ཨ་མེ་རི་ཁའི་ཙུང་ཐུང་པའེ་ཏེང་དང་བརྙན་ལམ་ནས་མཇལ་མོལ་མཛད་སྐབས་ཀྱི་བཀའ་མོལ།

       ཀྲུང་གོ་དང་ཨ་རིའི་བར་གྱི་འབྲེལ་བ་འཕེལ་རྒྱས་གཏོང་བའི་ཉམས་མྱོང་དང་བསླབ་བྱ་ཕྱོགས་བསྡོམས་བྱས་ནས། དུས་རབས་གསར་པར་ཀྲུང་གོ་དང་ཨ་རི་མཉམ་གནས་བྱེད་པར་རྩ་དོན་གསུམ་རྒྱུན་འཁྱོངས་བྱེད་དགོས་ཏེ། གཅིག་ནི་ཕན་ཚུན་བརྩི་འཇོག་བྱེད་དགོས། ཕན་ཚུན་གྱི་སྤྱི་ཚོགས་ལམ་ལུགས་ལ་བརྩི་འཇོག །རང་སོ་སོའི་འཕེལ་རྒྱས་ཀྱི་ཁེ་དབང་ལ་བརྩི་འཇོག་བཅས་བྱས་ཏེ། འདྲ་མཉམ་གྱི་ལྟ་སྟངས་འཛིན་པ་དང་། འགལ་བ་སྟངས་འཛིན་བྱེད་པ། མཐུན་པ་ཡོང་ཐབས་དང་མི་མཐུན་པ་སོར་འཇོག་བཅས་བྱེད་དགོས། གཉིས་ནི་ཞི་བདེ་མཉམ་གནས་བྱེད་དགོས། གདོང་གཏུག་མི་བྱེད་པ་དང་ཁ་གཏད་དུ་མི་ལངས་པ་ནི་ཕྱོགས་གཉིས་ཀྱིས་ངེས་པར་དུ་བརྟན་སྲུང་བྱེད་དགོས་པའི་མཐའ་ཚད་ཡིན་ཞིང་། ཨ་རི་ཕྱོགས་ཀྱིས་ཀྲུང་གོ་དང་ཨ་རི་མཉམ་གནས་བྱེད་ཆོག་ཅེས་བཏོན་པ་དེར་ད་དུང་ཡིག་འབྲུ་གཉིས་བསྣན་ཆོག་པ་སྟེ། ཞི་བདེ་མཉམ་གནས་རེད། གསུམ་ནི་མཉམ་ལས་མཉམ་རྒྱལ་བྱེད་དགོས། ཀྲུང་གོ་དང་ཨ་རིའི་ཁེ་ཕན་སྣོལ་འདྲེས་ཟབ་མོ་བྱུང་བས། འཆམ་པོ་བྱུང་ཚེ་གཉིས་ཀར་ཕན་པ་དང་། འཐབ་རྩོད་བྱུང་ཚེ་གཉིས་ཀར་གནོད་སྐྱོན་འབྱུང་། སའི་གོ་ལ་ཧ་ཅང་ཆེ་བས་ཀྲུང་གོ་དང་ཨ་རི་རང་སོ་སོ་དང་མཉམ་དུ་འཕེལ་རྒྱས་འགྲོ་ཆོག་གི་རེད། གཉིས་ཁེ་གཉིས་ཕན་རྒྱུན་འཁྱོངས་བྱས་ཏེ་བསྡོམས་སྟོང་འཐབ་འགྲན་མི་བྱེད་པ་དང་། ཁྱོད་ཕམ་ང་རྒྱལ་མི་བྱེད།