ན་གཞོན་སྒྱུ་རྩལ་པ་དཔལ་རྒྱལ་ལགས་ཀྱི་རྡོ་ཚོན་རི་མོའི་བརྩམས་ཆོས་བདམས་བཀོད།

གུས་པའི་མིང་ལ་དཔལ་རྒྱལ་ཟེར། ལོ་རབས་དགུ་བཅུའི་འགོ་ལ་མདོ་སྨད་རུ་སྔུན་ཚ་ནག་འབྲོག་སྡེ་ཆེན་མོའི་ཁྱིམ་ཚང་དཀྱུས་མ་ཞིག་ལ་སྐྱེས། ལོ་ན་གཉིས་ལ་སོན་པའི་དུས་སུ་གློ་བུར་བའི་ན་ཚ་ཞིག་བྱུང་ནས་སྨན་པར་བསྟེན་མོད། སྨན་གྱི་ནུས་པ་མ་ཐོན་པར་རྣ་ཤེས་ཉམས་པར་གྱུར། རིམ་བཞིན་སྐད་ཆ་སྦྱངས་བར་གེགས་ཐེབས་པས་ངག་ཀྱང་ལྐུག་པར་གྱུར། བྱིས་པའི་དུས་སུ་ནུ་བོ་དང་སྲིང་མོ་ནང་བཞིན་སློབ་གྲྭར་འགྲིམས་པའི་གོ་སྐབས་མེད་པར་གྱུར་པས་ཕ་ཡུལ་གྱི་རི་ལུང་ནས་ནོར་ལུག་འཚོས། ཁོམ་སྐབས་དང་བསྟུན་ནས་རི་མོ་ལ་རང་སྦྱོངས་བྱས། རིམ་གྱིས་རི་མོ་ལ་དགའ་ཞེན་ཆེ་རུ་ཕྱིན་པས་ཉིན་རྒྱུན་གྱི་འཚོ་བའི་ཀློང་ནས་ནང་སེམས་ཀྱི་འཇིག་རྟེན་དང་འགྱུར་བཞིན་པའི་འབྲོག་ཁུལ་གྱི་འཚོ་བ་དག་རི་མོར་ཕབས། རི་མོ་ལས་གཞན་ད་དུང་ནམ་རྒྱུན་འཚོ་བའི་ཁྲོད་བརྙན་པར་ལེན་རྒྱུར་ཡང་ཧ་ཅང་དགའ་པོ་ཡོད། ལན་རེར་པར་ཆས་རྒྱབ་ལ་ཁུར་ཏེ་རི་ལུང་བརྒལ་ནས་པར་ལེན་པར་འགྲོ་བའི་གོམས་སྲོལ་ཡང་ཡོད། ༢༠༡༦ལོའི་མཚོ་སྔོན་ཞིང་ཆེན་གྱི་དབང་སྐྱོན་རིག་རྩལ་འགྲན་བསྡུར་ཁྲོད་ཞིང་ཆེན་རིམ་པའི་པར་རིས་འགྲན་བསྡུར་གྱི་ཨང་གཉིས་པའི་བྱ་དགའ་ཐོབ། ༢༠༡༨ལོའི་མང་རྫོང་བྲག་དཀར་རིག་གནས་དུས་ཆེན་སྟེང་རི་མོའི་འགྲན་བསྡུར་གྱི་ཨང་གཉིས་པའི་བྱ་དགའ་ཐོབ། ༢༠༢༠ལོར་ས་གནས་སྲིད་གཞུང་གིས་ངའི་ལས་ཁུངས་ལ་དབང་སྐྱོན་རིག་གནས་སྒྱུ་རྩལ་ལས་བཏོད་ས་ཚིགས་ཞེས་པའི་གཟི་བརྗིད་གྱི་སྒོ་བྱང་ཞིག་སྤྲད། ༢༠༢༡ལོར་མང་རྫོང་དཔལ་རྒྱལ་རིག་གནས་སྒྱུ་རྩལ་ཁྱབ་སྤེལ་ཀུང་ཟི་བཙུགས།