སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
ཉི་ནུབ་དང་ཨ་མ།
རྩོམ་པ་པོ། འབྲོང་སྨུག་པོ། རྩོམ་སྒྲིག་པ། Michung དུས་ཚོད། 2017-5-3 10:56:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
 

ཉི་ནུབ་དང་ཨ་མ།

འབྲོང་སྨུག་པོ།

མིག་གིས་ཟིན་པ་དཀའ་བའི་གནམ་མཐའི་གྲོང་དུ།།
སྐྱོ་བའི་ཟིལ་བ་མང་པོས་རྒྱང་བལྟས་བྱས་ཏེ།།
རྒྱུ་སྐར་ཐང་མར་བརྡལ་བའི་ངོས་ཀྱི་དེ་ནས།།
དྲན་གདུང་མེ་ལོང་དམར་པོ་ལན་རྒྱར་ཕྱིས་ཡོད།།

ཟླ་འོད་འཁོར་བར་ལྷུང་བའི་ས་སྲོད་གྲངས་མེད།།
མདུན་གྱི་སྒེའུ་ཁུང་འགྲམ་ན་ཡང་ཡང་བསུ་དུས།།

རྣམ་ཤེས་ཤོག་བུའི་ལྡེབས་ཀྱི་དྲིན་ཆེན་ཨ་མ།།

སེམས་ཀྱི་ཕོ་བྲང་དབུས་ནས་མ་ཡལ་འདུག་གོ།


ཚེ་ཡི་ཆུ་ཐིགས་རྡོག་པོ་མུར་རྒྱུན་ཟགས་ཏེ།།

རླུང་བུས་སྒུལ་བའི་སྣང་བ་མུན་པར་དུད་ཀྱང་།།

ཡིད་ཀྱི་ལྗོན་པར་ཁྲི་བའི་བརྩེ་བ་འཇམ་པོ།།

ཕྱོགས་མེད་ཉི་ཟེར་ཡིན་རུང་ཆོག་པར་འདྲ་འོ།།


སྤྲིན་དཀར་ལྷ་ལམ་བརྒྱུད་ནས་བྱང་ལ་ཐལ་སོང་།།

ཉི་ནུབ་ལས་ཀྱི་རྐང་རྗེས་བདག་ལ་སྤར་བྱུང་།།

མུན་པའི་ལྕགས་ཀྱུས་ཐེབ་པའི་སྨྲེང་སེམས་འཁྱག་པ།།

ལ་གཞུང་མང་པོ་བསྒལ་ཏེ་ཡུལ་ལ་ལོག་ཡོང་།།


ད་ལྟའི་ཚེ་རབས་འདི་ཡི་ཕྱོགས་མཚམས་ཀུན་ལ།།

ཟས་གོས་འཕོངས་མེད་བཤམས་པའི་མི་ཞིག་ཡོད་དེ།།

སེམས་གཅོང་མཛད་མེད་འདི་ཡི་རླབས་ཁ་གཅོད་པའི།།

སྟོང་ཉིད་དེ་བཞིན་ཉིད་དང་མཚུངས་པར་འདྲ་ལེ།།


སྒྱུ་མའི་མི་ཚོགས་གྲུག་པའི་མཐའ་དབུས་འདི་རུ།།

ཆགས་ཞེན་ཆུ་བོ་དབོ་སའི་སྣོད་ཅིག་མེད་འདྲ།།

ནམ་མཁའི་མེ་ཏོག་ལྡེམ་པའི་མཚན་ལྗོངས་དག་ལ།།

རྨི་ལམ་འཁྲུལ་བའི་ཀློང་ནས་མ་ལོར་སྒུག་ཡོད།།


ཕྱི་དྲན་གསེར་བུ་ལྡོང་བའི་རི་སྒོང་འདི་ནས།།

མི་མངོན་ཡུལ་གྱི་འཇིག་རྟེན་རེ་བས་བལྟ་དུས།།

བདག་གི་འདས་དོན་སློག་པའི་འདང་ཆེན་ཨ་མ།།

ངོ་གདོང་མཆི་ནས་རླན་རུང་མཐོང་རྒྱུ་མ་བྱུང་།།


སེམས་ལ་དྲན་པ་སྐྱེས་པའི་མཚན་སྨག་རེ་རེར།།

ལྷིང་འཇགས་བདེ་བའི་གྲོང་གི་ཁེར་རྐྱང་ང་ལ།།

བརྩེ་ཞེན་དབྱངས་ལ་རྒྱུས་པའི་གཏམ་ཞིག་ཡོད་མོད།།

བར་སྣང་སྟོང་བ་འདི་ལ་ཅི་བཤད་མི་འདུག།


ངས་ནི་བྱིས་པ་ནང་བཞིན་ངུ་ལབ་གཏོང་སྟེ།།

མཛུབ་མོའི་ནག་ནོག་འཇུབ་ནས་ཀེ་རེར་བལྟས་ཡོད།།

ཚོར་བའི་རྡུལ་རྣམས་སྤྲུག་པའི་དཔྱིད་ཀའི་སྣང་བས།།

འཁྲེང་ཞེན་ལ་རྩེར་བུད་པའི་གཞོག་འདེགས་བྱས་སོ།།


ལས་ཀྱིས་འགྲུལ་ཆས་སྒྲིག་པའི་འཁོར་བ་ཆུང་ཆུང་།།

མི་ཚེའི་ཟིལ་བ་ལྷུང་བའི་རྟེན་མཁར་ཡིན་ཙང་།།

འབྱམས་ཀླས་སྣང་བ་འཕྲུལ་བའི་གཞིས་ཀ་དེ་ནས།།

དགའ་སྐྱོ་སྣོལ་མར་མཚོན་པའི་ཨ་མ་ཚེ་རིང་།། 

༧༠༡༧.༤.༢༡།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...