སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
ཇོ་བོ་རྗེའི་བསྟོད་པ་སུམ་ཅུ་བ།
རྩོམ་པ་པོ། འབྲོམ་སྟོན་པ་རྒྱལ་བའི་འབྱུང་གནས རྩོམ་སྒྲིག་པ། Lhamo དུས་ཚོད། 2019-7-2 10:08:00 རྩོམ་ཁུངས། མཚོ་སྔོན་པོ་དྲ་བ། ཀློག་གྲངས།
 ཇོ་བོ་རྗེའི་བསྟོད་པ་སུམ་ཅུ་བ།
འབྲོམ་སྟོན་པ་རྒྱལ་བའི་འབྱུང་གནས།
     འབྲོམ་སྟོན་པ་རྒྱལ་བའི་འབྱུང་གནས་ནི་རབ་བྱུང་དང་པོའི་གོང་གི་ལོ་སྐོར་མཐའ་མའི་ཤིང་འབྲུག་ལོར(1004)བར་ཡབ་རྟ་གསུམ་སྐུ་གཤེན་དང་ཡུམ་ཁུ་འོད་བཟའ་གཉིས་སུ་སྲས་སུ་ཡུལ་སྟོད་ལུང་ཕུར་སྐུ་འཁྲུངས། རབ་བྱུང་དང་པོའི་ཆུ་རྟ་ལོར(1042)ཇོ་བོ་རྗེ་དཔལ་ལྡན་ཨ་ཏི་ཤ་མངའ་རིས་ལ་ཕེབས་པ་གསན་ནས་ཁམས་ནས་ཞབས་ཐང་གིས་མངའ་རིས་སུ་ཕེབས་ཤིང་། སྤུངས་རངས་སུ་ཇོ་བོ་རྗེ་དཔལ་ལྡན་ཨ་ཏི་ཤ་དང་མཇལ་ཏེ་ལོ་ངོ་བཅུ་གཅིག་གི་རིང་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། ཇོ་བོས་ཡོན་ཏན་ཐམས་ཅད་བུམ་པ་གང་བྱོའི་ཚུལ་དུ་འབྲོམ་ལ་གནང་ཞིང་ཁྱད་པར་དུ་སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཇོ་བོ་རྗེ་སྐུ་མྱ་ངན་ལས་འདས་རྗེས་འབྲོམ་སྟོན་པས་རྭ་སྒྲེང་དབེན་གནས་བཏབ་སྟེ་ཚོགས་པ་ཆོས་བཞིན་བསྐྱངས། པོ་ཏོ་བ་རིན་ཆེན་གསལ་དང་སྤྱན་སྔ་བ་ཚུལ་ཁྲིམས་འབར། ཕུ་ཆུང་བ་གཞོན་ནུ་རྒྱལ་མཚན་གཙོས་མཁས་ཤིང་གྲུབ་པའི་བུ་སློབ་མང་དུ་སྤེལ། རབ་བྱུང་དང་པོའི་ཤིང་འབྲུག་ལོར(1064)རྭ་སྒྲེང་དུ་གཟུགས་སྐུའི་བཀོད་པ་ཆོས་དབྱིངས་སུ་བསྡུས།
     ཨྃ་བདེ་ལེགས་སུ་གྱུར་ཅིག ། ཕུན་སུམ་ཚོགས་པ་བྷཾ་ག་ལ་ཡི་ཡུལ།། ཆོ་རིགས་བཙུན་པ་ཟ་ཧོར་རྒྱལ་བོའི་རིགས།། བྱང་ཆུབ་སེམས་དཔའ་ཞི་འཚོ་འཁྲུངས་པའི་རྒྱུད།། མར་མེ་མཛད་པའི་ཞབས་ལ་གསོལ་བ་འདེབས།། ཡབ་དང་ཡུམ་ལ་སྲི་ཞུ་མཁས་ཤིང་གུས།། གཟུགས་མཛེས་ཡིད་འོང་ཤེས་རབ་སྙིང་བརྩེར་ལྡན།། དུལ་ཞིང་རྒྱུད་འཇམ་ཐབས་