སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སྟག་རིག་འབྲུག་ཐར་གྱི་སྙན་རྩོམ《སྨོན་འདུན་བྱུ་རུ་དམར་ཆུང》།
རྩོམ་པ་པོ། སྟག་རིག་འབྲུག་ཐར། རྩོམ་སྒྲིག་པ། Lhamo དུས་ཚོད། 2016-3-8 9:31:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
སྨོན་འདུན་བྱུ་རུ་དམར་ཆུང་།
སྟག་རིག་འབྲུག་ཐར། (མཚོ་ལྷོ)
ལ་ལུང་ཡུལ་གྲུ་ཀུན་ཏུ་གཞི་བཅས་པའི།།
གནམ་གྱི་ཕྱེད་ཀར་འབོད་པའི་བུད་མེད་ཚོའི།།
ལོ་ཡི་ཁྱུད་མོ་འཁོར་ལོའི་བང་འགྲོས་ཀྱིས།།
ཁོ་ནར་དབང་བའི་དུས་ཆེན་སྤྲོ་བས་བསུ།།

བརྩེ་བ་གསེར་ཟམ་མི་འགྱུར་བརྟན་པའི་སླད།།
ཕུགས་རེའི་བརྩེ་བ་ཏབ་ཅིག་མྱོང་བའི་ཆེད།།
སེམས་གྲོགས་དགའ་མགུའི་པད་མོ་འཛུམ་པའི་དོན།།
རིན་བྲལ་མིག་འཕྲོག་དངོས་པོའི་སྐྱེས་ཆེན་འབུལ།།

འོན་ཏེ་ནང་སེམས་རླབས་ཕྲེང་ཟེགས་མའི་རྩེ།།
དྭངས་གསལ་མུ་ཏིག་བརྒྱུས་འདྲའི་སྙིང་གི་ནོར།།
དབྱངས་གསལ་སོ་བཞིའི་ལེགས་ཚོགས་རྟེན་འབྲེལ་བཅུད།།
དུས་ཆེན་འདི་ལ་སྤྲོ་བས་འདེགས་པར་རིངས།།

གཡུ་བྱུར་རྒྱུ་ཡིས་དྲངས་པའི་གཉའ་གནོན་ལ།།
ད་ཆའི་སྡུག་ཡུས་ཁུར་བའི་མནའ་མར་གྱུར།།
རྔུལ་ཁྲག་ལྷན་དུ་བསྲེས་པའི་རིན་དོད་ལ།།
མ་འོངས་ཨ་མའི་ཆོ་ལོ་རྒྱབ་ལ་ཁུར།།

ལོ་ཟླའི་རྡུང་རྡེག་དྲག་པོ་ཐོད་ལ་དཔྱངས།།
མིག་ཆུའི་སྐྱོ་ངལ་ན་བུན་ཡིད་ལ་འཐིབས།།
གླིང་བཞིའི་མི་ཁར་མནོ་བསམ་རབ་བཞེས་ཏེ།།
ལོ་ལོའི་འོད་སྟོང་འབྱུང་འགྱུར་གཙུག་ཏུ་བཀུར།།

སྡུག་བསྔལ་གྲང་ལྷགས་རྗེས་ཀྱི་སྦྲང་ཆར་ལ།།
དཀའ་བའི་ཁུར་ཙ་གདོང་གིས་བསུས་གྱུར་ན།།
གཏན་འདུན་རེ་བའི་འཛིན་མའི་ཐོང་ག་རུ།།
བདེ་སྐྱིད་ཡིད་འོང་ལོ་འབྲས་རབ་སྨིན་ཏེ།།

ཤེས་བརྩོན་གསེར་གྱི་སྣོད་བཟང་བུམ་པ་ལ།།
དཔོག་འདོད་ཡོན་ཏན་འོ་མའི་ངད་ཁ་ལྡང་།།
འདོད་འདུན་གངས་སེང་དཀར་མོའི་ང་རོ་ལ།།
ཕོ་མོ་འདྲ་མཉམ་དབང་ཐང་འཁྱིལ་བར་ངེས།།

ཤ་རྩ་བྱུ་རུའི་མདངས་ལས་མཛེས་པ་གཅིག།
མིག་རྩ་ཁྱུང་གི་ཁྲ་ལས་གསལ་བ་གཉིས།།
སོ་རྩ་དུང་གི་དཀར་ལས་དྭངས་མོ་གསུམ།།
སྒྲོལ་མའི་སྐུ་ལ་ཅོ་འདྲིའི་མོ་སྒོ་ཤོག།

གཡུག་ཡོད་རླུང་ནག་འཚུབ་མའི་ལས་ཀ་ཅན།།
ཁྲེལ་ལྡན་ཀུན་མཐུན་མེ་ལོང་དྭངས་ཤ་ཅན།།
ཐུགས་དཀར་བྱང་ཆུབ་སེམས་དཔའི་རྗེས་འཇུག་ཅན།།
ཡིད་འཕྲོག་ལྷ་མོའི་ཐུགས་རྒྱུད་ཕྱུག་པར་ཤོག།

ལས་བསོད་རླུང་རྟའི་མཐའ་ཐང་རབ་རྒྱས་ཤིང་།།
ཚེ་རིང་ནད་མེད་འདོད་དོན་ལྷུན་འགྲུབ་ཀྱི།།
བཀྲ་ཤིས་སྨོན་ཚིག་དུང་གི་སྒྲ་སྙན་མོ།།
འཇིག་རྟེན་སྐྱེས་མའི་ཐོས་འཛིན་སྒོ་མོར་འབུལ།།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...