རྩེ་ཁོག་རྫོང་བོད་ཀྱི་གཏམ་དཔེ་རྒྱུད་འཛིན་འཕེལ་རྒྱས་མཐུན་ཚོགས་ཀྱི་དབུ་འབྱེད་མཛད་སྒོ་རྩེ་ཁོག་རྫོང་དུ་བསྡུས།

        ཟླ7པའི་ཚེས11ཉིན། རྩེ་ཁོག་རྫོང་བོད་ཀྱི་གཏམ་དཔེ་རྒྱུད་འཛིན་འཕེལ་རྒྱས་མཐུན་ཚོགས་ཀྱི་དབུ་འབྱེད་མཛད་སྒོ་རྩེ་ཁོག་རྫོང་དུ་བསྡུས་ཤིང་། འབྲེལ་ཡོད་མགོ་ཁྲིད་དང་གཏམ་དཔེ་རྒྱུད་འཛིན་པ། གཏམ་བཤད་པ་སོགས་མི་སྣ་ལྔ་བརྒྱ་ལྷག་མཛད་སྒོར་ཞུགས།
        རྩེ་ཁོག་རྫོང་བོད་ཀྱི་གཏམ་དཔེ་རྒྱུད་འཛིན་འཕེལ་རྒྱས་མཐུན་ཚོགས་ནི་རྩེ་ཁོག་རྫོང་ཨུ་དང་རྫོང་མི་དམངས་སྲིད་གཞུང་གི་རྒྱབ་སྐྱོར་དང་རྫོང་རིག་གནས་ཅུའུ་ཡི་སྣེ་ཁྲིད་འོག་ཆོག་མཆན་ཐོབ་པའི་ཁྲིམས་མཐུན་གྱི་ཚོགས་པ་ཞིག་ཡིན་ལ། 2021ལོའི་ཟླ4པའི་ཚེས20ཉིན་དངོས་སུ་བཙུགས་ཤིང་། ཏང་གི་ཚོགས་ཆེན་ཐེངས་ཉི་ཤུ་པ་དགའ་བས་བསུ་བ་དང་། མཚོ་སྔོན་ཞིང་ཆེན་ཏང་གི་འཐུས་མི་ཚོགས་ཆེན་ཐེངས་བཅུ་བཞི་པ་བདེ་ལེགས་ངང་འཚོགས་པའི་སྐབས་དང་བསྟུན་ནས་དབུ་འབྱེད་མཛད་སྒོ་སྤེལ་བ་རེད།
        རྩེ་དྲུག་སྙིང་བདུན་གྱིས་མཐའ་ནས་སྐོར་ཞིང་རྩེ་ཆུ་རིང་མོ་གཡས་སུ་འཁྱིལ་བའི་རྩེ་གཞུང་རྩྭ་ཐང་གི་འབྲོག་སྡེ་ཆེན་པོ་བཅུ་ལ་གནའ་སྔ་མོའི་རིང་ནས་སྲིད་པ་གཏམ་གྱི་ཕ་ས་རུ་འབོད་ཅིང་། ད་ལྟའི་ཆར་ཡང་ཁ་ལྕེ་གློག་དམར་འཁྱུག་འདྲའི་གཏམ་བཤད་པ་ཟམ་མ་ཆད་པར་བྱུང་དང་འབྱུང་བཞིན་ཡོད་པས། རྩེ་ཁོག་རྫོང་བོད་ཀྱི་གཏམ་དཔེ་རྒྱུད་འཛིན་འཕེལ་རྒྱས་མཐུན་ཚོགས་བཙུགས་པ་འདིས་གོམ་གང་མདུན་སྤོས་ཀྱིས་ཀྲུང་ཧྭ་རིག་གནས་ཀྱི་ཆ་ཤས་སུ་གྱུར་བའི་བོད་ཀྱི་གཏམ་དཔེ་སྒྱུ་རྩལ་རྒྱུན་འཛིན་དང་སྔོག་འདོན། འཕེལ་རྒྱས་བཅས་ཀྱི་ཐད་ལ་དགེ་མཚན་ཆེན་པོ་བསྐྲུན་ཡོད།