སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
གཞིས་ཀ་རྩེ་གྲོང་ཁྱེར་གྱི་དབེན་དགོན།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2019-3-6 10:30:00 རྩོམ་ཁུངས། གངས་ལྗོངས་ཉི་གཞོན་དྲ་བ། ཀློག་གྲངས།
     མཚན་རྒྱས་པར། སྒྲུབ་པའི་གནས་མཆོག་དབེན་ས་བདེ་ཆེན་ཆོས་ཀྱི་ཕོ་བྲང་ཞེས་ཞུ། གསེར་མདོག་ཅན་དགོན་ནས་སྤྱི་ལེ་བཅུ་གྲངས་ཙམ་སྣུམ་ནག་འཁོར་ལམ་བརྒྱུད་ལྷ་ཁུད་བར་དུ་སོང་། དེ་ནས་ལྷོ་ངོས་སུ་སྤྱི་ལེ་ཁ་ཤས་འཛེགས་ན་དགོན་དེར་སླེབས་པ་ཡིན། དགོན་དེ་ནི་སྤྱི་ལོ་1550ལོར་པཎ་ཆེན་སྐུ་ཕྲེང་གསུམ་པ་བློ་བཟང་དོན་གྲུབ་སྟེ་རྒྱལ་བ་དབེན་ས་པས་ཕྱག་བཏབ་གནང་མཛད། དེ་ཡང་རྒྱལ་བ་དབེན་ས་པ་ཐོག་མར་ད་ལྟའི་དགོན་དེའི་ཤར་ངོས་ཞལ་གཟིགས་སྒྲུབ་ཕུག་ཏུ་བླ་མ་ལྷའི་རྣལ་འབྱོར་གྱི་སྒྲུབ་ལ་རྩེ་གཅིག་ཏུ་གཞོལ་ནས་བཞུགས་པའི་སྐབས་རྗེ་ཙོང་ཁ་པ་གླང་ཆེན་ལ་འཆིབ་པ་ཞལ་གཟིགས་བྱུང་བས་རྗེས་སུ་སྒྲུབ་ཕུག་ལའང་ཞལ་གཟིགས་སྒྲུབ་ཕུག་ཅེས་ཐོགས། དེ་ནས་ཉིན་གཅིག་རྒྱལ་བ་དབེན་ས་པའི་དབུ་བླ་སྐྱབས་མཆོག་དཔའ་བོ་མཆོག་དང་ལྷན་དུ་དབུས་རིའི་རྩེར་ཕེབས་པ་ན་སྐྱབས་མཆོག་ཆེན་པོས་སྤྱན་ནམ་མཁར་གཟིགས་ཏེ་ཕྱག་ཐལ་མོ་སྦྱར་བས། དབེན་ས་པས་ཅི་ལགས་ཞུས་པར། རྒྱལ་བ་རྡོ་རྗེ་འཆང་ལ་སྒྲུབ་ཆེན་བརྒྱད་ཅུས་སྐོར་བའི་ཉམས་ཤིག་ཤར་བྱུང་གསུངས་ཏེ་དེ་མར་ད་ལྟའི་དགོན་གནས་དེར་ས་བཞི་བྱོན་གྱིས་བརླབས་སྐབས་དེར་སྐྱབས་མཆོག་དམ་པ་དགུང་གྲངས་81ལ་ཕེབས་ཡོད། དེ་ནས་བླ་བྲང་རྩེ་འདུ་ཁང་ཀ་བ་བཞིའི་ནང་རྟེན་གཙོ་སངས་རྒྱས་གླང་པོའི་སྐུ་སྐྱེ་བཞེས་སྐབས་ཀྱི་ཚེམས་དང་། རྒྱལ་བ་དབེན་ས་པའི་སྐུ་སྨར་གདུང་བཞུགས་པའི་འདྲ་སྐུ་དང་། མགོན་ཁང་བཀའ་རྒྱ་མ་སོགས་རྟེན་དང་བརྟེན་པར་བཅས་པ་བཞུགས་སུ་གསོལ་བ་མཇལ་རྒྱུ་ཡོད། ད་ལྟ་སྔོན་གྱི་དགོན་ཤུལ་གསར་བཞེངས་གནང་བའི་ནང་སྔོན་གྱི་རྒྱལ་བ་དབེན་ས་པའི་སྐུ་རྨར་གདུང་བཞུགས་འདྲ་སྐུ་དང་། དབེན་ས་པའི་སློབ་ལ་མཁས་སྒྲུབ་སངས་རྒྱས་ཡེ་ཤེས་ཀྱི་སྐུ་བརྙན། གཞན་ཡང་སྔོན་གྱི་སྐུ་བརྙན་རྣམས་ཀྱི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད། ཡང་དགོན་དེ་དང་ཉེ་བར་ཆོས་འཁོར་དབུས་སྟེང་ཞེས་པའི་བཙུན་མའི་དགོན་དང་། དགོན་དེའི་ཤར་རིའི་རྒྱབ་ཏུ་བྲག་སྐྱ་རྡོ་རྗེ་ཕོ་བྲང་ཞེས་པའི་བཙུན་མའི་དགོན། ལྷན་ཕུར་བ་སོ་དགོན། དེ་ནས་ཉ་མོ་ཞེས་པའི་ཕུར་ཧའུ་དགོན་སོགས་མཇལ་རྒྱུ་ཡོད།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...