སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
ལོ་ཆེན་རིན་ཆེན་བཟང་པོར་བསྔགས་པའི་རབ་བྱེད།
རྩོམ་པ་པོ། ཞང་ཞུང་ཆོས་དབང་གྲགས་པ། རྩོམ་སྒྲིག་པ། Lhamo དུས་ཚོད། 2019-8-8 9:14:00 རྩོམ་ཁུངས། ཨ་མྱེས་རྨ་ཆེན། ཀློག་གྲངས།
༄༅། །ལོ་ཆེན་རིན་ཆེན་བཟང་པོར་བསྔགས་པའི་རབ་བྱེད།
ཞང་ཞུང་ཆོས་དབང་གྲགས་པས་བརྩམས། 
     ༄༅། །ན་མཿ ཤྲི་གུ་རུ་རཏྣབྷདྲ་ཡེ། དཔལ་ལྡན་ཡོན་ཏན་སྦྲང་རྩིའི་དོག་པ་ཡིས། ། འཁྱུད་པའི་ཞབས་སེན་རེག་པའི་དགེ་མཚན་ཅན། ། ལྷ་དབང་གཙུག་གི་མཚོ་སྐྱེས་ཕྲེང་བ་ཡིས། ། འགྲོ་འདིའི་སྤྱི་བོ་རྟག་ཏུ་མཛེས་གྱུར་ཅིག ། ཚོགས་གཉིས་རིན་ཆེན་མ་ལུས་གཅིག་བསྡུས་པ། ། སྐལ་བཟང་བསོད་ནམས་ཕུང་པོ་ཡ་མཚན་ཞེས། ། མཁས་མང་དེད་དཔོན་ཚོགས་འདིས་བསྟོད་པའི་གླུ། ། སྦྱར་བས་ཐུབ་བསྟན་མཚོ་ཆེན་གང་བར་གྱུར། ། ཀེ་ལ་ཤས་མཚོན་བྱང་དུ་དགེ་སློང་མཆོག ། བྱ་ཡི་གདོང་ཅན་ཐུབ་བསྟན་དམིགས་བུ་ཞིག ། འབྱུང་པོ་ཀུན་དགའ་རངས་པ་སྐྱེད་ཅིག་ཅེས། ། སྟོན་པས་བསྟོད་ཚིག་ཕྲེང་བ་རྣམ་པར་སྤེལ། ། མཆོད་པ་གསལ་བྱེད་ཐལ་མོ་སྦྱར་མཛེས་སུ། ། ཚངས་པའི་ཅོད་པཎ་ས་ལ་ལྷུང་བ་ན། ། ས་སྐྱོང་ཚོགས་འདིའི་གཙུག་རྒྱན་གསེར་ལྡན་མའི། ། ལྟོ་བའི་རྒྱན་དུ་ཅི་སྟེར་མི་བགྱི་ལགས། ། ཉིད་ཀྱི་ཡབ་རྗེ་འབྱོར་བ་དུལ་བས་བརྒྱན། ། ཡོན་ཏན་སྐྱིལ་ཀྲུང་འགྲོ་འདིའི་སྤྱི་བོར་འཛེགས། ། གྲོང་ཁྱེར་པ་རྣམས་གསེར་གྱི་ཁང་བའི་ཕྲེང་། ། མུ་ཏིག་ཚོགས་འབར་བརྒྱ་བྱིན་སར་གཤེགས་འདྲ། ། མཐོ་རིས་དཔལ་མོ་ཡུམ་གྱི་ཡོན་ཏན་ཆེས། ། སྐྲག་ལྡན་སྒྱུ་འཕྲུལ་ཞག་བདུན་ཉིད་དུ་ལྷུང་། ། ཁྱོད་སྐུའི་འབབ་ལྡན་ཡུམ་གྱི་དགའ་ཚལ་དུ། ། གཤེགས་པ་ལ་འགྲན་ཆུ་གཏེར་སྒྲོལ་བྱེད་བཤེས། ། ལེགས་བྲིས་འདི་དག་བསོད་ནམས་ནོར་འཛིན་གྱི། ། གདོང་ལ་སྐྲག་པས་ཀུན་བཟང་ཤར་གྱི་རིའི། ། ཕྲག་པ་ལ་འཛེགས་དེ་ཚེ་ཡན་ལག་མཆོག ། གསེར་གྱི་འདབ་བཟང་རྐང་སྟེགས་རྣམ་པར་བསྟེན། ། ཡོན་ཏན་མཐའ་དག་ཀུན་འགྲོ་ནགས་ན་བདེ། །  འབྲུག་སྒྲའི་གར་གྱི་ངང་ཚུལ་ལ་ཆགས་པ། ། སྤྱོད་བཟང་ཡུམ་གྱི་འོ་མའི་ཆུ་གཏེར་ཆེ། ། གྱེན་དུ་འཕྱུར་ལྡན་འདིར་ནི་རྣམ་པར་རོལ། ། མཁའ་འགྲོའི་དྲིལ་ཆེན་གླུ་དབྱངས་གྲེ་འགྱུར་བརྒྱའི། ། སེར་བུས་འདར་ལྡན་རབ་སད་བུ་མོའི་མཚོ། ། ཁྱབ་འཇུག་རྐང་པར་བཅོས་པའི་ལུས་ཀྱིས་ནི། ། མགྲིན་སྔོན་རལ་བའི་མཐོ་རིས་སྐས་ལ་འཛེག ། ཕྱག་མཐིལ་རྩིབས་སྟོང་འཁོར་ལོའི་མཚན་མ་དང་། ། ས་ལ་དབྱངས་ཡིག་ཕྲེང་བ་ལྷན་ཅིག་ཏུ། ། བཀོད་ལེགས་ཁྱོད་ནི་སྲིད་པའི་འཁྲུལ་བ་ལ། ། བཞད་པའི་ཚེམས་ཕྲེང་འོད་ཀྱིས་ས་འདི་འགེངས། ། ལེགས་གསུང་གཙུག་ལག་སྣང་བྱེད་བཟང་པོ་ཡི། ། དཀྱིལ་འཁོར་ལ་འཕོས་ངུར་སྨྲིག་ཚོན་བཟང་ནི། ། ངེས་པར་འབྱུང་བློ་འདབ་བརྒྱ་དང་འགྲོགས་པ། ། དགེ་བ་ཀུན་བྱེད་སྤྲུལ་པའི་འཁོར་ལོ་ཉིད། ། ཆོས་རྒྱལ་ཨིནྡྲ་བྷུ་ཏིའི་གྲོང་ཁྱེར་པའི། ། གླེགས་བམ་བརྒྱ་བྱིན་གྲོང་གི་ཡི་གེ་ཅན། ། ཕོ་ཉའི་གདམས་པ་འཛིན་དེ་ལས་དཀར་བརྒྱའི། ། ལྕགས་ཀྱུས་དྲངས་ཏེ་ཕྱག་གི་ལྡུམ་རྭར་འོངས། ། འཕགས་ཡུལ་ཡི་གེ་ལས་འོངས་དོན་བཟང་པོ། ། མུན་པར་བྱེད་གང་མངལ་གྱི་དྲི་མ་ཡི། ། བློ་མིག་རབ་རིབ་བསལ་བའི་ཐབས་གང་ཞེས། ། ས་ཧ་ཀ་རའི་འཁྲི་ཤིང་གྲིབ་མ་ལ། ། མཉམ་པར་འཇོག་པའི་བསམ་གཏན་ལ་ཞུགས་ཚེ། ། རྨི་ལམ་སྐྲུན་པར་བྱེད་དེ་ཉེ་བར་འོངས། ། དེ་ཚེ་དེ་ཡི་ཡིད་ཀྱི་མཁའ། ། བྱི་རུའི་ཆུ་འཛིན་ཉི་གཞོན་བརྒྱའི། ། མདངས་ཀྱི་རྣམ་པར་བཀྲ་བ་བཞིན། ། མཁའ་འགྲོའི་གཟུགས་ཀྱིས་རྣམ་པར་ཁྱབ། ། དགའ་མ་གསེར་གྱི་གདོང་མཛེས་མ། ། མུ་ཏིག་དོ་ཤལ་འོག་པག་གི། ། མཁའ་ལ་སྤྲིན་དཀར་འགོད་བཞིན་དུ། ། བུང་བའི་གླུ་དབྱངས་འདི་བྱས་སོ། ། སྲིན་བུའི་ཁ་ཆུས་རང་ལུས་བཅིངས་པ་ལྟར། ། ཡུལ་ལ་ཞེན་པས་བདུད་ཀྱི་རྒྱ་རུ་ཆུད། ། བདེ་འགྲོ་ཐར་བ་འདོན་པའི་མི་སུ་དག ། བྱང་ཕྱོགས་ཁ་ཆེའི་ཡུལ་དུ་ཕྱིན་ནས་ཀྱང་། ། རྒྱ་གར་ཤར་ནུབ་ཆུ་བཞིན་མྱུལ་ནས་ནི། ། དམ་ཆོས་རྒྱ་མཚོ་བོད་དུ་བསྒྱུར་ན་བདེ། །  འདབ་གཤོག་མ་རྫོགས་མཁའ་ལྡིང་སྲས་དེ་ལ། ། མཁའ་ཡི་ཕ་རོལ་རྟོགས་ཞེས་ཡུམ་གྱི་བཀའ། ། འདའ་བར་དཀའ་བ་དེ་ཐོས་རྣམ་པར་འདར། ། ངོ་འཛུམ་ནག་པོ་བདུད་ལ་བསྡིག་པ་བཞིན། ། ཉིན་བྱེད་གདོང་བ་ཆུ་འཛིན་ཡོལ་བའི་གོས། ། འཛིན་པ་ཅི་ཞེས་བསྐྱེད་མཛད་ཏི་ཏིའི་དྲིས། ། མཁའ་འགྲོ་འབྲུག་གི་བུ་མོས་ཟབ་མོའི་སྒྲ། ། སྙིང་ལ་སྐྲག་པ་སྟེར་བ་བསྒྲགས་ཏེ་སྨྲས། ། སྣག་གི་གཉེན་བཅས་ར་ཡིག་ཚོགས་རྣམས་ཀྱིས། ། རྣམ་དཔྱོད་དབུ་བ་དཀར་པོའི་དོ་ཤལ་ཅན། ། རིན་ཆེན་ཚོགས་འཛིན་ཛ་ཧུའི་བུ་མོ་དེ། ། འཕགས་ཡུལ་ནུབ་ཕྱོགས་ཁ་ཆེའི་རྒྱ་མཚོར་བཏང་། ། སྙིང་རྗེའི་ལང་ཚོ་རྒྱས་པའི་ཟླ་བ་དེ། ། བཀྲ་ཤིས་རྒྱུ་སྐར་འོད་ཟེར་རྩེ་མོའི་ཚོགས། ། འཁྲིད་དེ་དམ་ཆོས་མཁའ་ཡི་ལམ་ཞུགས་ཀྱིས། ། ཉ་ཡི་ཏོག་སྡེ་མུན་ཆེན་བག་ཡོད་བྱོས། ། རྔ་ཡབ་གཡོ་ལྡན་ཤིང་རྟའི་འཁྲུལ་འཁོར་གྱིས། ། ཆུ་མཐོངས་འགོག་པ་ལྷུར་ལེན་རི་དྭགས་འཛིན། ། འདི་ཡི་མགོན་བཅས་དཔལ་ལྡན་སྙན་ངག་མཁན། ། ཀུ་མུད་ཚལ་འདི་ཀུན་དགའི་གེ་སར་རྒོད། ། ཟླ་བ་རང་གི་རྗེས་འབྲང་སྐར་ཚོགས་དང་། ། འགྲོགས་པ་རྫོགས་པའི་དུས་ཀྱི་འཕགས་པའི་ཡུལ། ། ཉེ་བ་མ་ཧཱ་པི་གྷའི་གྲོང་ཁྱེར་དུ། ། སྙིང་སྟོབས་བཞོན་པ་ཁོ་ནས་དྲངས་པར་གྱུར། ། དེར་ནི་ཉལ་འགྲོའི་རྒྱུན་ཆེན་པོ། ། ཨིནྡྲ་ནཱི་ལའི་གསོ་བཟང་ཅན། ། གསེར་ལྡན་མ་ཡི་ལྟོ་བ་ནི། ། རིལ་གྱིས་འཁྱུད་པར་བྱེད་པ་སྟེ། ། དེ་ལ་རྐང་པས་འཐུང་བ་ཡི། ། སྐེ་རགས་སྙིང་ལ་འཇིགས་སྟེར་བ། ། ཡོད་དེ་དེ་སྲུང་གནོད་སྦྱིན་མོ། ། སྡིག་ཅན་སོག་ལེའི་སེམས་འཆང་བ། ། དེ་ཡིས་དམད་པའི་དུག་མདའ་ཡིས། ། མདུན་ན་འདོན་དེ་རྣམ་པར་ལྷུང་། ། སྙིང་སྟོབས་ཆུ་ཡི་རྡུལ་ཚོགས་ཀྱིས། ། གང་བའི་གསེར་གྱི་ཆུ་འཛིན་ཡང་། ། མི་འདོད་བྱེ་བའི་འཐོར་རླུང་གིས། ། སྐད་ཅིག་རྣམ་པར་འཁྲུགས་པ་ཐོབ། ། ཉི་མ་དང་ནི་དགའ་བའི་མིག ། ལྷན་ཅིག་ཟུམ་ཚེ་ལྟས་འདི་མཐོང་། ། དཔལ་མོ་གསེར་གྱི་གོ་ཆ་ཅན། ། ཕྱོགས་ཀུན་བསྲུང་བའི་ཡི་གེའི་ཕྲེང་། ། གསེར་གྱི་ཁུ་བས་འབྲི་བྱེད་པ། ། དེ་ཡིས་མགོན་དེ་དབུགས་ཕྱུང་ངོ་། ། ཀ་ཡེ་སྤྱོད་བཟང་འོ་མའི་མཚོ། ། སྲིད་རྩེའི་བར་དུ་ལུད་ཁྱོད་ཀྱི། ། མངག་གཞུག་གདུང་བྱེད་ཚང་ཚིང་ནི། ། ཁོ་མོས་ད་ལྟ་ཐལ་བར་བྱ། ། ས་འདིར་དགྲ་བོ་ནོར་ཕྱིར་སྲོག་འདོར་བ། ། མཐར་བྱེད་རྟ་བབ་ཀ་བའི་དཔུང་པ་ཅན། ། བརྒྱ་ཕྲག་གནོད་པ་འབྱུང་ངོ་ཕྱག་གི་ནི། ། ལྕགས་ཀྱུས་གྲོགས་འདི་ཁྲིད་དེ་མྱུང་དུ་སོང་། ། ཅེས་སྨྲས་པ་དང་ལྷན་ཅིག་གཉིད་ཀྱིས་ནི། ། ཟུམ་པའི་འདྲེན་བྱེད་འདབ་བརྒྱས་ཉི་འོད་ཐོབ། ། རྨི་ལམ་ལྟས་ཏེ་རྗེས་ཞུགས་འཛིན་པ་ཡི། ། ལྟོ་ལ་གོམ་པ་བཞི་བཅུ་བཀོད་པ་ནི། ། ལུང་བསྟན་ས་དེར་སླེབས་པའི་དཔུང་གི་ཚོགས། ། མིག་གི་འོད་ཟེར་ཅིག་ཅར་མུན་པས་ཁྱབ། ། གང་ཡང་གྲང་དང་ཚ་བ་དང་། ། བཀྲེས་དང་སྐོམ་པ་མི་སེམས་ཤིང་། ། རྒྱལ་བའི་ཆོས་ཚུལ་མ་ལུས་ཀུན། ། ཚོལ་ལ་ཞུགས་པའི་སེམས་དཔའ་འདིས། ། ཤེར་ཕྱིན་ཁོ་ན་འཚོལ་བྱེད་པའི། ། རྟག་ཏུ་ངུ་ཡི་གྲགས་པ་ཕྲོགས། ། རིད་ཀྱང་དགའ་སྤྲོའི་གཟི་བྱིན་ཅན། ། ཟླ་ཚེས་འདྲ་དེ་རྗེས་འབྲང་བཅས། ། གཤེགས་ཚེ་རྐང་འཐུང་དྲ་བའི་གསེབ། ། བྱེད་པོས་མངོན་པར་སྤྲུལ་པ་ཡི། ། ནུ་མ་མངོན་དགའ་སྨིན་ལེགས་ཟུང་། ། ཡིད་སྲུབས་གསལ་བ་བཞིན་དུ་སྣང་། ། དེ་དག་སྙིང་ནི་དད་པ་དང་། ། ཕྲག་པ་ཟས་ཀྱི་ཁུར་གྱིས་ནོན། ། དང་པའི་མིག་ཆུས་སྡིག་པ་ཡི། ། དྲི་མ་འཁྲུད་ཅིང་ཟས་ཀྱི་ཚོགས། ། རོ་བརྒྱ་ལྡན་པས་ཉེར་མཆོད་དེ། ། སྡེ་ཆེན་གྲོང་གཤེགས་དོན་གྲུབ་བཞིན། ། སྲོག་འདོར་ན་ཡང་དམ་པ་ལ། ། ཕན་བཏགས་དྲིན་ལན་མི་འདོར་ཏེ། ། དེ་དག་མགོ་སྐྱེས་ལྕང་ལོའི་ཤས། ། དགེ་ལེགས་སླད་དུ་མངོན་པར་བཞེས། ། སྦྲང་རྩིས་མྱོས་པའི་བུང་བ་དེས། ། མཁའ་ལྡིང་ཕམ་བྱེད་འདམ་མའི་གར། ། ཉིན་ཕྱེད་བསྐྱོད་པས་ཁ་ཆེའི་ཡུལ། ། གཉིས་སྐྱེས་གྲོང་ཁྱེར་བདུན་པར་ཕྱིན། །  