སྡེབ་ངོས་རྩོམ་ཡིག་ཀློག་ཐབས།
དཀར་རིལ་མནན་ཏེ་རིགས་དབྱེ་ལ་ལྟ་བ།
སྟོད་ལུང་བདེ་ཆེན་མཚུར་ཕུ་དགོན་གྱི་མཚུར་ཕུའི་རྡོ་རིང་།
རྩོམ་པ་པོ། མི་གསལ། རྩོམ་སྒྲིག་པ། Lhamo དུས་ཚོད། 2018-11-9 9:08:00 རྩོམ་ཁུངས། སུམ་པའི་རིག་གནས་འཕྲིན་སྟེགས། ཀློག་གྲངས།

    མཚུར་ཕུའི་རྡོ་རིང་ནི། བོད་ལྗོངས་ལྷ་ས་ས་ཁུལ་སྟོད་ལུང་བདེ་ཆེན་རྫོང་ཁོངས་ཀྱི་ཀརྨ་པའི་གདན་ས་མཚུར་ཕུ་དགོན་དུ་མཆིས་ཤིང༌། སྤྱི་ལོའི་དུས་རབས་དགུ་པའི་དུས་འགོ་སྟེ་སྤྱི་ལོ815ལོ་ནས888བར་མངའ་བདག་ཁྲི་རལ་གྱིས་སྲིད་དབང་བཟུང་བའི་ལོ་ག་གེ་མོ་ཞིག་ལ་བཙུགས་ཡོད་པ་འདྲ་ཞིང༌། ཆོས་རྒྱལ་ཁྲི་གཙུག་ལྡེ་བཙན་ཏེ་མངའ་བདག་ཁྲི་རལ་པ་ཅན་གྱིས་བཀའ་གནང་སྟེ་འུ་ཤང་རྡོའི་ལྷ་ཁང་བཞེངས་པའི་ལྷག་མ་རྣམས་ཞང་བློན་ཚེས་སྤོང་སྟག་བཟང་ཉ་སྟོ་ཟེར་བས་སྟོད་ལུང་ལྕང་ཕུར(མཚུར་ཕུ)(ལྷ་ཁང་འདི་ལ་སྟོད་ལུང་ལྷག་མའི་ལྷ་ཁང་ཟེར)བཙུགས་པར་སྣང༌། མངའ་བདག་ཁྲི་རལ་པ་ཅན་གྱིས་སྟོད་ལུང་མཚུར་ཕུར་ཡང་བསྟན་པའི་མེ་རྩ་ལྕང་བུའི་གཙུག་ལག་ཁང་ཞེས་བྱ་བ་བཞེངས་ནས་དགེ་འདུན་གྱི་སྡེ་བཙུགས། དཀོན་མཆོག་གསུམ་གྱི་མཆོད་པའི་རྒྱུན་ཇི་སྲིད་བར་མི་ཉམས་པའི་ཆེད། དགེ་འདུན་རེར་ཞིང་འབྲོག་གི་སྡེ་འབངས་མི་ཁྱིམ་བདུན་ཏེ་སླ་ནས་སྦྱར་བའི་བཙན་པོའི་བཀའ་གཙིགས་རྡོ་རིང་ལ་བྲིས་ནས་མཚུར་ཕུའི་བླ་གཡེལ་མཐིལ་དུ་བཙུགས་གནང་མཛད་ཅིང༌། རྡོ་རིང་གི་རྩེ་མོར་ཆར་ཁེབས་པདྨ་དང་སྤྲིན་རིས་ཅན་དང༌། ནོར་བུ་མེ་འབར་རིས་ཅན་གྱི་ཏོག སྔར་ཡོད་རྡོ་རིང་སྟེགས་བུ་རིག་གསར་སྐབས་གཏོར་སྐྱོན་བྱུང་བས་ཕྱིས་ཉམས་གསོའི་སྐབས་སྟེགས་བུ་བང་རིམ་ལྔ་དང༌། རྡོ་རིང་ངོ་མའི་མཐོ་ཚད་ལ་སྤྱི་ཁྲེ2། 62སྟེ་མཐོ་བཅུ་དང༌། གཞེང་ཚད་ལ་མཐོ་གཉིས་དང་ཕྱེད། འཐུག་ཚད་ལ་མཐོ་གང་བཅས་ཡོད་ལ། རྡོ་རིང་གི་ལྷོ་ངོས་སུ་བོད་ཡིག་ཡིག་འཕྲེང46དང༌། ནུབ་ངོས་སུ་ཡིག་ཕྲེང22བྱང་དང་ཤར་གཉིས་ལ་ཡི་གེ་མེད།
