རྩོམ་བརྡ།

རྒྱ་ཆེའི་རིག་གཞུང་ཞིབ་འཇུག་པ་དག་གི་སྙན་ལམ་དུ།
       «རེབ་གོང་སྒྱུ་རྩལ་ཞིབ་འཇུག»དུས་དེབ་ནི་རྨ་ལྷོ་ཁུལ་རེབ་གོང་སྒྱུ་རྩལ་ཞིབ་འཇུག་ཁང་གིས་རེབ་གོང་ཡུལ་གྱི་ཐུན་མོང་མ་ཡིན་པའི་རིག་གནས་སྒྱུ་རྩལ་གྱི་སྐོར་འཚོལ་སྡུད་དང་སྲུང་སྐྱོབ། རྒྱུན་འཛིན་དང་དར་སྤེལ་སོགས་ཆེད་གཉེར་གནང་བའི་རིག་གཞུང་དུས་དེབ་ཅིག་ཡིན་ཞིང་། སྔ་རྗེས་སུ་དུས་དེབ་འདིར་བོད་རྒྱ་ཡིག་རིགས་ཀྱི་རིག་གཞུང་དཔྱད་རྩོམ་བརྒྱ་དང་དགུ་བཅུ། པར་རིས་ཞིབ་འགྲེལ་བརྒྱ་ཙམ་བཀོད་པ་ལ་རྒྱལ་ཁབ་ཕྱི་ནང་གི་རིག་གཞུང་ལས་གཉེར་པ་དག་གི་དགའ་བསུ་ཆེན་པོ་ཐོབ། ཐེངས་འདིའི་འདོན་ཐེངས་དྲུག་པ་ལ། ཆབ་སྲིད་དཔལ་འབྱོར་དང་ཡུལ་སྲོལ་གོམས་གཤིས། ཆོས་ལུགས་དང་ལོ་རྒྱུས་ཡིག་ཚང་། ལོ་ཙཱ་དང་སྐད་བརྡ། རྩོམ་རིག་དང་ཟློས་གར་སྒྱུ་རྩལ། རི་མོའི་སྒྱུ་རྩལ། མི་སྣ་ཞིབ་འཇུག གསོ་རིག སློབ་གསོ། བཟོ་སྐྲུན། པར་རིས་ཞིབ་འགྲེལ་སོགས་ཚན་བྱང་རིགས་འགའ་དབྱེ་རྩིས་ཡོད་པས། རྒྱ་ཆེའི་རིག་གཞུང་ཞིབ་འཇུག་པ་དག་གིས་གཤམ་གྱི་རེ་འདུན་ལྟར་རྩོམ་བསྐུར་བར་དགའ་བསུ་ཞུ།
       གཅིག དུས་དེབ་འདི་ལ་བོད་ཡིག་དང་རྒྱ་ཡིག་གི་པར་གཞི་གཉིས་ཡོད་ཅིང་། རྩོམ་ཡིག་ལ་དཔྱད་རྩོམ་གྱི་ཚད་གཞི་ལྟར་ནང་དོན་གནད་བསྡུས་དང་བརྡ་ཆད་གཙོ་བོ། ལུང་ཚིག་དང་དཔེ་མིང་། རྩོམ་པ་པོ། དཔེ་སྐྲུན་ཁང་། ཤོག་གྲངས་ཨང་ཀི་བཅས་ངེས་པར་ཚང་དགོས་པར་མ་ཟད། དཔེ་རྟགས《 》དང་ལུང་ཚིག་གི་ཨང་རིམ[1][2][3]ནང་དོན་གནད་བསྡུས་དང་བརྡ་ཆད་གཙོ་བོ་གུག་རྟགས[……]འདིའི་རྣམ་པ་ཡིན་དགོས།
       གཉིས། རྩོམ་སྡུད་དུས་ཚོད་ནི་ད་ནས་བཟུང་སྤྱི་ལོ2024ལོའི་ཟླ5པའི་ཚེས31ཉིན་གྱི་བར་ཡིན་ལ། རྩོམ་ཡིག་ངེས་པར་གློག་རྡུལ་ཡིག་ཟམ་སྟེང་བསྐུར་དགོས་པ་དང་བོད་ཡིག་ཡིག་གཟུགས་ཧི་གཟུགས་ཡིན་དགོས།
       གསུམ། རྩོམ་གྱི་ཡིག་གྲངས་སྟོང་གསུམ་ལས་མི་ཉུང་བ་དང་རྩོམ་ཡིག་སྐུར་སྐབས་རྩོམ་པ་པོའི་མིང་དང་ལས་གནས། འབྲེལ་གཏུག་ཁ་པར། ཐོབ་ཐང་ལག་འཁྱེར། དངུལ་བྱང་ཨང་གྲངས། དངུལ་ཐོ་འབྱེད་སའི་དངུལ་ཁང་གི་མིང་སོགས་གསལ་པོར་འབྲི་དགོས།
ངེད་རྩོམ་སྒྲིག་ཁང་གི་འབྲེལ་གཏུག་བྱ་ཡུལ།
       ས་གནས། མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་རོང་བོ་གྲོང་རྡལ་གྱི་བྱ་ཁྱུང་བྱང་ལམ་སྒོ་ཨང10པ།
       ཡིག་ཟམ། rgysyjy@163.com
       ཁ་པར་ཨང་གྲངས། 0973--8722908