ལྐོག་གྱུར་གྱི་སྙིང་སྟོབས། འབའ་རྫོང་བསོད་ཚེ།

རྩོམ་པ་པོ།:འབའ་རྫོང་བསོད་ཚེ། 2011-12-12
མཚོ་སྔོན་པོ་དྲ་བ།

ལྐོག་གྱུར་གྱི་སྙིང་སྟོབས།

                                                                               འབའ་རྫོང་བསོད་ཚེ།

                        ངའི་ཤ་གསེང་རུས་གསེང་ན་ཡོམ་ཡོམ་དུ་འགུལ་གྱིན་པ་ནི
                        འུ་དུམ་བཙན་གྱི་དབུ་སྟེང་གི་རྭ་ཅོ་དེ་རེད
                        བླ་སྤྲུལ་སྟོང་དང་སེར་སྐྱ་ཁྲི་ཡི་བཙན་ཤེད་ཀྱིས་བཙུགས་པའི་རྭ་ཅོ་ཟུང་དེས
                        བཙན་པོའི་སྙིང་སྟོབས་ལ་རྫོགས་ཚིག་བཀོད
                        བཙན་པོའི་དམག་དཔུང་ལ་གོད་ཆག་བྱུང
                        ཁོས་ནི་འདྲ་མཉམ་ཞིག་གླེང་གྱིན་ཡོད
                        སེར་སྐྱ་ཕོ་མོའི་འདྲ་མཉམ་ཞིག་གླེང་གིན་ཡོད
                        ཁོས་ནི་ཐོབ་ཐང་ཞིག་བསྒྲགས་ཀྱིན་ཡོད
                        བྲན་དམངས་འབུམ་གྱི་ཐོབ་ཐང་ཞིག་བསྒྲགས་ཀྱིན་ཡོད
                        ཁོས་ནི་ད་དུང་འདས་སོང་གི་ཁ་སང་ལ་ཚང་རྩིས་རྒྱག་བཞིན
                        སང་ཉིན་གྱི་གངས་ལྗོངས་ལ་འབོད་བརྡ་བཏང་ནས་ཡོད
                        ཁོ་བོ་ནི་མི་དབང་འུ་དུམ་བཙན་རང་རེད
                        ཨ། ཁོང་གིས་དེ་རིང་གི་བོད་མཐོང་འདུག

                        ལོ་ངོ་སྟོང་གི་རིང་ལ
                        ཉིན་མཚན་འབུམ་གྱི་ཡུན་ལ
                        “གླང་དར”དུ་འབོད་པ་གང་ཞིག
                        “བསྟན་བཤིག”ཏུ་གླེང་བ་སུ་ཞིག
                        སེར་མོ་ཀུན་གྱི་བྲང་གཞུང་ན་ན་ཟུག་ཏུ་གྱུར་ཡོད་ལ
                        སྐྱེ་བོ་ཡོངས་ཀྱི་སེམས་ནང་ན་རྨ་ཁ་རུ་བརྫིས་ཡོད་དེ
                        སོ་དཀར་བྱིས་པའི་འཛུམ་ཀོང་ན
                        སྐྲ་དཀར་རྒན་པོའི་ཐོད་གཉེར་ན
                        ཡོད་ཚད་ཀྱི་ཡོད་ཚད་ན་བསྙོན་གྱིས་སྦགས
                        ཁྲི་ཤོར་རྒྱལ་མོའི་རླབས་རྒྱུན་གྱིས
                        འུ་དུམ་བཙན་གྱི་རྣམ་ཤེས་དེ་ད་དུང་ཡང་བར་དོ་ན་གནས་ཡོད་ཟེར་གི
                        རྨ་རྒྱལ་སྦོམ་རའི་རྔམས་བརྗིད་ཀྱིས
                        འུ་དུམ་བཙན་གྱི་སྙིང་སྟོབས་དེ་ད་དུང་ཡང་ཡལ་མེད་དུ་གནས་ཡོད་གསུང་གི
                        ཇོ་མོ་གླང་མའི་དབུ་རྩེ་ཡིས
                        འུ་དུམ་བཙན་གྱི་ལོ་རྒྱུས་ལ་བསྙོན་བཏགས་གིས་སྦགས་འདུག་ཟེར་གི
                        རེད་ཡ
                        ད་ལན་འུ་བུ་ཚོས་ཀྱང་འདས་སོང་ལ་ཚང་རྩིས་རྒྱག་རན་འདུག
                        ལོ་ངོ་ཆིག་སྟོང་ལ་ལྐོག་དུ་གྱུར་བའི་སྙིང་སྟོབས་དེ
                        ཕྱི་གསལ་ནང་གསལ་གྱིས་ང་ཚོའི་མིག་ཁར་མངོན་འདུག
                        འུ་བུ་ཚོས་སྙིང་སྟོབས་དེར་བདེན་ཁ་འབུལ་རན་རེད
                        འུ་བུ་ཚོས་དྲང་བདེན་ལ་བདེན་ཁ་འབུལ་རན་རེད