ཚེ་དབང་མཐར་ཕྱིན་གྱི་རྩོམ་ཡིག་ཁག་ཅིག

རྩོམ་པ་པོ།:ཚེ་དབང་མཐར་ཕྱིན། 2012-06-01
མཚོ་སྔོན་པོ་དྲ་བ།

རུས་མིང་། ཚེ་དབང་མཐར་ཕྱིན།
འཛིན་གྲྭ  མཐོ་གཅིག
ཕ་ཡུལ། སྨར་ཁམས་རྫོང་།

རང་མཉམ་གཞོན་ནུ་ལ་སྐུལ་བའི་ཀ་རྩོམ་རྣ་བའི་ཚེར་མ།

       ཀྭ་ཡེ་གསོན་དང་རིགས་བཟང་སྙིང་མཐུན་གྱི་སྤུན་མཆེད༎
       ཁ་བའི་ལྗོངས་ཀྱི་རིག་པའི་མུ་ཏིག་གི་ཕྲེང་བ༎
       ག་ས་གང་དུ་ཕྱིན་ཀྱང་བརྩེ་སེམས་ཀྱིས་ཟློ་དང༎
       ང་ཚོའི་མི་རིགས་འདི་ལ་ཡོད་རྒྱུ་ནི་འདི་རེད༎

       ཅ་ཅོའི་འཆལ་གཏམ་མ་བསྙད་རིག་གཞུང་གི་དོན་སྙིང༎
       ཆ་ལུགས་ཉམས་ལེན་གྱིས་དགོས་འདོད་དུ་བླང་སྟེ༎
       ཇ་ཁང་སོགས་ལ་མ་འགྲིམ་དར་སྤེལ་ཀྱང་མཛད་ན༎
       ཉ་རྒྱས་ཟླ་བ་འཕེལ་བཞིན་མཁས་པ་རུ་ཆགས་ངེས༎

       ཏ་ཐཱ་ག་ཏ་མེས་པོའི་གསུང་འབུམ་གྱི་གཞུང་ལ༎
       ཐ་ན་སྦྱོར་བ་ལག་གིས་ཉམས་ལེན་ཞིག་མེད་ན༎
       ད་ལྟ་ཉིད་ནས་བཅངས་པའི་ཕུགས་བསམ་གྱི་ཡུལ་དུ༎
       ན་རྒས་གོ་ཁར་ལྷུང་ཡང་སླེབས་ཐབས་ནི་མེད་དོ༎

       པ་ཊ་བཞིན་གྱི་དེང་གི་འཚོ་བ་ཡི་རྗིང་དུ༎
       ཕ་མེས་གནང་བའི་སྒལ་ཚིགས་བརྟན་པོ་འདི་ཆག་ཅིང༎
       བ་མོ་སེར་བས་བཅོམ་བཞིན་ཤི་གསོན་གྱིས་བྱིངས་ན༎
       མ་ཡུམ་བོད་ཀྱི་ཕྱི་རབས་བསྐྱང་རྒྱུ་འདི་དཀའ་འོ༎

       ཙ་མ་ར་ཡི་རྭ་བཞིན་གཤིས་གྱོང་འདི་བསྐྱང་ན༎
       ཚ་ཚ་སངས་རྒྱས་དམ་པའི་བཀའ་ལུང་དང་འགལ་བས༎
       ཛ་ལང་རྒྱ་ཡན་སེམས་ཀྱི་དྲི་མ་འདི་བཀྲུས་ཤིང༎
       ཝ་སྐྱེས་ལྟ་བུའི་ཚུལ་འཆོས་དོར་ན་ནི་དགའ་འོ༎

       ཞ་ཞོར་བོད་པ་ཚང་གི་རེ་འདུན་འདི་བསམ་ཏེ༎
       ཟ་འདྲེ་བཞིན་གྱི་ཞེ་སྡང་གཏི་མུག་འདི་སྤངས་དགོས༎
       འ་ཅག་མི་རིགས་འདི་ལ་ཕན་པ་ཡི་ལས་ཤིག༎
       ཡ་ཆུང་སེམས་སུ་བསྒྲུབ་རྒྱུའི་དམ་བཅའ་ཞིག་འཇོག་དགོས༎