      ཡི་གེའི་ནང་དོན་གཙོ་ནི་ཞང་བློན་ཚེ་སྤོང་ཉ་སྟོས་བཙན་པོ་ཁྲི་གཙུག་ལྡེ་བཙན་གྱི་བཀའ་དྲིན་གསབ་ཕྱིར། བཙན་པོའི་སྐུ་ཡོན་སུ་བསྔོས་ཏེ། སྨོན་ལམ་རྒྱ་ཆེར་བཏབ་ནས་སྟོད་ལུང་གི་ལྕང་ཕུར་གཙུག་ལག་ཁང་བརྩིགས་པ་མ་ཟད་དགེ་སློང་བཞི་རྒྱུན་བཞུགས་ཀྱིས་བཙན་པོའི་ཞབས་འདེགས་རྒྱུན་མི་ཆད་པར་སྒྲུབ་པའི་མཆོད་རྒྱུན་སེམས་ཅན་དང༌། འབྲོག་ཐང༌། བྲན་གཡོག་བཅས་ཕུལ་ཚུལ་འཁོད་ཡོད་པ་དང༌། ཏུན་ཧོང་ཡི་གེར། བྱ་གི་ལོ་ལ་བབས་ཏེ། དགུན་བཙན་པོའི་ཕོ་བྲང་སྟོད་ཀྱི་ལྕང་བུ་ན་བཞུགས་ཞེས་ཁྲི་སྲོང་ལྡེ་བཙན་སྤྱི་ལོ757ལོར་སྟོད་ལུང་ལྕང་བུར་བཞུགས་མྱོང་བའི་གནས་ཚུལ་འཁོད་པ་དང༌། འུ་ཤང་རྡོའི་ལྷ་ཁང་བཞེངས་ནས་རབ་གནས་མ་གྲུབ་གོང་བཙན་པོ་བཀྲོངས་པའི་ལོ་རྒྱུས་ཡོད་པ་གཉིས་བསྡུར་ན་སྟོད་ལུང་ལྕང་བུ་ནི་སྐབས་དེའི་གནས་ས་གལ་ཆེའི་གྲས་ཤིག་ཡིན་ཚོད་འདུག་ཀྱང༌། ད་ལྟ་ནི་ལྕང་བུའི་གཙུག་ལག་ཁང་རྩ་སྟོང་དུ་སོང་ཞིང་དུས་ཕྱིས་གནས་དེར་ཀརྨ་པ་སྐུ་ཕྲེང་དང་པོ་ཀརྨ་པ་དུས་གསུམ་མཁྱེན་པས་སྤྱི་ལོ1189ལོར་ཀརྨ་པའི་གདན་ས་མཚུར་ཕུ་ཕྱག་འདེབས་མཛད་པ་འདི་ཉིད་ཡིན།
       རྡོ་རིང་དེའི་ཐོག ཞང་ཉ་སྟོས་བཞེངས་པའི་གཙུག་ལག་ཁང་དེར་གོང་ནས་བདག་སྐྱོང་གིས་དེའི་ཆོས་གཞིས་མི་སེར་བཅས་པར་དཔྱ་ཁྲལ་མི་འགེལ་བ་དང༌། ས་ཞིང་དང་རྒྱུ་ནོར་གཞུང་བཞེས་མི་མཛད་པར་ཞང་ཉ་སྟོས་ཇི་ལྟར་ཕུལ་བ་བཞིན་བཀའ་བཙན་པར་གནང་བ་མ་ཟད་ནམ་ཞིག་ཞང་ཉ་སྟོའི་བུ་རྒྱུད་ཆད་པ་ཡིན་ན་ཁོང་གི་ཁ་དབང་ཡོངས་རྫོགས་གོང་ནས་མི་བཞེས་པར་གཙུག་ལག་ཁང་འདིའི་མཐུན་རྐྱེན་དུ་བསྣན་དགོས་པ་བཅས་ཀྱི་ཞལ་བཞེས་བཀའ་ལུང་སྩལ་དོན་རྣམས་རྡོ་རིང་ཐོག་བཀོད་ཡོད། ཚེས་སྤོང་རུས་རྒྱུད་ནི་བཙན་པོའི་སྐབས་ཀྱི་ཞང་བློན་གལ་ཆེའི་གྲས་ཀྱི་རྒྱུད་པ་ཡིན་ཞིང༌། ཁྲི་སྲོང་ལྡེ་བཙན་གྱི་བཙུན་མོ་ཚེས་སྤོང་བཟའ་མེ་ཏོག་སྒྲོན་ཞེས་གྲགས་ཆེ་བ་དེ་ཡང་རིགས་རྒྱུད་འདི་ལས་བྱུང་བ་ཞིག་ཡིན།
སྟོད་ལུང་ལྕང་བུ་སྟེ་མཚུར་ཕུའི་རྡོ་རིང་གི་ཡི་གེ་དངོས།
མཚུར་ཕུའི་རྡོ་རིང༌།
     ལྷོ་ངོས་ཡི་གེ

1.༄། །ཞང་ཚེས་པོང་སྟག་བཟང་ཉ་སྟོས།
2.སྟོད་ཀྱི་ལྕང་བུར། གཙུག་ལག་ཁང་བརྩྀགས་
3.པའི་ལོ་རྒྱུས། །རྡོ་རིངས་ལ་བྲྀ་བར། ༔བཙན༔
4.པོའི་བཀའས་གནང་སྟེ་བྲིས་པའ།༔།
5.ུ། །བཙན་པོ་ལྷ་སྲས་ཡབ་མྱེས་ཀྱི་སྐུ་རིང་ལ་
6.དམ་པའྀ་ཆོས་བརྙེས་ནས། །གདུང་རབས༔
7.སུ་དམ་པའི་ཆོས་མྱྀ་གཏང་ཞིང་མཛད་པར༔
8.ཆོས་གཙིགས་དང༌། བཀའ་ལུང་སྩལད་པ་
9.ས་འབྱུང་བ་བཞིན། ཞང་ཚེས་པོང་ཉ་སྟོས།
10.དམ་པའི་ཆོས་ཉམས་སུ་བླངས། བཙན༔
11.པོ་ལྷ་སྲས། ཁྲི་གཙུག་ལྡེ་བརྩན་འཕྲུལ་གྱི་
12.བཀའ་དྲྀན། ཞང་ཉ་སྟོ་ལ་ཆེད་སྩལད་པས་
13.བཀའ་དྲྀན་ཆེན་པོ་བསབ་པའྀ་ཕྱིར། །
14.བཙན་པོ་སྐུ་ཡོན་དུ་བསྔོས་ཏེ། སྨོན་ལམ༔
15.རྒྱ་ཆེར་བཏབ་ནས། སྟོད་ལུངས་ཀྱྀ་ལྕང་བུར༔
16.གཙུག་ལག་ཁང་བརྩྀགས་སྟེ། དཀོན་
17.མཆོག་གསུམ་གྱྀ་རྟེན་བཙུགས། དགེ་
18.སློང་བཞི་གནས་པར་སྦྱར་ནས། རྐྱེན་ཀྱྀ་
19.བྲན་དང་ཞྀང་འབྲོག་དང༌། ལྷ་ཆ་དང༌། ནོར་རྫས་
20.དང༌། རྐང་འགྲོས་ལས་སྩོགས་པ། ཚང་བར༔
21.བཅད་དེ། །བཙན་པོ་ཁྲི་གཙུག་ལྡེ་བརྩན་
22.གྱི་སྐུ་ཡོན་རྒྱུན་མྀ་འཆད་པར་བྱེད་དོ། །
23.གཙུག་ལག་ཁང་འདྀའི་མཚན་ཡང༌། །
24.བཙན་པོའི་བཀའ་ཞལ་གྱྀས་བཏགས་སྟེ།
25.འོན་ཅང་དོའི་ཐུགས་དམ་གྱི་གཙུག་ལག
