དུར་ལམ་ནས་ཐོན་པའི་རིག་དངོས་འདི་ཉིད་ཉམས་གསོ་བྱས་འདུག

        ཤེས་རྟོགས་བྱུང་བར་གཞིགས་ན། ཐེངས་འདིའི་ལས་གཞིར་གྱུར་པའི་ཐང་རྒྱལ་རབས་ཀྱི་འཐག་དངོས་ཚང་མ་མཚོ་སྔོན་དུར་ལམ་ཆུ་ཚའི་བང་སོའི་ཚོགས་ནས་ཐོན་ཞིང་། རིག་དངོས་འདི་དག་གི་རི་མོའི་རྣམ་པར་གསོན་ཉམས་ལྡན་པ་དང་། རི་མོ་རྩ་བའི་ཆ་ནས་ཆ་ཚང་བ། ཚོན་མདངས་རྣམ་པར་གསལ་བ་བཅས་ཀྱི་ཁྱད་ཆོས་ཡོད་པས། བོད་བཙན་པོའི་དུས་སྐབས་ཀྱི་དཔེ་མཚོན་རི་མོ་འབའ་ཞིག་ཡིན་པར་མ་ཟད། འདི་དག་ནི་ཐང་རྒྱལ་རབས་དང་བོད་བཙན་པོའི་དུས་སྐབས་ཀྱི་གོས་འཐག་བཟོ་རྩལ་དང་གནའ་བོའི་དར་གོས་ཚོང་ལམ་གྱི་རིག་གནས་སྤེལ་རེས་དང་། ཉོ་འཚོང་། ཤར་ནུབ་སྒྱུ་རྩལ་ཉམས་འགྱུར་ལ་ཞིབ་འཇུག་བྱེད་པའི་དཔྱད་གཞིའི་རྒྱུ་ཆ་རྩ་ཆེན་གྱི་གྲས་ཤིག་ཡིན། ཡོན་རྒྱལ་རབས་སྐབས་ཀྱི་སྐྱིང་ཁབ་ནི་མཚོ་སྔོན་གྱི་མཚོ་ཆུང་ཕྱུག་མོའི་བང་སོའི་ཚོགས་ནས་ཐོན་པ་དང་། དེའི་རྒྱུ་ཆ་གཙོ་བོ་ནི་དངུལ་སྐུད་ཀྱིས་མེ་ཏོག་གཙགས་པ་དང་། གོང་བ་དང་ཕུ་ཐུང་གི་ཁ་ཚང་མ་གསེར་སྐུད་བསྲེས་ནས་བཏགས་པས་མེ་ཏོག་མངོན་པར་བྱས་ཡོད། རིག་དངོས་འདི་ནི་མཚོ་སྔོན་ས་ཁུལ་ནས་ཐོག་མར་ཐོན་པ་ཞིག་ཡིན་ཞིང་། ཡོན་རྒྱལ་རབས་སྐབས་ཀྱི་གསེར་སྐུད་སྤྱད་པའི་འཁེལ་འཐག་ལག་རྩལ་ཞིབ་འཇུག་བྱ་རྒྱུར་དོན་སྙིང་གལ་ཆེན་ལྡན་ལ། གྲངས་ཉུང་མི་རིགས་ཀྱི་རྒྱན་གོས་ལོ་རྒྱུས་དང་སྤྱི་ཚོགས་འཚོ་བའི་གནས་ཚུལ་སོགས་ལ་ཞིབ་འཇུག་བྱེད་པར་མེད་དུ་མི་རུང་བའི་དཔྱད་གཞི་གལ་ཆེན་ཞིག་ཡིན།         ཉེ་བའི་ལོ་ཤས་ཀྱི་རིང་ལ་མཚོ་སྔོན་ཞིང་ཆེན་གནའ་དཔྱད་ཞིབ་འཇུག་ཁང་གིས་བོད་ཀྱི་རིག་དངོས་སྲུང་སྐྱོང་གི་ཆེད་དོན་ལས་དོན་རྒྱུན་མཐུད་དེ་སྤེལ་བ་དང་། རིག་དངོས་རྩ་ཆེན་སྲུང་སྐྱོང་གི་རྣམ་གྲངས་སྣ་ཚོགས་ལག་བསྟར་བྱ་རྒྱུར་སྐུལ་འདེད་བཏང་སྟེ། བོད་ཀྱི་རིག་དངོས་རྩ་ཆེན་དག་ལ་ཚན་རིག་དང་མཐུན་པའི་སྒོ་ནས་སྲུང་སྐྱོང་དང་ཉར་ཚགས་ཡག་པོ་ཐུབ་པར་འགན་ལེན་བྱས་པ་རེད།