«དུས་རབས་གསར་པར་ཤེས་ལྡན་མི་སྣར་བརྟེན་ནས་རྒྱལ་ཁབ་སྟོབས་ལྡན་དུ་གཏོང་བའི་འཐབ་ཇུས་ལག་བསྟར་གཏིང་ཟབ་བྱས་ཏེ་འཛམ་གླིང་གི་ཤེས་ལྡན་མི་སྣའི་ལྟེ་གནས་གལ་ཆེན་དང་གསར་གཏོད་མཐོ་ས་མགྱོགས་མྱུར་སྐྲུན་དགོས།»

       མཁོ་གལ་ཆེ་ཞིང་ཧ་ཅང་དཀོན་པའི་དམིགས་བསལ་གྱི་ཤེས་ལྡན་མི་སྣར་དམིགས་བསལ་གྱི་སྲིད་ཇུས་ཡོད་དགོས། གཞན་ལ་འཛོལ་མེད་སྐྱོན་བྲལ་ཡོང་རེ་བྱེད་མི་རུང་ལ། བསླབ་པ་རྒན་གཞོན་དང་ལོ་ན་ཆེ་ཆུང་ལ་ལྟ་མི་རུང་། ཚང་མ་ཁྲེ་ཙེ་གཅིག་གིས་བསྡུར་ཞིབ་བྱེད་མི་རུང་བར་འཇོན་ཐང་དང་ཡོན་ཏན་ངོ་མ་ལྡན་པའི་ཤེས་ལྡན་མི་སྣར་ནུས་རྩལ་འདོན་ཡུལ་ཡོད་པར་བྱེད་དགོས། ཡིད་ཆེས་རྨང་གཞིར་བྱས་པའི་ཤེས་ལྡན་མི་སྣའི་བཀོལ་སྤྱོད་ལམ་སྲོལ་བཙུགས་ཏེ། ཕམ་ཁ་བྱུང་ཆོག་པ་དང་ཕམ་ཁ་བྱུང་བར་བཟོད་སྒོམ་བྱེད་པ། ཚན་རིག་པ་རང་གནས་ཀྱི་ཚན་ཞིབ་རྩ་འཛུགས་མ་ལག་འཐུས་ཚང་དུ་གཏོང་བ། ཚན་རིག་ཞིབ་འཇུག་ལས་འགན་གྱི་སྒྲུབ་འགན་ཁས་ལེན་དང་རྟ་རྒྱུག་ལམ་ལུགས་འཐུས་ཚང་དུ་གཏོང་བ། དམིགས་འབེན་ཁྲིད་ཕྱོགས་སུ་འཛིན་པའི་དམག་བཀའ་ཁུར་ལེན་ཞུ་ཡིག་ལམ་ལུགས་ལག་བསྟར་བྱེད་པ། ཚན་རྩལ་སྣེ་ཁྲིད་ཤེས་ལྡན་མི་སྣས་དམག་དཔུང་ཁྲིད་ནས་གཡུལ་སར་སྐྱོད་པ་ལ་བསྔགས་སྐུལ་བྱེད་དགོས། རིགས་མི་འདྲ་བའི་ཤེས་ལྡན་མི་སྣར་ལས་སྒྲུབ་ལས་གཏོད་ཀྱི་ལས་སྟེགས་བསྐྲུན་དགོས། ཤེས་བྱ་དང་ལག་རྩལ་སོགས་གསར་གཏོད་ཀྱི་བདག་རྐྱེན་རིན་ཐང་གང་ལེགས་མཚོན་པའི་ཁེ་ཕན་བགོ་བཤའི་ལམ་སྲོལ་བཙུགས་ཏེ། བྱ་གཞག་གིས་ཤེས་ལྡན་མི་སྣར་སྐུལ་མ་གཏོང་བ་དང་། ཤེས་ལྡན་མི་སྣས་བྱ་གཞག་འགྲུབ་ཏུ་འཇུག་དགོས།