གཙགས་དྲུབ་རིག་གནས་ཡུལ་སྐོར་དུས་ཆེན་གཟབ་རྒྱས་ངང་མགོ་བརྩམས།

        ཟླ་བདུན་པའི་ཀོས་ནན་རྫོང་ནི་དབྱར་གྱི་ལང་ཚོ་རྣམ་པར་རྒྱས་ཤིང་ཕྱོགས་ཀུན་ཏུ་རང་བྱུང་མཛེས་ལྗོངས་ཀྱིས་བརྒྱན་པའི་དུས་ཀྱི་རང་མདངས་དང་མཉམ་དུ། ཕྱོགས་བཞིའི་མགྲོན་པོ་དག་ཀྱང་ཚོན་མདངས་རྣམ་པར་བཀྲ་བའི་ཀོས་ནན་གྱི་ཕང་བར་ལོག་ནས་ངོ་མཚར་གྱི་ལྟད་མོ་སྣ་ཚོགས་ལ་རོལ་མྱོང་བྱེད་པར་རེ་སྒུག་བྱེད་བཞིན་ཡོད་ལ། ཟླ༧ཚེས༡༢ཉིན། ཀོས་ནན་རྫོང་དུ་མི་ཚོགས་ཀྱི་འདུ་འཛིའི་རབ་ཏུ་ཁེངས་ཤིང་ལས་རིགས་ཁག་གི་སྐུ་མགྲོན་དང་མི་རིགས་ཁག་གི་ལས་བྱེད་མང་ཚོགས་ཀྱིས་མཉམ་དུ་གཙགས་དྲུབ་གླུ་གར་རིག་གནས་ཡུལ་སྐོར་དུས་སྟོན་འགོ་ཚུགས་པར་བསུ་མ་བྱེད་ཀྱིན་ཡོད། འགོ་ཚུགས་མཛད་སྒོའི་སྟེང་རྫོང་ཨུའི་ཧྲུའུ་ཅི་གཞོན་པའམ་རྫོང་དཔོན་ཆའོ་པད་མ་ཚེ་རིང་གིས་སྤྲོ་སེམས་རབ་ཏུ་འཁོལ་བའི་ངང་ནས་ཤིས་ཚིག་ཕུལ་བ་དང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་གཙོ་ཀརྨ་ཕུན་ཚོགས་ཀྱིས་ཀོས་ནན་རྫོང་གི་སྐབས་བརྒྱད་པའི་གཙགས་དྲུབ་གླུ་གར་རིག་གནས་ཡུལ་སྐོར་དུས་སྟོན་གྱི་བྱེད་སྒོ་འགོ་ཚུགས་པ་ཁྱབ་བསྒྲགས་བྱས།

        སྐབས་འདིའི་གཙགས་དྲུབ་གླུ་གར་རིག་གནས་ཡུལ་སྐོར་དུས་སྟོན་ནི་ཞིང་ཆེན་སྐབས་བཅོ་བརྒྱད་པའི་ལུས་རྩལ་འགྲན་ཚོགས་ཀྱི་གོ་སྐབས་དང་སྦྲགས་ནས། ཚོགས་ཆེན་ཐེངས་ཉི་ཤུ་བ་རྒྱལ་ཁའི་ངང་འཚོགས་པ་དང་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ལ་སྐུལ་འདེད། གྲོང་གསེབ་དར་རྒྱས་གཏོང་བའི་འཐབ་ཇུས་ལ་སྐུལ་འདེད་བཅས་ཀྱི་བརྗོད་བྱ་གཙོ་བོར་དམིགས་ནས། ཁྱད་ཆོས་ལྡན་པའི་མི་རིགས་རིག་གནས་དང་ལུས་རྩལ་འགྲན་བསྡུར། ཡུལ་སྐོར་ཞབས་ཞུའི་ལས་རིགས་བཅས་མཉམ་འདྲེས་གཏིང་ཟབ་བྱས་ཤིང་། ས་གནས་ཀྱི་ཁྱད་ཆོས་འབུར་ཐོན་པ། བྱེད་སྒོའི་ནང་དོན་ཕུན་སུམ་ཇེ་ཚོགས་སུ་གཏོང་བ། སྐུ་མགྲོན་ཡུལ་སྐོར་བ་དང་མི་རིགས་ཁག་གི་མང་ཚོགས་ལ་སྐོར་བྲོ་འགྲན་བསྡུར་དང་། ཁྱད་ལྡན་ཐོན་རྫས་འགྲེམས་ཚོང་། སྲོལ་རྒྱུན་མདའ་འཕེན་རྟ་རྒྱུག་སོགས་ངོ་མཚར་ཆེ་བའི་རིག་གནས་ཀྱི་དགའ་སྟོན་བཤམས་རྒྱུ་དང་། དེ་མིན་ཀོས་ནན་གྱི་རིག་གནས་ཡུལ་སྐོར་བྱ་གཞག་མཉམ་འདྲེས་འཕེལ་རྒྱས་ལ་སྔར་བས་སྐུལ་འདེད་གཏོང་རྒྱུ། མང་ཚོགས་ཀྱི་བསམ་པའི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་རྒྱུ། སྤྱི་ཚོགས་དཔལ་འབྱོར་གྱི་སྤུས་ཚད་འཕེལ་རྒྱས་ལ་སྐུལ་འདེད་གཏོང་རྒྱུ། ད་དུང་མཚར་སྡུག་ཀོས་ནན་གྱི་སྙན་གྲགས་དང་མཚན་སྙན་མཐོ་རུ་གཏོང་རྒྱུ་བཅས་རེད།