སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སྙིང་མོ་སྐྱིད་ཀྱི་སྒྲུང་རྩོམ《སྐར་གྲངས་ཀྱིས་བསླངས་བའི་ཆག་སྒོ》།
རྩོམ་པ་པོ། ལྷ་མོ་ཚེ་སྐྱིད། རྩོམ་སྒྲིག་པ། Lhamo དུས་ཚོད། 2017-7-26 14:44:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།

སྐར་གྲངས་ཀྱིས་བསླངས་བའི་ཆག་སྒོ
                                                 སྒྲུང་གཏམ་འདི་ནི་དངོས་བྱུང་གི་གྱོད་དོན་ཞིག་གཞིར་བཟུང་ནས་བྲིས་པ་ཡིན།
                      བོད་ལྗོངས་ལྷུན་གྲུབ་རྫོང་མི་དམངས་ཞིབ་དཔྱོད་ཁང་། སྙིང་མོ་སྐྱིད། 

    གློག་འོད་མག་མོག་གི་སློབ་ཁང་ནང་སློབ་མ་ཆུང་ཆུང་ཚེ་རིང་སྐྱིད་ནི་ཁབ་བཙུགས་པའི་སྒང་ལ་བསྡད་པ་ནང་བཞིན་རྐུབ་སྟེགས་སྟེང་འདུག་བཟོད་མི་བདེ་བའི་གནས་སུ་གྱུར་འདུག  ཁོ་མོའི་མགོ་བོ་དང་ཁར་སྨད་ཡོད་ཀྱང་དགེ་རྒན་དང་འཛིན་གྲྭ་ཡོངས་ཀྱི་སློབ་གྲོགས་ཚོའི་ཕྲ་ཆུང་མིག་གི་རྒྱལ་མོ་དྲུག་ཅུ་ཐམ་པས་ཁོ་མོ་གཅིག་པུར་བལྟས་བསྡད་ཡོད་པ་ཚོར་ཐུབ་པས། དེ་མ་ཉིད་དུ་ས་འོག་ཏུ་འཛུལ་སའི་ཁུང་བུ་ཞིག་ཡོད་ན་ཅི་མ་རུང་སྙམ།
    “ད་ཐེངས་ཀྱི་རྒྱུགས་འབྲས་ཨང་མཐའ་མ་དེ་སུ་ཡིན་པ་ཁྱོད་ཚོས་ཚོད་དཔག་ཅིག་བྱོས་དང་། ”དགེ་རྒན་ཀླུ་མོས་མཐོང་ཆུང་གི་མིག་མདའ་ཞིག་ཚེ་རིང་ལ་སྐྱིད་ལ་འཕེན་བཞིན་སློབ་མ་ཡོངས་ལ་ཕྱོགས་ནས་བཤད།
    “ཚེ་རིང་སྐྱིད། ”སློབ་གྲོགས་ཚོས་མ་བགྲོས་གཅིག་མཐུན་གྱིས་ལན་བཏབ།
    “ཁྱོད་ཚོ་སློབ་གྲོགས་འདི་ལྟ་བུ་ཞིག་དང་མཉམ་དུ་འཛིན་གྲྭ་གཅིག་གི་ནང་ནས་སློབ་སྦྱོང་བྱེད་འདོད་དམ།”
    “མི་འདོད།”
    མཐོང་ཆུང་དང་དམའ་འབེབས་ཀྱི་གཉའ་གནོན་འོག་བྱུང་བའི་ན་ཟུག་དྲག་པོ་ཞིག་གིས་ཚེ་རིང་སྐྱིད་ཀྱི་ལུས་ཡོངས་བཏུམས་པས་སེམས་ནས་མ་བཟོད་པར་ངུས། ཡིན་ནའང་ཁོ་མོར་ཁ་ཡ་བྱེད་མཁན་གཅིག་ཀྱང་མེད་ལ། སློབ་གྲོགས་ཚོའི་འཕྱ་དམོད་བྱེད་པའི་དགོད་སྒྲ་དང་འུར་སྒྲས་ཚེ་རིང་སྐྱིད་ཀྱི་ངུ་སྒྲ་བཀབ་སོང་།