26.ཁང་ཆེན་པོའི་མཇུག་ལ་གདགས་ཤིང༌།
27.ཚིས་ཀྱང༌། བླ་ནས་མཛད་པར། །བཀའས་
28.གནང༌། །ལྷ་རྀས་ཀྱི་འབངས་དང༌། དཀོར་
29.ལ། ཁྲལ་མྱྀ་དབབ་པ་དང༌། ཁྭ་དང༌། ཆད་ཀ༔
30.མྱྀ་བཞེས་པ་ལས་སྩོགས་པ་ཡང༌། །ལྷ་རིས༔
31.ཆེན་པོའི་ཐང་དུ། །བཀའས་གནང་ངོ༌། །
32.གཙུག་ལག་ཁང་འདྀའི་རྐྱེན་རྀས་བསྔོ་ཞིང་
33. སྤྱད་པ་ཡང༌། །ཞང་ཉ་སྟོས། །ཇི་ལྟར་བྱས་ཤྀང༌།
34. བསྔོས་པ་བཞྀན་བརྩན་པར། །བཀའས་གནངོ༌།
35.ནམ་ཞྀག་ན། །ཞང་ཉ་སྟོ་ལ། བུ་ཚ་རྒྱུད་ཡོང༔
36.མྱེད་པ་ཞྀག་དུ་གྱུར་ན། །ཁོལ་ཡུལ་ལས་སྩོགས་
37. པ་དབང་ངོ་ཅོག། །བླར་ཡང་མྱི་བཞེས།
38. ཀྱང་མྱྀ་སྦྱིན་བར། །གཙུག་ལག་ཁང་འདྀ་རྐྱེན།
39. དུ་བསྣན་པར། །བཀའས་གནང་ངོ༌།
40. གཙུག་ལག་ཁང་གྀ་རྐྱེན་བཅད་པའི་དཀར༔
41. ཅག་དང༌། བསྔོས་ཡྀག་བླ་དཔེ་ནི། །བཅོམ་ལྡན་
42. འདའས་རིང་ལུགས་ཀྱི་འདུན་སར་བཞག །
43. འོག་དཔེ་ནི། འོན་ཅང་དོ་གཙུག་ལག་ཁང་གྀ༔
44. གནས་བརྟན་དང༌། མངན་ལ་སྩལད། དཔེ༔
45. དེ་དང་འདྲ་བ་གཅྀག་ནི། །གཙུག་ལག་ཁང་༔
46. འདིར་གཞག་པར། བཀའས་གནང་ངོ༌།
     ནུབ་ངོས་ཡི་གེ
1. ཞང་ཚེས་པོང་
2. གསས་སྟོའི་བུ་
3. ཚ། གཙིགས༔
4. གནང་བའྀ་བླ་
5. དཔེ་ནི། ཕྱྀང་བ་
6. འི་སྐུན་མཁར་
7. ན། གཙིགས༔
8. ཆེན་པོ་གཞན་གྱྀ་
9. ཟླ་ལ་བཞག །དེ་
1.དང་འདྲ་བ་རྣམ༔
11. གཅྀག་ནི། གཙིགས་
12. གཞན་གྱྀ་ཟླ་ལ་
13.བཀའྀ་སར་བཞག
14. ། གཙྀགས་ཀྱྀ་
15. འོག་དཔེ་འཕྲ༔
16. མེན་གྱྀ་སྒྲོམ་བུ༔
17. ནི། གཙུག་ལག༔
18. ཁང་འདྀའྀ་མཛོད་
19. དུ་གཞག་པར།
20. བཀའས་གནང་
21. ངོ༌། །
22. བཀྲ་ཤིས།


འདི་རུ་དཔྱད་བརྗོད་འཇོག་པའམ་ཡང་ན་དཔྱད་བརྗོད་ལ་གཟིགས་ཆོག
དཔྱད་འཇོག་ཤོག་ངོས་ཕབ་བཞིན་པ།
正在加载评论列表...