       ར་མ་ལུག་སྐད་སྨྲ་བའི་སྲོལ་ངན་འདི་དོར་ཏེ༎
       ལ་ལུང་མི་རིགས་ཀུན་ལ་མཐུན་པ་ཡིས་གཤིབ་དང༎
       ཤ་ཚ་སྙིང་རྗེ་ལྡན་པ་རང་རིགས་ཀྱི་སྲོལ་བཟང༎
       ས་ཕྱོགས་གང་དུ་འགྲིམ་ཡང་སྲུང་རྒྱུ་ནི་འགངས་ཆེ༎

       ཧ་ཧ་བདག་གི་གཏམ་ལ་སྙན་ཆ་ནི་མེད་ཀྱང༎
       ཧ་ཅང་རིགས་ཞེན་སེམས་སུ་འཁྲུངས་བ་ཞིག་ཡིན་ཕྱིར་༎
       ཨ་རོགས་སྤུན་གྲོགས་རྣ་བའི་ཚེར་མ་རུ་གྱུར་ཡང༎
       ཨ་ལགས་དོར་ཞིའི་གསུང་བཞིན་ཕན་པ་ནི་མངའ་འོ༎


མི་རིགས་དང་ཕ་སྐད་ལ་བཅངས་པའི་བརྩེ་བ་དྭངས་མ།

         གངས་རིའི་ར་བ་མུ་ཁྱུད་དུ་བསྐོར་བའི་སཱ་ལའི་སྨན་ལྗོངས་ཀྱི་ཀུན་བཟོད་སྣོད་ཀྱི་ལྟེ་བ་རུ་འཚོ་ཞིང་བཞེས་པའི་ང་ཚོ་འགྲོ་བ་མིའི་རིགས་བྱུང་བ་ནས་བཟུང།   ཕན་ཚུན་བརྡ་སྤྲོད་དང་འབྲེལ་འདྲིས་བྱེད་སའི་བརྒྱུད་ལམ་གཙོ་བོ་ནི་སྐད་ཆ་ཡིན་སྟབས། སོ་སོའི་སྐད་ཆ་འདི་བེད་སྤྱོད་བྱས་ནས་ཡུན་རིང་འགོར་ཡོད། རྗེས་སུ་སྐད་ཆའི་དགོས་མཁོ་དང་བསྟུན་ནས་མི་རིགས་རང་གིས་སྐད་དང་ཡོངས་སུ་མཐུན་པའི་ཡི་གེ་འདི་གསར་གཏོད་མཛད་ཡོད།  དེ་ཡང་སྐད་རིགས་ཅི་འདྲ་ཞིག་ཡིན་ཡང་ཐོག་མ་ཉིད་ནས་ཕུན་སུམ་ཚོགས་ཤིང་ཆ་ཚང་བ་ཞིག་མིན་པ་ནི་སྨོས་ཅི་དགོས། ཡིན་ཡང་དུས་རབས་ཀྱི་གོམ་འགྲོས་དང་བསྟུན་ནས་རང་མི་རིགས་ཀྱི་སྐད་ཡིག་ཆེན་མོ་འདི་ཡང་གཅིག་གྱུར་དང་ཆ་ཇེ་ཚང་དུ་སོང་ཡོད་པ་ནི་བསྙོན་དུ་མེད།
           སྐད་ཡིག་ནི་མི་རིགས་ཤིག་གི་མཚོན་རྟགས་དང་གྲུབ་ཆ་གཙོ་བོ་ཞིག་ཡིན་པས་སྐྱེ་བོ་ཀུན་གྱིས་སེམས་ཁོང་གི་གཅེས་ནོར་ལྟར་དུ་འཛིན་སྐྱོང་བྱེད་དགོས།  དེ་བཞིན་བོད་ཡིག་ནི་བོད་མི་རིགས་ཀྱི་སྐད་དང་ཡོངས་སུ་མཐུན་པའི་བརྡ་སྤྲོད་ཀྱི་གཞུང་ལུགས་ཤིག་ཡིན།
