ངོས་དང་པོ > སྐབས་དོན། > སྣ་ཚོགས། > ཀྲུང་ནེ་མཛའ་བརྩེ་རིན་ཆེན་ནོར་གྱིས་མཚོན།

ཀྲུང་ནེ་མཛའ་བརྩེ་རིན་ཆེན་ནོར་གྱིས་མཚོན།

རྩོམ་པ་པོ།： ཡོང་ཁུངས།：ཀྲུང་གོའི་བོད་ལྗོངས་དྲ་བ། དུས་ཚོད།：2026-03-02 08:25:10 ཀློག་གྲངས།：

རང་རེའི་མེས་རྒྱལ་གྱི་ལྷོ་ནུབ་མཐའ་མཚམས་ཏེ། བོད་ལྗོངས་མངའ་རིས་ས་ཁུལ་སྤུ་ཧྲེང་རྫོང་དུ་ལོ་ངོ་སྟོང་གི་ལོ་རྒྱུས་ལྡན་པའི་གནའ་བོའི་དགོན་པ་ཞིག་ཡོད་པ་དེ་ནི་འཁོར་ཆགས་དགོན་ཡིན། ལོ་གསར་གྱི་སྐབས་སུ་གསར་འགོད་པ་ལ་མོ་ཁྲི་སྟོང་བརྒལ་ནས། བརྗིད་ཆགས་རི་བོའི་པང་དུ་ཆགས་ཤིང་དྭངས་གཙང་ཆུ་མོས་དར་དཀར་སྒྲོན་པའི་ས་སྐྱའི་ལུགས་ཀྱི་དགོན་པ་དེར་བསྐྱོད་སྐབས་སུ། ཡུལ་དེར་ལོ་སར་གྱི་དགའ་སྤྲོ་རབ་ཏུ་རྒྱས་ནས་ག་ས་གང་དུ་ལོ་གསར་གྱི་རྣམ་པ་མངོན་ཡོད་ལ། སྲུང་སྐྱོང་དང་རྒྱུན་འཛིན་སྐོར་གྱི་སེམས་འགུལ་ཐེབས་དགོས་པའི་གཏམ་རྒྱུད་དུམ་བུ་ཞིག་ཀྱང་རྣ་བའི་བཅུད་དུ་སྨིན་ཡོད།

གངས་རིའི་འདབས་སུ་ཆགས་པའི་ལོ་ངོ་སྟོང་གི་ལོ་རྒྱུས་ལྡན་པའི་མངའ་རིས་སྤུ་ཧྲེང་འཁོར་ཆགས་དགོན།

འཁོར་ཆགས་དགོན་ནི་སྤྱི་ལོ996ལོར་ལོ་ཙཱ་བ་རིན་ཆེན་བཟང་པོ་སོགས་ཀྱིས་ཕྱག་བཏབ་པའི་མངའ་རིས་ས་ཁུལ་གྱི་དགོན་པ་གྲགས་ཅན་ཞིག་ཡིན་ལ། 2001ལོར་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་ཚན་པའི་གྲས་སུ་བཅུག དགོན་པའི་ནང་དུ་སྐུ་འདྲ་དང་། ལྡེབས་རིས། ཐང་ག གླེགས་བམ་སོགས་རིགས་དངོས་རྩ་ཆེན་འབོར་ཆེན་ཉར་ཚགས་བྱས་ཡོད། དེའི་ཁྲོད་དུ་ན་ནིང་ཕྱིར་རང་རྒྱལ་དུ་ལོག་མ་ཐག་པའི་རྒྱལ་ནོར་རིམ་པའི་རིག་དངོས་སྟེ། དུས་རབས་བཅུ་གཅིག་པ་ནས་བཅུ་གཉིས་པའི་བར་གྱི་ལག་བྲིས«ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོ»ཞེས་བྱ་བར་ཀུན་གྱིས་དོ་སྣང་ཆེན་པོ་བྱེད་བཞིན་ཡོད།
དགོན་པའི་ནང་དུ་སྐྱོད་སྐབས་སུ་ང་ཚོ་དགེ་འདུན་པ་ཡོན་ཏན་རྒྱ་མཚོ་དང་འཕྲད་བྱུང་། ཁོང་ནི་དགོན་པའི་དམངས་གཙོ་དོ་དམ་ཨུ་ལྷན་གྱི་ཨུ་ཡོན་ཡིན་ལ། ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་སྐབས2022པའི་ས་སྐྱའི་འཛིན་གྲྭའི་སློབ་མ་ཞིག་ཀྱང་ཡིན། གླེགས་བམ་དེ“ཕྱིར་ཁྱིམ་དུ་ལོག་པ”ཡི་གནས་ཚུལ་གླེང་སྐབས། ཁོང་ལ་སེམས་ཚོར་ཟབ་མོ་བྱུང་བཞིན་མཆིས།

