རྟོགས་སད་གླུ་རུ་གྱེར་བའི་འབོད་པ།

རྩོམ་པ་པོ།:ཏཱ་རེ་སྐྱིད། 2011-07-10
མཚོ་སྔོན་པོ་དྲ་བ།


རྟོགས་སད་གླུ་རུ་གྱེར་བའི་འབོད་པ།

                                                                         དམའ་འབྲིང་གསུམ་པའི་འཛིན་གྲྭ་དང་བོ། ཏཱ་རེ་སྐྱིད།

                                                             ཕ་མ་རྣམས་ཀྱིས་རྔུལ་ཁྲག་ནོར་ལ་བརྗེས།།
                                                             བུ་དང་བུ་མོའི་ལང་ཚོ་གསེར་ལ་བརྗེས།།
                                                             རིག་གནས་ཤེས་བྱར་བརྗེ་མཁན་མི་མང་བས།།
                                                             གླེན་པ་དེ་ཚོའི་གོ་རྟོགས་ནམ་ཞིག་སད།།

                                                             སྟག་ཤར་རྣམས་ནི་རང་གི་རྩལ་ལ་རློམ།།
                                                             སྨན་ཤར་རྣམས་ནི་རང་གི་ཡག་ལ་རློམ།།
                                                             རིག་གནས་ཤེས་བྱར་རློམ་མཁན་མི་མང་བས།།
                                                             ལང་ཚོ་རྒས་དུས་རང་ཉིད་རྗེས་ལུས་ཡིན།།

                                                             དཔོན་པོ་ཕལ་ཆེར་རྒྱུ་དང་འབྱོར་བར་རྔམ།།
                                                             མདོ་མེད་འགའ་རེ་གསེར་དང་དངུལ་ལ་རྔམ།།
                                                             རིག་གནས་ཤེས་བྱར་རྔམ་མཁན་མི་མང་བས།།
                                                             རྔམ་པ་དེ་ཚོའི་གོ་རྟོགས་ནམ་ཞིག་སད།།

                                                             གཅེས་པའི་དུས་ཚོད་དོན་མེད་ཆུད་ཟོས་བྱས།།
                                                             དཀའ་བས་བསགས་པའི་དངུལ་ལོར་ཆང་ལ་བརྗེས།།
                                                             རིག་གནས་ཤེས་བྱ་སྤྱོད་མཁན་མི་མང་བས།།
                                                             རྗེས་ལུས་དེ་ཚོའི་གོ་རྟོགས་སད་ལ་རན།།

གདམས་པའི་ལེའུ།

                                                             སྙིང་ཉེ་སློབ་གྲོགས་ཚོ།།
                                                             སློབ་སྦྱོང་རང་དོན་ཡིན།།
                                                             འདུན་མ་ཁྱོད་ལ་དགོས།།
                                                             དགེ་རྒན་ལམ་སྟོན་ཡིན།།
                                                             རང་ཉིད་འགྲོ་མཁན་ཡིན།།
                                                             སློབ་གྲྭ་ཐང་ཆེན་ཡིན།།
                                                             རང་ཉིད་རྟ་ཕོ་ཡིན།།
                                                             སློབ་མཐར་ཕྱིན་ལ་ཉེ།།
                                                             དྲན་རྒྱུ་མང་མི་ཉན།།
                                                             ཕུགས་འདུན་རྒྱང་དུ་ཡོད།།
                                                             སྙིང་སྟོབས་ཁྱོད་ལ་དགོས།།
                                                             དུས་ཚོད་སྡོད་མི་སྲིད།།
                                                             གོ་སྒྲིག་རང་ལ་དགོས།།
                                                             ཉི་མ་གཏོང་མི་ཉན།།
                                                             འགྱོད་པ་རྗེས་སུ་སྐྱེས།།
                                                             མི་ཚེ་ཀྱག་ཀྱོག་ཡིན།།
                                                             དཀའ་སྡུག་འབྱུང་ལོས་སྲིད།།
                                                             དཀའ་བ་འཁུར་ཐུབ་ན།།
                                                             བདེ་སྐྱིད་རྗེས་སུ་ཡོད།།
                                                             རྒན་གྱི་བཀའ་དྲིན་ལ།།
                                                             རྗེས་སུ་ཡི་རང་བྱེད།།
                                                             གྲོགས་ཀྱི་བརྩེ་བ་དེ།།
                                                             མི་འགྱུར་དམ་བཅའ་འཇོག །