དེར་ནི་དེ་དག་གྲོང་པའི་སྐད། ། ཟུར་ཆགས་ལ་སོགས་ཐོས་ཙམ་གྱིས། ། ཁོང་དུ་ཆུད་དེ་ཀུ་མུད་ད། ། ཟླ་བ་མཐོང་བ་ཉིད་ཀྱིས་རྒོད། ། དེ་ལས་རྒྱང་གྲགས་སོང་བའི་ནགས། ། འཇིགས་རུང་ཅེ་སྤྱང་ཕེ་སྒྲ་སྒྲོགས། ། བུང་བ་གཡོ་བའི་མུན་གཏིབས་པས། ། སོ་ལྡན་འགྲམ་པ་གནག་གྱུར་པ། ། དེར་ནི་སྟག་གི་ཆུང་མས་མ་ཡི་དངོས། ། གསར་དུ་ཐོབ་སྟེ་བཀྲེས་པས་རྣམ་པར་འཁྲུགས། ། དེ་མཐོང་ཆུ་བུར་ལྟ་བུའི་ལུས་འདི་ནི། ། འཇིག་པ་རིང་བ་མིན་སྙམ་སྐད་ཅིག་བསམས། ། སྐབས་དེར་མིག་སྨན་མདོག་ཅན་གཅེར་བུ་ཞིག ། མཁའ་ལ་གར་བྱེད་ཉི་མ་འབུམ་དག་སྤྲོ། ། ཟླ་བ་ཚེས་པ་ལྟར་དཀར་མི་རྐང་གི། ། གླིང་བུའི་སྒྲ་ཆེན་མཁའ་ཡི་ཕ་མཐར་སྒྲོགས། ། དེར་ནི་གྲུབ་པ་མཆོག་བརྙེས་པ། ། རཏྣ་སི་རླྷི་ཞེས་བྱ་སྟེ། ། སྒྲ་དེ་གདོང་ལྔའི་གད་རྒྱངས་སུ། ། འཁྲུལ་ལྡན་སྟག་མོ་ནགས་མཐར་བྲོས། ། ཀ་ལ་བ་ཏི་ཞེས་བྱའི་གྲོང་། །  ཁུ་བྱུག་གིས་རྒྱས་སྐྱེད་ཚལ་དུ། །  བསོད་ནམས་པིར་གྱི་རི་མོ་ཡི། ། ཞབས་མཐིལ་གཟུགས་བརྙན་འབྲི་ཞིང་གཤེགས། ། དེ་ནས་ཀརྨིར་རྒྱལ་པོའི་ཁབ། ། མིག་ལ་མྱོས་པ་སྟེར་བྱེད་པ། ། གྲོང་ཁྱེར་ཕ་མཐའ་གནམ་སྔོན་གྱིས། ། ཕ་མཐའ་རྣམ་པར་འཁྱུད་པ་མཐོང་། ། སྐར་མའི་ཚོགས་རྣམས་ནམ་མཁའ་ལ། ། རྟེན་མེད་གནས་པར་མ་ནུས་ཏེ། ། ས་འདིར་ལྷན་ཅིག་འགོད་པ་ཞེས། ། བདག་ཉིད་ཆེན་པོས་རྣམ་པར་བསམ། ། གྲིབ་བརྟན་ཡོན་ཏན་མེ་ཏོག་ཚོགས། ། འཐུ་ཞིང་ཆུ་ཀླུང་བུ་མོ་རྣམས། ། ཕྱོགས་ཀྱི་བུ་མོའི་རྣ་ལུང་ལ། ། རྣ་རྒྱན་འགོད་ཕྱིར་རིངས་པར་རྒྱུ། ། ཐོག་མར་ནུ་ཞོ་འཐུང་བའི་ཚོགས། ། འདུས་ཏ་མགོན་འདི་བསུ་བྱས་ནས། ། ཀ་ཡེ་ལྟོས་ཤིག་གསེར་མདོག་ཅན། ། སྨ་ར་མེད་དེ་ཡ་མཚན་ཞེས། ། ཕེག་རྡོབ་ཕལ་མོའི་སྒྲ་འབྱིན་ཞིང་། ། ག་ཞ་བྱེད་ཅིང་གོས་དག་འཐོར། ། འཆི་མེད་མདུན་སས་གང་གི་ནི། ། ནོར་སྲུང་སྡེར་མོ་མཆོད་འོས་པ། ། བཞི་མདོ་ཆེན་པོར་སྟོན་པ་བཞིན། ། འབྱུང་པོ་དགོངས་པས་བསོད་སྙོམས་མཛད། ། དེར་ནི་གཉིས་སྐྱེས་མངོན་ཤེས་ལྔ། ། འཛིན་འདྲས་ཕྱག་འཚལ་འདབ་བརྒྱ་ཡིས། །  གང་བའི་དངུལ་གྱི་སྤོས་ཕོར་ནི། ། ཕུལ་ཏེ་མ་འོངས་ལུང་བསྟན་བྱས། ། ཀ་ལི་ཀ་ཡི་གྲོང་དབུས་ན། ། གཙུག་ལག་ཁང་ཆེན་བི་ཧ་ར། ། འཇིག་རྟེན་ཀུན་ལ་རྣམ་གྲངས་པར། ། བརྒྱ་ཕྲག་ལྔ་ཡི་ལྔ་རིག་གིས། ། མདུན་བདར་གུ་ཎ་ཡི་ཏྲ་གང་། ། སྒྲ་ཚད་རིག་པ་གང་ཞིག་གིས། ། ཕྱོགས་སུ་ལྷུང་གྱུར་དེ་བསྟེན་ནས། ། གང་བློ་ཆུ་ཤེལ་ཁོང་པར་ནི། ། མ་ལུས་ཚོན་འཕོས་དབྱངས་ཅན་བཞིན། ། དེ་དང་མཁན་པོ་ངྷ་རྨཱ་ཏ། ། ཤྲི་ལ་དགེ་འདུན་བཅས་པ་ལས། ། གསོལ་བཞིའི་ཆོ་ག་རྣམ་དག་གིས། ། བསྙེན་རྫོགས་དགྲ་བཅོམ་མངོན་སུམ་ཉིད། ། བིནྡྷ་ར་གྲོང་ཚོགས་མཆོད་ཀྱིས། ། མཉེས་བྱས་རྣལ་འབྱོར་གྲུབ་མཆོག་ལས། ། དེ་ནས་ཡིད་བཞིན་བསམ་འཕེལ་ཞེས། ། བྱ་བའི་རྐང་མགྱོགས་དངོས་གྲུབ་བརྙེས། ། གྲོང་ཁྱེར་ཏ་མ་ལ་ས་ནྟི། ། ཤྲངྷ་ཀ་རས་མཛེས་དེར་གཤེགས། ། དབང་རབ་མནོས