           ཀྱེ་མ་ཀྱི་ཧུད།  སྔོན་སོང་འོད་སྟོང་འབར་བའི་ལོ་རྒྱུས་ཀྱིས་ད་ལྟའི་ཚབ་བྱེད་མི་རུང་ཞིང་སྔོན་བྱོན་མཁས་དབང་རྣམས་ཀྱིས་མི་རིགས་འདི་ཡི་མཐར་ཐུག་གི་དོན་དུ་དཀའ་ངལ་གང་ལའང་མ་འཛེམ་པར་སྐད་ཡིག་འདི་ཆ་ཇེ་ཚང་དུ་བཏང་ཡོད་མོད། དེང་གི་བོད་མི་ཕལ་ཆེ་བས་སྔོན་བྱོན་མཁས་པའི་ཁྲག་དང་རྔུལ་ཆུས་བསྐྲུན་པའི་འབྲས་བུ་རྣམས་བེད་སྤྱོད་དང་གཞན་ལ་ངོམ་རྒྱུ་ཕར་ཞོག  ད་དུང་དེ་ལ་མཐོང་ཆུང་དང་སྡིགས་མོ་བྱེད་པར་ཁོ་བོའི་སེམས་གཏིང་དུ་སྐྱུར་ཤ་དང་ཕངས་སེམས་ཅིག་ཅར་དུ་ལངས།
           ཁ་བ་རི་བོའི་སྤུན་གྲོགས་ཚོ།  གླིང་འདིའི་མི་རིགས་གང་དང་གང་ཞིག་ཡིན་ཡང།  སོ་སོའི་སྐད་དང་ཡི་གེ་ནི་མི་རིགས་གང་དེའི་སྲོག་ཤིང་ལྟ་བུར་གྱུར་ཡོད་པ་དང་སྲོག་ཤིང་དེ་ཡང་མི་རིགས་དེའི་སྐྱེ་བོ་ཀུན་དང་ལྷག་པར་དུ་ཕྱི་རབས་རྣམས་ཀྱིས་བསྲུང་དགོས་པའི་མི་རིགས་ཀུན་གྱི་གོམས་འགྲོས་ཤིག་དང་འཛམ་གླིང་ཡོངས་ཀྱི་ཆོས་ཉིད་ཅིག་ཀྱང་རེད།  དེ་བཞིན་རང་རེའི་བོད་ལ་མཚོན་ན་བོད་ཀྱི་སྐད་ཡིག་འདི་ཉིད་རིང་ནས་བསྐྱང་རྒྱུའི་ལས་དེ་ནི་བོད་མི་སྤྱི་དང་ལྷག་པར་བོད་གངས་ཅན་གྱི་ཕྱི་རབས་པ་དུ་མའི་གཉའ་ཐོག་ཏུ་བབས་པའི་འོས་འགན་ཅིག་ཡིན་པས་ཕྱིར།  ང་ཚོ་ཕྱི་རབས་པ་རྣམས་ཀྱིས་སྒོ་གསུམ་གྱི་དྲི་མ་མ་ལུས་བསྐྲུས་ནས་གངས་ཅན་བོད་ཀྱི་སྲོག་ཤིང་ལྟ་བུར་གྱུར་བའི་སྐད་ཡིག་ཆེན་མོ་འདི་ཉིད་འཛིན་སྐྱོང་སྤེལ་གསུམ་བྱ་རྒྱུ་ནི་བོད་པའི་བུ་ཕྲུག་ཅིག་གི་མི་ཚེའི་འོས་འགན་འབའ་ཞིག་རེད།
