«ཞང་ཀང་མེས་རྒྱལ་གྱི་པང་དུ་ལོག་ནས་ལོ་ངོ་ཉི་ཤུ་འཁོར་བར་རྟེན་འབྲེལ་ཞུ་བའི་ཚོགས་ཆེན་དང་ཞང་ཀང་དམིགས་བསལ་སྲིད་འཛིན་ཁུལ་གྱི་སྐབས་ལྔ་པའི་སྲིད་གཞུང་གི་འགན་བཞེས་མཛད་སྒོའི་ཐོག་གནང་བའི་གསུང་བཤད།»

       རྒྱལ་ཁབ་ཅིག་ལ་ལམ་ལུགས་གཉིས་ནི་ཀྲུང་གོའི་གསར་གཏོད་རླབས་པོ་ཆེ་ཞིག་དང་། ཀྲུང་གོས་རྒྱལ་སྤྱིའི་སྤྱི་ཚོགས་ཀྱིས་དེའི་རིགས་ཀྱི་གནད་དོན་ཐག་གཅོད་བྱེད་པར་བཏོན་པའི་བསམ་གཞིགས་གསར་པ་དང་ཇུས་གཞི་གསར་པ། ཀྲུང་ཧྭ་མི་རིགས་ཀྱིས་འཛམ་གླིང་ཞི་བདེ་དང་འཕེལ་རྒྱས་ཡོང་བར་ཕུལ་བའི་ལེགས་སྐྱེས་གསར་པ་བཅས་ཡིན་ཞིང་། དེར་ཆུ་བོ་ཐམས་ཅད་རྒྱ་མཚོར་འབབ་པ་ལྟ་བུའི་དཀྱེལ་ཆེ་བའི་ཀྲུང་གོའི་བློ་གྲོས་དྲིལ་ཡོད། རྒྱལ་ཁབ་གཅིག་ལ་ལམ་ལུགས་གཉིས་ཀྱི་བྱེད་ཕྱོགས་རྒྱུན་འཁྱོངས་བྱེད་པ་དང་། རྒྱལ་ཁབ་ཅིག་ལ་ལམ་ལུགས་གཉིས་ཀྱི་ལག་ལེན་སྐུལ་སྤེལ་གཏིང་ཟབ་གཏོང་བ་དེ་ནི་ཞང་ཀང་གྲོང་མིའི་ཁེ་ཕན་དང་མཐུན་པ་དང་། ཞང་ཀང་དར་རྒྱས་དང་བརྟན་བརླིང་ཡོང་བའི་དོན་དངོས་ཀྱི་དགོས་མཁོ་དང་མཐུན་ལ། རྒྱལ་ཁབ་ཀྱི་རྩ་བའི་ཁེ་ཕན་དང་མཐུན་ཞིང་། རྒྱལ་ཡོངས་མི་དམངས་ཀྱི་ཐུན་མོང་གི་རེ་འདོད་དང་མཐུན་པ་རེད། དེར་བརྟེན། ངས་འདི་ལྟར་གསལ་པོར་བཤད་ཡོད། ཀྲུང་དབྱང་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་བྱེད་ཕྱོགས་ལག་བསྟར་བྱེད་སྐབས་གནད་གཉིས་རྒྱུན་འཁྱོངས་བྱེད་དགོས་པ་སྟེ། གཅིག་ནི་བློ་བརྟན་འགྱུར་མེད་ཡོང་དགོས་པ་དང་། འགྱུར་ལྡོག་མི་གཏོང་རྒྱུ་དང་གཡོ་འགུལ་མི་བྱེད་རྒྱུ་དེ་ཡིན། གཉིས་ནི་ཆ་ཚང་ཞིང་གནད་ལ་འཁེལ་དགོས་པ་དང་། རྒྱལ་ཁབ་གཅིག་ལ་ལམ་ལུགས་གཉིས་ཞང་ཀང་དུ་ལག་ལེན་བྱེད་སྐབས་ངོ་བོ་དང་རྣམ་པ་མི་འགྱུར་བ་འགན་ལེན་ཏན་ཏིག་བྱས་ནས་ཐོག་མཐའ་བར་གསུམ་དུ་ཡང་དག་པའི་ཕྱོགས་སུ་མདུན་སྐྱོད་བྱེད་དགོས་པ་དེ་ཡིན།