དབྱིན་ཇིའི་དཔེ་མཛོད་དུ་བཞུགས་པའི་རྙིང་མའི་རྒྱུད་འབུམ་ལག་བྲིས་མ།

       རྙིང་མའི་རྒྱུད་འབུམ་འདི་ལ་གཞན་ལས་ལྷག་པའི་ཁྱད་ཆོས་དུ་མ་བདོག་པ་ལ། རྒྱུད་འབུམ་འདི་སྤྱིར་སྣག་བྲིས་ཡིན་ནའང་དབུ་ལྡེབ་མཐིང་ཤོག་བརྩེགས་མ་རུ་གསེར་བྲིས་བྱས་ཡོད་ཅིང་། དབུ་ལྷ་ལ་གཡོན་དུ་ཀཿཐོག་རིག་འཛིན་ཆེན་མོ་དང་། དབུས་སུ་སློབ་དཔོན་པདྨ་འབྱུང་གནས་ཀྱི་གཡས་གཡོན་གཉིས་སུ་མཁའ་འགྲོ་ཡེ་ཤེས་མཚོ་རྒྱལ་དང་ལྷ་ལྕམ་མནྡྷ་ར་བ་བཞུགས་པའི་སྐུ་དང་། གཡས་སུ་རྗེ་འབངས་ཉེར་ལྔ་སོགས་གང་རུང་ཞིག་འབྱུང་ཞིང་། དམིགས་བསལ་དུ་པོ་ཏི་གཅིག་གི་དབུ་ལྷ་རུ་ཚེ་ལྷ་རྣམ་གསུམ་ཡང་བྱུང་ཡོད་དོ། །
       རྒྱུད་འབུམ་འདིར་པོད་གྲངས་སོ་གསུམ་བཞུགས་པའི་གྲངས་ནི་གསལ་བྱེད་སུམ་ཅུ་ཨོཾ་ཨཱ་ཧཱུཾ་དང་བཅས་པས་མཚོན་ཡོད་འདུག་ཅིང་། པོད་གྲངས་ཀྱི་ཆ་ནས་སྡེ་དགེ་ཤིང་སྤར་མའི་པོད་ཉེར་དྲུག་དང་། འབྲུག་ཡུལ་མཚམས་བྲག་བྲིས་མའི་པོད་ཞེ་དྲུག གཏིང་སྐྱེས་དགོན་པ་བྱང་གི་པོད་སོ་དྲུག་ཅན་དང་མི་འདྲ་ནའང་། ཆོས་ཚན་གྱི་གོ་རིམ་སྒྲིག་སྟངས་སོགས་ཀྱི་ཐད་གཏིང་སྐྱེས་དགོན་པ་བྱང་གི་ལག་བྲིས་དང་ཐག་ཧ་ཅང་ཉེ་ཚུལ་ཉམས་ཞིབ་པ་སྔོན་མ་དག་གིས་གསུངས་ཡོད། རྙིང་མའི་རྒྱུད་འབུམ་སྤྱི་དང་ཁྱད་པར་དབྱིན་ཇིའི་དཔེ་མཛོད་དུ་བཞུགས་པའི་རྒྱུད་འབུམ་ལག་བྲིས་མ་འདི་ལ་དབྱིན་ཇིའི་ཞིབ་འཇུག་པRobert MayerདངCathy Cantwellཁྱོ་ཤུག་གཉིས་ཀྱིས་ལོ་མང་རིང་ཉམས་ཞིབ་བགྱིས་ཏེ་དཔྱད་འབྲས་མི་ཉུང་བ་ཞིག་སྤེལ་ཡོད་པ་དང་། ད་ལྟ་ཁོང་གཉིས་ནི་རྒྱུད་འབུམ་འདིར་རྒྱུས་མངའ་ཆེས་ཆེ་བའི་ཉམས་ཞིབ་པ་ཆགས་ཡོད་ཅིང་། ཁོང་གཉིས་ནས་རྒྱུད་འབུམ་འདིའི་དཀར་ཆག་རྒྱས་པ་ཞིག་ཀྱང་བྲིས་གནང་མཛད་འདུག(དཀར་ཆག་དེ་ཉམས་ཞིབ་ཕྱིར་མཁོ་བ་བྱུང་ཚེ་ཁོ་བོས་འདོན་སྤྲོད་གནང་ཆོག) 
རྒྱུད་འབུམ་སྐོར་གྱི་འཕྲོས་ཀློག
1. Cantwell, Cathy. "Distinctive Features of the Rig ‘Dzin Tshe Dbang nor bu (Waddell) Edition of the Rnying ma’i Rgyud ‘Bum." InProceedings of the Ninth Seminar of the IATS, 2000. Volume 10: The Many Canons of Tibetan Buddhism, pp. 359–376. Brill, 2002.
2. Ehrhard, Franz-Karl. "The Scribe's Remark: A Note on the 'Rig 'dzin Tshe dbang nor bu (Waddell) Edition' of rNying ma rgyud 'bum." Zentralasiatische Studien 41 (2012): 231–237.
3. van Schaik, Sam. “A Catalogue of the First Volume of the Waddell Manuscript rNying ma rgyud 'bum.”The Tibet Journal 25, no. 1 (2000): 27–50.