           རང་རེའི་ལྗོངས་ཀྱི་སྐད་ཡིག་འདི་ཉིད་ནི་སྤྱི་ལོ་དུས་རབས་བདུན་པའི་དུས་དཀྱིལ་དུ་ཆོས་རྒྱལ་སྲོང་བཙན་སྒམ་པོས་མི་རིགས་རང་ལ་སྐད་དང་ཡི་གེ་མེད་པའི་གནས་བབ་ཞན་པ་དངོས་ལ་དམིིགས་ཏེ་བློ་གསལ་བློན་པོ་ཐོན་མི་རྒྱ་གར་དུ་ཡི་གེ་སློབ་པར་མངགས།  འདང་ཞིག་རྒྱོབ་དང། སྤུན་ཟླ་ལགས། དེང་གི་སྐྱེ་བོ་འགའ་ཤས་ཀྱིས་སྣང་མེད་དུ་འཇོག་བཞིན་པའི་བོད་ཀྱི་སྐད་ཡིག་འདི་ནི་སློབ་དཔོན་ཐོན་མི་མཆོག་གིས་ལམ་བགྲོད་པར་དཀའ་བའི་ངལ་བ་དང་ཚ་གྲང་བཀྲེས་སྐོམ་གྱི་སྡུག་བསྔལ། དེ་བཞིན་སྐད་བརྡ་མི་འཕྲོད་པའི་ངལ་བ་དུ་མ་ཁྱད་དུ་བསད་ནས་ཐུ་བྷོའི་མ་འོངས་པ་དང་བོད་གདོང་དམར་ཀུན་གྱི་འཚོ་རྟེན་གྱི་ཆེད་དུ་རྒྱ་གར་ནས་ཡིག་རིགས་དུ་མ་སྦྱངས་པ་མཐར་ཕྱིན་བྱས་ནས་མཐར་བོད་མི་རིགས་ཀྱི་སྐད་ཡིག་འདི་ཉིད་གསར་དུ་གཏོད་ཡོད།  ལོ་རྒྱུས་ལ་ཕྱི་བལྟ་ཞིག་བྱས་དང་།  བསིལ་ལྡན་བོད་ཀྱི་ལྗོངས་སུ་མི་རིགས་རང་གི་སྐད་དང་ཡོངས་སུ་མཐུན་པའི་དབྱངས་གསལ་སོ་བཞི་དར་བ་ནས་བཟུང། བོད་ཀྱི་ཆབ་སྲིད་དང་དཔལ་འབྱོར། ཆོས་ལུགས་བཅས་ལ་འཕེལ་རྒྱས་ཅི་ཙམ་ཞིག་བྱུང་ཡོད་པ་མིག་མཐོང་ལག་ཟིན་རེད།  དེ་བས་མི་རིགས་ཀྱི་སྐད་ཡིག་དེས་མི་རིགས་ཀྱི་འཕེལ་རྒྱས་ལ་ཤུགས་སྣོན་བྱེད་པའི་དངོས་ཡོད་གནས་ཚུལ་ལ་དམིགས་ནས་ད་ནས་བཟུང་སྟེ་རང་རེའི་ཁ་བ་ཅན་གྱི་སྐད་དང་ཡི་གེར་དུངས་བ་ཆེས་ཆེར་དང་བརྩོན་པ་ལྷུར་ལེན་བྱ་རྒྱུ་གཞིར་བཞག་བྱས་ནས་མི་རིགས་གཞན་གྱི་སྐད་དང་ཡི་གེའི་ཕུན་སུམ་ཚོགས་པའི་ཆ་དང་ཚན་རིག་གི་ཤེས་བྱ་ཀུན་གྱི་ཉིང་བཅུད་ཕྱོགས་སུ་བཏུས་ནས་རང་མི་རིགས་ཀྱི་སྐད་ཡིག་དར་རྒྱས་སུ་གཏོང་དགོས་པ་ལས་རང་གིས་རང་མི་རིགས་ཀྱི་སྐད་དང་ཡི་གེ་ལ་མཐོང་ཆུང་བྱེད་པ་ནི་རང་སྡུག་རང་གིས་ཉོས་པ་ལས་གཞན་ཅི་ཡང་མིན།