“གླེགས་བམ་དེ་ནི་དུས་རབས་བཅུ་གཅིག་པ་ནས་བཅུ་གཉིས་པར་བོད་ཀྱི་ལོ་ཙཱ་བ་ཆེན་མོ་དག་གིས་ལེགས་སྦྱར་གྱི་ཡི་གེ་ནས་བོད་ཡིག་ཏུ་བསྒྱུར་བ་ཞིག་ཡིན་ལ། འཁོར་ཆགས་དགོན་པས་ཉར་ཆགས་བྱས་པ་ཆེས་སྔ་བའི་རིག་དངོས་ཀྱི་གྲས་ཤིག་ཀྱང་ཡིན”ཞེས་ཡོན་ཏན་རྒྱ་མཚོས་ངོ་སྤྲོད་གནང་། དུས་རབས་ཉི་ཤུ་པའི་ལོ་རབས་དྲུག་ཅུ་དང་བདུན་ཅུའི་ནང་དུ། གླེགས་བམ་ལ་གཏོར་སྐྱོན་མི་ཡོང་བའི་སླད་དུ་དགེ་འདུན་པ་རྒན་པ་ཚོས་དེ་ནེ་པ་ལའི་མཐའ་མཚམས་གྲོང་ཚོ་ཞིག་གི་གྲོང་མིའི་ཁྱིམ་དུ་བཅོལ་ཡོད་པ་དང་། “ཉར་ཚགས་བྱས་ནས་བགྲང་བྱ60ལྷག་ཙམ་འདས་ཡོད”

ཡོན་ཏན་རྒྱ་མཚོས་དགོན་པའི་ནང་གི་གནས་ཚུལ་དང་རིག་དངོས་ཕྱིར་ལོག་པའི་གཏམ་རྒྱུད་ངོ་སྤྲོད་བྱེད་བཞིན་པ།

དེའི་རིང་ལ། གླེགས་བམ་འདི་ཉིད་རྒྱལ་ཁབ་གཞན་དུ་ཡོད་ནའང་། སྟབས་ལེགས་པ་ཞིག་ལ་མེ་སྐྱོན་དང་ཆུ་སྐྱོན་སོགས་ཀྱི་བགེགས་བར་ཆད་ལས་གཡོལ་ནས། བདེ་བླག་ངང་ཉར་ཚགས་ལེགས་པོ་ཐུབ་ཡོད། ཡིན་ནའང་། དུས་ཀྱི་འགྱུར་བ་དང་བསྟུན་ནས། ཕྱི་རྒྱལ་གྱི་རིག་དངོས་ཚོང་པ་དག་གིས་གནའ་དཔེ་རྩ་ཆེན་འདིར་འགྲམ་ཆུ་ལྡང་བཞིན་ཡོད་ལ། ཐ་ན་བམ་པོ་རེར་སྒོར་ཁྲི100ནས200བར་གྱི་རིན་གོང་མཐོན་པོ་བྱིན་ནས་ཉོ་རྩིས་ཀྱང་བྱེད་བཞིན་ཡོད་པས། རིག་དངོས་འདི་ཉིད་ཡང་བསྐྱར་གཞན་ལག་ཏུ་ཤོར་བའི་ཉེན་ཁ་མཆིས།
“དེ་གཞན་གྱི་ལག་ལ་གཏན་ནས་ཤོར་དུ་འཇུག་མི་རུང་།” ཡོན་ཏན་རྒྱ་མཚོས་ནན་ཏན་ངང་དེ་ལྟར་བརྗོད། 2024ལོར། འཁོར་ཆགས་དགོན་དོ་དམ་ཨུ་ཡོན་ལྷན་ཁང་གིས་གླེགས་བམ་འདི་ཉིད་ཉར་ཚགས་བྱེད་མཁན་དང་གྲོས་སྡུར་བྱས་པ་བརྒྱུད། ཉར་ཚགས་ཀྱི་གྲོན་དངུལ་འོས་འཚམ་ཞིག་སྤྲད་རྗེས། རྒྱལ་ནོར་འདི་ཉིད་སླར་ཡང་རང་ཡུལ་ལ་ལོག་ཏུ་བཅུག་ཡོད། འོན་ཀྱང་གླེགས་བམ་ཉར་ཚགས་མཁན་གྱི་བློ་ལ་འགྱུར་བ་ཕྲ་མོ་ཙམ་བྱུང་ཚེ། རིག་དངོས་རང་ཡུལ་དུ་ལོག་པའི་བྱ་བ་འདིར་བར་ཆད་ཅི་འབྱུང་ཆ་མ་འཚལ།
ཉེན་ཁའི་དུས་སུ། འཁོར་ཆགས་དགོན་གྱིས་ལྷ་སའི་འགག་སྒོ་ལས་ཁུངས་ཀྱི་ཁོངས་གཏོགས་སྤུ་ཧྲེང་འགག་སྒོར་རོགས་རམ་རེ་ཞུ་བྱས། སྤུ་ཧྲེང་འགག་སྒོ་ལས་ཁུངས་ཀྱི་འགོ་འཛིན་ཝང་ཁེས་ཡིས་སྨྱན་སྦྱོར་གྱི་བཅར་འདྲི་དང་ལེན་བྱེད་སྐབས་སུ། “གནས་ཚུལ་ཤེས་རྗེས། ང་ཚོས་མཚན་བརྒྱབ་ནས་རིག་དངོས་ཕྱིར་ལོག་གི་སྲིད་ཇུས་དང་ཁྲིམས་སྲོལ་ལ་ཞིབ་འཇུག་བྱས་ཏེ། ‘སྔོན་ལ་འགག་སྒོར་གནས་སྐབས་སུ་ཉར་ཚགས་བྱེད་པ་དང་རྗེས་སུ་ཁྲིམས་མཐུན་ངང་འགག་སྒོ་བརྒྱུད་པའི’འཕྲལ་སྡོམ་ཇུས་གཞི་གཏན་འཁེལ་བྱས”ཞེས་བཤད། འགག་སྒོ་དང་དགོན་པའི་དོ་དམ་ཨུ་ལྷན་གཉིས་ཀྱིས་གྲོས་མོལ་ཚོགས་ཆུང་བཙུགས་ནས། ངང་རྒྱུད་རིང་པོས་གླེགས་བམ་དེ་ཉིད་ཉར་མཁན་ལ་ཀྲུང་གོའི་རིག་དངོས་སྲུང་སྐྱོབ་བཅའ་ཁྲིམས་དང་འགག་སྒོའི་ལྟ་སྐུལ་དོ་དམ་སྲིད་ཇུས་འགྲེལ་བཤད་བྱས་མཐར། རིག་དངོས་འདི་ཕྱིར་སྤྲོད་རྒྱུར་མོས་མཐུན་བྱས།

