སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སྡེ་དགེའི་རྣོ་ངར་གྱི་སྙན་ངག་ཚན་པ་གཉིས།
རྩོམ་པ་པོ། སྡེ་དགེའི་རྣོ་ངར། རྩོམ་སྒྲིག་པ། Michung དུས་ཚོད། 2017-6-19 17:19:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
རང་གི་མེ་ལོང་ཕྱིས་པ།

སྡེ་དགེའི་རྣོ་ངར། 

སྒྱུ་འཕྲུལ་ཟློ་བའི་ས་ངོས་འཁྱག་པ་རང་འཚང་འབྲི་སའི་ཤོག་ལྷེ་ཡིན།།

ངེས་མེད་མུན་པའི་ཁྲོན་པ་འདི་ཡང་ཚེ་རབས་འདི་ཡི་ཉལ་ས་སྟེ།།

སྐྱོ་ཤས་སྐྱེ་ཞོར་བདེ་བ་སྒོམ་སྟེ་ལུས་བསྟན་འདི་ཉིད་ཚར་སོང་ན།།

ཕལ་བའི་མི་ཡི་འགྲོ་དོན་ཟེར་བའང་དེ་ག་ཙམ་གྱིས་ཆོག་འདུག་གམ།།

 

ཁ་ཆར་འཚུབ་རླུང་མུར་མུར་གཡུག་པའི་རྫོགས་མེད་རྨོངས་པའི་ཀོ་གྲུ་རུ།།

སྨྲེང་བའི་རྣམ་རྟོག་ལུས་ལ་གྱོན་ཏེ་གདོད་ནས་འདི་བཞིན་སླེབས་ཡོང་ཞིང་།།

རྡུལ་དང་མུན་ནག་བཙན་ས་འདི་ན་དལ་ཞིང་ཁོམ་པར་ལུས་འདུག་པས།།

སྐྱེ་དགུའི་གྲལ་གྱི་གཞོན་པ་བདག་ནི་ལས་ངན་ནང་གི་ལས་ཟད་དོ།།

 

སོང་ཟིན་ལོ་ཟླའི་བརྩེགས་པའི་ངོས་སུ་ཀླན་ཀ་ཙམ་ལས་ཅི་འཆི་སྟེ།།

ཡེང་མ་ལམ་གྱི་འཁོར་བའི་མི་ངས་དོན་སྙིང་འཚོལ་སྡུད་མི་བྱེད་པས།།

ཡར་གྱི་རི་བོའི་ཟོམ་དུ་མ་འཛེད་མར་འབབ་ཆུ་བོའི་གཞུང་དུ་ལྷུང་།།

སེམས་དང་སྤྲིན་པ་གཅིག་ཆར་འཐབ་ན་བདག་བློ་སྨུག་པས་བཙེམ་མམ་ཅི།།

 

ཞེན་ལྟས་ཁྲིད་པའི་གྲོག་རོང་འདི་ནས་ཨ་སྟོང་མང་པོ་སིབ་སིབ་འཕྱོ།།

འཚུབ་ཅིང་བྲེལ་བའི་མི་ཚེའི་མར་མེ་མཚན་མཐའི་སྐར་མ་ཇི་བཞིན་ཏེ།།

ཁྲག་གིས་སྦགས་པའི་ལམ་བུ་འདི་ནས་གཞན་དུ་ཆས་སྙམ་བྱེད་ན་ཡང་།།

ང་ནི་རྟག་པའི་གཤིས་ལ་ཞུགས་སྟེ་བྱས་པ་ལྟར་སྟེས་སྤང་ལ་རྩེད།།

 

ཤུགས་རིང་སྔུར་བ་དལ་བར་མཐེན་པའི་རི་སྒོང་སྤུངས་པའི་རྩ་འཇམ་གྱིས།།

འཁོས་ཀ་ཞན་པའི་བདག་གི་རྣ་བར་སྐྱོན་གྱི་རྡོ་བ་བསྒྲིགས་འདུག་ཀྱང་།།

གང་ཞིག་མདུན་གྱི་མེ་ལོང་ནང་གི་ཚུགས་མེད་ལས་ཀྱི་གོམ་སྟབས་ཀྱིས།།

བསུབ་ཏུ་མེད་པའི་ལས་བྱ་ནག་ནོག་རང་བློའི་བག་ནས་རྗེན་པར་སྟོན།།

 