         སྤུན་ཟླ་ལགས། ཡང་གཅིག་བཤད་ན་ཁོ་བོས་རང་གི་སྐད་ཡིག་འདི་ལ་དུངས་སེམས་ཆེས་ཆེར་བཅངས་དགོས་ཟེར་བར་ཁྱོད་ཀྱིས་ཀྱང་བོད་ཡིག་འདི་ཉིད་རིན་ཆེན་དང་དར་གོས་སྣ་ཚོགས་ཀྱི་བསྒྲོན་ཏེ་ཁྱིམ་གྱི་ཕུག་ཏུ་གཡང་རྟེན་ཇི་བཞིན་རེག་མེད་ཚོར་མེད་དུ་བཞག་ནས་དེ་ལ་གུས་པའི་ཕྱག་འཚལ་ཞིང་རེ་བའི་སྨོན་ལམ་འདེབས་ན་ཁྱོད་ནི་གོ་བ་མེད་པའི་གླང་རྒན་དང་གཉིས་སུ་མི་འདུག་ཅེས་སྡིགས་ན་འུད་ཤོབ་མིན།  ད་དུང་གཞན་རིགས་ཀྱིས་སྔར་བཞིན་བོད་མི་རིགས་འདི་རྨོངས་དད་དང་སྒྱིད་ལུག་རེད་ཅེས་འཕྱ་ངེས་རེད།  ཁོ་བོས་བོད་སྐད་ཡིག་འདི་འཕེལ་རྒྱས་སུ་གཏོང་དགོས་ན་ངེས་པར་འུ་ཅག་ཀུན་གྱིས་སྙིང་ལ་རུས་པ་བསྐྱེད་ནས་རང་མི་རིགས་ཀྱི་སྐད་ཡིག་ལ་འབད་བརྩོན་བྱེད་དགོས་ཞེས་ཟེར་བཞིན་ཡོད།  འཇིག་རྟེན་འདི་ན་བརྩོན་གྲུས་ཀྱིས་མ་ཐོགས་མ་རེག་པའི་དོན་དག་གང་ཞིག་ཕུན་སུམ་ཚོགས་པོར་ཡོང་བ་ནི་མཁའ་ཡི་པདྨོའི་ཚུལ་དུ་གདའ།  དེ་ཡང་ཇི་སྐད་དུ“སྔོན་ཆད་ང་དང་ཁྱེད་གཉིས་མཉམ་པ་ལ་ཁྱེད་ནི་བརྩོན་འགྲུས་ཆེ་བས་རྫོགས་སངས་སངས་རྒྱས་ཀྱི་གོ་འཕང་ཐོབ། ང་ནི་ལེ་ལོ་ཆེ་བས་འཁོར་བར་འཁྱམས”ཞེས་པའི་དཔེ་ལྟར་དེང་གི་དུས་འདིར། སྤུན་ཟླ་མི་རིགས་གཞན་གྱིས་རང་རང་གི་སྐད་ཡིག་དང་ཚན་རིག་ཤེས་བྱའི་འཕུར་གྲུར་བརྟེན་ནས་སྐབས་གསུམ་ལྷ་ཡི་ཡུལ་དང་ཟླ་བའི་གོ་ལ་བསྐྱོད་དུས་རང་རིགས་ནི་རྨོངས་དད་དང་མཁྲེགས་འཛིན་གྱི་མུན་ཀློང་དུ་འཁྱམས་པར་སྤྱུགས་བསམ་མམ། འུ་ཚོའི་མི་རིགས་ཀྱི་རེ་བ་དང་མ་འོངས་པ་ནི་དེང་གི་སློབ་གླིང་དུ་ཤི་མ་གསོན་གྱིས་རོལ་བའི་ང་ཚོ་ཡིན་པས།  འབྱུང་འབྱུར་མི་རིགས་འདི་ཉིད་སྣང་གསལ་གྱི་ཁམས་དང་མུན་པའི་སྨག་ཏུ་བརྗང་མིན་ནི་ང་ཚོའི་བརྩོན་པ་དང་ཚུལ་ལུགས་། དེ་བཞིན་འདུ་ཤེས་དང་སྤྱོད་པ་བཅས་ལ་རག་ལས་ཐུབ།