ཕྱོགས་མང་པོས་འབད་བརྩོན་བྱས་པ་བརྒྱུད། 2025ལོའི་དབྱར་ཁར་ཕྱི་རྒྱལ་དུ་དུས་རབས་ཕྱེད་ཀ་ལྷག་ལ་ལུས་པའི་གླེགས་བམ་རྩ་ཆེན་དེ་མཐར་ཁྲིམས་མཐུན་གྱི་བརྒྱུད་རིམ་ཚང་མ་བརྒྱུད་དེ་འཁོར་ཆགས་དགོན་དུ་དངོས་སུ་ཕྱིར་ལོག་ཐུབ་ཡོད། རིག་དངོས་ཆེད་མཁས་པས་དཔྱད་བསྡུར་གཏན་འབེབས་བྱས་པ་བརྒྱུད། གླེགས་བམ་དེ་རྒྱལ་ཁབ་ཀྱི་རིམ་པ་དང་པོའི་རིག་དངོས་སུ་གཏན་འཁེལ་བྱས་པ་དང་། ད་བར་འཛམ་གླིང་ཡོངས་སུ་ཉར་ཚགས་ཆ་ཚང་ཤོས་དང་། དར་ཁྱབ་རིམ་པ་དང་ལྡན་པའི་ཆེས་གནའ་བོའི«ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོ»བྲིས་མ་ཞིག་ཡིན།

འཁོར་ཆགས་དགོན་དུ་ཕྱིར་ལོག་པའི«ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོ།»

“ནེ་པ་ལའི་གྲོགས་པོས་ལོ་ངོ60ལྷག་ཙམ་ལ་སྲུང་སྐྱོབ་གནང་བར་ང་ཚོས་ཐུགས་རྗེ་ཆེ་ཞུ་རྒྱུ་དང་། ཁོང་ལ་ཉར་ཚགས་གནང་བའི་གྲོན་དངུལ་ངེས་ཅན་སྤྲད་ཡོད། དེ་ནི་ཉོ་ཚོང་ཞིག་གཏན་ནས་མ་ཡིན་པར། ཁོང་གིས་རིག་དངོས་སྲུང་སྐྱོང་གནང་བར་ཐུགས་རྗེ་ལན་འབུལ་ཞུ་ཕྱིར་ཡིན”ཡོན་ཏན་རྒྱ་མཚོས“བོད་རང་སྐྱོང་ལྗོངས་རིག་དངོས་ཅུས་དང་། འགག་སྒོ་ལས་ཁུངས། འཐབ་ཕྱོགས་གཅིག་གྱུར་པུའུ། དགོན་སྡེ་དོ་དམ་ཨུ་ཡོན་ལྷན་ཁང་སོགས་ཕྱོགས་ཁག་གི་རྒྱབ་སྐྱོར་ཤུགས་ཆེན་འོག མཐར་རྒྱལ་ནོར་བདེ་འཇགས་ངང་རང་ཡུལ་དུ་ལོག་ཐུབ་པ་བྱུང་བར་ང་ཚོར་གཟི་བརྗིད་ཆེན་པོ་འདུག”ཅེས་ནན་བཤད་གནང་།
ད་ཆ། ལོ་ཟླའི་ཆགས་འཇིགས་དུ་མ་བརྒྱུད་མྱོང་བའི་ལོ་ངོ་སྟོང་གི་གླེགས་བམ་དེ་འཁོར་ཆགས་དགོན་དུ་ཞི་བར་གནས་ཤིང་། དད་ལྡན་པ་རྣམས་ཀྱིས་གུས་བཀུར་དང་ཆེད་མཁས་པས་ཞིབ་འཇུག་བྱེད་བཞིན་ཡོད། དེ་ནི་ཆོས་གཞུང་རྩ་ཆེན་ཞིག་ཡིན་པ་མ་ཟད། ཀྲུང་གོ་དང་ནེ་པ་ལ་རྒྱལ་ཁབ་གཉིས་ཀའི་མི་དམངས་ཀྱི་མཛའ་མཐུན་འགྲོ་འོང་གི་བདེན་དཔང་ཞིག་ཀྱང་ཡིན་ལ། མེས་རྒྱལ་དར་རྒྱས་གོང་འཕེལ་དང་། མི་དམངས་བདེ་སྐྱིད་གསལ་ཐང་ཡིན་པའི་མཛེས་སྡུག་ལྡན་པའི་རྣམ་པ་ཡང་མཚོན་ཡོད།

འབྲེལ་ཡོད་འོས་སྦྱོར།

暂无相关信息roking

འབྲེལ་གཏུག་ཁ་པར།：0974-8512858

འཕྲིན་སྐུར་ཡིག་ཟམ།：amdotibet@163.com