མཁས་སྙིང་སྟོབས་ཆེ།། མར་མེ་མཛད་པའི་ཞབས་ལ་གསོལ་བ་འདེབས།། འཇིག་རྟེན་ལུགས་ཀྱི་བསྟན་བཅོས་ཐབས་ཅད་དང་། བཟོ་དང་གསོ་བ་སྒྱུ་རྩལ་སྣ་ཚོགས་དང་།། རིག་བྱེད་ཀུན་ལ་མཁས་ཤིང་མཁྱེན་པ་རྒྱས།། མར་མེ་མཛད་པའི་ཞབས་ལ་གསོལ་བ་འདེབས།། འདོད་པའི་ཡོན་ཏན་རྣམས་ལ་མ་ཆགས་ཤིང་།། རྒྱལ་སྲིད་འབྱོར་བ་ཕུན་ཚོགས་སྤངས་ནས་ནི།། དགེ་འདུན་ཕལ་ཆེན་སྡེ་བའི་དགེ་སློང་མཛད།། དཔལ་ལྡན་ཨ་ཏི་ཤ་ལ་གསོལ་བ་འདེབས།། འདུལ་བའི་སྡེ་སྣོད་སྡེ་བཞི་ལས་གསུངས་པའི།། བདེ་བར་གཤེགས་པའི་བསླབ་པ་བཅས་པ་ལ།། ཉེས་པའི་སྐྱོན་གྱིས་མ་གོས་རྣམ་པར་དག།། དཔལ་ལྡན་ཨ་ཏི་ཤ་ལ་གསོལ་བ་འདེབས།། ཡོངས་སུ་འཛིན་པའི་མཁའ་པ་མང་བསྟེན་ཅིང་།། སྡེ་སྣོད་གསུམ་དང་སྒྲ་དང་ཚད་མ་དང་།། མན་ངག་ཀུན་ལ་མཁས་ཤིང་མཁྱེན་པ་རྒྱས།། དཔལ་ལྡན་ཨ་ཏི་ཤ་ལ་གསོལ་བ་འདེབས།། གསེར་གླིང་རྒྱལ་པོ་ས་སྐྱོང་བླ་མ་ལས།། བྱང་ཆུབ་སེམས་ཀྱི་བདུད་རྩི་སྨན་བླངས་ནས།། འགྲོ་བ་ཀུན་ལ་ཕན་བདེ་མཛད་པ་ཡི།། དཔལ་ལྡན་ཨ་ཏི་ཤ་ལ་གསོལ་བ་འདེབས།། སེམས་ཅན་ཕོངས་ཤིང་ཤིན་ཏུ་སྡུག་བསྔལ་བ།། རབ་ཏུ་མང་ལ་སྙིང་ནས་བརྩེ་བ་ཡིས།། འཇིག་རྟེན་ལྷ་དང་ལྷ་མིན་བཅས་པ་ཡི།། སྐྱོབ་པ་ཡབ་གཅིག་པུ་ལ་གསོལ་བ་འདེབས།། གྲུབ་པ་བརྙེས་པའི་བླ་མ་དམ་པ་ལས།། ཡི་དམ་ལྷ་ཡི་མངོན་རྟོགས་ལུང་མནོས་ནས།། རྩེ་གཅིག་སྒྲུབ་པ་སྙིང་བོར་མཛད་པ་ཡིས།། ལུང་བསྟན་ཐོབ་པར་འགྱུར་ལ་གསོལ་བ་འདེབས།། གདུལ་བྱ་བོད་དུ་ཡོད་པར་དགོངས་ནས་ནི།། ཁ་བ་ཅན་གྱི་ལྗོངས་སུ་བྱོན་ནས་ཀྱང་།། སྡེ་བ་མི་ཆེན་རྣམས་ཀྱི་བླ་མ་མཛད།། མཆོད་ཅིང་བཀུར་འོས་ཁྱོད་ལ་གསོལ་བ་འདེབས།། མཁས་མཆོག་ཁྱེད་འདྲ་བོད་དུ་མ་བྱོན་ན།། སངས་རྒྱས་བསྟན་པ་ཡོད་པར་གྱུར་ཀྱས་ནི།། ཕལ་ཆེར་ཟབ་མོའི་དོན་ལ་རྨོངས་གྱུར་པས།། ལེགས་པར་སྟོན་མཛད་ཁྱོད་ལ་གསོལ་བ་འདེབས།། བསྟན་བཅོས་སྒྱུར་དང་བསྒྱུར་ཟིན་འཆོས་པ་དང་། དེ་དག་འཆད་