«ཀྲུང་དབྱང་གི་དཔལ་འབྱོར་ལས་དོན་གྲོས་ཚོགས་ཐོག་གི་གསུང་བཤད།»

       རྒྱལ་ཁབ་ཀྱི་འཐབ་ཇུས་ཚན་རྩལ་སྟོབས་ཤུགས་ཆེ་རུ་གཏོང་བར། ཐོག་མར་ཚན་རྩལ་གསར་གཏོད་གནད་ཆེན་སྒྲིག་འཛུགས་བྱེད་མཁན་ཡིན་པའི་རྒྱལ་ཁབ་ཀྱི་ནུས་པ་འདོན་སྤེལ་གང་ལེགས་བྱེད་དགོས། གོ་ལ་ཧྲིལ་པོའི་ཚན་རྩལ་འགྲན་རྩོད་ཉིན་རེ་བཞིན་ཛ་དྲག་ཏུ་འགྲོ་བཞིན་ཡོད་པ་དང་། རྒྱལ་ཁབ་ཆེན་པོའི་ཚན་རྩལ་འགྲན་རྩོད་དེ་རྒྱལ་ཁབ་ཀྱི་བྱ་སྤྱོད་དུ་གྱུར་ཡོད་པས། ང་ཚོས་ངེས་པར་དུ་མ་ལག་ཅན་གྱི་འགྲན་རྩོད་སྟོབས་ཤུགས་ལ་ཤུགས་རྒྱག་དགོས། འཐབ་ཇུས་རང་བཞིན་གྱི་དགོས་མཁོའི་ཁྲིད་སྟོན་རྒྱུན་འཁྱོངས་དང་། ཚན་རྩལ་གསར་གཏོད་ཀྱི་ཁ་ཕྱོགས་དང་གཙོ་གནད་གཏན་འཁེལ་བྱས་ཏེ་རྒྱལ་ཁབ་ཀྱི་འཕེལ་རྒྱས་དང་བདེ་འཇགས་ལ་ཚོད་འཛིན་བཟོ་བའི་དཀའ་གནད་གལ་ཆེན་ནུས་ཤུགས་ཡོད་རྒུས་ཐག་གཅོད་བྱེད་དགོས། རང་རྒྱལ་ལ་ཚན་རྩལ་མི་སྣ་དང་སྒྲིག་གཞི་ཤིན་ཏུ་མང་མོད། འོན་ཀྱང་དུས་ཡུན་རིང་པོར་ཁ་ཐོར་དང་། བསྐྱར་ཟློས། ཕན་འབྲས་ཆུང་བ་སོགས་སྐྱོན་ཆ་རྙིང་པ་གནས་ཡོད་པས། བཟང་སྡེབ་ཧྲག་སྒྲིག་བྱས་ནས། རྒྱལ་ཡོངས་སྟོབས་ཤུགས་གཅིག་སྒྲིལ་གྱི་སྒྲིག་སྲོལ་དཔེ་གསར་གྱི་དགེ་མཚན་འདོན་སྤེལ་བྱེད་དགོས།