དེབ་གསར«བཙན་པོའི་དུས་ཀྱི་ཏུན་ཧོང་རྟ་དཔྱད་ཀུན་གསལ་མེ་ལོང»

       ཉེ་ལམ། བསང་ཆུ་རྫོང་བོད་སྨན་ཁང་གི་ཆེད་མཁས་སྨན་པ་ལྷ་མོ་སྐྱིད་ལགས་ཀྱིས་བརྩམས་པའི་དེབ་གསར«བཙན་པོའི་དུས་ཀྱི་ཏུན་ཧོང་རྟ་དཔྱད་ཀུན་གསལ་མེ་ལོང»ཞེས་པ་སི་ཁྲོན་མི་རིགས་དཔེ་སྐྲུན་ཁང་ནས་པར་སྐྲུན་འགྲེམས་སྤེལ་བྱས།

       གནའ་རབས་རིག་གནས་དང་སྒྱུ་རྩལ་གྱི་བང་མཛོད་ཆེན་མོ་ཏུན་ཧོང་ཡིག་རྙིང་ཁྲོད་ཀྱི་རྟའི་གསོ་དཔྱད་དང་རྟ་བཤད་སྐོར་གྱི་ཡིག་ཆ་དག་གི་ནང་དུ་རྟ་ལ་འཚོ་སྐྱོང་དང་བདག་གཉེར་བྱེད་ཐབས་ཀྱི་ལག་ལེན་མྱོང་གྲུབ་དག་བཀོད་ཡོད་པ་མ་ཟད། རྟའི་གསོ་དཔྱད་ཀྱི་སྐབས་སུ་རྟ་ནད་སྣ་ཚོགས་ཀྱི་བརྟག་བཅོས་གསལ་རྒྱས་སུ་བསྟན་ཡོད་པ་དང་། སྨན་རྫས་ཀྱང་མང་པོ་བཀོད་ཡོད་ཅིང་། གཏར་བསྲེག་ཐུར་མ་བཅས་ལའང་རང་རང་གི་གསང་དམིགས་མང་པོ་བསྟན་ཡོད་ལ། སྐབས་འགར་ལག་ལེན་བྱ་སྟངས་དང་ཆ་བྱད་ཀྱང་གསལ་པོར་བཀོད་འདུག་པ་ནི། དཔེར་ན་རྟའི་དཔྲལ་རུས་ཕུག་ཐབས་དང་། རྐེད་པ་དང་རྐང་ལག་ཆག་པ་སྦྱོར་ཐབས། བྱང་ཁོག་གི་ཆུ་འདྲེན་ཐབས། གཅིན་འགགས་དང་རྟུག་སྐམ་འབྱིན་ཐབས། རྟའི་སོ་ལྷག་འབྱིན་ཐབས་ལྟ་བུ་བཀོད་འདུག་པས་སྐབས་དེར་བོད་ཀྱི་རྟའི་གསོ་དཔྱད་ཚད་མཐོན་པོའི་དུས་ལ་སླེབས་ཡོད་པར་ར་སྤྲོད་བྱེད་ནུས། དེབ་འདིར་རྩོམ་པ་པོས་ཏུན་ཧོང་བོད་ཡིག་གཙུག་ལག་ཁྲོད་ཀྱི་རྟའི་གསོ་དཔྱད་དང་རྟ་བཤད་སྐོར་གྱི་ཡིག་ཚང་ཐར་ཐོར་དུ་གནས་པ་རྣམས་དཀྱུས་གཅིག་ཏུ་བཀོད་ནས་ཡིག་ཆ་རེ་རེ་ཞིབ་ཏུ་བཀྲལ་བའི་ཞོར་དུ། ནང་གི་བརྗོད་བྱའི་བསྟན་དོན་ལ་དཔྱད་ཞིབ་གནང་ཡོད་དོ། །