བོད་སྐད་གློག་བརྙན«དབྱར་ཁའི་སྤོ་ལོ»ཞེས་པའི་གཟིགས་འབུལ་མཛད་སྒོ་ཁྲེང་ཏུའུ་རུ་འཚོགས།

       2026ལོའི་ཟླ1ཚེས25ཉིན། དུས་ཡུན་ལོ11རིང་ཕབ་སྐྲུན་བྱས་པའི་གངས་ལྗོངས་ས་མཐོའི་རྐང་རྩེད་སྤོ་ལོ་བརྗོད་གཙོར་བྱས་པའི་གློག་བརྙན«དབྱར་ཁའི་སྤོ་ལོ»ཞེས་པའི་གཟིགས་འབུལ་མཛད་སྒོ་དེ་ཁྲེང་ཏུའུ་གྲོང་ཁྱེར་དུ་གཟབ་རྒྱས་ངང་འཚོགས་ཡོད། འཁྲབ་ཁྲིད་པ་འཇམ་དབྱངས་ཡེ་ཤེས་དང་། གཙོ་འཁྲབ་པ་གནམ་མཚོ་སོགས། དེ་བཞིན་གློག་བརྙན་ལས་རིགས་ཀྱི་མཁས་དབང་ཁག་གཅིག་བཅས་ཡུལ་དངོས་སུ་ཕེབས་ཡོད་པ་དང་། ཁོང་རྣམ་པས་གློག་བརྙན་འདིའི་བརྗོད་གཞི་དང་གྲུབ་ཚུལ་སོགས་ཀྱི་ཐད་ནས་གཟིགས་མོ་བ་དང་བགྲོ་གླེང་གནང་ཡོད།

       འཇམ་དབྱངས་ཡེ་ཤེས་ནི་གློག་བརྙན་འདིའི་འཁྲབ་གཞུང་རྩོམ་སྒྲིག་པ་ཡིན་ལ། འཁྲབ་ཁྲིད་པ་ཡང་ཡིན། ཁོང་གིས་རང་ཉིད་དགའ་ཞིང་ཆ་རྒྱུས་ཆེ་བའི་རྐང་རྩེད་སྤོ་ལོ་དེ་གཏམ་རྒྱུད་ཀྱི་གཙོ་རྐང་དུ་བྱས་ནས་འབྲོག་ཕྲུག་ཚེ་རིང་གིས་རྐང་རྩེད་སྤོ་ལོའི་ཕུགས་འདུན་འཚོལ་སྙེག་བྱས་པའི་གཏམ་རྒྱུད་བརྗོད་ཡོད།

       གློག་བརྙན་གྱི་བཀྲག་མདངས་འཚེར་ས་གཞན་ཞིག་ནི་འཁྲབ་སྟོན་པ་མང་ཆེ་བ་ནི་ཆེད་ལས་འཁྲབ་སྟོན་པ་མིན་པར། ས་གནས་དེ་གའི་འབྲོག་པ་དང་འབྲོག་ཁུལ་གྱི་བྱིས་པ་ཡིན། མི་སྣ་གཙོ་བོ་ཚེ་རིང་གི་འཁྲབ་སྟོན་པ་ནི་ས་གནས་དེ་གའི་སློབ་ཆུང་གི་རྐང་རྩེད་སྤོ་ལོའི་རུ་ཁག་གི་རུ་དཔོན་ཡིན། ཁོང་ཚོའི་འཁྲབ་སྟོན་གྱིས་གློག་བརྙན་ལ་བབ་ཆགས་པའི་ཡིད་དབང་འགུག་ཤུགས་ལྡན་པ་དང་། བོད་རིགས་བྱིས་པའི་ལྷད་མེད་བརྩེ་བ་དང་འབྲོག་པའི་ཁྱིམ་ཚང་གི་བརྩེ་སེམས། དེ་བཞིན་ས་མཐོའི་མི་དམངས་ཀྱི་ཧུར་སེམས་སོགས་མཚོན་ཡོད།

       «དབྱར་ཁའི་སྤོ་ལོ»ཞེས་པའི་ནང་། རྐང་རྩེད་སྤོ་ལོ་བརྒྱུད་ནས་སྲོལ་རྒྱུན་དང་དེང་རབས་བར་སྤེལ་རེས་དང་མཉམ་འདྲེས་གཏིང་ཟབ་བྱུང་ཡོད། འཁྲབ་ཁྲིད་པ་འཇམ་དབྱངས་ཡེ་ཤེས་ཀྱིས། རྐང་རྩེད་སྤོ་ལོ་ནི་གཞོན་ནུ་ཚོའི་ཕུགས་འདུན་གྱི་གཞི་རྟེན་ཞིག་ཡིན་པ་མ་ཟད། མཐོ་སྒང་དང་ཕྱི་རོལ་ཁོར་ཡུག་བར་དང་། སྲོལ་རྒྱུན་དང་དེང་རབས་བར་འབྲེལ་མཐུད་བྱེད་པའི་འབྲེལ་ཟམ་ལྟ་བུ་ཞིག་ཡིན། ང་ཚོས་གློག་བརྙན་འདི་བརྒྱུད་ནས་མི་དེ་བས་མང་བས་བོད་རིགས་ཀྱི་ཁོག་ཡངས་རང་བཞིན་དང་ལུས་རྩལ་སྙིང་སྟོབས་ཀྱི་ཐུན་མོང་རང་བཞིན་མཐོང་ཐུབ་པའི་རེ་བ་ཡོད་ཅེས་བརྗོད།

