དེབ་གསར། «བོད་ཀྱི་ཡིག་ཐོག་གི་སྣང་བརྙན།—དོན་གྲུབ་རྒྱལ་གྱི་བརྩམས་ཆོས་ཁྲོད་ཀྱི་སྣང་བརྙན་ཞིབ་འཇུག»

       «བོད་ཀྱི་ཡིག་ཐོག་གི་སྣང་བརྙན།—དོན་གྲུབ་རྒྱལ་གྱི་བརྩམས་ཆོས་ཁྲོད་ཀྱི་སྣང་བརྙན་ཞིབ་འཇུག»ཅེས་པའི་ཆེད་རྩོམ་འདི་ནི་ཧྥིན་ལན་པ་མཛངས་མ་རཱི་ཁས་འབུམ་རམས་མཐར་ཕྱིན་འབྲས་རྟགས་སུ་བརྩམས་ཤིང་། ལོ་ཙཱ་པ་ཐེ་བྲག་བསྟན་པས་དབྱིན་ཡིག་ནས་བོད་ཡིག་ཏུ་བསྒྱུར་པ་ཞིག་ཡིན།

       ཡིག་འབྲུ་འབུམ་ལྔ་ལྷག་གི་བདག་ཉིད་ཅན་གྱི་ཆེད་རྩོམ་འདིའི་ཁྲོད་དུ་མཛངས་མ་རཱི་ཁས་དོན་གྲུབ་རྒྱལ་གྱི་རྩོམ་རིག་བརྩམས་ཆོས་ལག་ལ་སོན་ཚད་གང་དཔྱད་གཞི་བྱས་ཐོག ཕྲ་ཞིབ་ཀྱི་རིགས་ལམ་ལ་བརྟེན་ནས་བརྩམས་ཆོས་ཁྲོད་མངོན་པའི་བོད་རང་གི་ཐུན་མོང་མ་ཡིན་པའི་འབྲི་ཐབས་ཏེ། དཔེ་རྒྱན་དང་གཟུགས་རྒྱན་གང་རུང་གི་རྣམ་པས་སླེབས་པའི་སྣང་བརྙན་མཚོན་ཐབས་སྣ་ཚོགས་ལ་ཕྱོགས་དང་ངོས་མང་བོ་ནས་ཞིབ་ཆ་དོད་པོའི་ཞིབ་འཇུག་བྱས་ཡོད།

       ཐབས་ལམ་གྱི་སྟེང་ནས་བོད་ཀྱི་དེང་རབས་རྩོམ་རིག་བརྩམས་ཆོས་ཤིག་ཡིན་ཕྱིན། ཕྱིའི་གཞུང་ལུགས་ལ་བརྟེན་ནས་ཚད་འཇལ་བའི་དེང་གི་བྱེད་སྟངས་ལས་ལྡོག་སྟེ། དཔྱད་བྱའི་བརྩམས་ཆོས་སུ་འབྲི་ཐབས་གང་སྤྱད་པ་དེར་འབྲེལ་གྱི་གཞུང་ལུགས་འོས་འཚམ་དུ་སྤྱོད་པ་ལས། གཞན་གཞུང་འཚམ་མི་འཚམ་གྱི་ཤན་མི་འབྱེད་པར་ཉ་ཉུང་མཉམ་བསྲེ་བྱས་མེད་ལ། དཔྱད་བྱའི་བརྩམས་ཆོས་རྣམས་གནའ་བོའི་རྒྱ་གར་གྱི་རྩོམ་རིག་དང་། བོད་ཀྱི་གནའ་རབས་དང་སྲོལ་རྒྱུན་རྩོམ་རིག དེ་བཞིན་རྒྱའི་གནའ་དེང་རྩོམ་རིག ནུབ་ཕྱོགས་རྩོམ་རིག་བཅས་དང་བསྡུར་དཔྱད་ཀྱི་ཐབས་ལམ་ལ་བརྟེན། དོན་གྲུབ་རྒྱལ་གྱི་བརྩམས་ཆོས་ལ་ཤན་ཇི་ལྟར་ཐེབས་ཡོད་ལུགས་དང་། དེ་དག་གི་རྒྱ་ལས་གྲོལ་ཏེ་རང་གི་ཐུན་མོང་མ་ཡིན་པའི་ཁྱད་ཆོས་ཅི་ཡོད་སོགས་བརྩམས་ཆོས་གང་རུང་གི་བརྗོད་བྱ་རྗོད་བྱེད་དང་བརྗོད་ཐབས་ཀྱི་སྟེང་ནས་དེར་འབྲེལ་གྱི་གཞུང་ལུགས་འོས་འཚམ་དུ་བེད་སྤྱད་པས་ཡིད་རྟོན་རུང་ཞིང་གནས་ལུགས་དང་ལྡན་པའི་ངེས་ཤེས་འདྲོངས་ནུས། ཆེད་རྩོམ་འདི་ལས་ཞིབ་འཇུག་གི་ཞིབ་ཆ་ཞེས་པ་ཇི་ལྟ་བུ་ཞིག་ཡིན་པ་དང་། གཞུང་ལུགས་འོས་འཚམ་དུ་ཇི་ལྟར་བེད་སྤྱོད་པའི་རིགས་ལམ་སོགས་ཀྱི་ཐད། བོད་ཀྱི་དེང་རབས་རྩོམ་རིག་ཞིབ་འཇུག་གི་སྡེ་ལ་སྔར་མེད་ཀྱི་མྱོང་བ་ཞིག་སྟེར་ནུས་པར་ངེས།

