མཚོ་སྔོན་གྱི་ལུས་སྦྱོང་སྐོར་བྲོ་འགྲན་བསྡུར་ཀོས་ནན་དུ་བསྡུས།

        འགོ་ཚུགས་མཛད་སྒོའི་སྟེང་རྫོང་ཨུའི་ཧྲུའུ་ཅི་གཞོན་པའམ་རྫོང་དཔོན་ཆའོ་པད་མ་ཚེ་རིང་གིས་ཤིས་ཚིག་ཕུལ་བ་དང་། མཚོ་ལྷོ་ཁུལ་མི་དམངས་སྲིད་གཞུང་གི་ཁུལ་གཙོ་གཞོན་པ་ཨན་མོ་ལཱ་ཡིས་མཚོ་སྔོན་ཞིང་ཆེན་གྱི་དམངས་ཡོངས་ཀྱི་ལུས་སྦྱོང་ཚོགས་ཆེན་སྐབས་བཞི་པའི་སྐོར་བྲོ་འགྲན་བསྡུར་ཆེན་མོ་འགོ་ཚུགས་པ་ཁྱབ་བསྒྲགས་བྱས་པ་རེད། ལུས་རྩལ་པའི་འཐུས་མི་དང་ཤན་འབྱེད་པའི་འཐུས་མིས་རྔམ་བརྗིད་ལྡན་པའི་དམ་བཅའ་བཞག་པ་དང་། ཟི་ལིང་དང་མཚོ་ཤར། མཚོ་ནུབ། མཚོ་བྱང་། ཡུལ་ཤུལ། རྨ་ལྷོ། མགོ་ལོག་བཅས་ནས་ཡོང་བའི་དམངས་ཁྲོད་སྐོར་བྲོ་རུ་ཁག༨ཀྱིས་གཟབ་མཆོར་ལེགས་པར་སྤྲས་ཤིང་། སྤྲོ་སྣང་དོད་པའི་གླུ་གར་གྱི་སྒྲ་དབྱངས་ཁྲོད་དུ་ལྟད་མོ་བ་ཚོར་མཚོ་སྔོན་གྱི་ས་ཁོངས་མི་འདྲ་བའི་སྐྱེ་ཁམས་མཛེས་ལྗོངས་དང་། སྲོལ་རྒྱུན་རིག་གནས། མི་རིགས་ཀྱི་རྒྱན་གོས། དངོས་པོ་མི་ཡིན་པའི་རིག་གནས་ཤུལ་བཞག་གི་བརྩམས་ཆོས། འཕེལ་རྒྱས་ཀྱི་གནས་བབ་བཅས་མིག་གི་དགའ་སྟོན་དུ་བཤམས་པ་དང་། སྤྲོ་སྣང་ལྡན་པའི་ཞབས་བྲོ་དང་སྙན་འཇེབས་ལྡན་པའི་འགྱུར་ཁུག་གི་ཁྲོད་ནས་མཚོ་སྔོན་མི་རིགས་ཁག་གི་བུ་ཕྲུག་ཚོའི་སྐྱེ་སྟོབས་ཀྱི་དཔལ་འབར་བ་དང་འབད་འབུངས་ཡར་བརྩོན་གྱི་བསམ་པའི་ཉམས་འགྱུར་མངོན་པ། མཚོ་སྔོན་གྱི་བུ་ཕྲུག་ཚོས་ཕ་ཡུལ་ལ་བཅངས་པའི་དགའ་ཞེན་དང་ཏང་ལ་བཅངས་པའི་བརྩེ་དུང་ཟབ་མོ་བརྒྱུད་སྤྲོད་བྱས་པས་ཡུལ་དངོས་གྱི་ལྟད་མོ་བ་ཚོའི་ཐལ་མོའི་རྡེབ་སྒྲ་དང་དགའ་བསུ་ཡང་ཡང་ཐོབ་པ་རེད།