«རྒོད་པོའི་ཕུགས་འདུན»ཞེས་པའི་མཐའ་ཞུས་དང་གཟིགས་འབུལ་མཛད་སྒོ་སྤེལ།

       ཟླ་དང་པོའི་ཚེས23ཉིན་གྱི་སྔ་དྲོར། གློག་བརྙན་ཐུང་གྲས«རྒོད་པོའི་ཕུགས་འདུན»ཞེས་པའི་མཐའ་ཞུས་དང་གཟིགས་འབུལ་མཛད་སྒོ་གནའ་མཁར་ཟི་ལིང་དུ་སྤེལ།

       གློག་བརྙན་ཐུང་གྲས«རྒོད་པོའི་ཕུགས་འདུན»གྱི་འཁྲབ་གཞུང་རྩོམ་མཁན་ནམ་འཁྲབ་འཁྲིད་པ་རྒན་བསོད་ནམས་རྡོ་རྗེ་ཡིས་ངོ་སྤྲོད་བྱས་པ་ལྟར་ན། གློག་བརྙན་འདི་ནི་ཀྲུང་གུང་མཚོ་ནུབ་ཁུལ་ཏང་ཨུའི་དྲིལ་སྒྲོག་པུའུ་ཡིས་མཛུབ་སྟོན་གནང་ཞིང་། མཚོ་ནུབ་ཁུལ་མཉམ་འདྲེས་སྨྱན་སྦྱོར་ལྟེ་གནས་དང་རི་དཀར་པོ་གློག་བརྙན་འཕྲིན་རིག་གནས་སྒྱུར་སྒྲོག་ཚད་ཡོད་ཀུང་སི་གཉིས་ཀྱིས་མཉམ་དུ་བསྒྲུབས་པ་ཞིག་རེད།

       གློག་བརྙན་འདི་ནི«ནར་སོན་གྱི་ལོ་ཟླ»ཞེས་པའི་མུ་འབྲེལ་བརྙན་འཕྲིན་དེ་རྨང་གཞི་བྱས་ཏེ་ཟླ་བ་ཡི་མི་ཚེའི་བརྒྱུད་རིམ་བྲིས་ཡོད་དེ། ཟླ་བ་སློབ་ཆེན་མཐར་ཕྱིན་རྗེས་ཐོག་མའི་སེམས་འདུན་མ་བརྗེད་ལ། ཕ་ཡུལ་དང་དུས་རབས་ཀྱི་བཀའ་དྲིན་མ་བརྗེད་པར་ཕྱིར་ཕ་ཡུལ་དུ་ལོག་ནས་ཕ་ཡུལ་གྱི་སློབ་གསོའི་ཐད་འབང་འབུངས་དང་ཧུར་བརྩོན་བྱས་མཐར། ས་མཐའི་འབྲོག་པ་མང་ཚོགས་ཀྱིས་བྱིས་པའི་སློབ་གསོར་མཐོང་ཆེན་མི་བྱེད་པའི་བསམ་པའི་འདུ་ཤེས་བསྒྱུར་ཏེ། ས་གནས་ཀྱི་འཇོན་མི་གསོ་སྐྱོང་བྱས་པར་མ་ཟད་རང་ཉིད་ཀྱི་ནུས་པའང་མཐོར་བཏེགས། དེ་དང་ཆབས་ཅིག ཁོང་གིས་ད་དུང་སྡེ་མི་རྣམས་ཀྱི་སྣེ་ཁྲིད་དེ་རང་ས་གནས་ཀྱི་ཐོན་ཁུངས་ལ་རྐང་བཙུགས་ཤིང་། ཁྱད་ལྡན་ཐོན་ལས་འཕེལ་རྒྱས་སུ་བཏང་བ་དང་། རྒྱུན་མཐུད་རང་བཞིན་གྱི་ཕྱུག་འགྱུར་བགྲོད་ལམ་སྟེང་ཞུགས་པ། རང་ཉིད་ཀྱི་མི་ཚེའི་མྱོང་བ་གླེང་བཞིན་སྡེ་མི་རྣམས་ལ་སྐུལ་སློང་བྱས་ནས། ལས་ལ་བརྩོན་ཞིང་དཔའ་ངར་ལྡན་པའི་བུ་རྒོད་ཅིག་གི་མིག་དཔེ་བཟང་པོ་བསྟན།

       གྲོང་གསེབ་དར་སྤེལ་གྱི་ལས་དོན་སྒྲུབ་པའི་བརྒྱུད་རིམ་ཁྲོད། ཟླ་བ་ཡིས་རིགས་སོ་སོའི་མི་རིགས་བར་གྱི་འབྲེལ་འདྲིས་དང་མཉམ་ལས་ལ་མཐོང་ཆེན་བྱས་ཤིང་ཡར་སྐུལ་བཏང་སྟེ་རང་ཉིད་ཀྱི་དོན་དངོས་ལག་ལེན་ལ་བརྟེན་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རྒྱུན་ཆད་མེད་པར་བརྟན་པོར་བསྐྱེད་ཅིང་། ཕ་ཡུལ་གྱི་ཞིང་སྡེའི་འཆམ་མཐུན་དང་བརྟན་བརླིང་། ཡུན་རིང་འཕེལ་རྒྱས་ཐད་བློ་སེམས་གཅིག་མཐུན་དང་སྟོབས་ཤུགས་གཅིག་སྒྲིལ་བྱས་པ། ལང་ཚོའི་གཟི་དཔལ་ངོམས་ཏེ་བྱས་རྗེས་བཞག་པའི་གཏམ་རྒྱུད་བརྗོད་ཡོད་པས་ཚོགས་ཞུགས་མི་སྣ་ཡོངས་ཀྱི་དགའ་བསུ་ཆེན་པོ་ཐོབ།