       ལོ11རིང་གི་ཕབ་སྐྲུན་བརྒྱུད་རིམ་ལ་ཕྱིར་དྲན་བྱེད་དུས། འཇམ་དབྱངས་ཡེ་ཤེས་ལ་དགའ་སྐྱོ་འདྲེས་མའི་མྱོང་ཚོར་མང་པོ་ཡོད། ཁོང་གིས། གློག་བརྙན་ཕབ་སྐྲུན་བྱེད་དུས་དཀའ་ངལ་མང་པོ་འཕྲད་བྱུང་། མ་དངུལ་མི་འདང་བ་དང་ཕབ་སྐྲུན་ཚོགས་པ་འཐོར་བ་སོགས་ཀྱི་གནས་ཚུལ་འཕྲད་པས། མཚམས་རེ་ཕབ་སྐྲུན་བྱེད་མཚམས་འཇོག་རྒྱུའི་བསམ་ཚུལ་ཡང་སྐྱེས་མྱོང་། འོན་ཀྱང་ཕ་ཡུལ་ཕྱོགས་ཀྱི་ཕྲུ་གུ་ཚོས་སྤོ་ལོ་དང་འབྲེལ་བའི་གློག་བརྙན་འདི་འདྲ་ཞིག་མཐོང་ཐུབ་ན་བསམ་ནས་དཀའ་ངལ་ཁྱད་བསད་བྱས་པ་ཡིན། དེང་གི་ཆར་གངས་ལྗོངས་ས་མཐོར་རྐང་རྩེད་སྤོ་ལོར་དགའ་པོ་བྱེད་མཁན་མང་པོ་འདུག་ལ། འབྲེལ་ཡོད་ཀྱི་བྱེད་སྒོ་དང་འགྲན་བསྡུར་ཡང་མང་པོ་སྤེལ་བཞིན་འདུག འདི་ཚོ་མཐོང་དུས་རང་གིས་རྒྱུན་འཁྱོངས་བྱས་པ་དེ་འགྲིག་སོང་བསམ་གྱི་འདུག་ཅེས་བརྗོད།

       གཟིགས་འབུལ་བྱེད་སྒོའི་ཡུལ་དངོས་སུ་གཟིགས་མོ་བ་མི་ཉུང་བ་ཞིག་ནི་གསོ་རླུང་དཀོན་ཡང་དད་སེམས་མི་ཉམས་པའི་ཕུགས་འདུན་འཚོལ་སྙེག་བྱེད་པའི་གཏམ་རྒྱུད་དེས་ཡིད་དབང་བཀུག་ཡོད། གཟིགས་མོ་བ་ཞིག་གིས། ཚེ་རིང་གི་ཕུགས་འདུན་དེ་ཕར་བལྟས་ན་ཆུང་ཆུང་ཞིག་ཡིན་ཡང་དེའི་ནང་མི་སེམས་འགུལ་བའི་སྟོབས་ཤུགས་ཤིག་འདུག གློག་བརྙན་འདི་བལྟས་པ་བརྒྱུད་ང་ཚོས་མཐོ་སྒང་གི་མཛེས་སྡུག་ལྡན་པའི་རི་ཆུའི་བཀོད་པ་མཐོང་བྱུང་ལ། བརྟན་སྲུང་དང་དགའ་ཞེན་གྱི་རྩ་ཆེའི་རང་བཞིན་ཡང་ཚོར་བྱུང་ཞེས་བརྗོད་ཡོད། དེ་བཞིན་ལས་རིགས་གཅིག་པའི་གཟིགས་མོ་བ་ཞིག་གིས། གློག་བརྙན་འདིས་གཏམ་རྒྱུད་ཆུང་ཆུང་ཞིག་ལ་བརྟེན་ནས་བརྗོད་གཞི་ཆེན་པོ་ཞིག་མཚོན་འདུག འདིའི་ནང་མི་སྒེར་གྱི་ཕུགས་འདུན་འཚོལ་སྙེག་གི་གཏམ་རྒྱུད་ཡོད་ལ། བོད་འབྲེལ་ས་ཁུལ་གྱི་རིག་གནས་དང་ལུས་རྩལ་བྱ་གཞག་ལ་ཐོབ་པའི་གྲུབ་འབྲས་ཀྱང་མངོན་ཡོད་པས། གྲངས་ཉུང་མི་རིགས་ཀྱི་གློག་བརྙན་གསར་རྩོམ་ལ་བསམ་ཕྱོགས་གསར་པ་ཞིག་མཁོ་འདོན་བྱས་འདུག་ཅེས་གདེང་འཇོག་བྱས་ཡོད།