«མཉམ་འབྲེལ་རྒྱལ་ཚོགས་ཚོགས་ཆེན་སྐབས་དོན་ལྔ་པའི་སྤྱིར་བཏང་རྩོད་གླེང་ཐོག་གནང་བའི་གསུང་བཤད།»

       དཔལ་འབྱོར་གོ་ལ་ཧྲིལ་པོ་ཅན་དུ་འགྱུར་བ་ནི་ཕྱི་རོལ་ཡུལ་གྱི་དོན་དངོས་དང་ལོ་རྒྱུས་ཀྱི་འཕེལ་ཕྱོགས་ཡིན། དཔལ་འབྱོར་གོ་ལ་ཧྲིལ་པོ་ཅན་དུ་འགྱུར་བའི་གནས་བབ་ཆེན་པོའི་མདུན་དུ། བྱ་རྔ་མོང་དང་འདྲ་བར་མགོ་བོ་བྱེ་མའི་ནང་དུ་སྦས་ནས་མཐོང་ཡང་མ་མཐོང་ཁུལ་བྱེད་པ་དང་། ཡང་ན་ཐང་ཅི་ཧོ་ཏེ་དང་འདྲ་བར་མདུང་རིང་གཡུག་ནས་བཀག་འགོག་བྱེད་པ་ཐམས་ཅད་ལོ་རྒྱུས་ཀྱི་ཆོས་ཉིད་ལ་རྒྱབ་འགལ་བྱས་པ་རེད། འཛམ་གླིང་ཕན་ཚུན་བཀག་སྡོམ་དང་ཁེར་རྐྱང་གི་རྣམ་པར་ཕྱིར་བཤོལ་བྱེད་མི་སྲིད་ལ། མིས་བསམ་བཞིན་ཁ་ཕྲལ་དུ་ཡང་གཏོང་ཐུབ་མི་སྲིད། ང་ཚོ་དཔལ་འབྱོར་གོ་ལ་ཧྲིལ་པོ་ཅན་དུ་གྱུར་པ་ལས་བྱུང་བའི་འགྲན་སློང་ལས་གཡོལ་ཐབས་བྱེད་མི་རུང་བར་ངེས་པར་དུ་དབུལ་ཕྱུག་གི་ཧེ་བག་དང་འཕེལ་རྒྱས་ཀྱི་ཧེ་བག་སོགས་གནད་དོན་གལ་ཆེན་ལ་ཐད་ཀར་ཁ་གཏད་གཅོག་དགོས། ང་ཚོས་སྲིད་གཞུང་དང་ཚོང་ར་དང་། དྲང་གཞག་དང་ལས་ཆོད། འཕར་སྣོན་དང་བགོ་བཤའ། ལག་རྩལ་དང་ལས་ཞུགས་བཅས་བར་གྱི་འབྲེལ་བ་ཐག་གཅོད་ཡག་པོ་བྱས་ཏེ། འཕེལ་རྒྱས་དོ་མཉམ་དང་གང་ལེགས་ཀྱིས་འབྱུང་བར་བྱེད་པ་དང་། འཕེལ་རྒྱས་ཀྱི་གྲུབ་འབྲས་ལས་འདྲ་མཉམ་ངང་རྒྱལ་ཁབ་མི་འདྲ་བ་དང་རིམ་གྲས་མི་འདྲ་བ་དང་མི་ཚོགས་མི་འདྲ་བར་ཕན་པའི་གསོས་སུ་སྒྲུབ་དགོས། ང་ཚོས་སྒོ་འབྱེད་བསྟུན་མཁས་ཀྱི་འདུ་ཤེས་བསྐྱེད་དེ་བློ་བརྟན་འགྱུར་མེད་ཀྱིས་སྒོ་འབྱེད་ཅན་གྱི་འཛམ་གླིང་དཔལ་འབྱོར་འཛུགས་སྐྲུན་བྱེད་པ་དང་། འཛམ་གླིང་ཚོང་དོན་རྩ་འཛུགས་རྨང་རྡོ་ཡིན་པའི་ཕྱོགས་མང་ཉོ་ཚོང་སྒྲིག་གཞི་སྲུང་སྐྱོང་། དར་ཆ་གསལ་སྒྲེང་གིས་ཕྱོགས་རྐྱང་རིང་ལུགས་དང་སྲུང་སྐྱོབ་རིང་ལུགས་ལ་ངོ་རྒོལ། གོ་ལ་ཧྲིལ་པོའི་ཐོན་ལས་མུ་ཕྲེང་དང་མཁོ་སྤྲོད་མུ་ཕྲེང་བརྟན་པོ་དང་ཤར་གཏོང་ཐུབ་པ་སྲུང་སྐྱོང་བཅས་བྱེད་དགོས།