སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
ཚེ་དབང་དཔལ་འབྱོར་གྱི་སྙན་རྩོམ《ང་ཡི་ཕ་ཡུལ། མཛེས་པའི་གམ་པ》།
རྩོམ་པ་པོ། ཚེ་དབང་དཔལ་འབྱོར། རྩོམ་སྒྲིག་པ། Lhamo དུས་ཚོད། 2016-2-29 11:24:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།

ང་ཡི་ཕ་ཡུལ།  མཛེས་པའི་གམ་པ།
 ཚེ་དབང་དཔལ་འབྱོར།

                                     མཐའ་ནས་གངས་རི་ར་བས་ཡོངས་སུ་སྐོར་གྱུར་བ།།
                                     བར་དུ་མུ་མེད་རྩྭ་ཐང་ཡངས་པོ་རབ་མཛེས་ཞིང་།།
                                     གངས་ལྗོངས་བདུད་རྩིའི་ལྷ་ཆུའི་འབྱུང་ཡུལ་ཞེས་གྲགས་པའི།།
                                     ང་ཡི་མཛེས་སྡུག་ལྡན་པའི་ཕ་ཡུལ་གམ་པ་སྐྱིད།།

                                     ལྟ་ན་སྡུག་པའི་རི་ཀླུང་སྤང་ལྗོངས་ཡངས་པོའི་སྟེང་།།
                                     གཡང་དཀར་ལུག་གུའི་ཁྱུ་ཚོགས་ཤ་ཤེད་རབ་རྒྱས་པས།།
                                     དེང་གི་ཁྲོམ་རའི་སྟེང་དུ་བྲིན་ཚོང་ལེགས་རྒྱུགས་པའི།།
                                     རོ་བཅུད་ཁྱད་དུ་འཕགས་པའི་ལུག་ཤ་ངེད་ཚོའི་རྒྱན།།

                                     དྲིན་ཆེན་སློབ་དཔོན་པད་མའི་མཛད་རྗེས་ཁྱད་པར་ལས།།
                                     ནད་རིགས་བཞི་བརྒྱ་རྩ་བཞི་ཡོངས་སུ་བཅོས་གྱུར་བའི།།
                                     བདུད་རྩིའི་སྨན་མཆོག་བོད་ལྗོངས་ལྷ་ཆུ་རྟག་ཅན་དེ།།
                                     སྙན་གྲགས་བ་དན་ཕྱོགས་བཅུར་ཁྱབ་པ་ངེད་ཚོའི་རྒྱན།།

                                     ལྷོ་ཡི་གནས་རི་གཞི་བདག་གངས་ཅན་རྒྱ་བོ་གཅིག།།
                                     བྱང་གི་གནས་བཟང་གུར་མེའི་ལྷ་ཆེན་ཟངས་ར་དང་།།
                                     བཙན་པོའི་སྐབས་ཀྱི་རང་བྱུང་གནས་བརྒྱའི་སྒྲུབ་ཁང་སོགས།།
                                     རང་ཅག་ཁ་བའི་རྒྱན་དུ་གྱུར་བ་ངོ་མཚར་ཆེ།།

                                     སྐྱེས་ཆེན་དམ་པ་ནམ་མཁའི་སྐར་ཚོགས་བཞིན་གྱི་ཁྲོད།།
                                     གཙང་གི་གདན་ས་བཀྲས་ལྷུན་དགོན་ཆེན་ཕྱག་འདེབས་མཁན།།
                                     རྒྱལ་བ་སྐུ་ཕྲེང་དང་པོ་དགེ་འདུན་གྲུབ་པ་མཆོག།།
                                     གམ་པའི་གུར་མེའི་ཡུལ་དུ་འཁྲུངས་པ་ངོ་མཚར་ཆེ།།

                                     བོད་རྒྱུད་ནང་བསྟན་རྙིང་མའི་ཆོས་ཀྱི་དགོན་ལག་གཙོ།།
                                     རིན་ཐང་གཞལ་དུ་མེད་པའི་རྟ་མགྲིན་རང་བྱོན་སྐུ།།
                                     དད་ལྡན་བུང་བ་སྤྲིན་ཚོགས་འཁོར་བའི་གནས་བྱིན་ཆེན།།
                                     གནས་མཆོག་རྡོ་རྗེ་ཉི་མའི་མཆོད་རྟེན་ངེད་ཚོའི་རྒྱན།།

                                     ངོ་མཚར་ཅན་གྱི་མཚོ་མོ་གཡུ་མཚོ་དུང་མཚོ་ལས།།
                                     འགྲོ་བའི་སེམས་ཅན་རྣམས་ཀྱི་ལས་གྲིབ་ལྕི་ཡང་དང་།།
                                     རང་གི་འབྱུང་འགྱུར་ལས་དབང་མེ་ལོང་ལྟར་གསལ་བ།།
                                     རྡོ་རྗེ་མཆོད་རྟེན་ཉི་མའི་གནས་མཚོོ་ངེད་ཚོའི་རྒྱན།།

                                     རིན་ཆེན་ས་འོག་གཏེར་རྫས་དུ་མས་གྲུབ་གྱུར་བ།།
                                     ནད་རིགས་དུ་མ་བཅོས་པའི་ངོ་མཚར་ཅན་གྱི་གནས།།
                                     ལུང་གྲོང་དར་རྒྱས་གུར་མེའི་རང་བྱུང་ཆུ་ཚན་དག།
                                     ངེད་ཚོ་གམ་པའི་རྒྱན་དུ་གྱུར་བར་ངོ་མཚར་ཆེ།།

                                     མདོར་ན་ང་ཡི་སྐྱིད་པའི་ཕ་ཡུལ་གམ་པའི་ཕྱོགས།།
                                     ངོ་མཚར་ཅན་གྱི་གནའ་ཤུལ་གྲགས་ཅན་དེ་དག་ལ།།
                                     ས་ཕྱོགས་ཁག་གི་སྐྱེ་བོ་ཕོ་མོ་རྒན་གཞོན་ཚོས།།
                                     ལན་ཅིག་གཟིགས་པར་ཕེབས་རྒྱུར་བསུ་བ་ཞུ།།

2016ལོའི་ཟླ2པར་གམ་པ་རྫོང་གུར་མེ་ཤང་བཅའ་སྡོད་ས་ནས།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...