་ཤིང་རྒྱུད་ཀུན་ཐོས། ། མན་ངག་ཐོབ་ཅིང་གྲུབ་པ་བརྙེས། ། གང་ཡང་རང་ཡུལ་གཤེགས་བརྩོན་ཆེ། ། ལྷག་པའི་ལྷ་ཡིས་ལུང་བསྟན་པ། ། འཇིག་རྟེན་རིན་ཆེན་མཐའ་དག་གིས། ། རང་ཉིད་གཅིག་པུ་བརྒྱན་འདོད་འདི། ། གདེངས་ཅན་དབང་པོ་ནཱ་རོ་པའི། ། རིན་ཆེན་མཆོག་འདི་འདོར་བར་མཚར། ། ཞེས་པ་ཚིག་མདའི་འཇམ་དཔལ་དབྱངས། ། དབྱངས་ཅན་རྒྱུད་མངས་ལྟ་བུ་ཐོས། ། གུར་ཀུམ་དོག་པོས་རྐང་བ་ཡི། ། འདེགས་འཇོག་འགོག་པ་ལྷུར་ལེན་པ། ། པུ་ལ་ཧ་རི་གྲུབ་པའི་གྲོང་། ། ཡི་འགྲོགས་རྫུ་འཕྲུལ་མཆོག་གིས་གཤེགས། ། བདེ་ཆེན་ལང་ཚོ་སྟོང་ཉིད་ཀྱི། ། དགའ་མར་འཁྱུད་མཁས་ཀུན་ཏུ་བཟང་། ། ཚེམས་ཕྲེང་གེ་སར་ཁྱོད་ཀྱི་གདོང་། ། ཟླ་བ་སར་བ་ཤར་པས་རྒོད། ། ཉི་ཟླའི་རླུང་བཞོན་ཕྲོགས་ནས་ནི། ། གང་གིས་ཞོན་ནས་དབུ་མའི་ལམ། ། ཞུགས་ཏེ་ཟུང་འཇུག་གཞལ་ཡས་ཁང་། ། སྐད་ཅིག་གིས་བགྲོས་འདུས་པའི་ལམ། ། ས་གསུམ་རིན་ཆེན་གཅིག་པུ་དེས། ། ཁྱོད་ཀྱི་རལ་བ་རྣམ་པར་མཛེས། །  ཡུལ་དབུས་འཛིན་མར་ཞབས་མཐིལ་གྱི། ། རྩིབས་སྟོང་འཁོར་ལོའི་རི་མོ་བཀོད། ། གང་དག་དགག་སྒྲུབ་ཁྲིར་འདུག་ན། ། འཇམ་དཔལ་དཔའ་བོ་དངངས་བྱེད་པ། ། མཁན་ཆེན་གུ་ཎ་མི་ཏྲ་སོགས། ། པཎ་ཆེན་བཅུ་ཕྲག་བདུན་དང་ལྔའི། ། རིག་ཚུལ་ནོར་བུའི་དོ་ཤལ་གྱིས། ། ཁྱོད་ཉིད་མགྲིན་པ་རྣམ་པར་བཀྲ། ། གང་ཡང་མདོ་སྔགས་གཞུང་བཟང་བརྒྱ། ། བསྒྱུར་ཅིང་ཞུས་ཏེ་གཏན་ལ་ཕབ། ། རྒྱལ་བ་ཀུན་གྱིས་མ་མཛད་པའི། ། སྟོན་པའི་བྱ་བ་མཐའ་དག་མཛད། ། བྱ་བ་བྱས་ཏེ་ཞག་དྲུག་གིས། ། འཕགས་པའི་ཡུལ་ལས་རང་ཡུལ་བྱོན། ། ཏི་སེའི་གཙུག་ཏོར་འཆང་བ་ཡི། ། པུ་ཧྲངས་ཞེས་བྱ་གངས་ཀྱི་ཡུལ། ། ས་བདག་ལྷ་སྡེ་དཔུང་པ་ཡིས། ། རྒྱ་མཚོའི་གོས་ཅན་འཁྱུད་བྱེད་པ། ། བང་མཛོད་གནོད་སྦྱིན་རྨུགས་འཛིན་དང་། ། གཅིག་གྱུར་ལུས་ངན་ཕམ་བྱེད་བྱུང་། ། དེ་ཡིས་གཙུག་ལག་ཁང་ཆེན་བྱས། ། དགེ་འདུན་ཚོགས་མང་རྣམ་པར་མཆོད། ། བོད་ཀྱི་དགེ་བཤེས་སེ་ཏར་གྱིས། ། ཡིད་བསྒྱུར་འཇག་རྩེར་སྐྱིལ་ཀྲུང་འཆིང་། ། ཁྱོད་ཀྱི་སྡིགས་མཛུབ་དུས་མཐའི་མེས། ། སྐད་ཅིག་ཉིད་ལ་ཐལ་བར་མཛད། ། གུ་གེ་ཞེས་བྱ་འཛམ་གླིང་གི། ། ས་ལ་གནས་ཀྱང་ཡོན་ཏན་གྱིས། ། སྲིད་པའི་རྩེ་མོར་བགྲང་བྱ་བ། ། རབ་གསལ་ཡིད་གཞུངས་མཁས་པས་བསྟེན། ། དེར་ནི་རྒྱལ་ཕྲན་བྱེ་བའི་མགོར། ། ཞབས་སེན་ནོར་བུའི་འོད་ཆགས་པ། ། ལྷ་ཡི་བླ་མ་ཡེ་ཤེས་འོད། ། ས་གསུམ་མིག་གི་བདུད་རྩི་གང་། ། རལ་བ་ལྡན་པའི་སངས་རྒྱས་ཏེ། ། རྩོད་པའི་དུས་ཀྱི་འཁོར་ལོ་སྒྱུར། ། འོད་གསལ་ལྟར་འཁྲུངས་མི་ཡི་དབང་། ། ཉིན་པར་ཟླ་ཟེར་སྤྲོ་བ་བྱུང་། ། ད་ལྟའང་སྙན་གྲགས་མེ་ཏོག་དཀར། ། ཕྱོགས་ཀྱི་བུ་མོའི་རྣ་བར་འཆང་། ། དེ་ཡིས་གསེར་གྱི་གཙུག་ལག་ཁང་། ། དཔེ་མེད་ལྷུན་གྱིས་གྲུབ་པ་བཞེངས། ། ནོར་བུའི་ཞལ་ཞལ་རྒྱལ་བའི་སྐུ། ། གྲངས་མེད་འོད་རིས་འཆར་བ་ཅན། ། ནོར་བུའི་འོད་ཀྱིས་སྐུ་གཅིག་ཀྱང་། ། སྐུ་གཟུགས་བྱེ་བ་ཕྲག་བརྒྱར་སྣང་། ། ངོ་མཚར་ཕུང་པོའི་འཇིག་རྟེན་འདི། ། འབྲི་བྱེད་རི་མོ་མཁན་དེ་མཚར། ། དཔག་ཚད་ལྔ་བཅུ་བར་བར་རྣམ་གནས་པའི། ། ཡུལ་ཁོར་རྣམས་སུ་བརྒྱ་ཕྲག་གཙུག་ལག་ཁང་། ། བཞེངས་པའི་ཐིག་གདབ་རབ་ཏུ་གནས་པ་སོགས། ། དུས་གཅིག་ཉིད་དུ་ཁྱོད་སྐུ་གཅིག་གིས་མཛད། ། ས་སྐྱོང་བཀས་བསྐུལ་བློ་བཟང་ཁྱེའུ་ལྔ། ། ཁྲིད་དེ་ན་གེར་ཡུལ་ཁོ་ཆེན་པོར་གཤེགས། ། རིན་ཆེན་རྒྱུ་ལས་འཕགས་པ་པད་དཀར་འཛིན། ། བཞེངས་ཏེ་རྒྱ་བོད་གླེགས་བམ་སྟོང་དག་དང་། ། ལྷན་ཅིག་གླང་ཆེན་ཤིང་རྟས་རྣམ་པར་དྲངས། ། བྲག་རིའི་གདོང་གིས་འཁོར་ལོ་ཆགས་པ་ན། ། ང་ཉིད་རྐང་པས་འགྲོ་ཞེས་སྐུ་དེ་ཡིས། ། གོམ་པ་འདོར་བར་བརྩམས་ཚེ་ས་ཆེན་འདར། །  འདི་ལ་རྡུལ་གྱིས་གོས་ན་མི་རུང་ཞེས། ། པདྨ་བརྒྱུད་པ་སྟོང་དག་བྱུང་གྱུར་ཏེ། ། ཟེའུ་འབྲུའི་རྐང་སྟེང་གསེར་གྱི་རྐང་པ་ཡི། ། འཕུར་ལྡིང་མཛེས་པ་གསེར་གྱི་བུམ་པ་བཞིན། ། འགྲོ་བའི་བླ་མ་ཡེ་ཤེས་འོད། ། བསོད་ནམས་སྐས་ལས་ཐར་བར་གཤེགས། ། ཐུགས་རྗེ་ཆེ་གང་བྱང་ཆུབ་འོད། ། བློ་གྲོས་ཆེན་པོ་ཞི་བ་འོད། ། རྒྱལ་བའི་ཟློས་གར་ཉི་བཞོན་ནི། ། ཐུབ་བསྟན་ཤར་རིའི་དོ་རར་རོལ། ། དེ་དག་དད་པ་གསེར་གྱི་ནི། ། ལྕགས་ཀྱུས་དཔལ་ལྡན་མར་མེ་མཛད། ། སངས་རྒྱས་གཉིས་པ་སྤྱན་དྲངས་ཏེ། ། ཀེ་རི་ཟླ་བའི་འོད་ཀྱིས་འབར། ། ཐུབ་བསྟན་ལོ་ནི་བཅུ་ཕྲག་དགུར། ། ནད་མེད་མུ་གེ་མེད་པ་ཡིས། ། དར་མཛད་རྐང་གཉིས་གཙོ་ཁྱོད་དང་། ། སྤུ་ཧྲངས་བཞེས་ཝེར་ཞེས་བྱར་མཇལ། ། ལྷན་ཅིག་སངས་རྒྱས་གཉིས་མིན་ཞེས། ། སྨྲ་བ་རྫུན་གྱི་ཚིག་ཏུ་བྱས། ། སྐྱེས་མཆོག་ཁྱོད་ཀྱིས་བདུད་རྩིའི་རོས། ། ཡོངས་ཚིམ་འགྲོ་ལ་བ་ཚྭའི་ཆུ། ། ང་ཡིས་ཅི་བྱ་ཅི་བྱ་ཞེས། ། ངཱི་པམ་ཀ་རས་ཞུམ་ཚིག་གསུངས། ། ཏིང་འཛིན་གང་ལ་ལོ་གཅིག་མཉམ་བཞག་ན། ། རྨད་བྱུང་རྡོ་རྗེ་ལྟ་བུ་ཞེས་གྲགས་པ། ། དཔལ་ལྡན་ས་བཅུའི་རྩེར་སོན་དེ་འགྲུབ་པར། ། དགོངས་ཏེ་ཆུ་ཀླུང་ཆེན་པོ་པ་ཀྴུའི་འགྲམ། ། བསམ་གཏན་ལ་འོས་བཞེར་རར་གཙུག་ལག་ཁང་། ། བསྟན་མཛད་ནེ་རཉྫ་ནའི་རྒྱལ་སྲས་བཞིན། ། རྒྱལ་རྣམས་ཞུམ་མཛད་ཐུགས་དམ་བཅའ་བ་གསུམ། ། ནམ་ཡང་འགྱུར་མེད་རྡོ་རྗེའི་སྐུ་འདྲ་བ། ། སྒོ་འཕར་ཕྱི་ནང་གཅིག་ངོས་དུང་དང་དངུལ། ། གསེར་གྱི་ཡི་གེ་ངོ་མཚར་བྱེ་བ་འཛིན། ། ཐེངས་གཅིག་ཙམ་ངས་མི་དགེའི་བློ་སྐྱེས་དང་། ། རིན་ཆེན་སེམས་དང་ཡུད་ཙམ་བྲལ་བ་དང་། ། ལུང་མ་བསྟན་བློ་སྐད་ཅིག་གཅིག་སྐྱེས་ན། ། ཡན་ལག་མཆོག་གང་མཁའ་འགྲོས་ཁོས་ཤིག་ཅེས། ། ལྷར་བཅས་བདུད་བཅས་སྐྱེ་རྒུའི་བདག་པོར་བཅས། ། དགེ་སྦྱོང་གཉིས་སྐྱེས་དང་བཅས་འཇིག་རྟེན་ན། ། སུས་ཀྱང་བགོམ་པར་མི་ནུས་མི་འཇིགས་བཞི། ། བརྙེས་འདི་ངེས་པར་རྣམ་དག་སངས་རྒྱས་ཏེ། ། རང་དོན་ལ་ཆགས་བདག་ཀྱང་གཞན་དོན་དུ། ། ཁྱོད་ཀྱི་ཞབས་ལ་སྙིང་ནས་ཕྱག་འཚལ་ལོ། ། ཁྱོད་ཀྱི་སློབ་མ་གྲུབ་པའི་དབང་ཕྱུག་ཚོགས། ། མཁའ་ལ་འཕུར་ལྡིང་རྒྱུ་སྐར་གྲངས་མཚུངས་ཏེ། ། འཛིན་མར་རབ་གནས་བསྟན་པ་འཛིན་པ་ནི། ། གང་གཱའི་རྡུལ་གྲངས་ཉུང་ངུར་བྱེད་པ་ཉིད། ། ཁྱོད་ལ་འགྲན་བཞིན་ཕུར་བུ་སྐྱེངས་བྱེད་བཞིན། ། ཀུན་མཁྱེན་བཞིན་དུ་སྨྲ་བ་བྱང་ཤེ་དང་། ། དགེ་བློ་སྨེ་དང་འཇང་བློ་རིན་གཞོན་རྣམས། ། སོ་སོར་ཆོས་ཀྱི་ཁྲི་སྟན་ཆེ་ལ་བཀོད། ། ཡུམ་གྱི་སྐྱེད་ཚལ་རིན་ཆེན་མྱུ་གུ་ནི། ། སར་པས་རྣམ་མཛེས་དེ་ཚེ་ཡོན་ཏན་ཀུན། ། གཙིག་ཕུད་ཅན་དང་ཁུ་བྱུག་སྨྲ་མཁས་ཀྱི། ། གཟུགས་མཛེས་ཟོལ་གྱིས་འཇོ་སྒེག་རོལ་བ་འཛིན། ། ཤཱཀྱ་སེང་གེའི་དྲུག་གཉིས་མཛད་པ་ལ། ། འགྲན་པ་བཞིན་དུ་རྣམ་སྤྲུལ་འདི་གནས་དང་། ། འཚོག་ཆས་ཚོགས་ལ་བདག་མེད་སྤོངས་ཤིག་ཅེས། ། གྲུབ་པའི་སྐྱེ་བོས་སྙིང་ནས་འདོམས་པར་མཛད། ། གཉིས་ཀྱིས་དམན་པ་བཅུ་ཕྲག་བཅུའི། ། ལོ་ལ་ལང་ཚོ་གསར་བ་ནི། ། ནམ་ཡང་རྒས་མེད་དེ་བརྙེས་ཚེ། ། རླུང་གི་ཟས་ཅན་པགས་པ་བཞིན། ། ཅ་ཡེ་བྲག་ཅེས་བྱ་བ་དང་། ། གཡང་སྐྱུར་ཕུག་གི་གནས་དང་ནི། ། གོ་ཁར་རེ་ཝིང་གོ་སོགས་ནས། ། སྤྲུལ་པ་སོ་སོ་སོ་སོ་ཡི། ། མངོན་སུམ་མྱ་ངན་འདས་གྱུར་ཏེ། ། སྐུ་གདུང་འཛིན་བྱེད་བསྲེག་ཟ་ཡིས། ། རིལ་མེད་ཉིད་བྱས་རིང་བསྲེལ་ནི། ། གསུམ་ཞིག་ལྷག་མར་ལས་པ་ཡང་། ། རྟག་ཏུ་མཉམ་འཇོག་སྐུ་བཞིན་དུ། ། མཁའ་ཡི་དབྱིངས་སུ་མི་སྣང་གྱུར། ། ཚུལ་འདིར་རང་སེམས་སྣང་བ་ཞེས། ། མི་ཤེས་མི་དང་མི་མིན་དག ། མིག་ཆུའི་རྒྱུན་དག་སྤྲོ་བྱེད་པ། ། འཇིག་དུས་དག་བྱེད་ཕུང་པོ་བཞིན། ། ཀ་ཡེ་གྲོགས་དག་འཁོར་བ་འདི་དང་མྱ་ངན་ལྷན་ཅིག་མྱུར་དུ་འོང་ཞིག་དགའ་བ་ཡི། ། དགའ་སྟོན་རོར་ཆགས་དགའ་མ་འདི་ནི་བརྒྱ་ཕྲག་བཅུ་གཉིས་མཛེས་པ་ཡོངས་རྫོགས་རང་གི་གྲོགས། ། སྲེད་ལྡན་འཁྱུད་པ་ནམ་ཡང་འདོར་མེད་དེ་ལྟ་ན་ཡང་ཁྱེད་ཅག་ལུས་སྲོག་གེ་སར་རྡུལ། ། མི་རྟག་བུང་བས་ཁམ་ཟས་བྱེད་འདི་རྗེས་དཔག་བྱ་སླ་སྒྱུ་མ་འདི་བྱས་རྗེས་རིག་བྱ། ། རིན་ཆེན་ཟ་མ་ཏོག་ལས་ནི། ། རབ་འཐོན་རིན་ཆེན་བཟང་པོ་ཡིས། ། དེ་གསུང་ཆོས་མཐོང་དེ་དག་གིས། ། རྡུལ་མཉམ་མེ་ཏོག་ཆར་དག་སྤྲོས། ། དེ་ལྟར་ལུང་བསྟན་དཔལ་ལྡན་མར་མེ་མཛད། ། རིག་པ་འཛིན་པའི་འཕགས་ལམ་གྱིས་དྲངས་པའི། ། མངོན་ཤེས་སྤྱན་ཡངས་ཅན་དེས་ཡང་གསུང་བ། ། གྲུབ་པའི་ཕོ་ཉ་གསེར་གྱི་གོ་ཆ་སོགས། ། མཁའ་འགྲོའི་ཚོགས་