ལོ་སར་གྱི་སྐབས་སུ། ཞོང་ཧྭ་རྫོང་བིས་མདོ་དགོན་དང་མཚོ་ལྷོ་ཁུལ་པཎ་ཆེན་བདེ་སྐྱིད་དགོན་གྱི་གདན་ཞུས་ལྟར། སྲས་མོ་ཡབ་གཞིས་པཎ་རིག་འཛིན་དབང་མོ་རང་གི་ཕ་ཡུལ་དུ་ལོག་ནས་པཎ་ཆེན་སྐུ་ཕྲེང་བཅུ་བ་སྐུ་འཁྲུངས་ནས་བགྲང་བྱ་བདུན་ཅུ་ལོན་པའི་རྗེས་དྲན་བྱ་འགུལ་ལ་ཞུགས་པ་དང་།  ལོ་ངོ་ཉི་ཤུའི་རིང་ལ་མཇལ་འཕྲད་མ་ཐུབ་པའི་ཡུལ་མི་སྤུན་ཟླ་རྣམས་དང་ལྷན་དུ་འཛོམས། མཚོ་ལྷོ་བོད་རིགས་རང་སྐྱོང་ཁུལ་དུ་ཕེབས་པའི་བར་གསེང་དུ་སྲས་མོ་ཡབ་གཞིས་པཎ་རིག་འཛིན་དབང་མོ་མཚོ་སྔོན་པོ་དྲ་ཚིགས་སུ་གདན་ཕེབས་གནང་ཞིང་། མཚོ་སྔོན་པོ་དྲ་བའི་ལས་བྱེད་མི་སྣ་ཡོངས་ལ་ལོ་སར་གྱི་བཀྲ་ཤིས་སྨོན་འདུན་ཞུས། སྲས་མོས་མཚོ་སྔོན་པོའི་དྲ་ངོས་ལ་ཞིབ་གཟིགས་གནང་རྗེས་བཤད་རྒྱུར། “མཚོ་སྔོན་པོའི་དྲ་ངོས་བསྒྲུབས་པ་ཤིན་ཏུ་ཡག་པོ་འདུག  ཐུན་མོང་མ་ཡིན་པའི་ཁྱད་ཆོས་འཛོམས་ཡོད། ང་པེ་ཅིང་དུ་ཡོད་དུས་སྔ་མོ་ནས་མཚོ་སྔོན་པོ་དྲ་བ་བཟོས་ཡོད་པ་གོ་ཐོས་བྱུང་ཡོད། དེ་རིང་ང་དངོས་སུ་འདིར་ཡོང་བར་དགའ་སྤྲོ་ཞེ་དྲག་སྐྱེས་ཀི་ཡོད།”