མུན་ནག་ལང་ལོང་ཚུར་ལ་ལུད་པས་ང་ཡི་འཇིག་རྟེན་འཐིབས་པར་བྱས།།

རྡུལ་དང་ཁ་བས་འཚུབ་སྐོར་རྒྱག་སྟེ་རྣམ་ཤེས་འཁྲུལ་བའི་རྒྱ་རུ་བཙུད།།

བསྙོན་དུ་མེད་པའི་འཆི་བའི་བྱང་ཐང་ནམ་ཞིག་ཅིས་ཀྱང་བསྒལ་དགོས་མོད།།

ཞེན་པ་ཐོགས་པའི་རི་ཁུད་འདི་ནས་ང་ལ་གྲལ་སྒྲིག་གང་ཡང་མེད།།

 

བག་མེད་རུམ་དུ་མགོ་བོ་འཛུལ་བས་ཞི་བའི་ལྟད་མོ་མ་མཐོང་བས།།

སྡུག་བསྔལ་མཚོན་པའི་ཆུ་ཐིགས་གྲངས་མེད་སྐྲ་ལོའི་སྲུབ་ནས་གཞུར་ཏེ་འོང་།།

གནམ་གྱི་མེ་ལོང་སིག་སིག་འདར་ཏེ་ས་ཡི་དཀྱིར་འཁོར་སྒུལ་ནུས་པའི།།

ཆགས་སྡང་མཆེད་པའི་མེ་ཡི་ཟེགས་མས་རེ་བའི་ལང་ཚོ་ཡལ་བར་བྱས།།

 

ཡིད་ཆད་བྱུང་བའི་སྡུག་གི་ཁ་རླངས་ལུས་སེམས་ཀུན་ནས་ཧད་པའི་མུར།།

གཉོམ་པའི་མིག་མཐའ་ཆུ་གཉེར་བཅས་ཏེ་འཁུན་བུ་བར་མ་ཆད་དུ་དྲགས།།

ཀྱེ་མ་ལམ་གྱི་མདོ་བཞི་རེ་ནས་བདག་ཡིད་མཁའ་ལ་བརྡར་བ་ན།།

གངས་རྩེར་འཕོས་པའི་སྤྲིན་གྱི་ཚོམ་བུའི་ངུ་ངག་རྒྱ་མཚོར་འདྲེས་ཏེ་ཐལ།།

 

སྐྱོ་གདུང་ཁུར་བའི་མཚན་མོའི་བླ་རེས་སྟོང་གསུམ་ཁྱོན་དུ་འགེལ་ལམ་ཅི།།

དུབ་ཅིང་ངལ་བའི་མུ་གེའི་བྲེད་པ་འཚོ་གཞིས་གམ་དུ་ལྡེམ་མེར་འདུག།

ཟག་པའི་མདངས་ལ་རྣལ་མའི་ངེས་འབྱུང་མཚོ་ནང་ཁ་བ་བབས་པ་སྟེ།།

མཐོང་ཏུ་མེད་ལ་རེག་ཏུའང་མེད་པ་མོ་གཤམ་བུ་དང་མཉམ་པར་མཚུངས།།

 

སྡུག་བསྔལ་མུ་མེད་ཁྲོ་བའི་ཟོལ་གྱིས་རུས་ལ་ལྕགས་གཟེར་བརྡབས་པ་ན།།

མེ་དམར་ཚོམས་སུ་གཅིན་པ་གཏོང་འདྲའི་རྡུལ་གྱི་བྱེ་མས་བར་སྣང་བཀང་།།

གཏིང་མཐའ་བྲལ་བའི་ན་བུན་སྣ་ཚོགས་གློ་བའི་ཟབ་སར་རྡོལ་ན་ཡང་།།

གཏོལ་མེད་ལམ་གྱི་གཡང་ཁ་འདི་ནས་གུས་པོའི་ཚེ་སྲོག་གཅད་དགོས་ལགས།།

2017ལོའི་ཟླ4བའི་ཚེས30ཉིན།

ཕ་ཡུལ་ལུང་པ།

 

དགའ་སྡུག་ཡིད་ཀྱི་སོར་རྩེ་ཁེན་པའི་ཕ་རོལ་འཛིན་མའི་འཕོངས་བ་རུ།།

ངོམས་མེད་ལྟ་བའི་སེམས་ཀྱི་རྨུ་ཐག་ལ་གཞུང་རྒྱུད་ནས་མཐེན་པ་ན།།

སྐྱེ་བ་གཅིག་གི་ལང་ཚོ་འཕོས་པའི་སྒྱུ་མའི་ཀློང་གི་ཨར་གཏད་འདིར།།

མི་ཕྱེད་རྟོག་པའི་ཞེན་པ་རབ་མེད་གཡེར་བག་དང་བཅས་བྱོ་ས་ཡིན།།

 

ཅུང་ཟད་གྲང་བའི་ཞོགས་ཁ་རེ་རེར་རི་ལུང་སྨུག་པའི་གོ་འཕང་བརྙེས།།

ཡང་ན་གངས་ཀྱི་འདབ་མ་ལྷུང་བས་གཉུག་ཞལ་འོད་ཀྱིས་གོང་བར་བྱེད།།

དོགས་པའི་ཉམས་དང་སྐྱེངས་བའི་སྦྱོར་བ་དེ་དག་གང་ཡང་མི་དགོས་པར།།

ཅི་དགར་རན་པའི་ག་ལ་བ་འདི་ལྷ་ཡི་གནས་དང་ཅི་སྟེ་མཚུངས།།

 

ལ་གཞུང་འབུམ་གྱི་སྤྱིལ་བུ་དེ་ནས་བྱིན་ཆགས་སྟོང་གི་ཆུ་བོ་གཞུར།།

མུ་མཐའ་བྲལ་བའི་ཐང་ཆེན་ཁམས་སུ་འབྱམས་སྐྱེས་སྣ་མང་མུར་གྱིས་རྡོལ།།

མཐའ་ཟད་དུལ་བའི་ནགས་ཀླུང་ཚོགས་ཀྱང་སྨིན་ལེགས་མ་ཡི་ལན་བུ་སྟེ།།

དངོས་འཛིན་ཡིད་ཀྱི་ཟོམ་དུ་བབ་ཚེ་མིག་གི་པདྨོ་གཡོ་བར་བྱེད།།

 

གངས་ཀྱི་སྐྱིབས་སུ་ཉི་ཟེར་འདུ་བས་མཐའ་ཀླས་ལྗོངས་ཀྱི་སྨག་མུན་སེལ།།

སྔོ་མདངས་ལུས་པའི་ལྗོན་པ་སྣ་ཚོགས་དོག་མོའི་གདན་དུ་ཕྱམ་མེར་འགྱིང་།།

དགོང་སྔོན་སྤྲིན་གྱི་ཉམས་སྒྲོབ་རྩེན་པས་ཡིད་ཀྱི་ངལ་བ་བཅོམ་མཛད་དེ།།

ཨེ་མ་བདག་གི་ཕ་ཡུལ་ལུང་པ་ཚེ་འདིར་འཕྲད་པའི་ཆུང་མ་ལགས།།

 

ཡོངས་པའི་སྤང་ནི་འཛུམ་པའི་ཉམས་ཀྱིས་དྲི་ཞིམ་འཐུབ་ཅིང་མེ་དྲོད་འཁྱིལ།།

མཐོང་ན་ཡེར་བའི་རི་ལྔོངས་དག་ནི་ཁྲོ་བའི་ཟོལ་གྱིས་བྲག་ཆར་འཁོར།།

ནོར་དང་ལུག་ཁྱུ་དགྲང་བར་མི་ནུས་སྦྲ་ཆེན་འདབས་སུ་ཐང་མར་བརྡལ།།

ཨ་ཧོ་སྲིད་པའི་གཡང་ས་འདི་ན་སྲེད་ལྡན་མགུ་བའི་ལེགས་ཚོགས་འདུག།

 

