སྒྲུང་དེབ«སྒེའུ་ཁུང»གི་དཔྱད་གླེང་དང་བརྩམས་ཆོས་གསར་པའི་ཞུ་དག་ཚོགས་འདུ།

       སྤྱི་ལོ༢༠༢༦ལོའི་ཟླ༢པའི་ཚེས༧ཉིན་གྱི་ཕྱི་དྲོར། ལི་ཐང་རྫོང་རྩོམ་རིག་མཉམ་འབྲེལ་ལྷན་ཚོགས་ཀྱིས་གཙོ་སྒྲུབ་བྱས་ཤིང་ལི་ཐང་རྫོང་རྩོམ་པ་པོ་མཐུན་ཚོགས་ཀྱིས་འགན་སྒྲུབ་བྱས་པའི་དཀར་མཛེས་ཁུལ་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་གཞོན་པ། ལི་ཐང་རྫོང་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་ཆོས་དབྱིངས་རྒྱ་མཚོའི་སྒྲུང་དེབ་ཐོག་མ«སྒེའུ་ཁུང»གི་དཔྱད་གླེང་དང་བརྩམས་ཆོས་གསར་པའི་ཞུ་དག་ཚོགས་འདུ་དེ་སི་ཁྲོན་ཁྲེང་ཏུའུ་ནས་འཚོགས།

       ཐེངས་འདིའི་ཚོགས་འདུའི་ཐོག་མདོ་དབུས་ཁམས་གསུམ་ནས་ཕེབས་པའི་རིག་གཞུང་ཆེད་མཁས་པ་དང་རྩོམ་པ་པོ། ན་གཞོན་ཤེས་ཡོན་པ་མང་པོ་གདན་གཅིག་ཏུ་འཛོམས་ནས། ཆོས་དབྱིངས་རྒྱ་མཚོའི་སྒྲུང་དེབ་ཐོག་མ«སྒེའུ་ཁུང»དང་བརྩམས་ཆོས་གསར་པའི་གསར་རྩོམ་གྱི་ལེགས་ཉེས་ཐད་ལ་དཔྱད་གླེང་ཞིབ་མོ་གནང་།

       དཔྱད་གླེང་ཚོགས་འདུའི་ཐོག་རྩོམ་པ་པོ་དང་རིག་གཞུང་ཆེད་མཁས་པ་ཚོས་ཆོས་དབྱིངས་རྒྱ་མཚོའི་སྒྲུང་དེབ«སྒེའུ་ཁུང»དང་བརྩམས་ཆོས་གསར་པ་དག་ནན་གྱིས་བཀླགས་ཤིང་། ལྷག་པར་དུ་སྒྲུང་གཏམ་བྱེ་བྲག«མི་མ་ཡིན»དང«ང་རང་སྨྱོན་པར་གྱུར་དོན» «ཀུན་ཏུ་རྒྱུ» «གདགས་སྲིབ» «རྨི་ལམ་ལ་གྱེས་བརྡ་གཏོང་མཁན»སོགས་ཀྱི་རྩོམ་རིག་གི་ཁྱད་ཆོས་དང་འབྲི་ཐབས། བརྗོད་སྙིང་སོགས་ཀྱི་ཐད་ལ་དཔྱད་གླེང་ཞིབ་མོ་གནངས་ཏེ། ཁོང་གིས་མི་ཆོས་རིང་ལུགས་ཀྱི་སྙིང་སྟོབས་ངོས་ནས་གསར་རྩོམ་བྱེད་བཞིན་ཡོད་པ་དང་། བརྩམས་ཆོས་ཀྱི་བརྗོད་གཞི་ལ་བོད་ཀྱི་སྐྱེ་འཆིའི་ལྟ་དགོངས་དང་སྣོད་བཅུད་ཀྱི་ལྟ་དགོངས་འདུས་ཡོད་ལ། མིའི་འཚོ་བ་དང་འཚོ་བའི་དཀའ་སྡུག་དང་ཉེ་བས་བརྗོད་སྙིང་དེ་མིའི་ཐོག་ཏུ་འབབ་ཐུབ་ཡོད། ད་དུང་ཀློག་པ་པོ་ཚོར་འཆར་ཡན་གྱི་བར་སྟོང་སྤྲོད་ཐུབ་པ་མ་ཟད། བརྩམས་ཆོས་བརྒྱུད་ནས་རྩོམ་པ་པོ་རང་ཉིད་ཀྱི་སྣང་བརྙན་མཐོང་ཐུབ་པ་སོགས་མི་སྒེར་གྱི་འབུར་དུ་ཐོན་པའི་ཁྱད་ཆོས་ལྡན་ཞེས་གདེང་འཇོག་བྱས་ཤིང་། དེ་མིན་ཆོས་དབྱིངས་རྒྱ་མཚོའི་སྒྲུང་གཏམ་གསར་རྩོམ་གྱི་གྲུབ་འབྲས་དང་སྒྲུང་དེབ་དེ་དག་གིས་དཀར་མཛེས་ཁུལ་གྱི་རྩོམ་རིག་གསར་རྩོམ་གྱི་འཕེལ་རྒྱས་དང་། ནང་སྒོས་སུ་སྒྲུང་གཏམ་ཉུང་བ་དང་སྤུས་ཀ་ཞན་པ་སོགས་ཀྱི་གནས་བབ་བསྒྱུར་བཀོད་གཏོང་བར་དགེ་མཚན་ལྡན་པའི་ནུས་པ་ཐོན་ཡོད་ཅེས་གདེང་འཇོག་གང་ལེགས་གནང་བ་རེད།