«དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་གཞི་རྩའི་ཐབས་ཇུས་ཕྱོགས་ཡོངས་ནས་ལག་ལེན་མཐར་ཕྱིན་བྱེད་དགོས།»

       དུས་རབས་གསར་པའི་འཐབ་ལམ་ཐོག་ཏང་ཡོངས་ཀྱི་བློ་མཐུན་ཚོས་ངེས་པར་དུ་རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པའི་སློབ་སྲོལ་དར་སྤེལ་བཏང་ནས་ཏང་དང་རྒྱལ་ཁབ་ཀྱི་བྱ་གཞག་ལ་བྱུང་བའི་ལོ་རྒྱུས་རང་བཞིན་གྱི་འཕོ་འགྱུར་དང་ཟུང་འབྲེལ་དམ་ཟབ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་དུས་རབས་གསར་པར་སླེབས་པའི་དོན་དངོས་གསར་པ་དང་ཟུང་འབྲེལ་དམ་ཟབ། རང་རྒྱལ་སྤྱི་ཚོགས་ཀྱི་འགལ་བ་གཙོ་བོ་ལ་བྱུང་བའི་འགྱུར་ལྡོག་ཆེན་པོ་དང་ཟུང་འབྲེལ་དམ་ཟབ། “ལོ་བརྒྱ་གཉིས”ཀྱི་འབད་འཐབ་དམིགས་འབེན་དང་ལས་འགན་ཁག་ལ་ཟུང་འབྲེལ་དམ་ཟབ་བཅས་བྱས་ཐོག །རང་རྟོགས་ངང་ནས་རིགས་པའི་གཞུང་ལུགས་ཀྱིས་ལག་ལེན་ལ་ཁྲིད་སྟོན་བྱས་ནས་ཕྱོགས་གང་ཅིའི་ལས་དོན་སྔར་ལས་ལྷག་པར་ཕྱི་རོལ་ཡུལ་གྱི་ཆོས་ཉིད་དང་ཚན་རིག་གི་ཆོས་ཉིད་ཀྱི་བླང་བྱ་དང་མཐུན་པར་བྱེད་དགོས་པ་དང་། དུས་རབས་གསར་པར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བའི་ནུས་པ་མུ་མཐུད་དུ་ཆེ་རུ་གཏོང་དགོས་ཤིང་། ཏང་གི་ཚན་རིག་དང་མཐུན་པའི་རིགས་པའི་གཞུང་ལུགས་དེ་མི་བརྒྱ་སེམས་གཅིག་གིས“ལོ་བརྒྱ་གཉིས”ཀྱི་འབད་འཐབ་དམིགས་འབེན་མངོན་འགྱུར་བྱེད་པ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་མངོན་འགྱུར་བྱེད་པར་སྐུལ་འདེད་གཏོང་བའི་སྟོབས་ཤུགས་ཆེན་པོར་སྒྱུར་དགོས།