       སྤྱིར་ཆེད་རྩོམ་འདི་མི་སྣ་བྱེ་བྲག་པ་ཞིག་ལ་དམིགས་སུ་བཏོན་ཡོད་མོད། འདིའི་ཁྲོད་དུ་དབྱེ་ཞིབ་བྱས་པ་དེ་ལས་བརྒལ་ཏེ། བོད་ཀྱི་དེང་རབས་རྩོམ་རིག་སྤྱིའི་གནས་བབ་དང་ཁ་ཕྱོགས། དགོས་དམིགས་དང་བྱེད་ལས་བཅས་ལ་དབྱེ་ཞིབ་བྱས་ཡོད་པས་བོད་ཀྱི་དེང་རབས་རྩོམ་རིག་སྤྱིའི་གདེང་འཇོག་ཅིག་ཏུ་ཁས་འཆེས་རུང་ཐལ་མི་དྲགས་མོད། དཔྱད་བྱའི་བརྩམས་ཆོས་སྤྱི་ལ་དམིགས་ནས་གླེང་ན། ལོ་རབས་བརྒྱད་ཅུ་དང་དགུ་བཅུའི་དུས་སྐབས་སུ་བོད་ཀྱི་དེང་རབས་རྩོམ་རིག་དབུ་ཚུགས་པ་དང་དར་རྒྱས་གོང་འཕེལ་དུ་འགྲོ་བཞིན་པའི་དུས་ཀྱི་མཛེས་དཔྱོད་དམིགས་འདུན་ཅི་ཡིན་གྱི་གནད་བཏོན་ཡོད་པ་ཞིག་ཡིན།

       དེ་ལས་གཞན་མཛངས་མ་རཱི་ཁས་དོན་གྲུབ་རྒྱལ་གྱི་བརྩམས་ཆོས་ཁྲོད་སྣང་བརྙན་མཚོན་ཐབས་གཙོ་བོ་མེ་ལོང་མ་ལས་བསྟན་པའི་དཔེ་རྒྱན་དང་གཟུགས་རྒྱན་བེད་སྤྱད་ཡོད་པར་དམིགས་ཏེ། དབྱེ་ཞིབ་ཀྱི་གོ་རིམ་ཁྲོད་ནུབ་ཕྱོགས་རྩོམ་རིག་གཞུང་ན་དེ་དང་ཆ་འདྲ་བའི་གཞུང་ལུགས་དང་ལྟ་བ་གང་གང་ཡོད་པ་འདབས་མཆན་དུ་དཔྱད་པའི་ཚུལ་དུ་བཀོད་ཡོད་པ་ལས་གཞན། དེར་འབྲེལ་གྱི་བོད་རྩོམ་གང་གང་ཕྱི་ཡིག་ཏུ་བསྒྱུར་ཡོད་པ་སོགས་བོད་ཀྱི་དེང་རབས་རྩོམ་རིག་ཞིབ་འཇུག་བྱེད་མཁན་དང་རྒྱུས་ལོན་བྱེད་འདོད་མཁན་ཀུན་ལ་བརྡ་འཕྲིན་ཕུན་སུམ་ཚོགས་པ་ཞིག་མཁོ་སྤྲོད་བྱས་ཤིང་། དཔྱད་གཞི་ཡིག་ཆ་སྔར་མཐོང་མ་མྱོང་པ་དང་ཐོས་མ་མྱོང་པ་འབོར་ཆེན་ཞིག་ཀྱང་བསྟབས་འདུག

       དེང་བོད་ཀྱི་ཀློག་མཁན་མང་བོས་རྒྱ་བོད་ཡིག་རིགས་གཉིས་ལས་དཔེ་ཀློག་བྱེད་ནུས་པས་བསྒྱུར་རྩོམ་གྱི་རིགས་ལ་དེ་འདྲའི་སྤྲོ་བ་མི་འདུག་མོད། ཆེད་རྩོམ་འདིའི་སྒྱུར་མཁན་ཐེ་བྲག་བསྟན་པ་ལགས་ལ་མཚོན་ན་རྒྱ་བོད་དབྱིན་གསུམ་གྱི་ཡིག་རིགས་ལམ་ནས་དོན་གང་བརྗོད་པར་ཐོགས་རྡུགས་མེད་པས་བསྒྱུར་རྩོམ་འདི་ཀློག་དུས་ཕ་སྐད་ཀྱི་ལམ་ནས་གསར་རྩོམ་ཞིག་བཀླགས་པའི་ཉམས་སྣང་ལས་བསྒྱུར་རྩོམ་ཞིག་ཡིན་པ་བརྗེད་འགྲོ་བའི་ཚད་དུ་གདའ་འོ། །