རྦབ་ཆུ》ལ་ཅི་ལྟར་རོལ་མྱོང་བ་རྒྱུ་ཞེས་པ་དེ་ཡིན།ཟེར་སྲོལ་ལ།གནའ་བོའི་ཀེ་རེ་སིའི་ཡ་ལི་སི་ཏོ་ཏི་ནས་བཟུང་སྟེ་སྙན་ངག་ལ་མཚན་ཉིད་ཉིས་སྟོང་ལྷག་ཡོད་ཅེས་པར་བསམས་ན་སུས་ཀྱང་ཁ་ཚོན་གཅོད་དཀའ་བ་ཞིག་དང་ཡང་ན་སུས་ཀྱང་མཚན་ཉིད་དེ་དག་གཞིར་འཛིན་པའམ་རང་རང་གི་བློ་སྦྱོང་ལ་བརྟེན་ནས་རོལ་མྱོང་དང་ལྟ་ཀློག་གི་རིན་ཐང་སྔོག་འདོན་བྱེད་ཆོག་པའི་དབང་ཆ་ཡོད་པ་འདྲ།དེ་བས་སྐབས་འདིར་ཁོ་བོས་ཀྱང་སྙན་ངག་ཏུ་རུང་བ་སྙན་ངག་གི་མཚན་ཉིད་ཅེས་མི་བརྗོད་ཐབས་མེད་དུ་གྱུར་ལ།ལྟ་ཚུལ་དེས་སྔོན་འགྲོ་བྱས་ཏེ《ལང་ཚོའི་རྦབ་ཆུ》ལས་འཕྲོས་པའི་གཏམ་རེ་གཉིས་བརྗོད་པར་བྱའོ།། ཁོ་བོས་བལྟས་ན།སྙན་རྩོམ་འདིའི་རིན་ཐང་སྙན་རྩོམ་རང་སྟེང་དུ་མེད་པར་དེ་ལས་བརྒལ་འདུག་པ་ཞིག་སྟེ།འབག་བཟོ་འདམ་ལས་གྲུབ་རུང་འདམ་ལ་མི་ལྟ་བའི་དཔེ་བཞིན།དེ་ནི་ལྟ་གྲུབ་ཀྱི་རྒྱ་ལས་བརྒལ་བའི་རང་གཤིས་ཀྱི་བཅིངས་འགྲོལ་ཐེངས་གཅིག་རེད་ཅེས་པའམ།ཡང་ན་ཕྱིའི་རྣམ་པ་ལས་བརྩམས་ཏེ་ཤུགས་སུ་གབ་ཅིང་སྦས་པའི་འགྱུར་མེད་རྟག་བརྟན་གྱི་སྒྲིག་སྲོལ་གང་ཞིག་ལ་འཕངས་པའི་གཏོར་བརླག་གི་མདའ་མོ་ཞིག་སྟེ།རྩོམ་པ་པོའི་བརྩམས་ཆོས་ཀྱིས་དུས་རབས་དེའི་སྤྱི་ཚོགས་ལ་མཁོ་བའི་སྙིང་སྟོབས་ཤིག་གི་དགོས་མཁོ་བསྐངས་པ་ཡིན་ན།རྩོམ་པ་པོས་ཤེས་མ་ཤེས་རུང་།ཁོང་གི་བརྩམས་ཆོས་དེ་ཁོང་རང་ཉིད་ལ་མཚོན་ན་སྐུ་ཉིད་ཀྱི་ཚེ་སྲོག་ལས་ཀྱང་གལ་ཆེ་བ་མངོན་འདུག་①ཅེས་པ་བཞིན།སྙན་རྩོམ་འདིའི་དགེ་མཚན་མ་ལུས་ཀྱང་རྒྱུ་མཚན་དེ་ལྟ་བུ་ཞིག་གི་སྟེང་ནས་འཇོག་པར་ཁོ་བོ་འཐད་པ་ཡིན།རྒྱ་ནག་པ་ཧུའུ་ཧྲི་ལགས་ཀྱིས་སྤྱི་ལོ༡༩༡༩ལོར་བརྩམས་པའི《སྙན་ངག་གསར་བ》ཞེས་པའི་རྩོམ་ཡིག་དེའི་ཁ་བྱང་ཆུང་རུང་།འདི་ནི་ལོ་ངོ་བརྒྱད་ཀྱི་རིང་ལ་བྱུང་བའི་དོན་དག་གལ་ཆེན་ཞིག་རེད་ཅེས་པ་ནང་བཞིན།ལང་ཚོའི་རྦབ་ཆུ་སྤེལ་བ་དང་དེའི་ཤུགས་རྐྱེན་ནི་དེང་རབས་བོད་ཡིག་སྙན་ངག་བྱུང་འཕེལ་གྱི་ལོ་རྒྱུས་ཐོག་ཆེས་གལ་ཆེ་བའི་དོན་དག་ཅིག་རེད་ཅེས་བརྗོད་ཀྱང་འགལ་བ་མེད་སྙམ། སྙན་རྩོམ་འདིའི་ཡིད་ཡུལ་དཔེ་དང་ཆ་འདྲ་ས་ཡོད་པའི་ཆ་ནས“རྦབ་ཆུ”ཞེས་པ་དྲངས་ཏེ་ཀློག་པ་པོར་གསར་བ་གསར་རྐྱང་གི་སྣང་བ་སྟེར།སྤྱིར་བཤད་ན།ལོ་རབས་བརྒྱད་ཅུའི་ཚུན་གྱི་སྙན་རྩོམ་དུ“ལྕི་བ”དང“རྔ་མོང”“རླབས་རྒྱུན”དང“བྲག་རྡོ”སོགས་ཡིད་ཡུལ་གསར་བ་སྔོག་འདོན་དང་ནང་འདྲེན་བྱས་པ་ནི་ཁྱད་ཆོས་ཉག་གཅིག་ཡིན་ལ།དེས་སྔར་ཡོད་ཀྱི“ཟླ་བ”དང“གླང་ཆེན”སོགས་ལ་ཅོ་འདྲི་བའི་ཉམས་སྣང་སྩལ་བ་ལས་གཞན་ཡང་ང་ཚོའི་སྔར་གོམས་ཀྱི་མཛེས་དཔྱོད་ཉམས་མྱོང་ལ་ཕོག་ཐུག་བཟོས་འདུག་པ་གོར་མ་ཆགའདི་ནི་གནས་སྐབས་ཀྱི་གླེང་ཕྱོགས་ཙམ་ལས་ཞིབ་པར་གཞན་དུ་འཆད་དགོས་འདུགསྙན་རྩོམ་གཅིག་ལ་ཚིག་དང་དོན་གྱི་ཆ་ནས་རིམ་པ་བཞིན་གོང་ནས་གོང་དུ་ཀློག་འདོན་དང་རོལ་མྱོང་བྱེད་ཆོག་པའི་ཐབས་ཤིག་ཡོད་པ་བཞིན།འདིར《ལང་ཚོའི་རྦབ་ཆུ》ཞེས་པའི་སྙན་རྩོམ་ལའང་ཐབས་དེ་འདྲ་བེད་སྤྱད་དེ་རོལ་མྱོང་བ་ཆོགདང་པོ་ནི་རྣམ་པའི་ཐད་ཀྱི་བཅིངས་འགྲོལ་ཡིན།