བཅས་འཇིག་རྟེན་འདྲེན་བྱེད་དེ། ། མཁའ་སྤྱོད་གཤེགས་ཞེས་གྲགས་པ་དང་མཐུན་པར། ། མཁའ་ལ་གོམ་པ་འདེགས་འཇོག་ཟུང་གཅིག་གིས། ། རྨད་བྱུང་བདེ་བ་ཅན་གྱི་འཇིག་རྟེན་གཤེགས། ། ཞིང་དེའི་མགོན་དང་གཉིས་སུ་མེད་པར་མཇལ། ། ཆོས་ཀྱི་བགྲོ་བ་རྒྱ་ཆེའི་དགའ་བདེས་ཚིམ། ། འདབ་བརྒྱའི་ཚལ་དུ་བུང་བ་རོལ་བ་བཞིན། ། སླར་ཡང་ཞིང་དང་ཞིང་གཞན་ཀུན་ཏུ་གཤེགས། ། སྐད་ཅིག་རེ་རེར་འགྲོ་བ་གྲངས་མེད་ནི། ། གྲངས་མེད་སྨིན་ཅིང་གྲོལ་བར་མཛད་དོ་ཞེས། ། ཅི་ཡང་དང་བའི་ཟླ་བ་ཤར་བ་དེས། ། པཎ་ཆེན་དེ་ཡི་ཕྱག་པད་སྤྱི་བོར་ཟུམ། ། ཁྱོད་ཉིད་གཅིག་པུས་བོད་ཡུལ་འདི། ། སངས་རྒྱས་ཞིང་དང་འགྲོ་རྣམས་ཀྱང་། ། རྒྱལ་དང་རྒྱལ་སྲས་ས་ལ་བཀོད། ། མགོན་དེར་སླར་ཡང་ཕྱག་བགྱིད་དོ། ། ཡང་ཡང་གོམས་མཛད་ལེགས་ལྡན་མཐའ་དག་རྒྱལ་རྣམས་ལྗགས་ཡངས་དབྱར་སྐྱེས་རྔ་གསང་གྲོགས་པོ་ལ་ནི་འཁུ་བ་ལྟར་སྟོན་རང་གི་ཀུན་སྤྱོད་ནམ་ཡང་མ་རྫོགས་ངལ་བ་ཅན། ། ལྷག་བསམ་ཁུར་དང་འཁོར་བའི་དཔལ་ལ་འདོད་ཆགས་བྲལ་གང་དུག་ཅན་མ་ཡིག་བདག་པོའི་མགོ་སྐྱེས་མལ་སྟན་ལ་ཆགས་རིན་ཐང་རྒྱ་ཆེ་འདི་ཡིས་གང་གི་མཚན་ཙམ་གྱི། ། རྒྱ་ཡི་ཆར་ཡང་བཟོད་པ་མ་ཡིན་དེའི་དཔལ་རང་མཚུངས་བསྔགས་འོས་སྤྱོད་མཐའ་དབང་ཕྱུག་སྐྲུ་ཕྲེང་དོག་པ་ཉིད་བྱེད་ཁ་བ་སར་བའི་སྤུ་ལོང་གོས་གྱོན་འཛིན་མ་ལ། ། རྣམ་པར་བཀོད་པའི་ཆུ་མཚོ་ཆེ་ལས་སྔོན་མེད་སྙན་ངག་ཟླ་བའི་མདངས་འཕྲོག་སེན་མོའི་རྩེ་མོས་ཟེགས་མ་ཙམ་བླངས་མངོན་པར་འཐོར་བྱས་མཁས་རྣམས་དགྱེས་པས་ཡི་རངས་བྱོས། ། མང་ཐོས་སྤོབས་པའི་མཐེབ་ལོང་འགྲོགས་པ་ལས། ། སྙན་ངག་ཉག་ཕྲན་འབད་མེད་སྤྲོས་པ་ཡིས། ། སྲིད་འགྲོར་འཇིགས་པས་ཉེན་རྣམས་དགྲ་ཡི་སྡེ། ། ཉོན་མོངས་ཀུན་འཇོམས་དཔའ་བོར་བདག་གྱུར་ཅིག །
      ཅེས་བྱ་བ་ནི་བགྲང་བ་ལས་འདས་པའི་སྔོན་གྱི་སྐྱེ་བ་རྣམས་སུ་ཚོགས་གཉིས་རླབས་པོ་ཆེ་ཀུན་ཏུ་བསྟེན་ཅིང་མང་དུ་བསྟེན་ཅིང་མང་དུ་བསགས་པ་ཡོངས་སུ་སྨིན་པ་ཉིད་ལས། སྲིད་པ་ཐ་མ་པའི་སྐུའི་སྐྱེ་བ་འདིར་དབང་ཕྱུག་བརྒྱད་དང་ལྡན་པའི་བྱང་ཆུབ་སེམས་རྡོ་རྗེའི་ས་བརྙེས་པ། ། སྐྱེས་མཆོག་རིན་ཆེན་བཟང་པོའི་རྣམ་པར་ཐར་པ་ལོ་ཙཱ་ཆེན་པོ་ཉིད་ཀྱི་སློབ་མ་ཀ་བཞི་དང་གདུང་བརྒྱད་དུ་གྲགས་པའི་ནང་ཚན་ཁྲི་ཏང་བ་ཛྙ་ན་ཤྲིས་བཀོད་པ་དེ་ཉིད་འདིར་ཚིགས་སུ་བཅད་པའི་དབྱངས་ཀྱིས་བསྟན་ཅིང་སོ་སོར་བསྟན་ལ་རྣམ་པར་རིག་པར་བྱས་པ་སྟེ། ། རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུ་ཁོང་དུ་ཆུད་པའི་ཞང་ཞུང་པ་ཕྱོགས་ལས་རྣམ་རྒྱལ་ཆོས་དབང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའོ། །

འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...