བརྩེ་བའི་གཤིས་ལ་ལྷུན་ཆགས་མངའ་བའི་མེ་ཏོག་འཐུ་བའི་གཞོན་ནུ་མས།།

ཡིད་ལ་སུན་པའི་ངག་གི་ཚངས་དབྱངས་རི་སུལ་ཀུན་ནས་ལེན་ཏེ་འོང་།།

མཚར་སྣང་རླུང་གི་འཇམ་གཉེན་ནེན་མོས་སྒང་ཟོམ་ཀུན་ནས་རེག་ཅིང་སྒུལ།།

ཉམས་དགའི་ཞར་གྱི་འཚོ་བའི་ཕ་ཡུལ་དུ་ཞགས་ཉི་ལེར་ཕ་གིར་འདུག།

 

སྟོང་ཞིང་མཛེས་པའི་ཉག་ག་ཕལ་ཆེར་ཚོགས་དྲུག་ཆགས་པའི་ཆུ་ཀླུང་སྟེ།།

ཞེ་འདང་འཛར་བའི་ཟླ་འོད་ངོགས་སུ་གཟི་བྱིན་དང་བཅས་རབ་ཏུ་བྲུག།

གཡོ་མེད་འདོད་དགུའི་ཆར་ཆེན་དབབ་ཅིང་དེ་ཚེར་ང་ཡང་བཟི་བྱས་ཏེ།།

ཅི་ཡང་བདོག་པའི་ལུང་གཤོང་དེ་གར་འཁྲེང་བའི་བ་དན་ཡང་ཡང་དགྲེང་།།

 

ལྗོན་པའི་འདབས་ལོ་ཐུར་དུ་དཔྱང་པའི་རྩྭ་ཐང་མཛེས་པའི་བ་གམ་ནས།།

དམར་སེར་ཚོམ་གྱི་སྐྱེ་དངོས་སྣ་ཚོགས་རྟ་ནོར་ལུག་གི་རྨིག་པས་རྫི།།

མུར་རྒྱུན་འཕྱོ་བའི་གཙང་པོ་རབ་མེད་མཐའ་ཡས་རྒྱ་མཚོའི་འགྲམ་དུ་གཞུར།།

དེ་དང་ལྷན་དུ་ཉི་འོད་ལམ་ལམ་བསིལ་བའི་དོད་ཀྱིས་ཡུལ་ཀུན་འཕྲོལ།

 

དེ་ལྟར་ན་ཡང་བདག་ནི་འདི་སྟེ་ཉམ་ཉེས་ལས་ཀྱི་གཡབ་མོའི་འོག།

སེམས་ཀྱི་ཟབ་སའི་སྣོད་བཅུད་དེ་དག་ཡེ་ནས་སྐྱུར་ཏེ་བས་མཐའ་འགྲིམ།།

ཡིད་ལས་མ་འགགས་གནའ་བོའི་དུམ་ཁྱིམ་སྣང་བའི་ངོས་སུ་འདུག་ན་ཡང་།།

རྟག་པར་རང་གི་རྩེད་གཞིས་དག་ནི་རྨི་ལམ་མིན་པས་མི་མཐོང་གི།

 

ད་ནི་ལམ་གྱི་གཞི་མདོ་རེ་ནས་ཡིད་སེམས་དྲན་པས་མི་གདུང་ངོ།།

ད་ནི་འཕྲུལ་འབྱམས་རྩིག་ལྡེབས་ངོས་ནས་སྨྲེང་བའི་ངལ་བ་མི་བྱེད་དོ།།

ད་སྟེ་མི་ཡུལ་དཀར་ངོགས་འདི་ནས་མི་ཚེ་འདི་དང་ཕྱམ་གཅིག་ཏུ།།

སྟོང་ཆེན་ཁམས་སུ་རྡོག་པོས་གནན་ཏེ་ནམ་ཞིག་དེར་རུ་ལྷུང་བར་ངེས།།

2017ལོའི་ཟླ5བའི་ཚེས10ཉིན།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...