   ....... ཁོ་མོ་གློ་བུར་དུ་གཉིད་ལས་སད་པ་དང་དེ་ནི་རྨི་ལམ་ཞིག་ཡིན་པ་ཤེས། མ་གཞིར་རང་ཉིད་ཁྱིམ་གྱི་འཇམ་ཞིང་མཉེན་ལ་ཀོ་བས་བཏུམས་པའི་འབོལ་ཁྲི་གོང་ཆེན་དེའི་སྟེང་ཉལ་འདུག
   འདི་ནི་རྨི་ལམ་རྐྱང་རྐྱང་ཞིག་ཀྱང་མ་ཡིན་ཏེ། ལོ་ངོ་ཉེར་ལྔའི་སྔོན་དུ་དངོས་སུ་བྱུང་བའི་བྱུང་བའི་དོན་དག་ཅིག་ཡིན།  ཡིན་ནའང་དེ་ནི་ཁ་སང་བྱུང་བའི་དོན་དག་ཅིག་དང་འདྲ་བར་ཁོ་མོའི་ཀླད་པའི་ནང་གསལ་ལྷམ་མེར་ཡོད། ད་ལྟ་ཁོ་མོས་མོ་བརྒྱ་ཡིད་སྨོན་འཆོར་བའི་རྒྱས་སྤྲོས་ཀྱི་འཚོ་བ་རོལ་བཞིན་ཡོད་མོད། ལོངས་སྤྱོད་ཀླུ་དང་མཉམ་པའི་ད་ལྟའི་འཚོ་བ་འདིས་ཀྱང་ཆུང་དུས་སུ་བཞག་པའི་ཁོ་མོའི་སེམས་ཀྱི་རྨ་ཁ་དེ་སོས་མ་ཐུབ། སྡུག་བསྔལ་གྱིས་ཁེངས་བའི་ཕྱིར་དྲན་དེ་སྐབས་སྐབས་སུ་ཁོ་མོའི་ཡིད་ལ་འཆར་སྲིད།

 ༡

    བུ་མོ་སློབ་གྲྭ་གྲོལ་བའི་དུས་ལ་བསླེབས་བྱུང་། ཚེ་རིང་སྐྱིད་ཀྱིས་ཚོང་རྟགས་གྲགས་ཅན་གྱི་ལྭ་བ་ཞིག་བརྗེས་པ་དང་གདོང་ལ་མཛེས་བཟོ་ཞིག་བྱས་རྗེས་ཐོག་སྐས་ལས་བབས་ཏེ་ན་ནིང་ཉོས་པའི་ནོར་རྟ་རྟགས་ཅན་གྱི་རླངས་འཁོར་བསྐོར་ནས་བུ་མོའི་སློབ་གྲྭའི་ཕྱོགས་སུ་སོང་། བུ་མོར་བདག་སྐྱོང་ལེགས་པོ་ཞིག་བྱེད་ཆེད་ལོ་གཉིས་ཀྱི་སྔོན་དུ་ཁོ་མོས་ཀུང་ཟིའི་ལས་དོན་རྣམས་ཁྱོ་གར་སྤྲད་དེ་བློ་གཅིག་སེམས་གཅིག་གིས་འཇིག་རྟེན་ཨ་མ་ཞིག་བྱེད་བཞིན་ཡོད།
    བུ་མོ་ཟླ་སྒྲོན་འཇིག་རྟེན་འདིར་བསླེབས་པ་ནས་བཟུང་བཟའ་མི་གང་བོས་ཁྱིམ་གྱི་ནོར་བུར་བརྩིས་ཏེ་ཧ་ཅང་གཅེས་ལ། བཟའ་ཟླ་གཉིས་ཀྱིས་ཀྱང་དཔྲལ་བའི་མིག་དང་ཁོང་གི་སྙིང་ལྟར་གཅེས། བུ་མོ་སློབ་ལོ་རན་པ་ན་ཁོ་ཚོས་འབྲེལ་བ་གང་མང་བརྒྱུད་པ་དང་སྒོར་མོ་མི་ཉུང་བ་ཞིག་བཏང་ནས་གྲོང་ཁྱེར་དེའི་སྤྱིར་བཏང་གི་བྱིས་པ་རྣམས་ཚུད་དཀའ་བའི་སློབ་ཆུང་སྟེ་ཚོད་ལྟའི་སློབ་ཆུང་དུ་བཞག