          ཁོ་བོས་སྐད་ཡིག་འདི་ལ་བརྩོན་པ་ཆེར་བསྐྱེད་ཀྱིས་སྦྱོང་དགོས་ཞེས་པ་ལ་ཡང་ངེས་པ་ཆེས་ཆེན་ཞིག་ཡོད་དེ།  ང་ཚོས་གཅིག་ཏུ་སྔོན་བྱོན་མཁས་དབང་རིམ་བྱོན་གྱི་མི་ཚེའི་ལྟ་བ་དང་རིག་གནས་ལ་འཛིན་པའི་ལྟ་བ། ད་དུང་སྙིང་སྟོབས་བཅས་ལ་སློབ་སྦྱོང་བྱེད་རྒྱུ་དང་། གཉིས་སུ་མཁས་དབང་རྣམས་ཀྱི་རེ་བ་སྟོང་ཟད་དུ་མི་གཏོང་བར་ཁོང་རྣམས་ཀྱི་རེ་བ་དོན་དུ་གཉེར་བར་འབད་པ་བརྒྱ་དང་བརྩོན་པ་སྟོང་གིས་མདུན་བསྐྱོད་ཀྱི་གོམ་ཁ་བསྒྱུར་དགོས།  འཇིག་རྟེན་གྱི་ཁ་དཔེར“ཕག་ལ་སྣ་དགོས། མི་ལ་བློ་དགོས”ཞེས་པའི་དཔེ་ལྟར་ང་ཚོས་ཞིབ་མོ་བློ་ཡིས་བོད་རང་གི་རིག་གནས་ལ་ཅ་འབྱིད་ཡང་དག་པ་ཞིག་བྱེད་རྒྱུ་ཡང་གནད་ཀྱི་དམ་པ་རེད།  གལ་ཏེ་རང་རེ་རྣམས་ཀྱིས་རྨོངས་ཚོད་ཀྱི་དེང་གི་གསར་བྱུང་རིག་གནས་དང་སྲོལ་རྒྱུན་རིག་གནས་བཅས་ལ་མིག་བཙུམ་འཇུག་པར་རྩོམ་ན་དེ་ནི་བོད་མི་རིགས་ཀྱི་རྨོངས་དད་ཀྱི་གདོང་འབག་རྗེན་པར་སྟོན་པའི་རྟགས་མཚན་ཞིག་མ་ཡིན་ནམ།  ཕྲན་གྱིས་བསམ་ན་འུ་ཚོས་མི་རིགས་རིག་གནས་ཀྱི་ཉིང་བཅུད་ལེན་པ་སྟེ།  ངེས་པར་དུ་གང་ཞིག་དུས་དང་མཐུན་མིན་དང།  གང་ཞིག་མི་རིགས་འདིའི་འཕེལ་རྒྱས་ལ་མཁོ་མིན།  དེ་བཞིན་གང་ཞིག་མི་རིགས་འདིའི་སེམས་ཁམས་དང་ལོ་རྒྱུས་དུས་རབས་བཅས་ལ་མཐུན་མིན་གྱི་དབྱེ་ཞིབ་ནན་པོ་མཛད་རྒྱུ་ནི་ཧ་ཅང་གལ་ཆེ་བར་སྙམ།  དེ་ལྟར་བྱ་ཐུབ་ཚེ་ད་གཟོད“སྐད་རིགས་ཐམས་ཅད་ཤེས་ན་བཟང་མོད་ཀྱི། རང་གི་ཕ་སྐད་བརྗེད་ན་ངོ་ཚ་ཡིན”ཅེས་པའི་ཚིག་གིས་རང་ལ་དུས་དང་རྣམ་པ་ཀུན་ཏུ་སྐུལ་སློང་མཛད་ནས་ཕ་སྐད་ཕྱོགས་སུ་སྒོ་གསུམ་གཙང་མས་གོམ་པ་ཤུགས་ཀྱིས་སྤོ་དགོས།