དང་རང་གིས་རྩོམ་པ་སོགས།། ཡང་དག་ལམ་ལ་ལེགས་པར་འཁྲིད་མཛད་པའི།། བསྟན་པ་རྒྱས་མཛད་ཁྱོད་ལ་གསོལ་བ་འདེབསས།། ལྟ་ངན་ལ་ཞེན་ལོག་པའི་ལམ་ལ་ཞུགས།། བདུད་དང་མུ་སྟེགས་དབང་ཕྱུག་གྲུབ་མཐའ་ངན།། རིགས་པས་ཚར་བཅད་ཐར་བའི་ལམ་ལ་བཀོད།། ཐར་འདོད་དེད་དཔོན་ཁྱོད་ལ་གསོལ་བ་འདེབས།། སྦྱིན་དང་ཚུལ་ཁྲིམས་བཟོད་དང་བརྩོན་འགྲོས་དང་།། བསམ་གཏན་ཤེས་རབ་ཕ་རོལ་ཕྱིན་པ་དྲུག།། སྐྱེ་བ་དུ་མར་ཡང་ཡང་གོམས་པ་ཡིས།། ཚོགས་གཉིས་ཡོངས་སུ་རྫོགས་ལ་གསོལ་བ་འདེབས།། མཁོ་བ་སྦྱིན་དང་སྙན་པར་སྨྲ་བ་དང་།། འཇིག་རྟེན་དོན་མཐུན་གདུལ་བྱའི་དོན་དུ་སྤྱོད།། བསྡུ་བའི་དངོས་པོ་བཞི་ཡི་དཔལ་འབྱོར་གྱིས།། གཞན་དོན་ལྷུར་མཛད་ཁྱོད་ལ་གསོལ་བ་འདེབས།། དད་དང་ཚུལ་ཁྲིམས་ཐོས་དང་གཏོང་བ་དང་།། ངོ་ཚ་ཤེས་དང་ཁྲེལ་ཡོད་ཤེས་རབ་སྟེ།། ནོར་བདུན་དག་གིས་ཕྱུག་པར་གྱུར་བའི་མཛོད།། ཡོན་ཏན་འབྱུང་གནས་ཁྱོད་ལ་གསོལ་བ་འདེབས།། སྔོན་ཚེ་སྨོན་ལམ་བཏབ་པའི་སློབ་མ་མཆོག།། རྒྱལ་བའི་འབྱུང་གནས་རིང་ནས་འོང་བའི་ཚེ།། ཨུ་བ་སི་ཀ་དེ་རིང་སླེབ་བོ་ཞེས།། ལྷ་མིག་མངོན་ཤེས་མངའ་ལ་གསོལ་བ་འདེབས།། མ་ག་དྷ་ནས་སློབ་མ་གུས་པ་ཡིས།། སིལ་སྙན་དཀྲོལ་ཞིང་གསོལ་བ་བཏབ་པའི་སྐད།། བོད་དུ་གསན་ནས་འབྲོམ་ལ་སྦྲན་པ་ཡིས།། རྣ་བའི་མངོན་ཤེས་མངའ་ལ་གསོལ་བ་འདེབས།། ལྷ་སར་ལྷ་ཡི་རོལ་མོ་བསྒྲགས་པ་ལས།། མྱུར་བར་བྱོན་ནས་བར་ཁང་ལྷ་ཚོགས་ལ།། ཕྱག་རྟེན་ཕུལ་ནས་མཁའ་ལ་བསྐོར་བ་མཛད།། རྫུ་འཕྲུལ་མངོན་ཤེས་མངའ་ལ་གསོལ་བ་འདེབས།། གང་དུ་རྒྱལ་བོས་བཀའ་ཆེམས་གཏེར་དུ་སྤས།། མཁའ་འགྲོས་གཏེར་ཁ་ཕྱེ་ནས་ཁྱོད་ལ་གཏད།། ཤཱཀྱ་མུ་ནེའི་འཇའ་ས་ཁྱོད་ཀྱི་དྲིན།། ཇོ་བོ་བཀའ་དྲིན་ཅན་ལ་གསོལ་བ་འདེབས།། ས་བདག་ནད་ཀྱིས་ཟིན་པའི་མི་རྣམས་ལ།། རྟག་ཏུ་ཚེ་འཛིན་བསྲུང་བའི་སྐོར་རྣམས་ཀྱང་།། ཁྱོད་ལས་བྱུང་སྟེ་འགྲོ་བའི་ནད་གསོ་མཛད།། ཀླུ་སྒྲུབ་གཉིས་པར་གྲགས་ལ་གསོལ་བ་འདེབས།། སྙེ་ཐང་འོར་དུ་བྱེ་མའི་སྟེང་བཞུགས་ཚེ།། བརྒྱ་བྱིན་ལ་སོགས་བར་སྣང་ལྷ་རྣམས་ཀྱིས།། རིན་ཆེན་སྣ་ལྔའི་མེ་ཏོག་ཆར་བ་ཕབ།། བླ་མ་ལྷ་ཡི་ལྷ་ལ་གསོལ་བ་འདེབས།། གཡོར་བོ་མཆིམས་ཕུར་བུ་མོའི་མགོ་རྒྱན་ཕུལ།། ཤི་བ་གསན་ནས་དེ་ཡི་སྒྲིབ་སྦྱོང་མཛད།། རིགས་ཀྱི་བུ་མོ་ལྷ་རུ་སྐྱེས་ཞེས་གསུངས།། འགྲོ་བ་འདྲེན་པ་ཁྱོད་ལ་གསོལ་བ་འདེབས།། ཁོ་བོ་འདི་ནས་དགའ་ལྡན་གནས་སུ་འགྲོ།། ང་ལ་དད་ཅིང་གུས་པར་བྱེད་པ་རྣམས།། དགའ་ལྡན་ཡུལ་དུ་མཇལ་བར་འགྱུར་ཞེས་གསུངས།། མ་འོངས་མངོན་སུམ་གཟིགས་ལ་གསོལ་བ་འདེབས།། དགའ་ལྡན་ཡུལ་ན་ནམ་མཁའ་དྲི་མ་མེད།། འཕགས་པའི་ཡུལ་ན་དཱི་བཾ་ཀ་ར་དང་།། ཁ་བ་ཅན་ན་དཔལ་ལྡན་ཨ་ཏི་ཤ།། ས་སྟེང་གྲགས་པས་ཁྱབ་ལ་གསོལ་བ་འདེབས།། འབྲོམ་སྟོན་བདག་གིས་རྭ་སྒྲེང་ལྷ་ཁང་བཞེངས།། འགྲོ་བ་འདྲེན་ཕྱིར་གསོལ་བ་བཏབ་པ་ལས།། དགའ་ལྡན་གནས་ནས་རབ་གནས་མེ་ཏོག་གཏོར།། བྱིན་རླབས་དངོས་སུ་ཕབ་ལ་གསོལ་བ་འདེབས།། ཁྱོད་ཀྱི་ཡོན་ཏན་མཐོང་དང་ཐོས་པ་དང་།། དང་བའི་ཡིད་ཀྱིས་ལྷང་ལྷང་གསོལ་འདེབས་ན།། དགའ་ལྡན་གནས་ནས་ཐུགས་རྗེས་གཟིགས་མཛོད་ལ།། གསོལ་བ་བཏབ་བཞིན་བྱིན་གྱིས་བརླབ་ཏུ་གསོལ།། ད་དུང་ཁ་བ་ཅན་ན་ཁྱོད་ཉིད་ལ།། དད་ཅིང་རྗེས་སུ་སློབ་མ་མང་ཡོད་ཀྱི།། ཐུགས་ལ་དགོངས་ནས་བུ་ལ་མ་བཞིན་དུ།། བརྩེ་བས་བདག་གི་བཤེས་གཉེན་མཛད་དུ་གསོལ།། སྙིགས་དུས་སྐྱེས་བོ་དམུས་ལོང་ལྟ་བུ་རྣམས།། དམ་མིན་དགེ་བའི་བཤེས་འདྲས་རྗེས་བཟུང་སྟེ།། འཁོར་བའི་གཅུང་རོང་གནས་ནས་འདྲེན་མེད་རྣམས།། ཐུགས་རྗེའི་ལྕགས་ཀྱུས་མྱུར་དུ་དྲང་དུ་གསོལ།། དུས་དང་གནས་སྐབས་དག་ནི་ཐམས་ཅད་དུ།། དམ་པ་ཁྱོད་ནི་བདག་གི་མགོན་ལགས་ཀྱི།། མངོན་པར་རྫོགས་པར་མྱུར་དུ་འཚང་རྒྱ་འགྱུར།། ཐོས་བསམ་སྒོམ་གསུམ་བདག་ལ་སྩལ་དུ་གསོལ།།

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...