ཁོ་ཚོས་རྒྱུ་ཤུགས་དང་དབང་ཤུགས་ཚང་མ་བཀོལ་དོན་ནི་བུ་མོར་མི་གཞན་གྱི་ཁ་ནས་བཤད་པའི་“ཆེས་བཟང་བའི་སློབ་གསོ་”དེ་འཐོབ་ཏུ་འཇུག་བསམ་པ་རེད། ཡིན་ནའང་ཁོ་ཚོས་བུ་མོའི་སློབ་སྦྱོང་གི་གནས་ཚུལ་ལ་སེམས་ཁུར་མི་བྱེད། ཁོ་ཚོར་དགོས་པ་ནི་རང་གི་བུ་མོ་ཡང་ཚོད་ལྟའི་སློབ་ཆུང་ནང་ན་ཡོད་ཅེས་པའི་“མཚན་སྙན” ་དེ་ཡིན། གྲོང་ཁྱེར་འདིར་མཚོན་ནས་བཤད་ན་བྱིས་པ་ཚོད་ལྟའི་སློབ་ཆུང་ནང་འགྲོ་ཐུབ་པའི་ཕ་མ་ནི་རྒྱུ་དང་དབང་ཆ་ཡོད་པའི་མཚོན་རྟགས་ཤིག་ཡིན།
    ཚེ་རིང་སྐྱིད་སློབ་འབྲིང་མཐར་ཕྱིན་པ་ནས་བཟུང་ཨ་མ་དང་མཉམ་དུ་ཚོང་ལས་ལ་ཞུགས་པ་དང་། གཉེན་སྒྲིག་རྗེས་བཟའ་ཟླ་གཉིས་ཀས་ཁ་གདན་ལས་སྣོན་བཟོ་གྲྭ་ཞིག་བཙུགས་པར་ཡོང་སྒོ་ཧ་ཅང་བཟང་། དངུལ་གྱི་ཕྱོགས་ནས་འདང་རྒྱག་མེད་པས་ཁོ་ཚོས་མ་འོངས་བར་རང་གི་བུ་མོར་ཕྱི་རྒྱལ་ལ་སློབ་སྦྱོང་དུ་མངགས་རྩིས་ཡོད་ལ། ད་ལྟ་ནས་བཟུང་རང་གི་གཅེས་ཕྲུག་མ་དེ་སྐར་གྲངས་དང་རྒྱུགས་ཤོག་བར་ན་དངངས་འདར་བྱེད་བཞིན་པའི་སློབ་མ་ཞིག་བྱེད་དུ་འཇུག་འདོད་མེད་པས། བུ་མོར་སློབ་སྦྱོང་གི་གནོན་ཤུགས་མི་སྤྲོད་པར་དགའ་དགའ་སྤྲོ་སྤྲོའི་ངང་ནར་སོན་རྒྱུ་དེ་གཙོ་བོར་རེད་བསམ་ནས་ནམ་རྒྱུན་རྒྱུགས་ཀྱི་སྐར་གྲངས་ལ་དང་དོད་བྱེད་ཀྱིན་མེད་ལ། ཕ་མའི་གཅེས་སྐྱོང་འོག་བུ་མོར་སྤྲོ་སྐྱིད་ལྡན་པའི་བྱིས་དུས་ཞིག་བསྐྲུན་རྒྱུ་དེ་ཁོ་ཚོའི་འགན་ཁུར་དུ་བསམ་ཡོད།
    སློབ་གྲྭའི་སྒོ་ཁར་བསླེབས་རག་བར་དུ་ཚེ་རིང་སྐྱིད་ཀྱི་ཀླད་པའི་ནང་རྨི་ལམ་དེ་མ་གཏོགས་མི་འདུག ད་རེབ་དོན་ངན་དེ་དྲན་གསོས་སུ་འཇུག་པའི་རྒྱུ་རྐྱེན་གཉིས་ཡོད་དེ། གཅིག་ནི་ཆུ་ཚོད་གཅིག་གི་སྔོན་ལ་ཁོ་མོ་འབོལ་ཁྲིའི་སྟེང་ཉལ་ནས་བརྙན་འཕྲིན་ལ་བལྟ་དུས། དངོས་བྲིས་ལེ་ཚན་ཞིག་གཏོང་བཞིན་འདུག ལེ་ཚན་དེའི་ནང་དུ་མིང་ལ་བཀྲ་ཤིས་སྒྲོལ་མ་ཟེར་བའི་སློབ་འབྲིང་སློབ་མ་ཞིག་གི་རྒྱུགས་འབྲས་ནམ་ཡང་ཨང་མཐའ་མ་ཡིན་པས་དགེ་རྒན་གཙོ་བྱས་འཛིན་གྲྭ་ཡོངས་ཀྱི་སློབ་གྲོགས་ཚོས་མཐོང་ཆུང་དམའ་འབེབས་བྱས་པ་དང་། ཕ་མས་ཀྱང་གཤེ་གཤེ་བཏང་བ་སོགས་རྐྱེན་དུ་མའི་དབང་གིས་ཁ་ཆེམས་ཡི་གེ་ཞིག་བཞག་རྗེས་གཙང་བོར་མཆོང་ནས་རང་ཤི་བརྒྱབ་པའི་གནས་ཚུལ་རྣམས་ཕྲ་ཞིང་ཞིབ་པའི་སྒོ་ནས་བཤད་ཀྱིན་འདུག ལང་ཚོ་དར་ལ་བབས་པའི་བུ་མོ་ལོ་ཆུང་ཞིག་འདི་ལྟར་མཐའ་འཁོར་གྱི་མི་རྣམས་ཀྱི་ཚ་འདེད་འོག་རྐྱེན་ལམ་དུ་ཤོར། ལེ་ཚན་དེར་བལྟ་བཞིན་ཁོ་མོས་བུ་མོ་ལོ་ཆུང་དེར་སྙིང་རྗེ་ཚད་མེད་སྐྱེས་ནས་མིག་ཆུ་འཕུད་ཅིང་། མཐའ་འཁོར་གྱི་ཧམ་པ་ཚ་བའི་མི་དེ་དག་གི་སྟེང་ལ་ཁོང་ཁྲོ་ལངས།
    རྒྱུ་རྐྱེན་ཅིག་ཤོས་ནི་ཁ་སང་བུ་མོ་སློབ་གྲྭ་གྲོལ་དུས་གདོང་ལ་སེམས་ཁུར་གྱིས་ཁེངས་འདུག་པ་དེ་རེད། ཁོ་མོས་བུ་མོར་རྒྱུ་མཚན་དྲིས་པ་ན།
    བུ་མོ་ཟླ་སྒྲོན་གྱིས་“སང་ཉིན་སློབ་སྐབས་འདིའི་མཇུག་རྒྱུགས་ཀྱི་སྐར་གྲངས་ཐོན་རྒྱུ་རེད། གལ་ཏེ་རྒྱུགས་འབྲས་མ་ལེགས་ཚེ་ཅི་བྱ་”ཞེས་ངུ་ངག་གིས་བཤད་བྱུང་།
    “ཟླ་སྒྲོན་རང་གིས་ནམ་རྒྱུན་སློབ་སྦྱོང་ལ་འབད་པ་བྱས་པས་འགྲིག་གི་རེད། རྒྱུགས་འབྲས་བཟང་རུང་ངན་རུང་སྐྱོན་ཅི་ཡང་མེད་པས་སེམས་ཁུར་མ་བྱེད་”ཅེས་ཁོ་མོས་བུ་མོར་སེམས་གསོ་བྱས།
      “ཡིན་ནའང་ང་རང་དགེ་རྒན་དང་སློབ་གྲོགས་ཚོས་འཕྱ་སྨོད་བྱེད་པར་སྐྲག་གི”བུ་མོས་རང་གི་སེམས་ཁུར་བྱེད་ས་གཙོ་བོ་དེ་ཨ་མར་བཤད།

གཙོ་ངོས།ཤོག་ངོས་གོང་མ།123ཤོག་ངོས་འོག་མ།ཤོག་ངོས་མཐའ་མ།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...