         འཛམ་གླིང་གི་དཀར་ངོགས་འདི་རུ་འཚོ་བའི་མི་རིགས་དང་རྒྱལ་ཁབ་ཅི་འདྲ་ཞིག་ལ་བལྟས་ན་དཔལ་འབྱོར་དར་རྒྱས་སུ་ཕྱིན་ཡོད་པའི་མི་རིགས་དང་རྒྱལ་ཁབ་གང་དེའི་སྐད་དང་ཡི་གེ་བཅས་ཀྱི་དར་ཁྱབ་ཆེ་ལ་གཅིག་གྱུར་ཡོང་འདུག་པ་ཨེ་མཐོང།   འོན་ཀྱང་རང་རེའི་བོད་ནི་རྗེས་ལུས་ཀྱི་འདམ་དུ་ཐིམ་དང་འཐིམ་མུས་སུ་མཆིས་པ་འདི་གཅིག་ནས་རང་རེའི་བོད་ལ་སྐད་དང་ཡི་གེ་དེ་བཞིན་མི་ཆོས་རིག་གནས་གཙང་མ་ཞིག་ལྡན་མོད་འུ་ཚོ་སྐྱེ་བོ་རྣམས་ནི་བླང་དོར་གྱི་བློ་གྲོས་མི་ལྡན་ཞིང་རྨོངས་དད་ཀྱི་བློ་མོས་ཆེ་བའི་དབང་གིས་རིག་གནས་འདི་ལ་ནག་ནོག་གི་དྲི་མ་བཀྱེ་ཞིང་ལྷ་ཆོས་རིག་གནས་ཀྱི་འོག་ཏུ་གནའ་ནས་ད་ལྟའི་བར་དུ་འཇིག་རྟེན་མི་ཡི་མཐུ་ནུས་མ་མཐོང་བར་གཉའ་སྒུར་སྒུར་བྱས་ནས་སྡོད་པའི་རྐྱེན་ཡིན་ལ། མི་བུ་རང་ལ་ལ་རྒྱ་དང་འཐབ་རྩོད་ཀྱི་སྙིང་སྟོབས།  དེ་བཞིན་དེང་གི་སྣང་ཚུལ་ལྟར་ཨ་གསར་ཆེ་བའི་དབང་གིས་སོ༎
         ངའི་སྙིང་གི་བུ་ཡཱ། བོད་རིགས་སྤུན་ཟླ་ལགས། སྔོན་སོང་གི་ལོ་རྒྱུས་དང་མ་འོངས་པའི་ལམ་ཁར་ང་ཚོར་ཡོད་རྒྱུ་ནི་བོད་ཀྱི་སྐད་ཡིག་དྭངས་མ་འདི་ཡིན་པས།  ད་ནས་བཟུང་ང་ཚོས་དཔུང་པ་མཉམ་གཤིབ་ཀྱིས་སྔོན་མའི་མཁས་དབང་རིམ་བྱོན་བཞིན་སྙན་གྲགས་འཛམ་གླིང་ལ་ཁྱབ་པའི་དོན་ཆེན་ཞིག་བསྒྲུབ་མི་ཐུབ་ཀྱང།   མ་མཐའ་ཡང་མེས་པོའི་རེ་བ་སྙིང་ལ་བརྐོས་ཏེ་མེས་པོའི་ཞབས་རྗེས་དེ་སྐལ་པའི་དུས་ཀྱི་མཐའ་མར་སླེབས་ཀྱང་བསྲུང་དགོས་པ་ནི་སྨོས་མེད་རེད།  མཇུག་མཐར་ཁོ་བོས་གངས་རིའི་སྤུན་ཟླ་རྣམས་ཀྱིས་རང་མི་རིགས་ཀྱི་ཁྱད་ཆོས་དང་ཡོངས་སུ་མཐུན་པའི་བོད་ཡིག་དེ་ལེགས་པར་སྦྱང་སྟེ་དུས་བསྟུན་མདུན་བསྐྱོད་དང་མ་ཡུམ་ཀྲུང་ཧྭ་རིག་པའི་ལྡུམ་ར་སྔ་ལས་མཛེས་སྡུག་ལྡན་པར་བསྐྲུན་པའི་རེ་བ་ཆེས་ཆེན་བཅངས་སོ༎

གཙོ་ངོས།ཤོག་ངོས་གོང་མ།12ཤོག་ངོས་འོག་མ།ཤོག་ངོས་མཐའ་མ།